Ñembosako’i Personal Jajotopa hag̃ua Salvador ndive

Che hermano ha hermana-kuéra pohayhuetéva, octubre ohasávape, Presidente Russell M. Nelson ombo’e, “Ko’ág̃a ha’e ára peẽ ha che ñañembosako’i hag̃ua Ñandejára ha Salvador, Jesús upe Cristo, Jeju Mokõiháme g̃uarã”. Presidente Nelson oñe’ẽ jave pe Jeju Mokõiháre, akóinte vy’a rorýpe. Upevére, peteĩ mitãkuña Primaria-gua nda’aréi he’i chéve ha’e ojepy’apyha oñeñe’ẽ javénte pe Jeju Mokõiháre. Ha’e he’i, “Che akyhyje oikótagui mba’e vai Jesús ou jey mboyve”.

Ndaha’éi mitãnguéra añónte ikatúva oñeñandu péicha. Ñemoñe’ẽ iporãvéva chupe, peẽme ha chéve g̃uarã ha’e jasegi hag̃ua Salvador mbo’epykuéra. Umi iñehekombo’e ndaha’éi mba’e ñemi ni mba’e hasýva. Jasegi vove umíva, natekotevẽi jakyhyje térã jajepy’apy.

Iministério yvy arigua opa potávo, Jesucristo-pe oñeporandu araka’épa Ha’e ou jeýta. Ombohováivo, Ha’e ombo’e mbohapy parávola, ojehaíva Mateo 25-pe, mba’éichapa ñañembosako’iva’erãre jajotopa hag̃ua Hendive—taha’e Ijeju Mokõiháme térã ñasẽ vove ko múndogui. Ko’ã ñehekombo’e oñeikotevẽ ñañembosako’i ñandejupe jajotopa hag̃ua Hendive ha’e rupi imba’eguasuvéva tekove jehupytyrãme.

Pe Salvador omombe’u tenonderã parávola diez vírgen rehegua. Ko parávolape, diez vírgen oho peteĩ ñemendápe. Cinco iñarandúva ogueru ñandy omyanyhẽ hag̃ua imba’erendy, ha cinco iñarandu’ỹva ndoguerúi. Oñemoherakuãvo pe menarã og̃uahẽtamaha, umi vírgen iñarandu’ỹva osẽ ojogua hag̃ua ñandy. Ou jeývo hikuái, ohasáma upe ára; pe okẽ karuguasúpe oñembotýma.

Jesús ohechakuaa mbohapy mba’e ko parávolagui ñanepytyvõ hag̃ua. Haʼe omyesakã:

“Ha upe ára, Che aju vove che glóriape, oñekumplíta upe parávola Che ha’eva’ekue diez vírgen rehegua.

“Umi iñarandúva ha omog̃uahẽva’ekue añetegua, ha ojapyhyva’ekue Espíritu Santo oisãmbyhy hag̃ua chupekuéra, ha noñembotavyiva’ekue—añetehápe Che ha’e peẽme, ko’ãva … ogueropu’akáta pe ára”.

Ambue ñe’ẽme, ha’ekuéra natekotevẽi okyhyje térã ojepy’apy ogueropu’aka ha oñakãrapu’ãtagui hikuái. Ha’ekuéra ipu’akáta.

Ñanearandúramo, ñamog̃uahẽ pe añetegua ñamoneĩvo Jesucristo evanhélio sacerdocio ordenánsa ha konveniokuéra rupive. Upéi, ñañeha’ã ñaime hag̃ua tekomarangatúpe akói jaguereko hag̃ua Espíritu Santo ñanendive. Ko katupyry jahupytyva’erã peteĩteĩ ha ñandete, sa’i sa’i. Umi ñetupãitũ rehegua mba’e’apo hi’aréva, ñandete jajapóva, ha avave oikuaa’ỹvagui okombida Espíritu Santo-pe ñande raperechauka hag̃ua.

Mbohapyha mba’e Jesús ohechaukáva ha’e ani hag̃ua oĩ ñanembotavýva. Pe Salvador omomarandu:

“Pejesareko ani avave penembotavy.

“Oĩtagui heta che rérape oúva, he’ívo, Che ha’e Cristo; ha hetápe ombotavýta”.

Pe Salvador oikuaákuri umi impostor oñeha’ãta ombotavy jepe ojeporavopyrévape ha heta temimbo’épe oñembotavytaha. Ndajaroviaiva’erã umi japúpe he’ívape orekoha aprovasiõ divína ni jaike umi ñe’ẽte re’ẽme térã umi tenda ñemíme ñañehekombo’e hag̃ua umi oporombotavýva rehe.

Mormón Kuatiañe’ẽ ñanembo’e mba’éicha ikatu jahechakuaa umi oporombotavýva umi temimbo’égui. Temimbo’ekuéra akói omotenonde Tupãme jeguerovia, Chupe jeservi, ha iporãva jejapo. Nañanembotavymo’ãi avave jaheka ha jajapyhy jave ñemoñe’ẽ umi tapicha ojejeroviakuaávagui ha’éva Salvador discípulo ijeroviarekóva.

