Pemog̃uahẽ I-don

Jopói ñeme’ẽ ha’e peteĩ jepokuaa social ojejapóva opa cultura, civilización ha milenio-pe. Ára pukukue javeve, tapichakuéra ome’ẽ jopói ojupe omombarete hag̃ua umi relasiõ, ohechauka hag̃ua mborayhu ha aguyje, ha omarkávo umi evento imba’eguasúva ha’évaicha ñemenda, aramboty ha umi arete. Ha ndahaʼéi yvypóra añónte umi Tupã rembiapokue omeʼẽva jopói ojupe! Heta ambue techapyrã ikatúva jahechauka apytépe, ojekuaa umi pingüino ome’ẽha umi ita’i omimbipáva umi ipareharãme, ha umi bonobo (peteĩ chimpancé primo) ome’ẽ yva ombotuichave hag̃ua iñangirũnguéra jere.

Mbaʼe jopóipa peẽ pemeʼẽ? Pepensami peteĩ ára rehe pejuhúramo guare—térã pejapo—pe jopói perfecto peteĩ pehayhúvape g̃uarã. Peẽ peikuaántemavoi pe jopói ha’eha upe pehayhúva oipotaitéva’ekue ha peteĩ mba’e ha’ekuéra omomba’eguasútava. Mbaʼéparakaʼe upe jopói? Pende sýpe g̃uarãparaʼe? peteĩ angirũ? pene memby térã ta´ýra? peteĩ mbo’ehára? pende abuelo? Mbaʼéichapa peñeñandu pejuhúrõ guare upe jopói? Mba’éicha peñeñandu pepensávo upe tapicha pehayhúvare oipe’ávo pe jopói? Upéicha avei, araka’épa oĩ ome’ẽva peẽme pe jopói perfecto, ha mba’éichaparaka´e peñeñandu pemog̃uahẽvo upéva?

Arekórõ guare siete ary rupi, ha aiko che tuvakuéra ndive Arabia-pe, osẽkuri peteĩ pelíkula mitãnguérape g̃uarã hérava Chitty Chitty Bang Bang. Pe pelíkula oñeʼẽ peteĩ coche mágico rehe ikatúva oñemboguata ijehegui, oiko y ári, ha oveve jepeve! Aikuaákuri che rógape Inglaterra-pe ojapoha hikuái peteĩ coche juguete michĩmi ha’etéva Chitty Chitty Bang Bang, ha oh, mba’eichaitépa aipotákuri peteĩ! Ikatúva reitira peteĩ palánkagui, ha osẽ umi coche juguete pepo! Che ru oho peteĩ viaje de negocio-hápe Inglaterra-pe ha oporandu aipotápa ogueru chéve g̃uarã peteĩ mba’e, ha ha’e chupe mba’eichaitépa aguerekosete peteĩva umi coche Chitty Chitty Bang Bang-chagua.

Ou jey i-viaje-hágui, ha ndahechái pe coche. Che añembyasyeterei ha apensa oiméne hesaráihague. Ha katu 10 día rire rupi che aramboty, ha peteĩ mba´yru´imi ojejokua porãva asýva, cheraʼarõhínakuri. Tuicha ta’arõmby reheve, ha nañeanimáiva aha’arõiterei, ha katu aipe’a pe jopói ha ajuhu che coche. Avyʼaiterei ha katu cherasẽ. Aipeʼa pe palánka, ha umi ipepo osẽ, pe coche pelíkulapeguachaite! Mba’eichaitépa cheaguyjeme’ẽ che rúpe ko jopói amomba’eguasuvévare. Heta ary javeve añembosarái upe coche reheve ha añongatu upéva hetaiteve ary pukukue. Aimo’ãmínte che ru ohayhuhague ome’ẽvo chéve upe coche che jepe ahayhu haguéicha avei amog̃uahẽvo upéva.

