Pe Plan Poriahuvereko rehegua

Año ohasava’ekuépe abril-gua conferencia-pe, pe noticia oporombovy’aitéva Tupao ohupytyhague Kirtland Templo riremínte, Presidente Russell M. Nelson ñanekombida ñañemoarandu hag̃ua pe ñembo’e dedikatório Kirtland Templo pegua, oĩva Doctrina ha Konveniokuéra sección 109-pe. Pe ñembo’e dedikatório, he’i Presidente Nelson, “ha’e peteĩ tutorial mba’éichapa pe templo omombarete espiritualmente peẽme ha chéve ñambohovái hag̃ua umi py’ara’ã tekovegua ko’ã ára pahápe”.

Aime seguro pende sección 109 ñehekombo’e ome’ẽhague peẽme jepy’amongeta penderovasava’ekue. Ko pyharépe, akomparti mbovymi mba’e añemoaranduva’ekuépe asegívo ñande proféta ñekombida. Pe tape ome’ẽva py’aguapy che ñehekombo’e chegueraháva rupi chemomandu’a Ñandejára iporiahuverekoha ha ñande Ru Yvagagua plan salvación rehegua ha’eha añetehápe peteĩ plan poriahuvereko rehegua.

Ikatu peikuaaháicha, “oñemokyre’ỹ umi misionero oñehenói ramóvape orresivi hag̃ua pe templo-gua investidura pya’ete ikatuháicha ha oho hag̃ua templo-pe py’ỹiete umi circunstancia ohejaháicha.“ Oñeinvesti rire, ha’ekuéra avei “ikatu oservi templo … obrero ramo oñepyrũ mboyve i-servicio misional.”

Pe ára ohasava templo-pe oike mboyve Centro de Capacitación Misional-pe (CCM) ha’ekuaa tuicha jehovasa umi misionero pyahúpe oikuaave hag̃ua umi templo-gua konvéniogui okomparti mboyve umi konveniogua jehovasa yvóra ndive.

Ha katu añehekombo’évo sección 109-pe, añemoarandu, templo-pe, Tupã omombareteha umi misionero pyahúpe—añetehápe, opavave ñandéve—peteĩ tape joapy ha marangatúpe. Pe ñembo’e dedikatóriope, oñeme’ẽva’ekue rrevelasiõ rupive, José oñembo’e “osẽ vove ne rembiguaikuéra nde rógagui … ome’ẽ hag̃ua testimonio nde réragui”, “opa tavayguakuéra” “korasõ” “toñemohu’ũ“—mokõive “umi tuichavéva ko yvy ape ári” ha “opa umi mboriahu, umi oikotevẽva ha [umi] ohasa’asýva”. Oñembo’e “tojeheja rei umi prehuísio añetegua renondépe, ha nde tavayguakuéra tojeguerohory opavave renondépe; opa yvy rembe’y paha toikuaa ore, ne rembiguái, rohendu hague ne ñe’ẽ, ha nde oremondo hague.”

Kóva ha’e peteĩ promesa iporãitereíva peteĩ misionero oñehenói ramóvape g̃uarã—toguereko umi prehuisio “ojeheja rei añetegua renondépe”, “tohupyty jeguerohory opavave renondépe”, ha yvóra toikuaa Ñandejára ombouha chupekuéra. Opavave ñande ñaikotevẽ katuete ko’ãichaguaite jehovasa. Mba’eichaitépa ha’éta peteĩ jehovasa oñemohu’ũramo umi korasõ ñañemongetávo ñane vesíno ha ñane irũnguéra ndive. Pe ñembo’e dedikatório nomyesakãporãmbái mba’éichapa ñane tiempo templo-pe omohu’ũta ambue tapicha korasõ, ha katu aikuaa porã ojoajuha mba’éichapa pe tiempo Ñandejára rógape omohu’ũ ñane korasõ tee ñanesentrávo Jesucristo ha Iporiahuverekópe.

Añemoarandúvo Kirtland ñembo’e dedikatóriope, chepy’andýi avei José jeyjey ojerure’asyhague poriahuverekóre—Tupao miembrokuérare, Tupaóre ija’e’ỹvare, tetã sãmbyhyhárare, yvóra tetãnguérare. Ha, ijupe g̃uarã, ha’e ojerure’asy Ñandejárape imandu’a hag̃ua hese ha toiporiahuvereko Emma ha imitãnguéra ohayhuetéva.

