Jerovia: Peteĩ Ñembojoaju Jeguerovia ha Tekoañete rehegua
Pehechakuaami pe jerovia heñoiha jajeguerovia jave Jesucristo rehe ha ipoty ñande jeroviareko ha ñande rekoañetéramo Hendive.
Arekórõ guare diecisiete ary, ajapo peteĩ ñe’ẽme’ẽ che angirũ José Luis ndive ambo’e hag̃ua chupe mba’éichapa oje’yta. Upéicha peteĩ pyhareve roipuru tiémpo roñembokatupyry hag̃ua. Romohu’ã rire ore mbo’esyry ha asẽvo pe piscina-gui, ahendu che angirũ osapukái ojerurévo socorro. Ha’e ojahoga hína pe piscina ipypukuvehápe.
Añemombo pe ýpe ha a’yta ha’e oĩha gotyo añembo’évo pytyvõ rehe. Chepojáivo ipo rehe anohẽ hag̃ua chupe okápe, che angirũ py’aropúpe ojupi che atukupépe ha ojopy chéve peteĩ jajuvoka. Koʼág̃a katu mokõivévama rojahoga hína. Añeha’ãvo ikatumiháicha ag̃uahẽ hag̃ua pe okápe, añembo’e opa che pu’aka reheve peteĩ milagro-re Tupãgui. Upéi, mbeguekatúpe ha katu joapykuéri meme, Tupã pokatu ojehechauka añandúvo peteĩ po chemyañáva pe piscina hypy’ỹveha rembe’y gotyo, cheguerahávo isegurohápe.
Ko jehasa omoañete peteĩ mbo’esyry ipypukúva presidente Russell-M. Nelson ombo’eva’ekue peteĩ jey: “Peheka vove Ñandejára pokatu pende rekovépe peteĩchagua mbarete reheve orekóva peteĩ tapicha ojahogávahina oñeha’ãva ipytuhẽ, pe pokatu Jesucristo-gui oúva ha’éta pene mba’e.”
Mitãnguéra ha mitãrusukuéra ahayhuetéva, ko árape añe’ẽse penendive pe prinsípio tekotevẽpy jerovia Jesucristo rehe.
Jerovia Cristo rehe He’ise Jajeguerovia Hese
Mbaʼépa heʼise jajerovia Cristo rehe? He’isépa jajeroviaha Hese térã jaguerekoha peteĩ testimónio Ha’e añeteguaha? Upéva ikatu ha’e peteĩ ñepyrũ, ha katu hetave upévagui. Pejepy’amongetámapa raka’e jerovia ha’eha jeguerovia? Pejepy’amongetami pe tapicha pejegueroviavéva rehe: ikatu peteĩ pende rogaygua térã peteĩ angirũ. Mbaʼérepa pejeguerovia hesekuéra? Oiméne pehechágui mborayhu ha pytyvõ ome’ẽ meméva hikuái.
Jaguerekóramo jerovia Cristo rehe, jahechakuaa umi Ijehovasa ha ñamoheñói peteĩ joaju jeguerovia rehegua Hendive.
Mbaʼéichapa ikatu pejegueroviave Cristo rehe?
Peteĩ devocional mitãrusukuérape g̃uarã nda’areiete guare, peñekombidákuri pejepy’amongeta hag̃ua peteĩ jave pende rekovépe pehupytyhague peteĩ tesape mimbi yvagagua. Peha’ãmi ko tembiapo!
Peñepyrũ pejepy’amongetávo Cristo rehe ha upe vy’a Ijexpiasiõ ha Iñevanhélio oguerúva pende rekovépe. Avei, pejapo peteĩ jehaipy umi “mandu’a espiritualmente omyesakãva” Tupã oĩhague upépe peẽme g̃uarã, pende rayhuharakuérape g̃uarã, ha umi tapicha oĩva escritura-pe g̃uarã. Ha ko’ág̃a, ko’ã testimónio ndoguerumo’ãi pu’aka nde rekovépe pe Espíritu ohai peve umi “to’o apére” ne korasõme. Upévare pejepy’amongeta ha pehai opa mba’e Tupã omoĩva’ekue omomba’apo ko’ã milágro og̃uahẽ hag̃ua oñeikotevẽ javete.