Ñapensakuaa pe jopói ñeme’ẽ oguerekoha mbohapy ipehẽngue:

1. Pe jopói ñeme’ẽ, ha´e upe ome’ẽva oiporavo, ojapo térã ombosako’i jave pe jopói ha ome’ẽ pe máva ohayhúvape. Kóva heʼise pe omeʼẽva ome’ẽ añeteseha peteĩ mbaʼe he´isetereíva.

2. Pe jopói jeaseptaha jeabripe ohupytýva oasepta jave pe jopói upe ome’ẽvagui—py’ỹi ojehechauka py´andýi, aguyje ha vy’apavẽ—oabri mboyve upéva, sapy’ánte ojorávo peteĩ ojejokuaha ha oabri pe mba´yru oikuaa hag̃ua mba’épa upe jopói.

3. Ha upéi oiméne pe ipehẽngue iñimportantevéva, upe jopói ñemog̃uahẽ. Ñamog̃uahẽ peteĩ jopói oñeme’ẽva’ekue añetete, tuichave mba’e upe ñamog̃uahẽguinte ha upéi ja’abri upéva. Jepe, hetave, jahechakuaáguinte pe jopói mba´épa ovaléva ha jahechauka aguyje pe ome’ẽvape. Jahupyty añete hag̃ua peteĩ jopói, ñamomba’eguasuva’erã ñandejehegui, jaipuru porã hag̃ua upéva ñande rekovépe, ha upéi ñanemandu’a aguyje reheve pe ome’ẽva’ekue rehe.

Peteĩ jopói ñemog̃uahẽ ndaha’éi pasivo, ha katu peteĩ proceso jajaposéva ha imba’eguasúva ohasáva mombyryvéva peteĩ mba´yru je’abríguinte. Ñamog̃uahẽ ha’ehína ñamomba’e ha ñañembojoaju pe jopói ha pe ome’ẽva korasõ ndive peteĩ tape omombaretéva pe joaju oĩva pe ome’ẽva ha ohupytýva apytépe. Apensávo upe coche juguete rehe ogueru jey chéve heta mandu’apy hechapyrãva, añandu jeývo che ru mborayhu ha ñeñangareko pypuku cherehe, oñemoha’angáva upe jopói rupi ha ambue ojeipapakuaa’ỹva mba’e pojera rehe ojapova’ekue rupive.

Ñande Ru Yvagagua oreko hetaiterei don resape ha añetegua oñembosako’íva oñohẽ hag̃ua peteĩteĩ ñande ári, Ita’yrakuéra omomba’eguasúvape. Umíva osyry pe ñane Me’ẽhára Ipojerávagui, Ikorasõ ipy’aporãvagui peteĩ ykuáicha pe tave’ỹme. “Opa jopói iporãva ha opa don perfecto ou yvatégui, ha oguejy pe tesape Túvagui.” Ñane konvénio ndivegua joaju Túva ndive, Ha’e upe Me’ẽhára tapiaitegua ha ñande umi tekomirĩme jahupytýva.

Ha katu ndaikatuiramo’ãkuri jahupyty mba’eve upe Túva don tuichavéva’ỹ rehe, upe I-Cordero ohayhuetéva, Ita’ýra, Jesucristo. Opa umi ñande Ru don osyry ha ojeactiva pe Salvador ñeikuave’ẽ voluntario rupi Getsemaní-me ha pe kurusúre ha Ijeikovejey triunfante rupive. Jesucristo, ñane Redentor iporiahuverekóva, ha’e pe don supremo oúva umi tesape ñande Ru reheguágui. “Ha katu Itaʼýra don-pe Tupã ombosakoʼivaʼekue [ñandéve g̃uarã] peteĩ tape iporãvéva.”

Añe’ẽse peteĩ don opa mba’e ojapyhýva añetegua opave’ỹva rehe omopyendáva ñande katupyry jahupyty hag̃ua opa mba’e ñande Ru ome’ẽséva ñandéve—peteĩ don tekotevẽpy kuaapy rehegua, ojeacepta paitévo ha oñemog̃uahẽvo pe ánga pypukúpe, omohesakã umi vy’a ha jehasa’asy tekovepegua ha umi ñane porandu oñembohovai’ỹva: Ha’éva añetehápe ñande ha’eha Tupã ra’yrakuéra. Upe añetegua ñanembopytuhẽ! Iporãiterei! Ha ndaha’éi figurativo.

