Pene Arrepentimiento Ndaipohýiri Jesucristo-pe; Omomimbi Ivy’apavẽ

Ojapo heta ary peteĩ je’ói Florida-pe, aguapy okápe amoñe’ẽvo peteĩ aranduka. Héra he’ise ñag̃uahẽkuaáiti gueteri yvágape, nañaimeporãmbáirõ jepéma ko’ág̃a. Peteĩ kuña upérupi ohasáva oporandu, “Reimo’ãpa ikatuha péva?”

Ajesarupi, moapañuáme, ha upéi ahechakuaa ha’e oñe’ẽha pe aranduka amoñe’ẽva rehe. Ha’ékuri peichagua vyrorei, “Néi, ne’írã gueteri amoñe’ẽterei kóva, ha katu ha’éta ndéve opa rire”.

O, aje’oisetépa ára tapykue gotyo! Ha’étakuri chupe, “Héẽ, ikatu! Yvága ndaha’éi rupi tekove oĩporãmbávape g̃uarã; ha’e umi tekove oñeperdonava’ekuépe, umi oiporavo jeyjeyva’ekue Cristo-pe”.

Ko ára añe’ẽse umi ñande apytépe sapy’ánte oñandúvape, “Ha’ete arrepentimiento ha ñeñyrõ oikóva opavavépe g̃uarã ha katu chéve g̃uarã nahániri. Umi ha’eñoháme oñeporandúva, “Ajapo memégui peteĩchagua jejavy, oiméne che péichantevoi”. Umi, chéicha, orekóva ára pe konvénio rape ha’ete ijyvatetéva, haimete ojogua peteĩ konvénio yvyty jejupípe!

Peteĩ misionero rechapyrã Australia-pe, Elder QaQaFiji-gua, okomparti peichagua andu itestimónio osẽ mboyvépe: “Aikuaa Tupã cherayhuha, ha katu sapy’ánte añeporandu, ’Oikuaápa Tupã che ahayhuha Chupe?’ Nacherekoporãmbái rupi, ha ajapo gueteri jejavy”.

Upe porandu kyrỹi ha ñanemopirĩvape, Elder QaQa omombyky upe mba’e py’ỹi chepy’apýva. Ikatu peẽ avei peñeporandu, pepensávo “Añeha’ã mbarete, ha katu oikuaápa Tupã añeha’ã añeteha? Ajavy jeyjey jave, oikuaápa Tupã ahayhuha gueteri Chupe”?

Ambyasy ahechakuaa hag̃ua, ha katu che avei amediva’ekue jepi che joaju Salvador ndive mba’éicha aiko porãmba rupive. Aimo’ãva peteĩ tekove ñe’ẽrendupápe he’iseha araka’eve natekotevẽi añearrepenti. Ha ajavy jave, ha’éva ára ha ára, añemomombyry Tupãgui, aimo’ãvo, “Oiméne oñembyasyete cherehe”.

Péva ndaha’éinte añetegua.

Añemoaranduva’ekue reha’arõramo nepotĩ térã reimeporãmbaite reju hag̃ua Salvador rendápe, rejavypaite upévape!

Mba’épa oikóne ñaimo’ãramo umi tembiapoukapy ha ñe’ẽrendu rehe ambue hendáicha?

Atestifika Tupã ojepy’apýrõ jepe ñande jejavy rehe, Ha’e ojepy’apyve upe mba’e oikóvare jajapo rire peteĩ jejavy. Jajútapa Hendápe jeyjeyve? Japytátapa ko konvéniore joajúpe?

Ikatu pehendu Ñandejára ñe’ẽnguéra “Cherayhúramo, [e]ñongatu che rembiapoukapykuéra” ha peñeñandu vai napeñongatúi haguére opa umi tembiapoukapy. Pehejami tapomomandu’a ha’eha avei peteĩ tembiapoukapy ñañearrepenti hag̃ua. Añetehápe, ikatu ha’e tembiapoukapy oje’e jeyjeyvéva umi escritura-pe.

Alma ijupe oñe’ẽme, “O haʼérire che peteĩ ánhel, ha oñemeʼẽrire chéve [che] korasõ oipotáva … ha asapukái arrepentimiento”, ha’e noñeha’ãikuri ñanemotĩ hag̃ua ohechaukávo ñande jejavykuéra. Ha’e osapukaise arrepentimiento peẽ ha che ani hag̃ua jahasa’asy yvórape. Peteĩ mba’e Alma ndaija’éire angaipáre ha’e upéva oguerúgui mba’erasy.

