Jeroviapy Tupã Renondépe

Che hermano ha hermana-kuéra pohayhuetéva, che aguyje añe’ẽ hag̃ua ko árape peẽme ko conferencia general tuichaitévape. Che resa ijedave ohóvo. Aguyje pentende haguére ame’ẽvo che mensáhe.

Jaikohína peteĩ tuicha ñemomýi árape Jesucristo Tupao Santokuéra Ára Pahapeguápe. Cherenyhẽ vy’águi ahechávo umi akãrapu’ã hetaite área-pe.

Ko’ýte che inspira ñane huventukuéra. Ome’ẽhína hikuái hetaiterei servicio. Ohekahína hikuái umi ijypykue ha ojapo ordenansakuéra templo-pe. Ñande hombres jóvenes ha mujeres jóvenes omoingehína aplikasiõ servicio misional-rã hetaite araka’eve mboyveguágui. Pe generasiõ pyahu opu’ãhína Jesucristo rapykuerigua ijeroviarekóva ramo.

Nda’aréi aikuaahague peteĩ bisnieta pyahu. Ajepy’amongetávo umi mba’e ijetu’úva ha’e ohasátavare hekovépe, tuicha aipytyvõse chupe omongakuaa hag̃ua jerovia Jesucristo-re. Iñevanhéliope jeiko tekotevẽte ivy’apevẽ tenonderãme g̃uarã.

Ha’e, peteĩteĩ ñandéicha, ombohovakéta umi mba’e ijetu’úva. Opavave jahasáta mba’asy, ñembyasy, py’ara’ã, ha ñehundi. Ko’ã mba’e ijetu’úva ohundikuaa ñandejehe jejerovia. Upevére, umi Jesucristo discípulo ohupyty ambueichagua jeroviapy.

Jajapo ha ñañongatúramo konveniokuéra Tupã ndive, jarekokuaa jeroviapy Espíritu-gui heñóiva. Ñandejára he’i Proféta José Smith-pe ñande jeroviapy ikatuha “oñemombarete Tupã renondépe”. Peimo’ãmi py’apytu’u jareko hag̃ua jeroviapy Tupã renondépe!

Añe’ẽvo jaguereko hag̃ua jeroviapy Tupã renondépe, añe’ẽhína jaguerekóvo jeroviapy ñañemoag̃ui hag̃ua Tupãre ko’ag̃aite! Añe’ẽhína ñañembo’évo jeroviarekópe Túva Yvagagua ñanerenduha, Ha’e ontende porãveha ñandehegui umi ñaneremitevẽ. Añe’ẽhína jaguerekóvo jeroviapy Ha’e ñanderayhuveha pe ikatúvagui ñaikũmby, Ha’e ombouha anhelkuéra oĩ hag̃ua ñanendive ha umi jahayhúva ndive. Añe’ẽhína jaguereko hag̃ua jeroviapy Ha’e ñanepytyvõseha peteĩteĩme jahupyty ñande potensial yvateve.

Ko’ág̃a, mba’éicha jahupytykuaa koichagua jeroviapy? Ñandejára ombohovái ko porandu ko’ã ñe’ẽme: “Eheja avei tahenyhẽ nderyepy … karidágui opa tekovekuérandi, … ha eheja pe virtu tombojegua meme ne akãremiandu; upérõ ndejeroviapy oñemombaretéta Tupã renondépe.”

Upépe oĩ pe kláve! Ñandejára ñe’ẽ teépe, karida ha virtu oipe’a tape jareko hag̃ua jeroviapy Tupã renondépe! Hermano ha hermana-kuéra, ikatu jajapo péva! Ñande jeroviapy ikatu añetehápe oñemombarete Tupã renondépe, ko’ag̃aite!

Ñama’ẽmi mokõive karida ha virtúre.

Peteĩha, karida. Ojapo mokõi ary, ajapo ñandéve peteĩ ñehenói, Jesucristo konvénio rapykuerigua ramo, jaiko hag̃ua py’aguapy’apoha. Ha’ejey upérõ ha’eva’ekue: “Pochy araka’eve noipy’amovãi. Ñemoĩreko nomopu’ãi avavépe. Ñorairõ ndoguerahái umi solusiõ inspirádope”.

Karida añete opa yvypórare ha’e umi py’aguapy’apoha rechaukaha! Jarekova’erã karida umi ñande diskúrsope, mokõive público ha privado-pe. Cheaguyje umi pejagarrava’ekuépe añetete che ñemoñe’ẽ mboyvegua. Ha katu jajapo porãvekuaa.

Ko ag̃agua ñemoĩreko oĩva en público ha umi redes sociales-pe ñandepy’apy. Umi jeja’e’ỹ rehegua ñe’ẽ ha’e árma oporojukáva. Ñorairõ ndohejái pe Espíritu Santo ha’e ñane irũ tapiaite.

