Ñamomba’eguasu Tekove

Omombe’u gueteri ohóvo: “Ahupyty hetaiterei mborayhu ha pytyvõ ogaygua ore barrio-peguágui. Kóva tuichaiterei mba’ékuri. [Che] obispo ha presidenta Mujeres Jóvenes-pegua ojapo ikatumíva guive ohechauka hag̃ua imborayhu ha iñepytyvõ. … Ahecha Ñandejára po … chemboguatávo chéve ha che rogayguápe. … Peteĩ barrio chemba’eichagua ha’e pe ogaygua opavave oikotevẽva, ko’ýte peteĩ mitãkuña che posisiõme g̃uarã.”

Ha’e ha hogaygua, ha hogaygua barrio-pegua, omog̃uahẽ porãite asy mborayhúpe imitãra’y kuimba’e ko febrero ohasávape.

Presidente Russell M. Nelson he’i, “Peteĩ característica distintiva Ñandejára Tupao añete ha oikovéva ha’éta tapiaite peteĩ ñeha’ã organizado ha dirigido oñeministra hag̃ua Tupã ra’y ha rajykuérape individualmente … [oñeministrávo mborayhu mba’eporã reheve] pe tapichápe en particular, Ha’e ojapo haguéicha.”

Peteĩ kuña ha’eñóva ojejuhúvo oha’arõha peteĩ mitã oñeha’arõ’ỹva, tesãi rehe jepy’apy, espíritu sarambi, ñemotĩ, pirapire rehe jepy’apy, ñehekombo’e rehe mba’eporandu, ñemenda rehe py’amokõi ha ñembyasy umi kerayvoty oñehundiva’ekuére ikatu, peteĩ oñembyasyvaiete ha ojehesareápe jave, ogueraha peteĩ kuñáme ojepy’amongetávape ojapo peteĩ mba’e ikatúva ogueru ñembyasy pypuku ha arrepentimiento.

Oimeraẽva ohendúvape g̃uarã ohasava’ekue pe ñembyasy ha arrepentimiento pypuku rupive oitykatava’ekue imemby térã oikéva’ekue umívape, penemandu’amíke: Jepémo ndaikatúi ñamoambue yma guare, Tupã ikatu omonguera yma guaréva. Pe perdón ikatu ou Igrásia expiatório milágro rupive pejevývo Hendápe peteĩ korasõ mirĩ ha oñearrepentíva reheve.

Mokõi ñe’ẽ oñembojoaju jepi pe yvy ape ári marangatukue reñói rehe: tekove ha jeporavo. Pe tekove ha’e upe imba’ehepyetevéva ñande Ru plan hekoporãmbáva apyteguáva, ha I-decreto rupive ñamomba’eguasu ha ñañongatu pe tekove; ha jaiporavo pe tekove toho meme hese oñemoheñóima guive tyepýpe. Avei ñamomba’e pe poravokuaa don, sãso jeiporavokuaa moral-pegua—oipytyvõva omombarete umi jeiporavo hekojojáva Tupã omoneĩva oguerúva vy’a ijapyra’ỹva.

Peteĩ kuña ha peteĩ kuimba’e ohasa jave peteĩ tiempo hekopererĩha rupive, ombohováivo peteĩ jeiporavo crucial, umi ñane ñe’ẽ, ñande po, ñane korasõ—espiritualmente, emocionalmente ha económicamente—ikatuhápe ohovasa chupekuéra oñandu hag̃ua pe Salvador mborayhu ha, he’i haguéicha Presidente Henry B. Eyring, ogueru peteĩ ñemyatyrõ’imi omohesakãva hesa espiritual “pe ha’ekuéra oimo’ãva ohechaha” guive “pe ndaikatúiva gueteri ha’ekuéra ohecha” peve

Presidente Dallin H. Oaks he’i: “Ñande actitud upe mitã jeityka rehe noñemopyendái umi mba’ekuaapy ojeikuaaukava’ekuépe araka’épa oñepyrũ pe tekove yvy ape ári. … Oñemohenda ñande jeikuaapy rupive … opavave Tupã ra’y espiritual ouva’erãha ko yvy ape ári peteĩ jehupytyse glorioso reheve, ha pe identidad individual oñepyrũhague ymaite guive oñemoheñói mboyve tyepýpe ha oho meméta heseve opa umi ára ijapyra’ỹva oútavape g̃uarã.”

Ñandejára ñe’ẽ umi heñói’ỹva rehe gueteri, oñeme’ẽva’ekue Primera Presidencia ha pe Doce Apóstoles Kórum rupive, araka’eve noñemoambuéi ha hyapu profetakuéra ñe’ẽgui ára pukukue javeve, ome’ẽvo tesakã divíno Ñandejára ojerureva’ekuépe ñandéve.

“Jesucristo Tupao Santokuéra Ára Pahapegua oguerovia yvypóra rekove imarangatuha. Upévare, Tupao opu’ã pe mitã jeitykase rehe ojeiporavóva ojejapo hag̃ua ou porãgui personal térã socialmente, ha oñemoñe’ẽ miembro-kuérape ani hag̃ua oike, ojapo, omokyre’ỹ, ohepyme’ẽ térã omohenda ko’ãichagua mitã jeityka.