Sapy’ánte chemandu’ava’erã, peteĩ kuatia che syváre ojávaicha, tembiapoukapykuéra ha’eha tape ñañemomombyry hag̃ua mba’erasýgui. Ha avei arrepentimiento. Ñande profeta he’i, “Pe Salvador akói ñanderayhu ha katu ko’ýte ñañearrepenti jave”.

Upéicharõ Ñandejára he’i jave, “Peñearrepenti, peñearrepenti”, mba’étekópa peimo’ãramo Ha’e he’iha, “Pohayhu. Pohayhu”. Peimo’ã Chupe ojeru’asývo peẽme peheja hag̃ua tapykue gotyo upe tekopy penemoñanduvaíva, penekombidávo pesẽ hag̃ua pytũmbýgui ha pejere Hesape gotyo.

Che memby Carly barrio-pe, peteĩ presbítero pyahu oñesũ ohovasa hag̃ua Santa Cena, ha he’i rangue, “Ojapo hag̃ua hikuái nde Raʼy ruguy momanduʼápe”, jejavýpe he’i, “Ojapo hag̃ua hikuái nde Raʼy mborayhu momanduʼápe”. Carly resa henyhẽ tesaýgui umi ñe’ẽ añetegua oikekuévo ipy’ápe.

Ñande Salvador ohasa’asyseva’ekue pe Iñexpiasiõ rasykue Ha’e penderayhu rupi. Añetehápe, peẽ ha’e “pe vy’a oñemoĩva’ekue henondépe” Ha’e ohasa’asy jave.

Ñekombida ñañearrepenti hag̃ua ha’e Tupã mborayhu rechaukaha.

Ja’évo héẽ upe ñekombidápe ha’e ñande jehechauka.

Peimo’ãmi Cristo ra’anga pehayhuvéva. Ko’ág̃a peimo’ã Chupe opuka jajáivo vy’águi peteĩteĩ ára peiporu jave Idon, ha’e rupi Ha’e pe “ñeha’arõ mimbi porãmbaite”.

Héẽ, pene arrepentimiénto ndaipohýiri Jesucristo-pe; upéva omomimbi Ivy’apavẽ!

Ñambo’e upéva!

Arrepentimiento ha’e rupi ñane marandu porãve!

Ndajapytái konvénio rapépe araka’eve jajapo’ỹre jejavy. Japyta konvénio rapépe ñañearrepentívo ára ha ára.

Ha ñañearrepenti jave, Tupã ñaneperdona ñanemotĩ’ỹre, ñanembojoja’ỹre avavéndi, térã ñandeja’o’ỹre ha’e haguére peteĩchagua mba’e pe ñañarrepentihaguére semána ohasávape.

Ha’e ovy’aite opa ára ñanderecha jave ñañesũ. Ha’e hory ñaneperdona hag̃ua Chupe g̃uarã ñande ha’égui tory!

Napeñandúipa añeteha péva?

Upéicharõ mba’ére hasyeterei ñandéve jaguerovia hag̃ua?!

Satana, pe acusador guasu ha mbotavyhára, oiporu ñemotĩ ñanemombyry hag̃ua Tupãgui. Ñemotĩ ha’e peteĩ pytũmby peichaite ipohyietéva, reipe’áramo nde retégui, oñeñandu orekorõg̃uáicha pohyikue térã ipohyiha.

Ñemotĩ ha’e pe ñe’ẽpu neinupãva, he’ívo, “Mba’épa reimo’ãra’e”? “Araka’épa rejapo porãta oimeraẽ mba’e”?

Ñemotĩ nde’íri ñandéve jajapohague peteĩ jejavy; he’i ñandéve ñande ha’eha pe ñande jejavy. Ikatu pehendu jepe, “Ekañy”. Pe oporohayhu’ỹva ojapo opa ikatumíva oheja hag̃ua upe pohyikue ñande pype, he’ívo ñandéve ijyvatetereiha hepykue, hasy’ỹvetaha opytáramo pytũmbýpe, oipe’ávo opa ñeha’arõ’asy.

Satana ha’e ñeha’arõ’asy mondaha.

