Opa Mba’e Ñemoĩjey Ára

Jesucristo Tupao Santokuéra Ára Pahapegua ñemohenda hekopete ha’ékuri heta tembiasa milagróso upemboyvegua ñemohu’ã. Peteĩva ko’ã tembiasa oikókuri 10 ary upemboyve Nueva York estádo nórtepe.

Arapoty 1820-pe, peteĩ mitãkuimba’e imitãva hérava José Smith oho hóga ypypegua ka’aguýpe oñembo’e hag̃ua. Ha’e orekókuri porandu hi’ánga salvasiõ rehegua, ha oikuaaseterei “opa [tupaokuéra] apytégui mávapa pe añeteguáva, ikatu hag̃ua [o]ikuaa mávarepa ojoajúta”. José Smith ojeroviákuri Tupã ombohovaitaha iñembo’e ha oisãmbyhytaha chupe.

Pehechami José noñembo’eihague oikuaa hag̃uánte mávapa oĩporã. Upéva rangue, oñembo’e oikuaa hag̃ua mávapa oĩporã péicha ojapo hag̃ua pe oĩporãva. José oporandúkuri jeroviápe ha oĩ omba’e’apo hag̃ua pe mbohovái ohuptývaicha.

“Iñembo’e añete [ñembohováirõ], Tupã pe Túva ha Ita’ýra, Jesucristo, ojehechauka José-pe ha omoñepyrũ ‘opa mba’e ñemoĩjey’ (Hechos 3:21) oje’etenonde haguéicha Biblia-pe. Ko visiõme, ha’e oikuaaa umi Apóstol ñepyrũha omanomba rire, Cristo Tupao Nuevo Testamento-gua okañyhague yvy árigui”. José Smith ha’etataha tembiporu omoĩjeývo peteĩ jey pe Salvador Tupao yma doctrina, autorida, ha konvénio ha ordenansakuéra.

José Smith he’i: “Ahecha mokõi Tekove, oñembo’ýva yvate che ári, hesape ha iglória ndaikatúiva oje’e. Peteĩva oñe’ẽ chéve, cherenóivo che réra rupi, ha he’i, ohechaukávo ambuévape—Kóva ha’e che Ra’y Ahayhuetéva: Ehendu Chupe!

Ko visiõ ha umi yvagagua tembiasa oúva upe rire rupi, José Smith og̃uahẽ oikuaa Tupã ha Jesucristo oikuaaha chupete voi, ojepy’apyha isalvasiõ eterna rehe, ha orekoha peteĩ misiõ ha’e ojapo hag̃ua. Ha’e avei oikuaa mbo’epykuéra imba’eguasúva pe Trinida atrivúto, hekopy ha ñeimeporãmba rehegua—ha pe Túva ha Ta’ýra ha’eha Tekove ndojoajúiva ha iñambuéva. Jesucristo ha’e Tupã Ra’y teete espíritu ha tetépe.

José Smith omombe’u Tupã pe Túva ha Jesucristo ha’eha tekove orekóva tete. Ha’e he’i, “Pe Túva oguereko peteĩ tete to’o ha kangueguigua, ikatúvare ojepoko yvypóra oguerekoháicha; avei pe Ta’ýra; ha katu pe Espíritu Santo ndoguerekói peteĩ tete to’o ha kangueguigua, ha katu ha’e peteĩ tekove Espíritu-guigua”.

Atestifika pe Túva ha Ta’ýra visíta José Smith-pe ha’ehague pe evénto omoñepyrũva’ekue pe tuicha “opa mba’e ñemoĩjey oje’eva’ekue umi proféta marangatu juru rupi múndo ñepyrũmby guive”.

Mokõiha umi tembiasa milagróso oiko meméva ogueraháva Salvador Tupao restaurado organisasiõ formal-pe ha’ékuri Mormón Kuatiañe’ẽ ñembohasa ha ñeguenohẽ.

“José Smith-pe oñeme’ẽ hague Tupã don ha pu’aka ombohasa haĝua peteĩ registro ymaguare: Mormón Kuatiañe’ẽ— Ambue Jesucristo Testamento. … Ko texto sagrádope oĩ peteĩ Jesucristo ministerio personal ñemombe’u yvyporakuéra hemisferio occidental-gua apytépe Ijeikovejey riremi. [Mormón Kuatiañe’e] ombo’e ko tekove propósito ha omyesakã pe Cristo doctrina, imba’eguasúva upe propositorã. Peteĩ escritura Biblia-pe omoirũva ramo, Mormón Kuatiañe’ẽ otestifika opa yvypóra ha’eha peteĩ Túva Yvagagua oporohayhúva ra’y ha rajykuéra, Ha’e oguerekoha peteĩ plan divino ñande rekovépe g̃uarã ha Ita’ýra Jesucristo, oñe’ẽha avei ko’ág̃a ára ymaguaréicha”.