Mba’éichapa oñeñandúne José, peteĩ semana rire, Semana Santa pyhareve, Abril 3 1836-pe, Kirtland Templo-pe, pe Salvador ojehechaukavove chupe ha Oliver Cowdery-pe ha, ojehaiháicha sección 110 Doctrina ha Konveniokuérape, he’i: “Che amboaje ko óga, ha che réra oĩta ko’ápe; ha Che ajehechaukáta ko ógape poriahuverekópe che tavayguakuérape.” Ko promesa poriahuvereko rehegua oiméne he’isékuri tuicha mba’e José-pe g̃uarã. Ha Presidente Nelson ombo’e haguéicha abril ohasava’ekuépe, ko promesa avei “oho peteĩteĩ templo ojededikáva rehe ko’ã árape.”

Oĩ hetaiterei tape peteĩ teĩ ñande ikatuháicha jajuhu poriahuvereko Ñandejára rógape. Kóva añetegua Ñandejára omanda ypy guive Israel-pe omopu’ã hag̃ua peteĩ tabernáculo ha omoĩ hag̃ua imbytépe pe “poriahuvereko apyka.” Templo-pe, jajuhu poriahuvereko umi konvénio jajapóvape. Umi konvénio, pe ñemongarai rehegua konvénio ári, ñandejokua Túva ha Ta’ýra ndive ha ome’ẽ ñandéve acceso hetave pe Presidente Nelson ombo’eva’ekuépe ha’eha “peteĩ mborayhu ha poriahuvereko imbojoaha’ỹva … oñehenóiva hesed“ hebreo-pe.

Jajuhu poriahuvereko pe oportunidad jajesella hag̃ua ñane familia-kuéra ndive apyra’ỹme g̃uarã. Templo-pe, jaju ñaikũmby porãve pe Creación, pe Je’a, pe Salvador sacrificio expiatorio ha ñande katupyrykue jaike jey hag̃ua ñande Ru Yvagagua renondépe—jepe, peteĩteĩ pe plan salvasiõ rehegua pehẽ—ha’eha peteĩ poriahuvereko jehechauka. Ikatu oje’e pe plan salvasiõ rehegua ha’eha peteĩ plan vy’apavẽ rehegua ha’eguiete peteĩ “plan poriahuvereko rehegua.”

Cheaguyje pe promesa porãite oĩvare sección 110-pe, Ñandejára ojehechaukataha poriahuverekópe Itemplo-kuérape. Avei ame’ẽ aguyje omohesakãvare mba’éichapa Ñandejára ojehechaukáta Ha’etevoi poriahuverekópe opa jajerure’asy jave, José-icha, poriahuverekóre.

José Smith jejerure’asy poriahuverekóre sección 109-pe ndaha’éikuri peteĩha jave ijejerure’asy poriahuverekóre ogueruha rrevelasiõ. Yvyramataty Marangatúpe, mitãrusu José oñembo’e ndaha’éi oikuaa hag̃uánte mba’e Tupaópa añetegua, ha katu he’i avei “ajerure’asy Ñandejárape poriahuverekóre, ndaipórigui ambue ikatúvape aha ahupyty hag̃ua poriahuvereko.” Oimeraẽicha, ijehechakuaa oikotevẽha upe poriahuvereko Ñandejára añoite ikatúva ome’ẽ oipytyvõ oipe’a hag̃ua yvága rovetã. Mbohapy ary rire, pe ángel Moroni ojehechauka osegívo José he’iva’ekue ha’eha “ñembo’e ha jerure’asy Tupã Ipu’akapávape cheperdona hag̃ua opa che angaipa ha umi che vyrorei’apo.”

Ko modélo, rrevelasiõ osegíva peteĩ jejerure’asýpe poriahuverekóre, ha’e jepiguáva umi escritura-pe. Enós ohendu Ñandejára ñe’ẽ oñembo’e rirénte ojerurévo ñyrõ. Rey Lamoni ru conversión oñepyrũ iñembo’e reheve: “Ahejapáta opa che angaipa roikuaa hag̃ua.” Ikatu ndajajehovasái ko’ãichagua jehasa hechapyrãva reheve, ha katu umi sapy’ánte hasývape g̃uarã oñandu ñembohovái iñembo’épe, Ñandejára poriahuvereko jeheka ha’e peteĩ tape imbaretéva oñeñandu hag̃ua Espíritu Santo testimonio.

Peteĩ principio upeichaguáva oñembo’e porãiterei Moroni 10:3–5-pe. Py’ỹi ñamombyky ko’ã versículo ñambo’e hag̃ua ñembo’e añete rupive, ikatuha jaikuaa Mormón Kuatiañe’ẽ añeteguápa. Ha katu ko ñemombyky ikatu ohejarei pe funsiõ imba’eguasúva orekóva pe poriahuvereko. Pehendumi mba’éichapa Moroni oñepyrũ imomarandu: “Péina ápe, che haʼese peẽme pemoñeʼẽ vove koʼã mbaʼe, … penemanduʼa hag̃ua Ñandejára iporiahuverekoitehague yvypóra raʼykuéra ndive, ára Adán ojejapo guive pehupyty peve peẽ koʼã mbaʼe, ha tapejepyʼamongeta koʼãvare pene korasõme.”