“Pe [Ñandejára] oheja ojejapo umi ikatúva ha’e excepción … ha’e jave:

• Pe tyeguasu ha’éramo peteĩ violación térã incesto rire, térã

• Peteĩ médico ikatupyrýva odetermináramo pe sy rekove térã hesãi oĩha tuicha peligro-pe, térã

• Peteĩ médico ikatupyrýva odetermináramo pe mitãrã orekoha defecto ivaietereíva ndohejamoʼãiva pe mitã oikove heñói rire”.

Primera Presidencia oho meme hese: “Pe mitã jeityka ha’e peteĩ asunto iserioitereíva. [Ko’ã situasiõ jepivegua’ỹme jepeve] oñekonsiderava’erã umi tapicha responsable ohupyty rire añónte ñemoañete ñembo’e rupive” ha oñemoñe’ẽ rire ambue tapichakuéra ndive.

Ojapo treinta ary, Ñandejára profetakuéra oguenohẽhague peteĩ ñemomarandu mundo-pe g̃uarã. Oguereko ko’ã ñe’ẽ:

“Ore … romomarandu Tupã omandahague umi pu’aka sagrado oñemoheñói hag̃ua ojeiporuva’erãha kuimba’e ha kuña apytépente, omendáva léi rupive ména ha tembireko ramo.

“Romomarandu umi mba’eichapa ojejapo pe tekove yvy ape ari oñemohendahague divinamente. Romoañete pe tekove marangatukue ha iñimportancia Tupã plan ijapyra’ỹvape.”

Ñamombarete ha ñañangareko pe tekove heñoi’ỹva rehe gueteri ndaha’éi peteĩ posición política. Ha’e peteĩ léi moral omoañeteva’ekue Ñandejára Iprofetakuéra rupive.

Peteĩ he’iva’ekue Presidente J. Reuben Clark Jr., oservi’akue Primera Presidencia-pe, omohesakã porãite ñande huventu ko araguápe: “Tupaogua huventukuéra iñembyahýi umi mba’e Espíritu reheguávagui; oikuaaseterei hikuái pe Evanhélio, ha oipota hikuái oĩhaichaite, tesakãme. Oikuaase hikuái … umi ñande jagueroviáva rehegua; ohupytyse hikuái umi testimónio [pe] añete rehegua. Ha’ekuéra … imba’eporandukuaa, añetegua ohekáva.” Tañañe’ẽ py’ỹive jerovia ha poriahuvereko reheve ñane huventukuérape umi ñande rogapýpe, ha oñondivekuéra ñande Sociedad de Socorro ha élder-kuéra kórum ñembyatyháme, Ñandejára kastida léi rehe, pe tekove marangatukue rehe, ha umi heñoi’ỹva gueteri ha isykuéra ñeñangareko rehe.

Peteĩ hermana ojehayhúva ohai chéve peteĩ jehasa orevova’ekue rehe ojapo heta ary: “Ha’érõ guare Arekópe 17 ary … , ajejuhu cheryeguasu ha ahupyty sa’i térã mba’evete pyvytõ che chíkogui. Añeñandu atĩeterei ha cheaño [ha katu che] araka’eve naimoãi [aitykávo che memby]. … Che [arekókuri] che rogaygua ahayhuetéva ha che obispo, umi máva ndive py’ỹi añembyatýva añemboguata hag̃ua. … Ajevy Tupã gotyo. Añemoarandu escritura-kuérape … ha añembo’e [ha] ajuhu mbarete che Salvador ha pe arrepentimiento ñemboguata rupive. … Ahupyty peteĩ ñembohovái [umi che ñembo’épe g̃uarã] ndaikatúiva anega. … Hasyetereikuri chéve, ha katu aikuaa amoĩtaha che membykuña’imi adopción-rã. … Añembo’e py’aguasu rehe [ha] añandu hesakã porãiterei Salvador mborayhu upe arrepentimiento rupive, aikuaa Tupã … ombohovaiha umi ñembo’e ha ñanemombareteha.”

Peteĩ peréha mborayhu oadopta upe mitãkuña’i porãite ha ombo’e chupe evanhélio. Ko’ág̃a ha’e omendáma ha oguereko hogaygua porãite imba’e teéva.

Sapy’ánte, pe py’amokõi hasyetereíva ha poropy’ajukáva ikatu omoirũ pe tekove oñemo’ã jave.

Nda’aréi peteĩ paréha mitã che ha Katy rohayhúva ohai chéve pe mitãra’y porãite oha’arõvare hikuái.