Peñeimahinamína pehenduhahína ko mbaʼe peteĩha jave! Añetehápe nde ha’e Itajýra rejehayhuetéva. Añetehápe nde ha’e Ita’ýra hepyetéva. Ha pe tape peimeháme ha’eha I-plan vy’apavẽ rehegua. Imborayhu opa mba’e oikuaáva reheve, Ha’e oikuaa porã mávapa peẽ peñembou mboyve ko yvy ape ári ha mba’épa pehasa ko’ág̃a peve pende rekove terrenal-pe, ha Ha’e iporiahuverekópe oplanea peteĩteĩ peẽme g̃uarã opa ko’ẽko’ẽve jave. Ha oh, mba’eichaitépa Ha’e oipota peteĩ ára peẽ peho jey Hendápe, pehupyty hag̃ua pe propósito supremo opa umi I-don iporãitévagui, tekove ijapyra’ỹva Hendive.

Pe oñeporandúva ndaha’éi añeteguápa ko don añetegua ỹramo jahechakuaátapa ha ñamog̃uahẽtapa upéva. Túva ome’ẽmakuri ñandéve upe don. Pe Salvador ohepyme’ẽma pe don propósito paha repykue. Ha katu oñembo’éramora’e peẽme kóva, oje’era’e upéva, ha ojepurahéira’e ko añeteguágui heta arýma, ikatu pe hechapyrã tuichaitereíva ymaite guive oñehundihague ha napeñanduvéima ipu’aka ha ipy’aguapy.

Ko don hepyetéva entendimiento rehegua—ha opa upe mba’eporã, py’aguapy ha ta’arõmby osyrýva chugui—ndojeaceptáiramo, ndoje’abríri ha noñemog̃uahẽi, mba’eichaitépa peteĩ pérdida vaiete ñandéve g̃uarã! Iñembyasyeteva’erãpa upe Me’ẽhárape g̃uarã! “Ha mba’épa ohupytýne pe kuimba’e oñeme’ẽvape peteĩ don, nomog̃uahẽiramo upe don? Péina ápe, ndovy’ái upe oñeme’ẽva rehe chupe, ni ndovy’ái upe don máva ome’ẽva rehe chupe.”

Pokombida pehupyty hag̃ua, taha’e peteĩha jave térã tuichave medida-pe yma guarégui, pe ñeikumby hechapyrãva peẽ ha’eha añetehápe Tupã ra’yrakuéra pejehayhuetéva. Pejorava’erã pe ojejokuaha, peipe’a pe kuatia ojaho’íva, pe’abri pe mba’yru, ha activamente pemog̃uahẽ aguyje mirĩ reheve, peteĩ ñeikumby añetegua ha ipotĩva ko añetegua fundamental-gui. Espíritu Santo ome’ẽkuaa testimonio pene korasõme añetehápe peẽ ha’eha pe Ijyvatevéva ta’yrakuéra.

Pemog̃uahẽporã vove ko añetegua hechapyrãva pene angaitépevoi ha peñandu pe py’aguapy ha py’akyrỹi upévagui, opaite pene paradigma oñemoambue! Ikatu peñandu Imborayhu, pehendu Iñe’ẽpu, ha pehechakuaa Ipo, taha’eha’e upe oiko, térã ndoikóiva, pende rekovépe. Embopyahukuaa mba’éicha rejehecha ndejupe ha ambuekuérape. Pene konvénio ndivegua joaju pende Salvador ndive imbaretevéntema, ha ko don he’ẽva lente rupive, pe tekove oguereko peteĩ mimbi, porãngue ha ta’arõmby ipyahúva.

