Peñeñangarekóke Jeipy’ara’ã Mokõihágui

Ojapo heta ary, ambotýrõ guare 12 ary, añekombida aha hag̃ua che Sacerdocio Aarónico kórum pegua campamento peteĩha rohasatahápe pyharekue. Kóva ha’ékuri peteĩ ñekombida arete guivéma aha’arõva, che ru ha’égui peteĩ kórumgua sãmbyhyhára ha py’ỹi oho oakampa umi mitãkuimba’e barrio-pegua ndive, che apyta aja che rógape.

Og̃uahẽvo pe ára, chepy’arory. Ha ahechakuaava’erã aikesetereíma hague umi mitãkuimbaʼe tuichavéva ndive. Che aiporavóma ajehechauka hag̃ua chejupe. Upe ñeha’ãme nda’aréi ajeipy’ara’ã ojehecha hag̃ua asegítapa pe ñembosarái ha ha’étapa pe aty pehẽ.

Tembiapo oñeme’ẽva chéve ha’e ahupyty hag̃ua che ru auto llave ikatu hag̃uáicha ojejapo peteĩ broma umi sãmbyhyhárape. Nachemandu’aporãi mba’épa ha’e akonvense hag̃ua che rúpe, ha katu pya’e añani pe mitãkuimba’e atýpe llave che pópe, avy’aitévo pe ahupytývare.

Upéi ou pe ambue tembiaporã. Aipe’ava’erãkuri pe coche rokẽ ha amoĩ peteĩ yvyra pe apyka respaldo ha pe coche bocina mbytépe. Ha atrankava’erã pe okẽ ikatu hag̃uáicha ipu pe bocina pyharekue ikatu’ỹre umi líder oike pe coche-pe ojeipe’a hag̃ua pe aparato.

Ko’ág̃a, ko’ápe ha’e ko ñemombe’u oñepyrũhápe chemotĩ’asy. Amoĩ rire pe yvyra hendaitépe, amboty pe okẽ ha añani pya’ete ikatuháicha akañy hag̃ua peteĩ ka’avo hi’aguĩva apytépe. Ajayvy aja yvýpe, añandu peteĩ mba’e’asy hatãitereíva. Pytũmbýpe ha ajapurágui aguapýkuri peteĩ tuna iñuatĩmbáva ári.

Che sapukái ñembyasýgui noñehendúi pe bocina pu hatãitére, ha ndarekóivo ambue mba’e ajapo hag̃ua aha jey mante chekarẽkarẽvo pe coche peve, akonfesávo che “angaipakuéra”, ha ahekávo atención médica tuja ha oporomotĩva.

Pe pyhare rembyre, añeno che rye ári peteĩ kárpape, che ru, peteĩ pínsa reheve, oipe’a aja umi tuna ñuatĩ che … néi, pehejamínte ta’e ndaguapy porãihague heta ára aja uperire.

Heta jey ajepyʼamongeta upe jehasáre. Ko’ág̃a ikatu apuka che mitãrusu akãguapy’ỹ rehe, jepe hesakãrõ chéve g̃uarã koʼág̃a mbovy umi principio iguýpe oĩva.

Heta yvypóra reko modélo ha’etévaicha jepigua pe yvypóra natural-pe—pe potapy ojeike porã hag̃ua, pe potapy ojehechauka hag̃ua ijupe, pe kyhyje ojeperdévo mayma mbaʼégui, ha pe tekotevẽ mbarete ñakañy hag̃ua ikatu hag̃uáicha jajehekýi umi consecuencia-gui. Ha’e ko tekopy pahápe ajesarekóta ko árape—ñakañy jajapo rire peteĩ mba’e ndajajapoiva’erãha.

Ko’ág̃a, nambojojapái hína che ñembojaru chemitãroguare angaipa vai reheve, ha katu ikatu jajapo umi ñembojoja ikatúva ñanepytyvõ jajeipy’ara’ã aja ñande ñemanokuaa rekovépe.

Pe Edén Yvotytýpe, Adán ha Eva oguereko peteĩ circunstancia iporãnguetéva—hetaiterei tembiʼu, pe yvotyty porãngue ijojaha’ỹva—ndaha’éi peteĩ yvotyty iporãva añónte ha katu peteĩ yvotyty ndorekóiva ñana ni ñuatĩ.

