“Upéva rupi Opavave Oikuaáta Peẽ Ha’eha che Discípulo”

Che hermano ha hermana-kuéra, che angirũnguéra pohayhuetéva, che ahayhu Jesucristo Tupao Santokuéra Ára Pahapegua. Ha’e pe Salvador Tupao añetegua ha oikovéva, ha ombo’e Jesucristo evanhélio restaurado renyhẽ. Isacerdocio pu’aka ha autoridad oĩ ko’ápe. Jesucristo voi oisãmbyhy ko Tupao, tembiguaikuéra Ha’e ohenói ha oautorisava’ekue rupive, ha peteĩ proféta oikovéva rupi, jepe Presidente Russell M. Nelson. Pe Salvador ome’ẽ Santokuéra Ára Pahapeguápe peteĩ misión ijojaha’ỹva ombyaty hag̃ua Tupã ta’yrakuérape ha ombosako’i hag̃ua ko yvóra pe Salvador Jeju Mokõiháme g̃uarã. Che atestifika opa koʼã mbaʼe añeteguaha.

Ha katu iñimportánte ñanemandu’a hetave tapichakuéra oexperimentávo Jesucristo Tupao peteĩha jave, ha’ekuéra nopensái hína sacerdocio autoridad térã ordenánsa térã Israel ñembyaty rehe. Pe ojogua ohechakuaavéva hikuái, opa mba’e ári, ha’e mba’éichapa oñeñandu hikuái oĩ jave ñanendive ha mba’éichapa ñande jajotrata ojupe.

“Pejoayhu peteĩva ambuévape”, he’i Jesús. Upéva rupi opavave oikuaáta peẽ Ha’eha che discípulo”. Py’ỹieterei, peteĩ tapicha testimonio peteĩha Jesucristo-gui og̃uahẽ oñandu jave mborayhu Jesucristo discípulo-kuéra apytépe.

Pe Salvador odeclara omoĩjey hague Itupao “jerovia … oñembohetave hag̃ua ko yvy ape ári.” Upévare, tapichakuéra ovisita jave umi ñande Tupao ñembyaty, pe Salvador oipota osẽ hikuái jerovia imbaretevéva Hese reheve! ¡Pe mborayhu ñane angirũnguéra oñandúva ñande apytépe omoaguĩvéta chupekuéra Jesucristo-re! Upéva ha’e ñane mba’e hasy’ỹ jahupytyséva ñañembyaty jave.

Oimeraẽ ohekáva tuichave jerovia Cristo-re térã peteĩ joaju hi’aguĩvéva Túva Yvagagua ndive, oñeñandu porãva’erã hogapeguáicha Jesucristo Tupao Santokuéra Ára Pahapeguápe. Ñakombidávo chupekuéra umi ñane ñembyatýpe ikatu ha’e jepigua ha natural ñainvitaháicha chupekuéra umi ñande rógape.

Ko’ág̃a, ahechakuaa amohesakãha hína pe ideal-va. Ha ko tekove mortal-pe, sa’i jahupyty ñaexperimenta hag̃ua pe ideal. Ha pe “ára perfecto peve,” akóinte oĩta peteĩ pa’ũ ideal-va ha añeteguáva apytépe. Upéicharõ, mba’épa jajapova’erã pe Tupao noñeñandúiramo ára perfecto-icha? Taha’e ha’évare, ñande barrio nomongakuaái gueteri jerovia térã pe mborayhu perfecto? Térã oñeñandu jave ñande ndaha’eiha upepegua?

Peteĩ mba’e ndajajapoiva’erã ha’e jahejarei pe ideal-vape!

Pe Mormón Kuatiañe’ẽ ñepyrũha oreko ko momarandu imba’eguasúva: “Oĩramo jejavy”, he’i, “koʼãva haʼe yvyporakuéra jejavy; upévare, ani pekondena Tupã mbaʼekuéra.”

¿Ikatúpa peteĩ kuatiañe’ẽ —térã peteĩ tupao térã peteĩ tapicha —oguereko “apañuãi” ha “jejavy” ha ha’e gueteri Tupã rembiapo?

