“Peju Cherendápe … Pomonguera hag̃ua”

Yma roiko peteĩ óga ojeréva yvyramáta iporãmbajepéva rehe. Pe ojeikeha ykére oĩkuri peteĩ sauce máta iporãitereíva. Peteĩ pyhare ñembyasyrã, oipeju peteĩ yvytu´atã tuichaitereíva, ha pe sauce ou ho’a. Oñeno yvýpe upe hapo okápe ha upéva iñembyasýkuri ijehecha.

Aimémakuri ambojere hag̃uáicha pe motosierra ha aikytĩ pe yvyramáta jepeʼarã ore vesíno oúrõ guare odiparahápe chejoko hag̃ua. Chejaʼo ajeise haguére pe yvyramátagui, ha haʼe oremokyreʼỹ hatã ani hag̃ua rojehekýi chugui. Upéi katu ohechauka peteĩ hapo oĩva gueteri yvýpe ha heʼi romopuʼãramo pe yvyramáta, roikytĩramo hakã ha romombarete, umi hapo ojejagarra jeytaha.

Che katu naimoʼãi ha chepyʼamokõi mba’éichapa peteĩ yvyramáta ojehecha porãva ho’aha ha oĩva apañuãime ikatúta oikove ha hekove jey. Ajepy´amongeta oñepyrũ jeýramo jepe okakuaa, katuete ndoikovemoʼãiha ambue yvytu´atã oúvape. Ha katu roikuaágui ore vesíno ogueroviaha pe yvyramáta oguerekoha gueteri henonderã, roho heseve pe plan rehe.

Ha upe resultádo? Nda´aréi uperire, rohecha oikoveha gueteri oñepyrũramo guare hapo pe yvyramáta. Ko’ágã, 12 ary rire, pe yvyramáta ikyre’ỹ ha henyhẽ tekovégui, hapo mbarete ha peteĩve jey ou ojekuaa porã asy.

Ajotopa jave Santo-kuéra ndive ko yvóra jerére, chemandu’a ko sauce máta rehe ha mba’éichapa oĩha ñeha’arõmby ha’etéramo jepe opa mba’e okañymbamaha. Heta oĩ peteĩ árape oguerekova´ekue umi testimónio evanheliopegua imbarete ha ikyre’ỹva upe sauce-icha. Upéi, i-motivo-kuéra personal rupiete, umi testimónio ou ikangy, ogueraháva upe jerovia okañy. Ambuéva katu ojejagarra umi hapo ipo´ivehápe oñakaramáva pe evanhélio yvy rehe.

Peteĩ ha jeyjeyve, che inspira hetaiterei tapicha rembiasakue oiporavóva ombopyahu idiscipulado ha ou jey hógape, pe Tupao. Omboyke rangue umi ijerovia ha ojeguerovíava rehe ha’erõguáicha jepe’a ndovaléiva mba’everã, upéva rangue ombohovái hikuái umi impulso espiritual ha ñekombida mborayhúpe ou jey hag̃ua.

Aha peteĩ conferencia de estaca-hápe Corea del Sur-pe peteĩ miembro ou jeyvahína okomparti: “Cheaguyjeme’ẽ hermano-kuérape oha’arõre hikuái o’acepta che jerovia’ỹ ha che rekokangy, ipojái haguére cherehe ha avei miembro-kuérape akóinte ipy’aporãiterei haguére chendive. Che jerére areko gueteri heta angirũ ndoumeméiva tupaópe. Ijagrasiadoitereíma, téramo he’i ojupe hikuái ou jey hag̃ua Tupaópe ohupyty jey hag̃ua ijerovia. Aimo’ãmínte opavave hikuái oiméne oipotaitereiha pe jerovia.”

Opavave oipotaiteréiva pe jerovia, pokombida peju jey hag̃ua. Ame´ẽ peẽme che ñe´ẽ pende jerovia ikatuha oñemombarete petupãitũ jeývo Santo-kuéra ndive.

