Ha Ñañe’ẽ Cristo-gui

Opa vove peteĩ asignación puku ambue yguasu mboypýri, che rembireko, Lesa, ha che roike peteĩ aeropuerto terminal-pe roñembosako’i hag̃ua peteĩ heta ambueichagua vuelo-pe g̃uarã—peteĩ pyhareve mbyky—roho hag̃ua ore rógape. Roñembo’ývo heta ambuekuéra oguata mbeguemívandi fila ipukúvare, roñandu ore je’ói irũnguéra ansiedad okakuaáva, ojepy’apýva ohupyty hag̃ua ivuelo, ohasa hag̃ua pasaporte ha visa ñema’ẽre, ha oguata porã hag̃ua seguridad jehecha jey rupive.

Rohupyty ipahápe peteĩ estación oĩháme peteĩ oficial aduanera ha’ete opena’ỹva umi tuicha estrés ha ansiedad ipohýiva upe kotýpe. Ha’e haimete máquina-icha ojapyhy, ni oma’ẽ’ỹre che resápe, che kuatiakuérare, omoneĩ che ra’anga, ohasa peteĩteĩ kuatia roguére, ha ipahápe omoĩ sello che pasaporte-re peteĩ tyapu pohýi reheve.

Upéi ojapyhy Lesa kuatiakuéra. Temiandu rehe’ỹ, oñakãity ha ojesarekóvo hembiapóre, hekópe ohasa umi kuatia roguére tesa katupyry reheve, ojesarekóvo umi detalle kuatia henondépe oĩvare. Roñemondýi ojejokóvo sapy’a, ohupi iñakã, ha oma’ẽ Lesa resaitépe peteĩ jesareko ojeipotáva ha hakuvóva reheve. Peteĩ pukavy kyrỹi reheve, omoĩ mbeguekatu sello Lesa pasaporte-re ha ome’ẽjey chupe umi kuatia. Che rembireko ome’ẽ avei pukavy, omboaje umi kuatia, ha oñemomaitei porã hikuái.

“Mba’épa oikóra’e upépe?“ Aporandu aroviakuaa’ỹre.

Lesa upéi ohechauka chéve mba’épa ohecha pe agente—peteĩ kuatia’i Salvador ra’anga reheve. Upéva ojeipota’ỹre ho’ákuri Lesa cartera-gui ipasaporte kuatia apytépe. Kóva ha’e pe agente aduanera ojuhuva’ekue. Kóva omoambueva’ekue ojapoháicha hembiapo.

Grace and Truth, Simon Dewey rupive, ome’ẽ altusfineart.com, © 2025, ojeiporu ñemoneĩ reheve

Ko Salvador ra’anga’i ombojoaju mokõi tapicha ojeikuaa’ỹva korasõ ambueichagua ndojoajumo’ãiva. Omoambue impersonal personal-pe, ohechaukávo porãngue, milagro, ha añetegua Jesucristo Tesape rehegua. Upe ára javeve ha py’ỹi upe guive, ajeipy’amongeta upe momento he’ẽ ha simple-re jurujái reheve ha avy’a pe efecto glorioso pe Cristo Resape rehegua Tupã Ra’ykuéra ári.

Ñande Jesucristo segihára, ha jaheka mokõivéva jahupyty ha ñamboja’o Hesape. Tupao rérape ikatu ojekuaa ijeheguínte ñande teología “Jesucristo ijupete ha’évo pe ita esquina-gua mburuvicha“ rehegua. Profeta ymaguare ha oikovéva rupi, ñande Ru Yvagagua omandákuri “Ñahendu hag̃ua Chupe!“ha “jaju hag̃ua Cristo-pe.” “Roñeʼẽ Cristo-re, ha rovyʼa Cristo-pe, romboʼe Cristo-gui, [ha] roprofetisa Cristo-gui“.

Ñambo’e Jesucristo ha’eha Tupã Ra’y, ha ára hembiaporã yvy’ári jave, Jesús ombo’ekuri Iñevanhélio ha omoĩkuri Itupao.

Jatestifika Hekove opakuévo, Jesús oexpiahague ñane angaipakuéra ohasa’asýrõ guare Getsemaní Yvotytýpe, oñemongurusu kurusúpe, ha upéi oikovejeyhague.

