Ñande Sistéma Yvága Gotyo Ñanemboguatáva
Ñaenfokávo ñande rekove Jesucristo rehe, jajuhúta ñande róga rape, jagueropu’akávo ipahaite peve ha javy’ávo ipahaite peve.
Jesucristo omoambue che rekove añemongaraírõ guare arekópe 26 ary che ahayhuetéva Frutillar, Chile-pe. Upe árape, che mba’apoha chegueraha ahasa pe océano, umi ysyry ha lágo oĩva pe Chile Patagonia porãitépe. Che ñemongarai rire, ahecha che rembiapo ha che rekove peteĩ tape pyahu ha iñambuéva ramo, ahechakuaávo añetehápe “opa mba’e ohechauka oĩha peteĩ Tupã.”
Naturalésape, pe salmón heñói umi ysyry heñoiháme. Oĩ ára hekovepekuéra, tekotevẽha o’yta ysyry yvy gotyo og̃uahẽ hag̃ua océano-pe, upe ojuhuhápe hembi’ukuérarã ha umi kondisiõ oñeikotevẽva okakuaa hag̃ua.
Ha katu pe océano peteĩ tenda ipeligroso-itereíva avei, upépe umi mymba pochy oma’ẽjoa ha umi pirakuha oñehaʼã onohẽ pe salmón umi pinda ojehecharamóva rupive, tembi’u joguaháva ha katu nomongarúiva chupekuéra. Ikatúramo oikove hikuái ko’ã amenásagui, oñembosako’imahína oiporúvo sistéma oñemboguataha ipu’akapáva ohojey hag̃ua ysyry yvate gotyo tenda heñoihaguepevoípe, ombohováivo desafío pyahu ha oĩva ojepokuaamahague. Umi científico oñemoarandu heta arýma upe mba’érepa ova ha ojuhu oipuruha hikuái peteĩ mápa magnético-chagua, ojoguáva GPS-pe, oñemboguata hag̃ua chupekuéra iñeg̃uahẽse paha peve peteĩ oñeimo’a’ỹva jejavy’ỹ reheve.
Opavave ikatu jaha jey peteĩ ára pe óga yvagagua jajuhaguégui. Ha pe salmón-icha, jaguereko ñande mápa magnético, térã Cristo Resape, ñanemboguata hag̃ua upépe. Jesús ombo’e hemimbo’ekuérape: “Che ha’e pe tape, pe añetegua ha pe tekove, avave ndoúi Túva rendápe, ndaha’éirõ che rupive.”
Ñaenfokávo ñande rekove Jesucristo rehe, jajuhúta ñande róga rape, jagueropu’akávo ipahaite peve ha javy’ávo ipahaite peve. Presidente Nelson ombo’e “pe vy’apavẽ ñañandúva sa’i oguerekoha joaju umi oikóva ñande rekovepegua ndive ha katu opa mba’e ojoajuha ñande rekove enfóke rehe.”
Ñande Naturalésa ha Jehupytykuaa Divíno
Pe ogaygua ñemomarandúgui ñamoñe’ẽ “peteĩteĩ [ñande] ha’eha peteĩ sy ha túva yvagagua memby, ra’y térã rajy espiritual ojehayhuetéva, ha, upéicha rupi, peteĩteĩ oreko peteĩ naturalésa ha jehupytykuaa divíno. … Pe rréino yvy ári mboyveguápe, umi ta’ýra ha tajýra espíritual oikuaa ha otupãitũkuri Tupãme Itúva Ijapyrã’ỹva ramo ha omog̃uahẽ hikuái I-plan umi Ita’ýra ha Itajýra ikatuha rupive ohupyty ko’ápe peteĩ hetekuerarã ha oguereko jehasa yvy ape ári oñakãrapu’a hag̃ua tekoporãmbaite gotyo ha ipahápe ohupyty ijehupytykuaa divíno jehejapyre rupytyha ramo tekove ijapyra’ỹvape.”
Heñói mboyve yvy ape ári, Jesucristo ojehechauka Moisés-pe ha oñe’ẽ chupe Túva rérape. Haʼe heʼi Moisés-pe orekoha peteĩ tembiapo tuichaitereíva chupe g̃uarã. Ojejuhúrõ guare, Ñandejára ohenói chupe “che ra’y” heta jey.