Peteĩ ex-misionero África-pegua ohai peteĩ Tupao líder guasúpe, ojerurévo chupe disculpa ha ohekávo perdón oñekoʼõi haguére upe omboʼevaʼekue peteĩ jepokuaa cultural rehegua, upéi ogueraháva chupe oheja Tupao. Teko mirĩme haʼe heʼi, “Ñembyasyrã, añekoʼõihague ojapómava 15 ary, ohepymeʼẽuka cheve tuchaiterei. Heta mba’e akañy—hetave aimo’ãvagui. Atĩeterei umi mbaʼe vai rehe ikatuvaʼekuéne ajapo pe tapére, ha katu opa mbaʼe ári avyʼaiterei atopa haguére che rape ajevy hag̃ua.”

Opavave pehechakuaávape umi okañyva’ekue, pokombida peju jey hag̃ua ikatu hag̃uáicha pe’u jey pe evanhélio yva vy’apavẽ.

Peteĩ hermana Estados Unidos-pegua oñemboyke Tupaógui heta ary pukukue. Iñemombe´u ou jeyhague ogueru umi mbo´epy ipu’akapáva tuvakuéra ha ogayguakuérape g̃uarã oñembyasýva umi ohayhúva oñemomombyry haguére. Ha’e ohai:

“Ikatukuaite ambohysýi hetaiterei mba’érepa añemboykehague Tupaógui, pe evanhélio ha ja’eporaséramo g̃uarã, che rogayguágui. Ha katu añetehápe noimportái hikuái. Ndajapói peteĩ decisión tuichaitereíva ahejávo Tupao—ha katu oiméne ajapo mil jeiporavo. Ha katu peteĩ mbaʼe ymaite guive aikuaáva haʼehína che tuvakuéra añetehápe ojapohague peteĩ decisión tuchaitereíva, ha ojepytaso mbarete hese. Haʼekuéra oelehi cherayhu.

“Ndaikatúi aikuaa mboy tesaýpa oñeñohẽnera’e, mboy pyharépa ojeke’ỹre, ni mboy ñe’ẽpa py’aite guive ñembo’épe oje’énera’e cherehehápe. Ha’ekuéra noñemoñe’ẽi chéve che angaipa rehe; upéva rangue, oñemoñe’ẽ chéve che angaipareko rehe. Ha’ekuéra nachemoñanduvaíri hogapekuéra ha umi ogaygua añembyaty jave; oimeraẽva umi temiandu che ajapova’ekue. Upéva rangue, haʼekuéra chemog̃uahẽporã meme gueteri. Oiméne ohecháraʼe hikuái che resape iñypytũha ohóvo. Téramo haʼekuéra oikuaa pe tekove che haʼéva upe javete haʼeha peteĩ kuarahy´ãmínte máva ag̃uahẽtava gueteri aiko.

“Upe che rape asẽhagueTupaógui ijetuʼu haguéicha, upéicha avei che rape ajevykuévo. Ha katu peteĩ mbaʼe ndahasyietéva aju jeykuévo haʼe pe temiandu aime jeyha che rógape moõ aime hag̃uáme.”

Che mensáhe ko árape ha’e opavave oñanduva’ekuépe yma pe Espíritu ha katu pemba´eporandúva oĩpa peteĩ tape ojeju jey hag̃ua térã peteĩ tenda peẽme g̃uarã Jesucristo Tupao ojerrestaurava´ekuépe. Ha’e avei oimeraẽvape g̃uarã umi apenami oikóva ogueropu’aka térã umi ojepy’ara’ãva oñemomombyry hag̃ua.

Ko mensáhe ndaha’éi peteĩ desafío, ha ndaha’éi peteĩ kondéna. Ha’e peteĩ ñekombida, oñemysãiva mborayhúpe ha peteĩ potapy añetete reheve peñemog̃uahẽ porãite jey hag̃ua pende róga espiritual-pe.

Añembo’ékuri peñandu hag̃ua Espíritu Santo testimonio pehendúvo ko’ág̃a ko ñande Salvador, Jesucristo ñekombida mborayhu ha ñe’ẽme’ẽ iporãmbajepéva:

“Ndapejeremo’ãipa ko’ág̃a cherendápe, ha napeñearrepentimo’ãipa pene angaipágui, ha napeñekonvertimo’ãipa, che pomonguera hag̃ua?”