Javy’a Salvador ñeikuave’ẽ expiatorio rupi, ñañeperdona ha ñañemopotĩkuaa haguére ñande angaipakuéragui ñañearrepentívo. Kóva ogueru ñandéve py’aguapy ha ñeha’arõ’asy ojapóvo avei ikatu hag̃uáicha ñandéve g̃uarã jaha jey Tupã renondépe ha jahupyty peteĩ vy’apavẽ renyhẽ.

Japrofetisa Jesús Jeikovejey rupi, ñemano ndaha’éi mba’e opahápe ha katu peteĩ paso tenonde gotyo imba’eguasúva. “Opaite ñande jaikovejeýta ñamano rire. Kóva he’ise peteĩ teĩ tapicha espíritu ha hete oñembojoajujeýta ha oikovéta tapiaite“.

Profeta oikovéva ñande árape—ohupytýva revelación Tupãgui ñanembo’e ha ñanesãmbyhy hag̃ua—opa ára ñanekombidave jaju hag̃ua Cristo-pe. Ha’ekuéra ñanepytyvõ ñamoĩve hag̃ua ñane korasõ, apysa, ha ñande resa Hese meme. Ikatu ja’ejeykuaa heta tembiecharã umi ñemohenda ha ñemoporãve oñemombe’úva Primera Presidencia rupive ojejapóva oñemañave meme hag̃ua Jesucristo rehe. Ko’ãva apytépe oike:

• Pe jeiporavo ojeheja hag̃ua pe “Tupao Mormón“ réra ha oñemyengovia hag̃ua pe téra oĩporãvare, Jesucristo Tupao Santokuéra Ára Pahapegua.

• Jehupytykuaave Cristo ñemoha’anga inspirado pyahu, ojehechauka hag̃ua ñembyaty rendakuérape.

• Umi Kuñataĩ ha Sacerdocio Aarónico kórum tema-kuéra ha purahéi ojesarekovéva Jesucristo-re, ha’évaicha “Che ha’e Jesucristo discípulo“ ha “Ema’ẽ Cristo gotyo.“

• Ñembotuichave Expiasiõ ha Jesucristo Jeikovejey teete jehaiguy mba’e igloriosovéva ramo tembiasakue pukukue aja.

• Pascua jeguerovy’a peteĩ época ramo ha ndaha’éi peteĩ ára jevy’arã añónte, tuichave Jesucristo jesareko reheve.

• Pe Jesucristo Tupao identificador visual jegueru ha heko moha’anga ramo rehegua.

Ñama’ẽ porãmi mba’épa ohupyty ko’ãva apytépe. Ñepyrũrã, pe Tupao ñemoha’anga.

2020-pe, Presidente Nelson ogueru peteĩ identificador visual pyahu Tupaópe g̃uarã. Ko ñemoha’anga omombe’u pe añetegua Cristo oĩha Itupao mbytépe ha oĩva’erãha ñande rekove mbytépe. Ko’ág̃a jahecha ko ñemoha’anga ojeikuaáva umi templo-gua recomendación-pe, Tupao página web ha revista-kuérape, pe Biblioteca del Evangelio aplicación ta’anga’i ramo, ha militar réra rechaukahápe jepe heta Tupao miembro oservíva fuerzas armadas-pe g̃uarã. Pe ñemoha’angápe oike Tupao réra oĩvo peteĩ ita mbyteguápe, peteĩ momandu’a Jesucristo ha’eha pe ita mbytegua mburuvicha, ojehechaukáva ápe camboyano-pe ha ojeporúva 145 ñe’ẽme.

Pe ñemoha’anga mbytegua ha’e pe Albert Thorvaldsen ita estatua Christus ojehayhuetéva ra’anga, jepigua oñembojoajúva pe Tupao ndive ha ojejuhúva visitante rendakuéra ha templo yvykuérape opa ko yvóra jerére. Iñemomba’eguasu Tupao ñemoha’angápe omombe’u Cristo oĩva’erãha mbytépe opa mba’e jajapóvape. Upéicha avei, pe Salvador ijyva jeipyso ohechauka Iñe’ẽme’ẽ oañuataha opavave ohóva Chupe. Ko ñemoha’anga ha’e jehechauka ojehechakuaáva Salvador Jesucristo mborayhu reheguágui ha peteĩ momandu’a meme Cristo oikovéva rehe.