Ikatu avei jajei mbotavýgui ñatupãitũ meme rupi templo-pe. Kóva ñanepytyvõ jareko hag̃ua jehecha ijapyra’ỹva ha ñanemo’ã umi influénsia ikatúvagui ñanderesarea térã ñanemboyke konvénio rapégui.

Mbo’epy tuichaite ko parávola diez vírgen reheguáre ha’e ñanearanduha ñamoneĩramo pe evanhélio, ñañeha’ã jaguereko hag̃ua Espíritu Santo ñanendive, ha jajei mbotavýgui. Umi cinco vírgen iñarandúva ndaikatúikuri oipytyvõ umi ndoguerekóivape ñandy; avave ndaikatúi omoneĩ pe evanhélio, ojapyhy pe Espíritu Santo peteĩ taperechauka ramo, ha ojehekýi mbotavýgui ñanderehe. Jajapova’erã ko mba’e ñandejehegui.

Pe Salvador upéi omombe’u parávola talentos rehegua. Ko parávolape, peteĩ kuimba’e ome’ẽ hetáichagua pirapire, ojeheróva talentos, mbohapy tembiguáipe. Peteĩ tembiguáipe ome’ẽ cinco talento, ambuévape ome’ẽ mokõi, ha mbohapyhápe ome’ẽ peteĩ. Ára ohasávo, umi mokõi tembiguái tenondegua omomokõi pe ohupytyva’ekue. Ha katu pe mbohapyha tembiguái oñotỹnte italénto peteĩete. Mokõive tembiguái omomokõiva’ekuépe italénto pe kuimba’e he’i “Iporãite, … tembiguái imba’eporã ha ijeroviarekóva: ndejeroviareko mbovymi mba’e ári, romoĩta heta mba’e ári: eike nde jára vy’ápe”.

Upérõ pe kuimba’e oja’o tembiguái italénto oñotỹva’ekuépe “iñaña ha iñate’ỹ” haguére. Ko tembiguáigui ojeipe’a italénto, ha oñemosẽ chupe. Upevére, ko tembiguái omomokõirire italénto, ohupytyva’eramo’ã jehechakuaa ha jopói ambue tembiguaikuéraicha.

Peteĩ ko parávola mensáhe ha’e Tupã oha’arõha ñambotuicha umi katupyry oñeme’ẽva’ekue ñandéve, ha katu Ha’e ndoipotái ñakompara umi ñande katupyry ambuekuéra orekóva rehe. Jahechami ko kuaapy ome’ẽva’ekue Zusha de Hanipol erudito jasídico siglo 18-pegua. Zusha ha’ékuri mbo’ehára herakuãporãva oñepyrũva okyhyje oñemoag̃uivo ñemanóre. Hemimbo’ekuéra oporandu, “Mbo’ehára, mba’ére eryrýi? Reikókuri peteĩ tekove porã; añetehápe Tupã ome’ẽne ndéve tuicha jopói”.

Zusha he’i: “Tupã he’írõ chéve, ‘Zusha, mba’érepa nde ndaha’éi ambue Moisés?’ Che ha’éne, ‘Nereme’ẽi rupi chéve ánga tuichaite reme’ẽva’ekue Moisés-pe’. Ha añembo’ýrõ [Tupã renondépe ha Ha’e] he’i, ‘Zusha, mba’érepa nde ndaha’éi ambue Salomón? Che ha’éne, ‘Nereme’ẽi rupi chéve Salomón arandu’. Ha, katu, añembo’ýrõ che Apohare renondépe ha Ha’e he’i, ‘Zusha, mba’érepa nde ndaha’ékuri Zusha? Mba’érepa nde ndaha’éikuri pe kuimba’e ame’ẽva’ekue ndéve katupyry ha’e hag̃ua?’ Ah, upévare aryrýi”.

Añetehápe, Tupã ombyasýta ndajajeroviáirõ Salvador mérito, poriahuvereko, ha grásiare ñambotuicha hag̃ua umi katupyry Tupã me’ẽmby jahupytyva’ekue. Ipytyvõ mborayhupópe reheve, Ha’e oha’arõ oiko ñandehegui ñane versiõ iporãvéva. Tañañepyrũ hetaichagua katupyry reheve ndaha’éi mba’e guasu Chupe g̃uarã. Ha peichava’erã ñandéve g̃uarã.

Ipahápe, Salvador omombe’u parávola ovecha ha kavarakuéra rehegua. Ha’e oujey vove Iglóriape, “opa tetãnguéra oñembyatýta henondépe: ha oipe’áta umíva ojuehegui, ovecha rerekua omboja’oháicha ijovecha ha ikavarakuéra; ha omoĩta umi ovecha ijakatúape, ha umi kavara katu ijasúpe”.

Umi oĩvagui Ijakatúape oiko Irréino rupytyha, ha umi Ijasúpe oĩva ndohupytýi jehejapyre. Pe mba’e ombojoavýva chupekuéra ha’ékuri omongarúpa Chupe hikuái Iñembyahýi jave, omboy’úpa Chupe Ijy’uhéi jave, ombohógapa Chupe ha’e jave pytagua, ombyaópa Chupe Ijopívo jave, ha ovisitápa Chupe Hasy térã oĩ jave ka’irãime.