Che ñembohovái ha’e peteĩ heẽ oñehendukakuaáva!

Upéicharõ, jajejoko jave Ñandejára norma ijyvatevévare, ñaha’arõkuaáke avei ojuehe. Peteĩ teĩ ñande ha’e peteĩ tembiapo okakuaáva, ha opavave jajerovia Salvador-re oimeraẽ jekakuaa jajapóvape g̃uarã. Upéva añete ñandéve peteĩ teĩme g̃uarã, ha añete Tupã rréino ko yvy’apérepe g̃uarã.

Ñandejára ñaneinvita ndaha’éi jajoaju hag̃uánte Irréinore ha katu avei ñañeha’ã mbarete hag̃ua ñamopu’ã upéva. Tupã ohecha peteĩ tavayguakuéra “peteĩva ikorasõ ha apytu’ũme.” Ha jaiko hag̃ua peteĩ korasõme, jahekava’erã korasõ potĩ, ha upéva oikotevẽ peteĩ korasõ ñemoambue mbarete.

Ha katu upéva nde’iséi amoambue che korasõ ambojoja hag̃ua ne korasõ ndive. Ni nde’iséi remoambueha ne korasõ rembojoja hag̃ua che korasõ ndive. He’ise opavave ñamoambueha ñane korasõ ñambojoja hag̃ua pe Salvador ndive.

Nañag̃uahẽiramo gueteri upépe, penemandu’áke: Ñandejára pytyvõ reheve, opa mba’e ikatu.

Ha oiméramo araka’eve reñandu ndereikeporãiha, eikuaáke nereimeiha neaño. ¿Nañaiméipa opavave tekovegua situasiõme ñañeñandúrõ guare pe extraño-icha oĩva pe kotýpe? Hetave jey aexperimentava’ekue upe mba’e. Arekórõ guare 11 áño, che família oñemyaña oheja hag̃ua ore róga ha rova peteĩ región ndoroikuaáivape. Opa mbaʼe iñambue pe che ajepokuaávagui. Ha che acento ohechauka porã ambue mitãnguérape che cheambueha pe ha’ekuéra ojepokuaávagui. Peteĩ époka aikotevẽtereívape ñemoirũ ha apertenese, añeñandu cheañoha ha añemboykéva.

Ko yvy ape ári, hetave umi mba’e iñambuéva jahechakuaáva—umi mba’e iñambuéva jaiporúva ñañomboja’o hag̃ua ojupe—oho umi mba’e yvy ariguáva rehe: jehecha físico, nacionalida, idioma, ao, jepokuaa ha mba’e. Ha katu “Tupã ndohechái umi mbaʼe tapichakuéra ohechaháicha. Tapichakuéra omañágui pe ojehecháva okáguio, ha katu Ñandejára omaña ikorasõre.”

Ha’e ohechaháicha, oĩ peteĩ kategoría oúva opa ambuekuéra renondépe: Tupã ra’y térã rajy. Ha opavave jaike porãiterei upévape.

Jepiguánte voi ñaimeseha umi tapicha ojehecháva, oñe’ẽva, omba’e’apóva ha opensáva ñandéicha jerére. Oĩ peteĩ tenda upévarã.

Ha katu pe Salvador Tupaópe, ñambyaty opa Tupã ra’y ha rajykuéra oñembyatyséva ha ohekáva pe añetegua. Ndaha’éi ñane apariencia física, ñande jehecha polítiko, ñande cultura térã etnia ñanemoĩva oñondive. Ndaha’éi ñane orígen común ñanemopeteĩva. Ha’e ñande objetivo común, ñane mborayhu Tupãre ha ñane mborayhu ñande rapicháre, ñane kompromiso Jesucristo ha Iñevanhélio rrestaurado ndive. Ñande ha’e “peteĩ Cristo-pe.”