Che curioso rupi, aporandu hetaiterei ogaygua ha angirũnguérape peteĩ mba’e imba’eguasúva pe Tupao ñemoha’angápe. Mba’e cheipy’andýiva, heta ndoikuaái peteĩ pehẽ marangatu upéva ohechaukáva. Jesucristo oñembo’y pe arco guýpe . Kóva omoha’anga pe Salvador oikovejeýva osẽvo iñeñotỹ rendágui. Añetehápe jaguerovy’a pe Cristo oikovejey ha oikovéva, jepe Tupao ñemoha’anga jeiporúpe.

Ko’ág̃a jajepy’amongeta mba’épa he’ise upe Pascua. Primera Presidencia marandu ramoguápe Pascua rehegua, ojejerurékuri ñandéve “jagueromandu’a hag̃ua ñande Salvador oikovéva Jeikovejey ñañemoarandúvo Imbo’epýgui ha ñaipytyvõvo ñamopyenda hag̃ua umi jepokuaa Pascua rehegua ñande sociedad tuichakue javeve, ko’yteve umi ñande rogaygua tee apytépe.” Ñamombyky hag̃ua, ñañekombida jaha hag̃ua peteĩ Pascua ijyvateve ha imarangatuvéva gotyo.

Ahayhu pe revelación meme Pascua rehegua ha avy’a pene ñeha’ãre pejapo hag̃ua Pascua-gui peteĩ ára santo ha marangatu. Ñembyaty peteĩ aravógui Domingo Pascua-peguápe ñembojoapy ramo, ambue techapyrã umi mba’e’apo hekojojávape oike barrio ha estaca devocional ha actividad-kuéra Domingo de Ramos ha avei Semana Marangatu pukukue jave. Ko’ã ñemomandu’ápe oike mba’e’apo mitã ha juventud ndive ha py’ỹi umívape oike umi coro ambue religión-gua. Ambuekuéra ojapókuri “Cristo Oikovéva” óga jepe’a miembro ha angirũnguérape g̃uarã ha oike heta denominación-pegua comunidad evento Pascua reheguápe.

Umichagua mba’e’apo ojogua umi tapicha’atýpe táva Jerusalén-pegua iñe’ẽpunguéra ojoajúrõ guare omoherakuã hag̃ua pe Salvador Ijeike pu’akápe. Upéicha avei oporombojurujái umi mombe’u pene mbohovái rehegua Primera Presidencia ñekombidáre petupãitũ hag̃ua pende rógape peguerovy’a hag̃ua ko ára imba’eguasuetéva.

Aguerovia pe rogaygua ñetupãitũ Pascua jerére opu’ã porãiteha. Ojapo mokõi ary, añe’ẽkuri ore rogaygua jeiporavóre omoporãve hag̃ua ore Pascua moherakuã. Ha’eva’erã, kóva ha’e gueteri tembiapo oñemohu’ã’ỹva. Ore tapia roguerovy’a peteĩ Pascua Domingo tembi’u, Pascua ajakakuéra, ha Pascua ryguasurupi’a jeheka, ha rojapo gueteri. Ha katu, rombojoapývo roipotágui peteĩ dimensión espiritual ojesarekovéva Jesucristo ha Iñexpiasiõre pe jeguerovy’ápe ogueru peteĩ joja he’ẽva ore ñemomandu’ápe ko’ã evento imarangatuvéva opa mba’égui rehegua.

Ko ary ha’éta ore ñeha’ã mbohapyha rojapo hag̃ua Pascua ojesarekovéva Jesucristo-re. Navidad Pesebre-icha, ore rogapegua Pascua Ára ñemoha’angápe oike ñembyao ndahepýiva, umi Testamento Pyahu ha Mormón Kuatiañe’ẽ escritura ñemoñe’ẽ, purahéi, Pascua ra’anga, pindo rogue—ha michĩmi sarambi, cheañetembaitérõ. Umi mitã ha nieto omoñe’ẽvo ha he’i ayvúvo Domingo de Ramos-gua ñemomorã “Hosanna … ojehovasa pe Ñandejára rérape oúva; Hosanna yvatete” ha “Kóva ha’e Jesús … Galilea-gua” ha’ete ko imba’eguasuetéva ha’eháicha “Py’aguapy yvýpe, tembipota porã yvyporakuéra ndive” Navidad-pe.