Uperire, peipuru ko tembiapo peteĩ oportunidad ramo peñemoag̃ui hag̃ua Tupã ypýpe. Peñembo’e pende Ru Yvagaguápe ha’eramoguáicha peteĩha javéramo. Peikuaauka pene mborayhu ha aguyje Ijehovasakuérare. Jepe peporandu avei Chupe mba’éichapa oñeñandu penderehe ha pe ñesãmbyhy pende rekove oguerahávare.
Pende reko añete ha mirĩ ramo, pehendúta Iñembohovái ha peñepyrũta peteĩ joaju ha’éva penemba’e tee ha oiko’aréva Túva Yvagagua ha Jesucristo ndive. Ndahaʼéi upéva añónte, ha katu umi pende jepokuaa religioso-gui oikóta mba’e he’iséva peẽme g̃uarã! Techapyrã ramo, peha’arõta kyre’ỹme pene ñembo’e, peñemoarandu jave peneaño ha petupãitũ templo-pe, oportunidad ramo peikuaa hag̃ua Chupekuéra ha peime hag̃ua Hendivekuéra.
Jerovia ipoty Tekoañete reheve
Pehechakuaami pe jerovia heñoiha jajeguerovia jave Jesucristo rehe ha ipoty ñande jeroviareko ha ñande rekoañetéramo Hendive. Peipotáramo peteĩ joaju añetegua Cristo ndive, pehechauka Chupe pejapóvo konvénio ha pemomba’eguasúvo umíva jeroviapy ha tekoañetéme. Jajapóvo umi konvénio Jesucristo ndive omopu’ã ñeha’arõ’asy. Oñemomba’évo umíva omopu’ã jerovia.
Pehejami taiporu peteĩ techapyrã chemba’e teéva: Che mitã’irõ guare, peteĩ ára ajuhu che sýpe hasẽ ha’eño. Aporandúvo chupe mbaʼérepa, haʼe heʼi mbeguekatumi: “Aikotevẽ nde tahaʼe mitãkuimba’e hekoporãva.” Aikuaáramo jepe ndaha’eiha che káusa oipy’apýva chupe, ahayhu ha ajeguerovia che sýre avavéicha ha ajapose hekove ani ijetu’ueterei. Upémarõ, tesay che rováre ha opa ñemomba’epýpe ikatúva oreko peteĩ mitã’i nueve ary orekóva, cheñe’ẽme’ẽ chupe upe árape akóinte añeha’ãtaha aiko hag̃ua pe imembykuimba’e heko porãvéva ha amomba’eguasutaha chupe.
Ikatúpa peimo’ãmi pe pu’aka upe ñe’ẽme’ẽ oguerekova’ekue—ha oguerekóva gueteri—cherehe?
Upe ñe’ẽme’ẽ hendive ombohapétakuri che rekove. Aiporavo mboyve, ahecha ombovyʼátapa chupe umi mbaʼe ajapóva. Ko ñe’ẽme’ẽ ñembojoaju ha pe joaju che sy ndive ha’ékuri upe che reko jepytasoha che rekove pukukue aja.
Heta ary rire, aikuaa porãvévo Jesucristo-pe, aikuaáma mba’éichapa amopyendava’erã che jerovia Hese. Ajapo umi konvénio Ñandejára ndive, ha añeha’ãvo amomba’eguasu, Ha’e oñyrõ che angaipakuéra, omboguata che rekove ha “chemyenyhẽ imborayhúgui” che rekove apytu’ũ meve. Cristo omyendy chepype mborayhu pypuku, ñemomba’e ha tekoañete Hese.
Peikumbýpa mba’ére “jerovia ha’e peteĩ prinsípio oñemba’e’apoha” ha “jerovia’ỹre ndaikatuiha ñambovy’a [Tupãme]”?
Peñeha’ãvo pejapo pe ombovy’áva Chupe, pejéta, José-icha Egipto-pe oipy’ara’ãrõ guare chupe Potifar rembireko, “Mba’éichapiko upéicharõ ajapóta ko mba’evai guasu, ha ajapo aingapa Tupã kóntrape?” Ha pembohovakévo ohapejokóva, pejéta pe mitãrusu proféta José-icha, “Che aikuaa upéva, ha aikuaa Tupã oikuaaha, ha ndaikatúi anega; … Aikuaa ajapóramo upéicha ambopochytaha Tupãme.”