Salvador Tupao restaurado miembro ramo, “Roguerovia Biblia ha’eha Tupã ñe’ẽ oñembohasa porãha peve; roguerovia avei Mormón Kuatiañe’ẽ ha’eha Tupã ñe’ẽ”. Mormón Kuatiañe’ẽ ha’e ambue Jesucristo testamento, omoañete Biblia añeteguaha, ha omoĩjey umi añetegua hesakã ha iporãitéva Biblia-gui oñehundiva’ekue.

Jesucristo Tupao Santokuéra Ára Pahapegua ombo’e pe Tupao ñepyrũmegua Salvador omoĩva’ekue, ijautorida divina, doctrina, ha konvénio ha ordenansakuéra reheve, oñehundihague yvy árigui. Pe opa mba’e ñemoĩjey ára pahápe ojeprofetisava’ekue pehẽ ramo, umi proféta ha apostolkuéra yma ijeheguiete voi okonferi pe sacerdocio autorida José Smith-pe ha ome’ẽ chupe sacerdocio llavekuéra. Kóva ha’ékuri mbohapyha umi tembiasa milagróso oiko meméva oguerúva pe Salvador Tupao restaurado ñemohenda hekopete.

Sacerdocio autorida oheja Tupã rembiguaikuérape “orrepresenta hag̃ua [Chupe] ha omba’e’apo Hérape”. “Sacerdocio llavekuéra ha’e pe autorida oñeisãmbyhy hag̃ua sacerdocio jeporu Tupã ra’ykuéra ñeimeporãrã”.

Pe Túva ha Ta’ýra sambyhy guýpe, Juan el Bautista, tekove oikovejeýva ramo, omoĩjey, 1.829-pe, pe autorida oñemongarai hag̃ua ñeñapymi rupi angaipakuéra rremisiõrã. Upe aryetépe, mbohapy umi Doce apóstol ñepyrŭha—Pedro, Santiago ha Juan—omoĩjey upe apostolado ha sacerdocio autorida ha llavekuéra adicional.

Séi ary Tupao hekopete oñemohenda rire, Kirtland Templo-pe, Moisés, Elías, ha Elías pe Proféta ome’ẽve José-pe autorida tekotevẽva ojapo hag̃ua Tupã rembiapo ára pahápe.

Moisés ome’ẽ Israel ñembyaty llavekuéra.

Elías ome’ẽ Abraham evanhélio dispensasiõ, oikévape convenio Abrahámico rrestaurasiõ.

Elías pe Proféta ome’ẽ pu’aka ojesella hag̃ua llavekuéra, ome’ẽvo pe autorida ohejáva umi ordenánsa yvy ári ojejapóva tojoaju ára apyra’ỹme, ha’éva família ñembojoaju rrelasiõ eterna-pe ohasáva ñemano.

José Smith ombohasa aja Mormón Kuatiañe’ẽ, ha’e ohupytýkuri rrevelasiõ ohechaukáva Jesucristo Tupao oñemoĩjeytaha. Ha katu Ñandejára ohekombo’e José-pe ani hag̃ua omohenda Itupao ag̃aite. Upe rangue, “profesía ha rrevelasiõ espíritu rupive” Ñandejára oikuaauka José-pe “mba’e araitépe … [ha’e] omohendava’erã Itupao peteĩ [jeyve], ko yvy ári.”

Pe Tupao oñemohenda meme hekopete sacerdocio rrestaurasiõ ha Mormón Kuatiañe’ẽ ñeguenohẽ rire añónte. Umi Mormón Kuatiañe’ẽ kópia ñepyrũha oĩkuri Marzo 26, 1830-pe, ha pe Tupao oñemohenda hekopete Abril 6-pe.

“Jesucristo Tupao Santokuera Ára Pahapegua … ha’e Cristo Tupao Nuevo Testamento-gua restaurado. Ko Tupao oñemboguapy ipiedra angular, Jesucristo, rekove perfecto ha Iñexpiasiõ infinito ha Ijeikovejey literal ári. Jesucristo ohenói jey Apostol-kuéra ha ome’ẽ chupekuéra sacerdocio autorida. Ha‘e ñaneinvita opavavépe jaju hag̃ua Hendápe ha Itupaópe, jarresivi hag̃ua pe Espiritu Santo, umi ordenánsa salvasiõrã, ha jahupyty hag̃ua vy’a hi‘aréva”.

Pe Túva ha Ta’ýra jehechauka José Smith-pe, Mormón Kuatiañe’ẽ ñembohasa ha ñeguenohẽ, ha sacerdocio autorida ha llavekuéra rrestaurasiõ ha’ékuri rrekisíto tenondegua tekotevẽva Ñandejára Tupao restaurado oñemohenda hag̃ua ojapo ko ára 195 ary.