Ko’ágã jaiporu ñembojegua ijoparáva. Pe ha’eva’ekue tapiti ha Pascua ryguasurupi’akuéra ko’ág̃a oñembojoja pe Christus ha ñeñotỹ renda nandi, pe Salvador oikovejeýva ojehechaukávo yvotytýpe ñeñotỹ renda oka gotyo, ha pe Salvador jehechauka Nefita-kuérape ra’angakuéra reheve. Avei roñeha’ã hína rojapo hag̃ua pe Pascua-gui peteĩ época peteĩ ára año rangue. Roñeha’ã roñe’ẽ, rojeipy’amongeta, ha roguerovy’avéva Domingo de Palmas ha Viernes Santo ha opa mba’e imarangatúva oikova’ekue peteĩ teĩ árape Semana Santa javeve.

Pascua ñandereja ñamoherakuã mokõive pe Jesucristo ñeikuave’ẽ ha avei pe Ijeikovejey añete ha oporombovy’áva. Ñane korasõ ipohýi ñaimo’ãvo pe Salvador jehasa’asy yvotyty ha Calvario-pe, ha katu ñane korasõ hory ñaimo’ãvo pe ñeñotỹ renda nandi ha yvága he’ívo “Ha’e oikovejey!”

Pe Primera Presidencia ñenemokyre’ỹ ramoite ñamaña “tenonde hag̃ua Pascua ha Jesucristo Jeikovejeýre—pe marandu iporãvéva umi oñeme’ẽva yvypóra apytépe” ohaiguy ko época tuichakue. Ha’ete aja oĩha peteĩ apo kakuaa teólogo cristiano apytépe ojehecha hag̃ua pe Jeikovejey figurativo ha ñemoha’anga término-pe, ñamoañete ñande doctrina: “pe Jeikovejey he’ise opavave oikova’ekue oikovejeytaha, ha pe Jeikovejey ha’e añete.” “Adán-pe opavave omanoháicha, upéicha avei, Cristo-pe opavave oñemoingovéta.” Jesucristo omondoho ñemano jejokua opa ánga oikovévape g̃uarã.

Ñande añetépe ñanepy’andýi gracia Jesús oikuave’ẽva ñandéve rehe. Jajapyhy Iñe’ẽ “avave ndoguerekoiha mborayhu tuichave kóvagui, peteĩ tapicha omoĩva hekove iñanguirũnguérare”.

C. S. Lewis he’i “Cristianismo ñembo’e he’ise [umi Apóstol-pe g̃uarã] ombo’e hag̃ua tenonderã pe Jeikovejey. … Jeikovejey ha’e mba’e mbytegua peteĩ teĩ sermón cristiano-pe oñemombe’úva Hechos-pe. Jeikovejey, ha hembiapo, ha’ékuri pe ’evanhélio’ térã marandu porã umi cristiano oguerúva.”

Che amomarandu “oĩha peteĩ jeikovejey, … pe ñeñotỹha ndoguerekóiha puʼaka, ha pe ñemano popĩa oñemoĩha Cristo poguýpe.”

Amohu’ã hag̃ua, atestifika opavave omoneĩva umi ñekombida ñande profeta oikovéva ha iconsejero-kuéragui jaguerovy’ave hag̃ua jaipotágui umi evento marangatu oñemoha’angáva Pascua rupi ojuhúta ijoaju Jesucristo ndive okakuaa mbareteveha.

Ojapo sa’i ára, aju aikuaa peteĩ jarýi oha’ãva’ekuégui Pascua ñemombe’u hemiarirõ irundy ary orekóvandi oiporúvo moha’anga’i ñeñotỹ renda, pe ita ojaho’íva pe ñeñoty renda, Jesús, María, umi discípulo, ha pe ánhel rehegua. Pe mitã’i omaña ha ohenduporã ijarýi omobe’úvo pe ñeñoty, ñeñotỹ renda ñemboty ha jeipe’a, ha pe yvotyty escena Jeikovejey rehegua. Upéi ha’e ñangarekópe ombe’upaitejey pe ñemombe’u detalle opombojurujáiva rehe isy ha itúvape omomýivo umi ta’anga’i. Ko momento he’ẽ rire, oñeporandu chupe oikuaápa mba’érepa jaguereko pe Pascua. Pe mitã’i ojesarupi ha akãremiandu mitãmi rehe ombohovái, “Ha’e oikove rupi.“

Ambojoapy che testimonio imba’évape—ha penemba’évape, ha anhelkuéra ha profeta-kuéra mba’évape—Ha’e oikovejey ha Oikoveha, upévagui atestifika, Jesucristo rérape, amén.