Pe túva ohai: “[Che rembireko oguerekórõ guare] 10 semana hyeguasuha roikuaa ore rajy’imi milagróso orekoha pe condición genética trisomía 21, ojekuaáva jepivéramo síndrome de Down ramo. Roñandu rojejopyha … umi médico rupi ropensa hag̃ua rombopaha pe mitã ñeha’arõ. Mbovymi semana rire roju roikuaa … ore rajy’imi heñói’ỹva gueteri … oikotevẽtaha heta korasõ cirugía pe hekove ary peteĩháme. Ko jehasa pukukue aja, roñembo’e kyre’ỹkuévo pe ñepytyvõ divíno rehe, … roñandu pe Espíritu oremongapyhývo. Rohupyty rrevelasiõ ha ñeikũmby ore rajy ha’eha peteĩ Túva Yvagagua rajy’imi poravopyre ha oĩsetereiha ore rogaygua ndive ha ouseterei ko yvy ape ári.”

Pe mitãmi sy ohai: “[Ore] roñemondyieterei, rojehesarea ha añetehápe pe marandu orereja vaiete. … Arekórõ guare 14 semana cheryeguasuha, roju roikuaa ore membymi orekoha heta defecto congénito ikorasõme, peteĩva umívagui ikatúva oporojuka. Rohecha hetaiterei médico ha especialista pe 10–18 semana peve oñemoheñói guive chepype. … Peteĩteĩ upe ore cita-pe, oñeporandu oréve rohosépa gueteri hese tenonde térã rombopahasépa pe mitã ñeha’arõ. … Pe Salvador omonguera che korasõ ha ome’ẽ chéve peteĩ py’aguapy ha py’akyrỹi remiandu ore membykuña’imi rehe. … [Túva Yvagagua] ohechauka jeyjey chéve Ha’e orekoha peteĩ plan hekoporãmbáva chéve g̃uarã [ha] ajerovia Hese.”

Vy’ápe omog̃uahẽ porãite hikuái imemby kuñamíme ojapo ko ára peteĩ semána. Ha’e imba’ekuéra ha ha’ekuéra imba’e tapiaite g̃uarã.

Jerovia oñemovã’ỹva ha py’aguasu hechapyrãva ha’e pe márka omoambuéva Jesucristo discípulo-kuérape.

Heta ary pupukue javeve, areko pe privilegio añembyatývo kuimba’e ha kuña ndive tekomirĩme ohekáva oike jey pe konvénio rapépe ha umi ijehovasa sacerdocio ha templo-peguápe heta ary ohundi rire hikuái i-membresía.

Peteĩ jave, añemongetajovái peteĩ kuimba’e ndive Primera Presidencia rérape ojerrestaura jey hag̃ua umi ijehovasapy pe sacerdocio ha templo-pegua.

Omenda rire templo marangatúpe, ha oguereko rire mbohapy mitã hechapyrãva, pe kuimba’e ndahekojeroviái hembireko ndive ha umi ikonvénio marangatu rehe. Peteĩ kuña omenda’ỹva opyta hyeguasu ha oitysékuri pe imemby.

Pe ména rembireko marangatu ojerure’asy pe kuñáme toguereko pe mitã ha ome’ẽ chupe iñeʼẽ omongakuaataha pe mitã, heñói vove, imembykuéra tee ndive.

Pe kuña omenda’ỹva ojepy’amongeta porã ha omoneĩ nombopahamoãiha pe mitã ñeha’arõ.

Ko’ág̃a ohasáma 10 ary. Pe hermana tekomirĩme oguapýva che renondépe ohayhu pe mitãkuimba’e imba’e teerõguáicha ha omombe’u chéve iména ñeha’ã omyatyrõ ha ohayhu ha oñangareko hag̃ua hese ha pe hogaygua rehe. Pe túva hasẽ hembireko oñe’ẽ aja.

Mba’éicha ikatu ko kuña i-noble-téva Tupãgui oúva oipyhy peteĩ mitã imba’e teerõguáicha ikatúva oporomomandu’a ára ha ára iména ndaijeroviarekoihague? Mba’éicha? Ojuhúgui mbarete Jesucristo rupive ha oguerovia pe tekove imarangatuha, pe tekove marangatu. Ha’e oikuaa pe mitã heñoi’ỹva gueteri ha’eha peteĩ Tupã ra’y, iñangaipa’ỹva ha ipotĩva.

Che hermano ha hermana-kuéra ahayhuetéva, pe mborayhu sa’ive ohóvo umi mitã heñoi’ỹva gueteri rehe yvóra tuichakue javeve ha’e peteĩ mba’e tuichaiterei oporopy’apýva. Tupã omomba’eguasu pe tekove. Ha’e upe Hembiapo ha Iglória toiko Ita’yrakuéra ñemanokuaa’ỹ ha tekove ijapyra’ỹva. Jesucristo discipulo-kuéra ramo ñamombaʼeguasu pe tekove. “Kóva rupi opavave oikuaáta peẽ che remimbo’eha, pejoayhúramo peteĩva ambue ndive.” Tañakomparti ñane mborayhu hetaitevénte umi ñanderehe oikotevẽ tarovaitéva ndive. Amombe’u che mborayhu penderehe ha ñande Ru Yvagagua mborayhu Ita’yrakuéra oúva rehe ko yvy ape ári. Jesucristo rérape, amén.