Antiguo Testamento-pe, proféta Daniel ohesa’ỹijo peteĩ kerarecha peteĩ ita rehegua oñeikytĩtava peteĩ yvytýgui ndaha’éi pópe ha omyenyhẽtava pe yvy tuichakue. Peteĩ ary pe Tupao oñemohenda rire, Ñandejára ohekombo’e José Smith-pe Tupã rréino llavekuéra “oñeme’ẽ jeyha yvypórape yvy ári” ha upe “[Jesucristo] evanhélio ojeretaha yvy paha peve, pe ita yvytýgui oñeikytĩmbyrévaicha ndaha’éiva pópe”.

Che atestifika: Ñandejára okumplihína Ipromesa. Pe Salvador Tupao oñemoĩ hína opa múndore ha ha’e tembiporu Tupã ombyatypataha Cristo-pe opa mba’e umi oĩva yvágape, ha umi oĩva yvýpe; ipype jepe”.

Ñandejára rembiapo ára pahápe “ha’e peteĩ káusa ointeresáva Tupã tavayguápe opaite ára; ha’e peteĩ tema umi proféta, rréi ha sacerdote-kuéra oñe’ẽhague vy’apópe; ha’ekuéra oma’ẽ tenonderã gotyo vy’ápe oha’arõvo ko ára ñande jaikovehápe; ha henyhẽvo ñeha’arõmby yvagagua ha vy’aguigua reheve, opurahéi ha ohai ha oprofetisa hikuái ko ñande ára rehe”.

Ko tuichave ha ipaháva opaite evanhélio dispensasiõ apytéguipe, “oikova’erã peteĩ joajupa ha oĩmba ha oĩporãmbáva, ha peteĩ dispensasiõ, lláve, ha pokatu ha glória oñondive ojoajúva, ha ojekuaauka Adán ára guive ko’ag̃agua ára peve jepe. Ha ndaha’éi kóvante, ha katu umi mba’e araka’eve ojeikuaauka’ỹva’ekue pe yvy ojejapo ypy guive … ojeikuaaukáta … ko, dispensasiõ ára oñekumplipaitetahápe”.

Pe proféta José uperire omyesakã, “Opa umi ordenánsa ha tembiaporã pe Sacerdocio peteĩ ára oikotevẽ’akue, pe Ipu’akapáva ñeisãmbyhy ha tembiapoukapy guýpe oimeraẽ dispensasiõme, ojeguerekóta pe dispensasiõ pahápe … oguerúvo pe rrestaurasiõ opa umi Proféta Marangatu juru oñe’ẽva’ekue”.

Añeha’ãkuri omombyky umi “marandu porã” iñimportante ha igloriosovéva elemento básico oimeraẽ tapicha oimeraẽ tenda múndope araka’eve ikatúva ahupyty—pe mensáhe Ñandejára Jesucristo orrestaurahague Iñevanhélio ha Tupao ára pahápe.

Ainvita opavavépe oikuaa ha okomprova hag̃ua ko mensáhe. Apromete umi tapicha “ñembo’e reheve ostudiáva pe Restaurasiõ mensáhe ha omba’e’apo jeroviápe ojehovasataha [Espíritu Santo pu’aka rupive] ohupyty hag̃ua itestimónio tee idivinida ha ipropósitogui ombosako’i hag̃ua múndo Ñandejára ha Salvador, Jesucristo, Jejujey Mokõiha oñeprometeva’ekuépe g̃uarã”. Peñembo’e mbaretéramo peha’arõvo pehupyty peteĩ mbohovái Tupãgui ha pemba’e’apo uperire, mitãrusu José Smith ojapo haguéicha, pende katupyry pehechakuaa ha pembohovái hag̃ua upe testimonio divino okakuaáta.

Atestifika Tupã, pe Túva Ijapyra’ỹva, ha’eha ñande Ru. Atestifika ha ame’ẽ testimónio Jesucristo ha’eha pe Túva Ra’y Ohayhuetéva ha Iñunihénito hetépe. Ha’e ñande Salvador ha Redentor.

Torýpe ame’ẽ testimónio pe Túva ha Ta’ýra ojehechaukahague mitãrusu José Smith-pe, omoñepyrũvo péicha Jesucristo evanhélio Restaurasiõ ára pahápe. Mormón Kuatiañe’ẽ ha’e ambue Jesucristo testamento ha oguereko Tupã ñe’ẽ. Pe Sacerdocio autorida oñerrepresenta hag̃ua Salvador-pe ha oñemba’apo hag̃ua Hérape oĩ jey yvy ári. Ha Jesucristo Tupao Santokuéra Ára Pahapegua ha’e Cristo Tupao Nuevo Testamento-pegua oñemoĩjeyva’ekue. Ame’ẽ che testimonio seguro opa ko’ã mba’e añeteguaha Ñandejára Jesucristo réra marangatúpe, amén.