Moroni ñanemokyre’ỹ ndaha’éi ñamoñe’ẽ hag̃uánte ko’ã mba’e—umi jehaipy ha’e osella potaitéva—ha katu avei jajepy’amongetahag̃ua ñane korasõme mba’épa pe Mormón Kuatiañe’ẽ omohesakã pe “Ñandejára iporiahuverekoitehague yvypóra raʼykuéra ndive.” Pe jepy’amongeta Ñandejára poriahuverekóre ha’e upe ñanembosako’íva “jajerure hag̃ua Tupãme, Túva Apyra’ỹva, Cristo rérape, ndaha’éipa añetegua ko’ã mba’e”.

Jajeipy’amongetávo Mormón Kuatiañe’ẽre, ñaporandúne: Añeteguápa, Alma ombo’ehaguéicha, Tupã porihuvereko plan oaseguraha opa tapicha oikóva ko yvy ári oñemongoive jeytaha ha hikuái “[oñemoĩporãmbajeýtaha] koʼág̃a oĩháicha“? Ndojavýipa Amulek—ikatúpa pe Salvador poriahuvereko omhyenyhẽ opa umi joja jejerure ro, ambuéicha ñande jahepyme’ẽva’erã, ha upéva rangue “[ñaneñuã] jyva mbaretépe“?

Añeteguápa, Alma otestifikahaguéicha, pe Cristo ohasa’asyhague ndaha’éi ñane angaipa añórente ha katu ñane “mbaʼeʼasy ha mbaʼasykuérare“ Ha’e “oikuaa hag̃ua … mbaʼéichapa oipytyvõvaʼerã itavayguakuérape, mbaʼasy oguerekoháicha hikuái“? Iporiahuverekoitépa añete Ñandejára, Rey Benjamín ombo’ehaguéicha, peteĩ jopói ojehepyme’ẽ’ỹva ramo, Ha’e oexpia “umi omanovaʼekue oikuaaʼỹre Tupã oipotáva chuguikuéra [angaipakuérare], térã ojapovaʼekue angaipa jeikuaaʼỹme“?

Añetépa, Lehi he’ihaguéicha, “Adán hoʼavaʼekue yvyporakuéra oikove hag̃ua; ha yvyporakuéra oikove, oguereko hag̃ua vyʼapavẽ“? Ha añeteguápa, Abinadí otestifikahaguéicha, he’i jeývo Isaías he’iva’ekue, Jesucristo “ñane rembiapovaikuérare [ojejopyhague], ha [oñeinupãhague] ñande rembiapovaikuérare; ha ñande pyʼaguapy ñeinupã [hoʼahague] hiʼári; ha [illagakuérare ñañemongueraha]“?

Ipahápe, iporiahuverekoitépa añete pe Túva plan oñembo’eháicha Mormón Kuatiañe’ẽme? Atestifika ha’eha upéichaite, ha umi mbo’epy poriahuvereko rehegua oguerúva py’aguapy ha ñehaʼarõʼasy oĩva Mormón Kuatiañe’ẽme añeteguaha.

Upéicharõ jepe, aguerovia oĩha umi oñeha’ãvahína, jepe jeroviarekópe pemoñe’ẽ ha peñembo’e, pehechakuaa hag̃ua Moroni promesa Túva Yvagagua “ohechaukataha peẽme, Espíritu Santo pu’aka rupive” Aikuaa ko ñeha’ãgui añandu haguére, ojapo heta ary, amoñe’ẽ peteĩhárõguare Mormón Kuatiañe’ẽ ha noñeme’ẽikuri peteĩ mbohovái pya’e ha hesakãva che ñembo’épe.

Reñorairõro hína, ikatúpa pokombida ejapo Moroni ñemoñe’ẽ pejeipy’amongeta hag̃ua mboy lájapepa Mormón Kuatiañe’ẽ ombo’e “Ñandejára iporiahuverekoitehague yvypóra raʼykuéra ndive“? Che jehasa rupi, aha’arõ pejapóvo, pe Espíritu Santo py’aguapy toike pene korasõme ha peikuaa, peguerovia ha peñandu pe Mormón Kuatiañe’ẽ ha pe poriahuvereko plan ombo’éva añeteguaha.

Ame’ẽ che aguyje pe Túva plan poriahuvereko rehegua tuichaitévare ha pe Salvador omboguatase haguére upéva. Che aikuaa Ha’e ojehechaukataha poriahuverekópe Itemplo marangatúpe ha peteĩteĩ ñande rekove pehẽme jahekáramo Chupe. Jesucristo rérape, amén.