Opa semánakue oĩ heta ombohováiva Salvador ñekombida ojevývo pe discipulado ha Tupao rembiporãme, kirirĩ ha tekomirĩmime ohekávo pe ñemonguera Jesús oñe’ẽme’ẽva. Ha umi ñemombe’u sapy’apy’a oñemosarambíva rovakerã, peteĩ número récord ñane mitãrusukuéra oiporavo opyta mbarete hag̃ua ha ombokakuaa hag̃ua ijerovia Jesucristo rehe.

Oĩrõ guare Jesús seguidor-kuéra Capernaúm-pegua hasyva´ekuépe Iñembo’epy ha oiporavo osẽ oho, ojere Ijapostol-kuéra gotyo ha oporandu: “Peẽpa pehose avei?”

Kóva ha’e pe ñeporandu peteĩteĩ ñande ñambohováiva’erã ñambohovakévo umi ñande jepy’ara’ã tee ára og̃uahẽ jave. Pedro ñembohovái Jesús-pe aragua´ỹ ha hesakãporãva: “Mávapepa rohóta? nde reguereko ñe’ẽ tekove ijapyra’ỹva.”

Upéicharõ, pemomba’évo pe Salvador ñekombida peju jey hag̃ua Hendápe, mba’épa ikatu peikuaa pe sauce rembiaságui?

1. Pe jajevy jey ndaha´éi jepi mba´e hasy´ỹva ha ñanemoñanduporãmbáva, ha katu ovale la pena. Ore sauce oñembo’y jeývo yvate, oñeikytĩmbaite umi hakã. Ndaha´éikuri iporãmbáva. Ñande avei ikatu ñañeñandu ñanekangyha ñañemboyke jave umi ñande rape tujágui ha jajehekýi pe orgúllogui. Pemoma’ẽvo pende jerovia Jesucristo ha Iñevanhélio rehe—pe yvyra ropyta ha umi hapo—ome’ẽta peẽme pe ñeha’arõmby ha pe py’aguasu peñepyrũ hag̃ua pepyrũ tapykue gotyo.

2. Heta ary ohasa jepe ore sauce imbarete ha iporã jey hag̃ua yma guaréicha. Koʼág̃a katu imbarete ha iporãiteve yma guarégui. Peha´arõkuaántekena pende jerovia ha testimónio okakuaa aja avei. Upévape oike ani peñekoʼõi umi komentário ojeʼejeʼereívare, haʼévaicha “ Moõpiko reimerakaʼe koʼã ary pukukue javeve?”

3. Pe sauce araka’eve ndoikovéiramo’ã oñeñangareko ha oñemombarete meme’ỹre. Pemombaretéta pende jerovia ha pende testimónio pevy’ávo mesa sacramental-pe opa semánakue ha petupãitũramo Ñandejára rógape.

4. Pe sauce oikotevẽháicha kuarahy resape umi hakã ha hogue okakuaa jey hag̃ua, upéicha pende testimonio okakuaáta peiméramo peñandukuaa hag̃uáicha pe Espíritu temiandu ha testimónio. Peikuaa Amulek-gui omombe’uva’ekue ára ha’érõ guare miembro menos activo he’ívo, “Añehenói heta ára ha nahenduséi.”

5. Che vesíno oikuaákuri mba’épa ikatu oiko jey pe sauce-gui. Upéicha avei Ñandejára oikuaa pene potencial divíno ha mba’épa ikatúva og̃uahẽ oiko pende jerovia ha pende testimóniogui. Ha’e araka’eve noñeme’ẽmo’ãi penderehe. Jesucristo Expiasiõ rupive, opa mba’e oñembyaíva ikatu okuera.

Che testígo ojevy’aha yvágape umi ou jeýva rehe. Peñeikotevẽ, ha pejehayhu. Atestifika Jesucristo ha’eha ñande Salvador ha Ha’e ohovasaha opa umi ou jeývape Hendápe tuichave py’aguapy ha tuichave vy’a reheve. Ijyva poriahuvereko noñembotýiri ha katu ojepe’a ha ojepyso peẽme g̃uarã. Nda’aretereíri peju jey hag̃ua. Opa ore korasõ mborayhu reheve, pomog̃uahẽporã ógape. Jesucristo rérape, amén.