Upe jehasa rire, Satana ou oipy’ara’ã hag̃ua chupe, he’ívo: “Moisés, kuimba’e ra’y, chetupãitũ.”
Moisés ombohovái pe jepy’ara’ã imandu’ávo inaturalésa divínare, he’ívo: “Mávapa nde? Péina ápe, che ha’égui petẽi Tupã ra’y.” Pe añetegua omosãso Moisés-pe peteĩ oporombohovakéva atákegui.
Hermano ha hermana-kuéra, umi pinda yvy ape árigua oĩ añete. Sapy’ánte umíva oporombojuruhe’ẽ, ha katu oheka peteĩ mba’e añónte: ñaneg̃uenohẽ pe y oikovéva rapégui oporogueraháva Túva gotyo ha tekove ijapyrã’ỹvape.
Aikuaa mba’éichapa ikatu añeteguaha umi pinda tekove yvy ape árigua. Peteĩ domingo, konvérso pyahurõ guare, ambo’ehína peteĩ clase sacerdocio-pegua, oñepyrũrõ guare peteĩ ñemongeta oporomoñanduporã’ỹva. Añeha’ãmbaite amohu’ã hag̃ua che lección. Apyta chepy’aro ha añeñandu che víctima-ha. Ha’e’ỹre mba’evete, aha pe oñesẽha gotyo, aguerekóvo che akãme ndajevymo’ãiha tupaópe sapy’ami.
Upe javetevoi, peteĩ sacerdocio guerekohára ojepy’apýva oñembo’y che renondépe. Mborayhúpe chekombida añesentra hag̃ua Cristo rehe ha ani pe situasiõ rohasava’ekuére clase-pe. Ama’ẽvo hendive pe ohasava’ekue rehe hendive, okomparti chendive ohenduhague peteĩ ñe’ẽ he’íva chupe: “Eho hapykuéri; ha’e imba’eguasu chéve g̃uarã.”
Che angirũnguéra ahayhuetéva, opavave ñanemba’eguasu Chupe g̃uarã. Presidente Nelson ombo’e “ñane konvénio rupi Tupã ndive, Ha’e araka’eve naikane’õmo’ãi oñeha’ãvo ñanepytyvõ, ha ñande araka’eve nañamyenyhẽmoãi I-paciencia poriahuvereko orekóva ñanendive g̃uarã.” Ñande naturalésa divína ha pe joaju konvénio rupi Tupã ndive ñanemboderécho jahupyty hag̃ua pytyvõ divíno.
Ñemongaru Tekotevẽ
Pe salmón oikotevẽháicha oñemongaru pe océano-pe okakuaa hag̃ua, tekotevẽ avei ñañemongaru espiritualmente ani hag̃ua ñamano ñemongaru vai espiritual-gui. Pe ñembo’e, umi escritura, pe templo ha jaha py’ỹi umi ñembyaty dominical-pe imba’eguasueterei ñane menu espiritual-pe g̃uarã.
Noviembre 1956-pe, Ricardo García oike ñemongarai y Chile-pe, oikóvo chugui Tupao miembro ypykue che retãme. Peteĩ ára omano mboyvemi, omomarandu hogaygua ha iñanguirũnguéra renondépe, “Ojapo heta ary misionero-kuéra chekombida avy’a hag̃ua che rogaygua ndive. Che ha’e tapicha ovy’áva. Peje opavave Chile-pe evanhélio ha’eha vy’apavẽ.”
Oñemongaru rire Jesucristo evanhélio reheve, Ricardo odedika hekove pukukue oservívo Tupã ha hapichápe mborayhúpe. Hechapyrã discipulado regua ohovasa heta ñemoñare’atýpe, chéve avei. Profeta Joseph Smith ombo’e “peteĩ kuimba’e henyhẽva Tupã mborayhúgui ndovy’apaiha ohovasávo hogayguápe añónte, ha katu oho opa yvóra rupi, ojepy’apývo ohovasaségui opa yvypóra raza”.
Jaha jey Ñande Róga Yvagaguápe
Peteĩteĩva ñande py’a pypykuvehápe oĩ peteĩ jehose jey ñande róga yvagaguápe, ha Jesucristo ha’e ñande sistéma yvága gotyo ñanemboguatáva. Ha’e upe tape. Ijehasa’asy expiatorio rupive ikatu jajapo konvénio sagrádo Tupã ndive. Jajapo rire konvénio, sapy’ánte jajejuhúta ja’ytaha pe ysyry rovake gotyo. Pelígro, decepción, jepy’arã ha jehasa’asy oha’ãta ñande jerovia ha mbarete espiritual. Pejerure pytyvõ. Jesucristo oikũmby ha akóinte oĩ oraha hag̃uáicha ñanendive ñane mba’epohýi.