Ha peẽ peikotevẽ pehendu péva, upévare ha’éta hatãporã ko’ã ñe’ẽ: Nde ndaha’éi ne akãmegua ñe’ẽpu térã pe jejavy rejapova’ekue. Peẽ avei tekotevẽ peje péva hatãporã. Peje Satanáme, “Nahániri ko ára”. Pemoĩ chupe pende rapykuépe.

Peñandu upe mbarete, vy’a’ỹ tupãmegua penembojeréva pende Salvador gotyo, ha pehecha Igrásia oikévo penderekovépe ha umi pehayhúva rekovépe. Apromete pe aravo’i jagueruhaguépe peteĩ korasõ ñembyasy Ha’e gotyo py’aguasúpe, Ha’e upepetéma oĩ.

Pehecháramo peteĩ ojahogávape, ndapeipysomo’ãipa pende po ha peg̃uenohẽ chupe? Ikatúpa peimo’ã pende Salvador-pe ombotovéramo oipyso hag̃ua ipo? Aimo’ã Chupe oikévo pe ýpe, oguejývo opa mba’e guýpe ñaneg̃uenohẽ hag̃ua ikatu hag̃uáicha jajapyhy pytuhẽ pyahu! Avave ndaikatúi oñapymi iguypeve Cristo resape mimbígui.

Pe Salvador akói imimbive ñemotĩ pytũmbýgui. Ha’e araka’eve noñemoĩmo’ãi pende repykue rehe. Pema’ẽ porãmi.

• Peimo’ãmi ko po omoha’angaha repykue.

• Ko po omoha’anga ñe’ẽrendu. Ikatu pepáy ko pyhareve, pejévo peteĩ ñembo’e mbarete, ha peheka pende escritura-kuérape pehendu hag̃ua Tupã ñe’ẽpu. Pejapókuri jeiporavo porã ha petrata tapichakuéra pende jereguápe Cristo ojapotaháicha. Pehenduhína pe conferencia general! Pene ñe’ẽrendu oĩ ko’ápe!

• Térã ikatu umi mba’e ndohoporãmbáira’e. Ipahaitépe hasy jepi peẽme pejapo hag̃ua umi mba’e michĩva, mba’e hasy’ỹ penembojoajúva yvágare. Pejapo umi jeiporavo ndaha’éiva pende orgullosopáva rehe.

• Moõpa oime pende repykue? Jepe oku’épara’e ko po?

Pende repykue ndojojoajúiri pene ñe’ẽrendu rehe. Pende repykue ndoku’éi; araka’eve naiñambuéi. Tupã ome’ẽva’ekue peẽme, ha ndaipóri mba’eve térã avave ikatúva omoambue upéva. Ñe’ẽrendu ogueru jehovasakuéra; upéva añete. Ha katu tepykue ndaha’éi peteĩ umíva apytégui. Pende repykue akói “tuicha Tupã resa renondépe”, taha’eha’e moõpa pendeguerahara’e umi pene jeiporavo.

Ajapo jave jejavy, che apytase konveniogua joajúpe Cristo ndive, ha ha’éta peẽme mba’érepa.

Akakuaa ajapyhývo ýpe ñeñapymi ñehekombo’e ha añemoarandu umi hue okalifika jave peteĩ ñeñapymi, omañaha mba’éicha ojejapo. Pe jaiképa vertical-paitera’e, umi py kuã yvate gotyo ha peteĩ jehypyi’imi reheve? Upéi ojapo hikuái peteĩ mba’e hechapyrãva. Ha’ekuéra ohechakuaa pe hasykue.

Opavave oñapymi ihasykue tee reheve. Pende Salvador añoite pe oikuaáva mba’e hasykue rehevépa peñapymi hína. Aipota peteĩ joaju upe tapicha cheikũmbýva ndive, oikuaáva che korasõ ha mboýpa añeha’ã!

Ha’e oikuaa pe pytũmby tatatĩ oguejyha opa ñande, jaje’óiva ári, pe ñande je’ói ohasaha ysyry ky’a rupi—upévare rejejapyhýrõ jepe upe ierroguigua barra rehe, ñande rupýita.

Jaju Cristo-pe ha’e oje’érõ, “Chepytyvõtapa?” ñeha’arõ’asy reheve, peteĩ seguridad ojekuaaukáva umi Ijyva akói ojepysotaha peẽ gotyo. Arovia ko arrepentimiento jehecha pyahu he’ise ndajaguerekói peteĩ ñe’ẽrendu porãmba jepe gueteri, ñaha’ã ñe’ẽrendu mborayhúre ko’ág̃ã, jaiporavo japyta hag̃ua, jeyjeyve, jahayhu rupi Chupe.