Upéicharamo jerovia Jesucristo rehe ha’e peteĩ joaju jeguerovia ojejapova’akue tekoañete ha mborayhúpe. Ambue ñe’ẽme, Tupã mborayhu poriahuvereko aguyjeme’ẽ rehehápe (hesed), jahechauka ñande mborayhu rekoañete (emunah) ñañongatúvo hembiapoukapykuéra.
Cristo oñe’ẽme’ẽ, “Upe oguerekóva che rembiapoukapy, ha oñangatúva … che Ru ohayhúta, ha che ahayhúta chupe, ha ajehechaukáta chupe.” Peñe’ẽme’ẽramo pende rekoañetetaha chupe, Ha’e ohechaukáta Imborayhu penderehe.
Jerovia umi Py’ara’ã Renondépe
Ha katu mba’éicha pembohovaiva’erã umi situasiõ ohapejokóva oikotevẽva umi Imilágro? Jepe umi desafío ndaikatúi ojejoko ha sapy’ánte oporomondýi, peguatánte chupe pendepy’akangy’ỹre Ha’e oĩha gotyo, pe léma PFJ 2025-pegua ñanekombidaháicha: “Pema’ẽ cherehe opa akãremiandúpe; ani peduda, ani pekyhyje.”
Mbaʼéichapa Ikatu Peguata Hendápe Pendepy’akangy’ỹre?
Peñeimahinami peẽ haʼeha peteĩ explorador oĩva peteĩ território ojexplora’ỹhame gueteri. Ikatu hag̃uáicha pehasa umi mba’e pende rapejokótava, peikotevẽ peteĩ tesape ryrúre. Pendejeroviapy Tupãme ha peñemoĩ meme Hendive ha’e upe píla pende linterna-pe g̃uarã. Upéicharamo pejuhúvo situasiõ iñypytũ ha i-peligroso-ha, peguata rangue umíva gotyo tesatũme, pemyendýta pende lámpara henyhẽva jerovia Cristo rehe aséitegui pemyasái hag̃ua ta’arõmby resape pe tape ojeikuaaporã’ỹháme. Pehasamava’ekue ombohetavéta pene ha’arõmby Ñandejára pendejokotaha peguatakuévo.
Moõ pevépa peg̃uahẽne pene ta’arõmby ha jerovia rehe Cristo-re?
Penemandu’ápa che mombe’u piscina-pe guare? Upe pya’aropu javete, pe milágro ou aha’arõ hagueichaite, ha katu Tupã nogarantisái ha’etaha katuete ñande rembipota oipotaháicha. Ñande jerovia oñemombyteva’erã Cristo-re ha ñane ta’arõmby katu Ijehovasakuérare, Ha’e oiporavoháicha oguerahauka. “Peha’arõ umi milágro”, ha katu “jaheja Tupã taipu’akapa ñande rekovépe.”
Tupã Ñe’ẽme’ẽnguéra Itavayguakuéra Ijeroviapývape g̃uarã
Che angirũnguéra imitãva, mba’eichaitépa porohayhu ha rojerovia penderehe! Peẽ Tupã rogaygua ha ta’yrakuéra konveniopegua. Perovia ha pejeguerovia Jesucristo rehe. Ha’e penembokatupyrýta añetehápe peiko hag̃ua Hemimbo’e ramo.
Pokombida peñepyrũ hag̃ua ko árape voi pemongakuaa pende joaju Jesucristo ndive. Peñe’ẽme’ẽ araka’eve ndapehejareimo’ãiha Chupe.
Pende rekoañete, mborayhu ha jerovia Cristo rehe omoldeáta pende reko ha identida Imba’éicha. Pehupytýta jerovia ha mbarete pegueropu’aka hag̃ua Satana je’api. Ha katu pejavy jave, peipotaitereíta Iñyrõ. Ipahápe, pene ta’arõmby tenonderãme g̃uarã ojajaipáta. Ha’e ogueroviáta peẽme Ipokatu pehupyty hag̃ua oimeraẽ mba’e Ha’e oha’arõva pendehegui, jepe pe pokatu peho jey hag̃ua Hendápe.
Atestifika peẽme pe vy’apavẽ oúva ojepurahéivo “pe mborayhu purahéi orredimíva” ha ñañandu “ñanerañuã tapiaiterã imborayhu jyvápe.” Jesucristo réra sagrádope, Amén.