Penemandu’áke Ha’e ojeikuaaha “kuimba’e ñembyasy, ha oikuaáva jepy’apy” ramo.” Pe Salvador ombo’e: “Ko yvórape pehasa’asýta, ha katu peñemokyre’ỹ; Che agueropu’akáma ko yvóra.” Ijehasa’asy expiatorio oheja oñeñyrõ ñande angaipakuéra og̃uahẽ meve Ha’e naimandu’aveimaha umívare.
Ikatu nañanderesaraipái ñane angaipakuéragui ñane mbo’epy reheguáramo ko yvy ape ári ñanemandu’a hag̃ua ani hag̃ua umíva jajapo jey. Upéva rangue, ñanemandu’áta Hese ja’u jave pe Santa Cena tupaópe opa Domingo-kue. Ko ordenánsa ha’e peteĩ mba’e tekotevẽpy pe tupãitũ ha jekakuaa espiritual-pe g̃uarã. Pe vy’apavẽ og̃uahẽ ñaikũmby vove kóva ndaha’eiha peteĩ ára oimeháichagua. “Pe pytu’uha ára ojejapo yvypórape g̃uarã” oñeha’arõvo ome’ẽ ñandéve pytu’u ko yvóragui ha ñembopyahu ñande rete ha ñande espíritu-pe.
Ñanemandu’a avei Hese jaha jave templo-pe—upe Ñandejára róga. Umi templo ome’ẽ ñandéve peteĩ jeikuaa ipypukuvéva Jesucristo-gui pe konvénio mbyte ramo ñandegueraháva tekove ijapyra’ỹvape, tuichavéva … umi Tupã don apytépe.”
Templo-pe jeho ome’ẽ chéve moangapyhy ha tuicha ta’arõmby ñande destino ijapyra’ỹva rehegua. Ahasakuri umi joaju yvagagua tapichakuéra ndive mokõive vélo ládo gotyo. Ahecha umi milágro oporomongueráva umi che ra’y michĩvéva rekovépe, mokõi umívagui oiko mba’asy ojehecha’ỹva reheve oikotevẽva ñeñangareko ára ha ára hekove pukukue aja.
Ore rogaygua ovy’a rokompartívo pe plan vy’a rehegua. Che ra’ykuéra rova ojajái ohendúvo, Jesucristo rupive, “[i]jehasa’asykuéra ha’éta sapy’amínte.” Rohayhueterei ore ra’ykuérape, ha roikuaa peteĩ árape, presidente Jeffrey R. Holland ombo’ehaguéicha, ha’ekuéra “oñembo’ýta ore renondépe ojeglorifikapyre ha tuichaitéva, ñaimo’ã’ỹháicha oĩporãmbáva hete ha apytu’ũme.” Ñane konvénio ñanemoag̃uive Tupãre ojapo peve taikatukuaaite umi ikatukuaa’ỹva, omyenyhẽvo opa pytũmby ha py’amokõi pa’ũ tesape ha py’aguapy reheve.
Aguyje Jesucristo-pe, Ha’e rupi oĩ ta’arõmby ha mba’erupivépa oñemopyenda porãva jahayhu, ñañembo’e ha ñaipytyvõ meme hag̃ua umi jajepy’apýva rehe.
Che aikuaa Ha’e oikoveha. Ha’e ñandekuaa ha Ha’e ñanderayhu. Ha’e hína pe tape, pe añetegua ha pe tekove ko yvórape.
Akombida opavave ñandéve ko árape ñasentra hag̃ua ñande rekove Jesucristo ha Imbo’epykuérape. Jajapóramo upéicha ñanepytyvõta ani hag̃ua jaisuʼu umi pinda py’ara’ã, pya’aro ha ñandejupeporiahuvereko rehegua. Ñande ñañembo’ýta umi templo-icha—imarangatu, imbarete ha oñemovã’ỹva. Jagueropu’akáta umi ára vai, ha ñag̃uahẽta ñande rógape, jagueropu’akávo ipahaite peve ha javy’ávo ipahaite peve. Jesucristo rérape, amén.