Ha katu jaikuaa avei pe tekove yvotyty pegua ojokohague pe jekakuaa oikotevẽva hikuái. Pe yvotyty ndaha’éikuri peteĩ ñeg̃uahẽha paha ha katu peteĩ jeipy’ara’ã, peteĩha heta apytégui oipy’ara’ãtava, ombosako’i, ha ohejátava chupekuéra okakuaa ijehupytykuaa paha peve ohojeývo Túva ha Ta’ýra renondépe.

Penemanduʼáta oĩhague joavy pe yvotytýpe. Lucifer-pe ojeheja oha’ã Adán ha Eva-pe. Haʼe oipy’ara’ã raẽ Adán-pe hoʼu hag̃ua pe yvyramata’águi iporãva ha ivaíva jeikuaa rehegua. Adán, imanduʼávo pe tembiapoukapy ani hag̃ua hoʼu chugui, ojejoko. Upéi ou jehovasapyre Eva, oiporavóva hoʼu pe yvágui, okonvensévo Adán-pe ojapo hag̃ua avei upéicha.

Upe rire, Adán ha Eva he’i upe jeiporavo tekotevẽha oñekumpli hag̃ua Túva Yvagagua plan. Ha katu ho’úvo pe yva, ha’ekuéra ojapyhara pe léi—peteĩ léi oñeme’ẽva’ekue chupekuéra Tuvaitégui. Pe iporãva ha ivaíva rehegua ñeikũmby oporojopýva oúva resultado ramo oiméne oheja chupekuéra ñembyasýpe ohendúvo pe Túva ñe’ẽpu omoherakuãvo Ijeju jey pe yvotytýpe. Ha’ekuéra ohechakuaa ijopivoha, oĩgui hikuái añetehápe ao’ỹre, oiko haguére peteĩ inocencia ñeimépe. Ha katu oiméne hasyve oĩgui hikuái ijao’ỹre upe momento-pe, ko’ág̃a oĩha hikuái expuesto ijapyhara rupi. Haʼekuéra oĩkuri mo’ãha’ỹre ha oñehungakuaáva ramo. Ha’ekuéra ijopívo opa sentido-pe.

Pe akóinte oportunista, Lucifer, oikuaávo iñeime expuesto ha ikangyha, oipy’ara’ã jey chupekuéra—ko’ág̃a okañy hag̃ua Tupãgui.

Ko jeipy’ara’ã—ahenóita “jeipy’ara’ã mokõiha”—ha’e pe py’ara’ã ikatúva ogueru consecuencia tuichavéva ñañeme’ẽramo chupe. Katuete, jajehekýi hag̃ua opa jeipy’ara’ã peteĩhágui jajapyhara hag̃ua Tupã léi iporãiterei, ha katu jaikuaa opavave ñañeme’ẽtaha opáichagua jeipy’ara’ã peteĩháme ko’ápe ko yvy’apére. Jahávo tenonde gotyo ñande jekakuaa ha ñeikũmbýpe, ñaha’arõ ñane mbarete jajehekýi hag̃ua umi jeipy’ara’ã peteĩhágui toñemoporãve meme ñañeha’ãvo jaikove ñande Salvador Jesucristo-icha.

Oĩ umi ikatu oñeha’ãva okañy Tupãgui ndojejuhu ni ndojeikuaaukaséigui, ha oñandu hikuái ñemotĩ térã culpa. Ha katu, heta escritura ñanemboʼe ndaikatumoʼãiha ñakañy Tupãgui. Amboja’óta mbovymínte.

Ñandejára ombo’e Jeremías-pe ko’ã porandu rupive: “¿Ikatúpa oimeraẽ okañy tenda ñemiháme ndahechamo’ãihápe chupe? he’i Ñandejára. ¿Namyenyhẽipa Che pe yvága ha yvy?”

Ha Job-pe oñembo’e:

“Hesa oĩgui yvypóra rape ári, ha ohecha opa ijeguata.

“Ndaipóri pytũmby, ni ñemano ñemo’ã, ikatuhápe okañy umi mba’evai apoha.”

Pe Salmista David ñe’ẽpoty rupive he’i:

“O Ñandejára, nde cheresa’ỹijókuri, ha cheikuaa.

“Nde reikuaa che je’a ha che ñepu’ã, nde reikuaa che akãremiandu mombyry guive. …

“Ndaipórigui ni peteĩ ñe’ẽ che kũme, ha katu, O Ñandejára, reikuaa porãmba umíva. …

“Moõpa aháta nde espíritu-gui? Térã moõpa akañýta ne renondégui?

“Ajupíramo yvágape, upépe reime nde; ajapóramo che rupa añaretãme, péina ápe, nde reime upépe.”