Penemandu’ápa Rey Benjamín tavayguakuérare, ndojaposevéimava ivaíva ha katu ojaposéntema opa ára iporãva? Peroviápa ohupihague hikuái hogaao, oho hógape, ha araka’eve ndojapovéima jejavy? Nahaniriete katu! Pe joavy oĩ ha’ekuéra ndojaposevéima angaipa. Ha’ekuéra ohayhu ñe’ẽrendu! Ikorasõnguéra ojere ha ojoaju Tupãre oñorairõ aja hikuái!

Peteĩ jave, yguasu rembe’ýpe, ahecha peteĩ guyra ovevéva yvytu kóntrape, omongu’e mbaretévo ipepo, haimete pochýpe, ha katu opytávo upe tendaitépe. Upéi ahecha ambue guyra, yvateve. Ojapyhýkuri peteĩ yvytu ojupíva ha oveve hasy’ỹme, omyangekoi’ỹre chupe yvytu. Péva ha’e joavy oĩva ñañeha’ãvo jajapo péva ñandejehegui ha jajeréramo ñande Salvador gotyo, jahejávo Chupe ñanemopu’ã “ñepohãno ipepópe” reheve”.

Líder de Misión ramo Australia-pe, ore visita paha aja peteĩteĩ misionero-kuéra ndive, roñe’ẽkuri 3 Nefi 17-re, oĩháme tapichakuéra hi’ag̃uíva Salvador-gui ha ikatúkuri ohendu Chupe oñembo’évo hesekuéra. Roporandu, “Ikatúramo rehendu Salvador-pe oñembo’évo nderehe, mba’épa reimo’ã Ha’e he’itaha”?

Ahendu imbohovaikuéra ha’ékuri peteĩ umi tembiasa cherekovepegua ijespiritualvéva. Peteĩteĩ ko’ã misionero opyta, ha tesay omyanyhẽ umi hesa romomandu’ávo chupekuéra, “Nde Salvador oikuaa mba’ehasy rehasáva tuichakue. Ha’e oñanduva’ekue!”

Kóva ha’e umi misionero kirirĩ ha kyrỹime omboja’óva: Peteĩ hermana he’i, “Jesús he’íne Túvape, ’Ha’e ojapo hína ikatuporãmíva. Aikuaa mba’eichaitépa oñeha’ã hína.’“ Peteĩ elder he’i, “Opaite ohasava’ekue reheve hekovépe, che orgullosoite hese”.

Ñatantea péva. Ko pyhare, peñembo’e mboyve, peimo’ã Jesucristo pende ypýpe. Ha’e pende avogádo Túva ndive. “Mba’épa he’íta che Salvador pe Túvape cherehe?”

Ha upéi pepyta kirirĩháme.

Pehendu pe ñe’ẽpu he’íva mba’e iporãva penderehe—pe Salvador ñe’ẽpu, pene angirũ porãve, ha pende Ru Yvagagua, añetehápe oĩva upépe. Penemandu’áke, Imborayhukuéra ha pende repykue akói tuicha, tojehu ojehúva.

Aime ko’ápe ame’ẽ hag̃ua testimonio Jesucristo ome’ẽha tesape umi pytũmbýpe oĩvape. Upéicha, umi ára peñandu jave upe ñe’ẽpu he’íva peẽme pekañy hag̃ua, pekañyva’erãha peneaño peteĩ koty ypytũme, pokombida pendepy’aguasu hag̃ua ha jeguerovia Cristo-pe! Peguata ha pemyendy pe tesape—ñande Ñeha’arõ’asy Mimbi Porãmba.

Pejahúvo Hesapépe, pehecháta pende jererére tapicha oñeñadu’akue avei ha’eño, ha katu ko’ág̃a, pe tesape rendy reheve, peẽ ha ha’ekuéra peñeporandúta, “Mba’érepa jakyhyjetera’e pytũmbýpe? Ha mba’ére japyta pukuete upépe?

“Upe Tesape Jára tapeneañua Ijyvápe ha penemoangapyhy ha penderayhu meme”. Tajahayhu meme Chupe ha tajaiporavo Chupe jeyjeyve. Jesucristo rérape, amén.