Jesucristo rapykueriguáicha, jaguata tenondeva’erãmo’ã py’aguapy’apohára ramo. Karidágui oikóramo ñande reko tapiagua, ojeíta ñandehegui impulso japoro’apo’i hag̃ua. Ndajahusgamo’ãvéima ambuekuérape. Jarekóta karida opaichagua tekovépe g̃uarã. Karida opa yvyporakuérare tekotevẽterei jakakuaa hag̃ua. Karida ha’e peteĩ py’aporã rekopy pyenda.

Jajerure ñande Ru Yvagaguápe tomyenyhẽ ñane korasõ tuichave karida reheve—ko’ýte umi hasývare ojehayhu hag̃ua—karida ha’égui peteĩ don ñande Ru Yvagaguágui Jesucristo seguidor-kuéra añeteguápe g̃uarã. Pe Salvador ha’e Py’aguapy Prínsipe. Ñande ha’eva’erã umi Hembiporu py’aguapyrã.

Ko’ág̃a, ñañe’ẽmi virtu rehe. Ñandejára he’i ñandéve ñambojegua meme hag̃ua ñaneakãremiandu virtu reheve. Peimo’ãmi pe ñemopu’ã pehupytýtava oimeraẽ akãremiandu positívope pemombate jave virtu reheve. Virtu omoporãve ha ombovy’a opa mba’e! Ambue hendáicha, peimo’ãmi mba’épa oikóne pembojoapy jave virtu peteĩ akãremiandu ky’a, ñaña, térã vy’a’ỹre. Pe virtu omomombyrýta umi akãremiandu. Pe virtu penemosãsóta umi temiandu angekói ha py’apýgui.

Hermano ha hermana-kuéra, pe yvóra iñañavévo ohóvo, tekotevẽ ñanepotĩve jahávo. Umi ñane akãremiandu, ñe’ẽ, ha mba’e’apo tekotevẽ akói ivirtuóso ha henyhẽ Jesucristo mborayhu potĩ reheve opa yvyporakuérare. Tuicha oportunida ñanerenondepegua ha’e toiko ñandehegui umi tekove Tupã oikotevẽva ñande jaiko.

Ñatupãitũ py’ỹi Ñandejára rógape ombotuicha ñande katupyry mokõive virtu ha karidápe g̃uarã. Péicha, ñane tiempo templo-pe ombotuichave ñande jeroviapy Ñandejára renondépe. Ñambohetave tiempo templo-pe ñanepytyvõta ñañembosako’i ñande Salvador, Jesucristo, Jeju Mokõiháme g̃uarã. Ndajaikuaái pe Ijeju ára ni aravo. Ha katu aikuaa Ñandejára chepy’amovãhahína ajerure hag̃ua ñañembosako’i upe “ára tuicha ha oporomondyietévarã.”

Jesarekópe jahekáramo karida ha virtu tomyenyhẽ ñande rekove, ñande jeroviapy ñañemoag̃ui hag̃ua Tupãre tuichavéta. Pokombida peipotágui pejapo hag̃ua tekotevẽva pekakuaa hag̃ua pende jeroviapýpe Ñandejára renondépe. Upéi, jajúramo ñande Ru Yvagaguápe jeroviapy tuichavéva reheve, ñanerenyhẽvéta vy’águi, ha pende jerovia Jesucristo rehe tuichavéta. Ñañepyrũta ñañandu pu’aka espiritual ohasátava ñañe ñeha’arõ tuichavéva.

Ñandeaguyje Ñandejárape oñembopya’e haguére templo-kuéra ñemopu’ã ary ohasava’ekuépe. Iñeisãmbyhyguýpe, ko ára romomarandu umi plan oñemopu’ã hag̃ua peteĩ templo peteĩteĩ ko’ã 15 tendápe:

• Reynosa, México

• Chorrillos, Perú

• Rivera, Uruguay

• Campo Grande, Brasil

• Oporto, Portugal

• Uyo, Nigeria

• San José del Monte, Filipinas

• Numea, Nueva Caledonia

• Liverpool, Australia

• Caldwell, Idaho

• Flagstaff, Arizona

• Rapid City, Dakota del Sur

• Greenville, Carolina del Sur

• Norfolk, Virginia

• Spanish Fork, Utah

Atestifika Jesucristo, pe Israel Redentor, omboguataha ko, Itupao. Ha’e oñembosako’ihína ou jey hag̃ua. Tañañembosako’i avei ñande ñamog̃uahẽ hag̃ua Chupe. Upévare añembo’e Jesucristo rérape, amén.