Opavave oñemondýikuri, mokõive umi oĩva akatúape ha umi asupegua. Oporandu hikuái araka’épa ome’ẽ, térã nome’ẽi Chupe tembi’u, hoy’u hag̃ua, ha ao térã oipytyvõ Chupe oiko’asy jave. Ombohováivo, pe Salvador he’i, “Añetehápe Che ha’e peẽme, Pejapóramo peteĩva ko’ã che joyke’y michĩvévare, chéve g̃uarã pejapo”.

Pe parávola mensáhe hesakã: jaservi jave ambuekuérape, jaservi Tupãme; ndajajapói jave, japorodesilusiona. Ha’e oha’arõ jaiporu umi ñane don, talento, ha katupyry jahovasa hag̃ua Túva Yvagagua ra’ykuéra rekove. Impulso divíno ambuekuérape jaservi hag̃ua ojehechauka peteĩ poema épico-pe ojehaiva’ekue siglo 19-pe poeta finlandés Johan Ludvig Runegerg rupi. Che joyke’ykuéra ha che rohendu jeyjeýva pe poema “Chokokue Paavo” ore mitã pukukue aja. Upe poema-pe, Paavo ha’ékuri peteĩ chokokue mboriahu oikóva hembireko ha 10 mitãnguéra ndive yrysykuéra región-pe Finlandia mbytépe. Heta ary ojoapykuéri, hetave iñemitỹ oñehundíkuri, taha’e pe y arapotypegua nieve omboykúva rupi, pe arahakupegua aravai amandáu térã peteĩ araroguekúi ñepyrũmegua eláda. Opa ára og̃uahẽ jave ñemono’õ michĩmi, pe chokokue rembireko ojahe’o, “Paavo, Paavo, nde kuimba’e tuja ndaipo’áiva, Tupã hesaráima ñandehegui.” Paavo katu, py’aguasúpe he’i, “Embojehe’a ipire pe centeno ru’itĩ reheve ejapo hag̃ua mbujape ani mitãnguéra iñembyahýi. Che amba’apo mbaretevéta amokãve hag̃ua umi ñu itujúva. Tupã ñandepy’ara’ã hína, ha katu Ha’e ome’ẽta”.

Umi ñemitỹ oñehundi jave, Paavo he’i hembirekópe omomokõi hag̃ua pirekue ombojehe’éva hu’itĩ reheve ani hag̃ua oĩ ñembyahýi. Ha’e avei omba’apo mbareteve, ojo’óvo umi yvykua ha omokã pe yvy sa’ive hag̃ua iñúme y ro’ỹsa arapotypegua ha araroguekúi ñepyrũmegua eláda.

Heta ary ijetu’u rire, Paavo ipahápe omono’õ peteĩ ñemitỹ porã. Hembireko vy’ápe he’i, “Paavo, Paavo, ko’ãva ha’e ára vy’a! Árama ñamombo hag̃ua pirekue, ha ñambojy mbujape hu’itĩgui añónte ojejapóva.” Ha katu Paavo ojagarra porã hembireko po ha he’i, “Embojehe’a mbyte pe hu’itĩ yvyra pire ndive, ñane vesíno kokue oje’elágui”. Paavo osakrifika imba’ereta ha hogayguakuéra mba’ereta oipytyvõ hag̃ua ivesíno oĩvai ha oguereko’ỹvape.

Salvador parávola ovecha ha karavakuéra rehegua mbo’epy ha’e jaiporuva’erãha umi jopói oñeme’ẽva ñandéve—umi ára, katupyry, ha jehovasa—jaservi hag̃ua Túva Yvagagua ra’ykuérape, ko’ýte umi oiko’asy ha oikotevẽvape.

Che invitasiõ Primaria-gua mitã ojepy’apývape añe’ẽmahague iñepyrũme, ha peteĩteĩ peẽme g̃uarã, ha’e pesegi hag̃ua Jesucristo-pe ha pejerovia Espíritu Santo-re pejapotaháicha peteĩ angirũ pehayhúvare. Pejerovia umi penderayhúvare ha umi Salvador-pe ohayhúvare. Tapeẽte voíke ha peheka Tupã taperechauka pemongakuaa hag̃ua pende katupyry peteĩete, ha peipytyvõ ambuekuérape, hasy jave jepe. Peime porãta pejotopa hag̃ua Salvador ndive, ha ikatúta pejoaju Presidente Nelson ndive pevy’a hag̃ua torýpe. Pejapóvo, peipytyvõ múndope toñembosako’i Jesucristo Jeju Mokõiharã, ha pejehovasáta ñeha’arõ peikotevẽva reheve peike hag̃ua Ñandejára pytu’u ha vy’ápe, ko’ág̃a ha ára oúvape.

Japuraheiháicha peteĩ umi ñane himno pyahúpe:

Jesucristo rérape, amén.