Peñembo’emítapa pentende hag̃ua añetehápepa pehupytyhína ko kuaapy omoamambuéva pene ánga pypukukuveha? Pemog̃uahẽmítapa pe don? Pejapo pykupyve, sãsomeve, hetaitevétapa araka’eve upemboyve pejapo haguéichagui—ha pejapóvo pehupyty hag̃ua opa umi ambue don upévandi oúva?

Ikatu peñeporandu, “Mba’épa ikatu ajapo ahupyty hag̃ua ko don Tupãgui?”. Néi, añetehápe, mba’eve. Ha’e peteĩ don oúva pe Me’ẽháragui. Ha’énte peteĩ hecho. Pehejánte tog̃uahẽ. Peẽ ha’e Ita’yrakuéra. Ha’e penderayhu. Ani pembojetu´u upéva. Ani pejoko pe don ñemog̃uahẽ pepensávo oimeháichávo napemereseiha. Añetehápe ni peteĩ ñande apytépe “omerese”—opa umi Túva don ojehupyty pe Mesías Marangatu mérito, poriahuvereko, ha grásia rupive añónte, ha katu mba’eichaitépa Ikorasõ generoso oipotaiterei peteĩteĩ Ita’yrakuéra ohupyty umíva! Upéi, oñepurũvo pene ñeikũmby pyahu térã oñembopyahúva, pevy’a peaguyjeme’ẽvo upe jopói Me’ẽhárape.

Ajuhu guive che jerovia arekópe 20 ary mbytépe, apáy pe ñeikumbýpe che ha’eha añetehápe peteĩ Tupã ra’y. Amoinge pypukuvévo chepype ko don, aikuaa hesakãve mávapa che ha mba’éichapa ajehayhu porãmba. Umi mba’e chepytyvõva’ekue akakuaa hag̃ua entendimiento-pe ha’e umi escritura ñe’ẽ, che jehovasa patriarcal, templo-pe ñetupãitũ, aservi ambue tapichápe ha pe ñembo’e marangatu che Ru ndive. Chemopy’andýi mba’éichapa umi ñembyasy, mba’e’asy ha jehasa’asy che rekovépe ymave oñemboguapy, oñembopy’aguapy, ha heta mba’e ojesuperánera’e aikuaárire ko añetegua porãite.

Moroni ñanemokyre’ỹ “ani hag̃ua penega Tupã don,” ha katu “peju hag̃ua Cristo-pe, ha pejejagarra hag̃ua opa don iporãvare,” Ikatu peju Cristo-pe jerovia reheve Imborayhúre ha pemog̃uahẽ opa I-don vy’apavẽ, py’aguapy, ta’arõmby, tesape, añetegua, revelasiõ, kuaapy ha arandu rehegua—pene akã tenonde gotyo, pende jyva ojepysóva, ha pende po ojepe’áva reheve, peimẽma pemog̃uahẽ hag̃uáicha. Ha peẽ ikatu pehupyty ko’ã don peime haguére seguro ha peñemopyenda peikuaávo peẽ ha’eha peteĩ Tupã rajy pejehayhúva, peẽ ha’eha peteĩ Tupã ra’y ojehayhuetéva, ha Ha’e ome’ẽ peẽme don ramo Ita’ýra perfecto ha imarangatúva penderredimi, pendehustifika ha penemomarangatu hag̃ua.

Peẽ ha’e peteĩ Tupã ra’y ha rajy. Kóva ndaha’éi peteĩ purahéi iporãmínteva japurahéiva. Peaceptamítapa, pe’abri, ha pemog̃uahẽ Chugui ko don kuaapy ha ñeikumby rehegua? Peñongatu porãtapa tesoro hepyetéva ha’ehaicharamo? Pehupyty jey ko don, térã ikatu añetehápe pehupyty peteĩha jave, ha peheja tomoambue opa mba’e pende rekovépe. Kóva ha’e pe tape iporãvéva Tupã ombosako’iva’ekue peẽme g̃uarã Ita’ýra don rupive. Peẽ añetehápe peikove peguereko hag̃ua vyʼapavẽ! Jesucristo rérape, amén.