Pe joaju jahekáva ndaha’éi opavave toĩ peteĩ hendápe; ha’e opavave tomaña peteĩ dirección-pe—Jesucristo gotyo. Ñande peteĩnte ndaha’éi moõpa ñaimeva’ekue rupi ha katu moõpa ñañeha’ã hína jaha rupi, ndaha’éi máva rupípa ñande ha katu mávapa ñañeha’ã oiko ñandehegui.

Upévagui ha’e pe Cristo Tupao añetegua.

Pehayhúramo Tupãme, peikuaasevéramo Chupe peseguívo Ita’ýrape, upéicharõ peẽ ha’e ko’apegua. Pehekáramo pende py’aite guive peñongatu hag̃ua pe Salvador rembiapoukapykuéra—jepe ndaha’éi gueteri perfecto upévape—upéicharõ peẽ pendeja porãiterei Jesucristo Tupao Santokuéra Ára Pahapeguápe.

Ha mba’épa oikóta nde neambuéramo umi tapicha oĩvagui nde jerére? Upéva ndojapói ndehegui peteĩ ijoja’ỹva—ojapo ndehegui peteĩ parte oñeikotevẽva Cristo retépe. Opavave oñeikotevẽ Cristo retepýpe. Umi apysa ohendu umi mba’e tesa araka’eve ndaikatumo’ãiva. Umi py ojapo umi mba’e umi po ndojapomo’ãiva.

Upéva nde’iséi ne rembiapo ha’eha remoambue opavave hag̃ua ndéicha. Ha katu heʼise reguerekoha peteĩ mbaʼe imba’eguasúva reikuave’ẽ hag̃ua—ha peteĩ mbaʼe imba’eguasúva reaprende hag̃ua!

Peteĩ teĩ conferencia general sesión-pe, jajehovasa purahéi inspirador reheve umi coro ikatupyrývagui. Pehendu aja, ikatu pehechakuaa umi opurahéiva ndaha’eiha opavave opurahéiva peteĩchagua nota. Sapy’ánte peteĩ sección ogueraha pe melodía, sapy’ánte ambue. Ha katu opavave oipytyvõ pe tyapu porãme, ha peteĩchapaite hikuái. Peteĩ teĩ pe coro pegua oreko peteĩchagua ohupytyséva central: omomba’eguasu Tupãme ha omopu’ã ñane korasõ Hendápe. Peteĩ teĩ oguerekova’erã iñakã ha ikorasõ ojepytasóva peteĩchagua propósito divino-pe. Ha upéva oiko vove, añetehápe oiko chuguikuéra peteĩ ñeʼẽpu.

Nde ndaha’éiramo gueteri miembro Jesucristo Tupao Santokuéra Ára Pahapegua, roinvita rejoaju hag̃ua orendive rovy’ávo pe Salvador “purahéi mborayhu rredentor” rehe.” Roikotevẽ penderehe. Ore pohayhu. Pe Tupao iporãvéta pene ñeha’ã reheve peservi hag̃ua Ñandejárape ha Ita’yrakuérape.

Pehechaukáma ramo, pe ñemongarai rupive, pejapo rupi konvénio Tupã ndive, pene rembipota “peju hag̃ua Tupã rredílpe, ha peñehenói itavayguakuéra,” aguyje peẽme ha’e haguére parte ko tembiapo tuicha ha divino-pe ha peipytyvõ haguére oiko hag̃ua Jesucristo Tupaógui pe Salvador oipotáva.

Añemoarandu haguéicha che angirũ Alemania-peguágui, ñane mborayhu Tupã ha Ita’yrakuérare ha’e peteĩ testimonio mbarete ko yvórape kóva ha’eha añetehápe pe Salvador Tupao.

Tupã tañanderovasa ñañeha’ã hag̃ua ñehaʼarõkuaa reheve ha katu kyre’ỹme jaiko hag̃ua umi ideal ñande Salvador, Redentor ha Maestro omoĩva’ekue ñandéve g̃uarã —upéicha opavave oikuaáta ñande ha’eha Idiscipulokuéra. Jesucristo réra sagrádope, Amén.