Tupã Mborayhu

Peteĩ ara’akúpe roviaha aja peteĩ área mombyryha rupi, ore familia ohasa peteĩ pyhare rokévo okápe peteĩ yvága arai’ỹva guýpe. Ojehecha hesakã porã ore ári pe Vía Láctea iporãitereíva, henyhẽva hetaiterei mbyjágui ha pe estrella fugaz sapy’ánte ohasáva. Roñemaravilla aja Tupã creación rechapyrã reheve, roñandu peteĩ joaju reverente Hendive. Umi ore mitã michĩva, okakuaava’ekue Hong Kong-pe, araka’eve ndohasáikuri mba’eve peichagua. Ha’ekuéra oporandu imitãrekópe roikópa upe yvagaitevoi guýpe ore rógape. Añeha’ã amohesakã chupekuéra ha’eha upe yvagaitevoi, ha katu pe yvytu ha tesape ñemongy’a pe tenda roikohápe ndohejái rohecha ko’ã mbyja oĩramo jepe upépe.

Umi escritura ñanembo’e “jerovia ha’e pe mba’e oñeha’arõva, pe mba’e ojehecha’ỹva jehechauka.” Umi distracción ñanemoapañuáiva ha jeipy’ara’ã terrestre omo’ãramo jepe ñande visión espiritual, ñamomba’apo jave jerovia Tupãre ha Ita’ýra Jesucristo rehe, jahupyty peteĩ ñemoañete hesakãva Irrealidágui ha ojepy’apyha ñanderehe.

Mormón Kuatiañe’ẽme, profeta Lehi ohecha “peteĩ yvyramáta, pe hiʼa ojeipotáva ñanembovyʼa hag̃ua” ha ha’e pe “heʼẽve opa mbaʼégui.” Ha’e ho’u jave pe yva, hi’ánga henyhẽ vy’a tuichaitereívagui, ha oipota hogayguakuéra hoʼu avei. Jaikuaa ko yvyramáta orrepresentaha pe “Tupã mborayhu”, ha Lehi-cha, ñande avei jahupytykuaa peteĩ testimonio vy’ápe Tupãgui ñainvitávo Chupe ñande rekovépe.

Jesucristo omoha’anga Túva Yvagagua mborayhu ñanderehe. Isakrifísio expiatorio rupive, Ha’e ojagarra ijehe ñane angaipakuéra ha oñehunga ñane rembiapovaikuérare. Ha’e ijeheguiete ogueraha umi ñane mba’asykuéra, ohasa mbaʼeʼasy ha ojagarra Hiʼári ñane ñembyasy ha mba’asykuéra. Ombou Espíritu Santo ñanemoangapyhy hag̃ua, ha Espíritu yvakuéra apytépe oĩ vy’a, py’aguapy ha jerovia, ñanemyenyhẽva ñeha’arõreko ha mborayhúgui.

Tupã mborayhu oĩramo jepe opavavépe g̃uarã, heta oheka kyre’ỹ upéva, ambue katu oñanduse pe Tupã mborayhu ha katu ndogueroviái omereseha. Oĩ ambue oñeha’ã mbaretéva ojejoko hag̃ua hese. Umi escritura ha Ñandejára profeta ñanembo’e ikatuha ñañandu meme Tupã mborayhu, Jesucristo grásia rupive, ñañearrepenti jey jeýramo, ñaperdona añete, ñañeha’ã ñakumpli Imandamientokuéra ha jaservi ambue tapichakuérape ñaha’arõ’ỹre mba’eve. Ñañandu Tupã mborayhu jajapóramo umi mba’e ñanemoaguĩvéva Hese, ha’eháicha ñañemongeta Hendive ára ha ára ñembo’e ha escritura estudio rupive, ha ndajajapovéi umi mba’e ñanemomombyrýva Chugui, ha’eháicha ñande’orgulloso, jajoavyse mante ha ñanderekoñemoĩ.

Presidente Russell M. Nelson ñane’invita “jaipe’a hag̃ua, Salvador pytyvõ rupive, umi yty tuja ñande rekovépe” ha “ñamboyke hag̃ua pe py’aro.” Ha’e ñanemokyre’ỹ “ñamombarete hag̃ua ñane pyenda espiritual” ñasentrávo ñande rekove [Salvador]-pe ha umi ordenánsa ha konvénio Itemplo-pe.” Ha’e opromete “ñañongatúvo ñane konveniokuéra templo pegua, jahupytyve acceso Ñandejára pu’aka oporomombaretévape. … Ñañandu heta rasa pe Jesucristo ha ñande Ru Yvagagua mborayhu potĩ!”

Areko peteĩ angirũ ojehovasava’ekue peteĩ familia porã ha peteĩ carrera prometedora reheve. Upéva okambia peteĩ mbaʼasy ohejárõ guare chupe ikatu’ỹre ombaʼapo, ha uperire ojedivorsia. Umi ary oúva upe guive hasýkuri, ha katu pe mborayhu orekóva ita’yrakuérare ha umi konvénio ojapova’ekue Tupã ndive ombojepytaso chupe. Peteĩ ára ha’e oikuaa pe hembireko ymaguare omenda jey hague ha ojerure oñekansela hag̃ua pe isellamiento templo-pe. Haʼe ojepyʼapy ha oñekonfundi. Haʼe oheka pyʼaguapy ha entendimiento Ñandejára rógape. Pe ára oúvape ivisita rire, arresivi chugui ko mensaje:

“Arekókuri peteĩ experiencia hechapyrãva templo-pe ange pyhare. Che aimo’ã ojehechakuaa porã hague aguerekoha gueteri heta py’aro. … Aikuaa añemoambueva’erãha, ha añembo’ékurihína opa ko semana pukukue upéicha hag̃ua. … Ange pyhare templo-pe literalmente añandu pe Espíritu oipe’a pe py’aro che korasõgui. … Haʼékuri peteĩ alivio tuichaitereíva tojeipeʼa chehegui. … Ojepeʼa peteĩ kárga físika ipohyietereíva oĩva che ári”.

Oguerekórõ jepe gueteri umi idesafío, che angirũ oatesora upe tembiasa Ñandejára rógape, pe Tupã mborayhu pu’aka oporomosãsóva oipytyvõ haguépe chupe oñeñandu hag̃ua hi’ag̃uive Tupãre, ikyre’ỹve tekovére ha sa’ive ojepy’apy tenonderãre.

Ñañandu vove Tupã mborayhu, ikatu jagueropu’aka ñane mba’epohýi hasy’ỹve háicha ha ñañesomete ñeha’arõ ha vy’ápe Hembipota poguýpe. Jaguereko jeroviapy Tupã imandu’ataha umi konvénio ojapova’ekue ñanendive, ñandevisitáta ñande jehasa’asýpe ha ñandeipe’áta ñeñapytĩmbýgui. Avei ñakompartise pe vy’a ñañandúva ñande rogaygua ha jahayhúva ndive. Lehi familia-icha, káda persona oreko albedrío oiporavo hag̃ua oparticipa térã nahániri pe yvágui, ha katu ñande oportunida ha’e jahayhu, ñakomparti ha ñainvita peteĩ manera umi jahayhúvape ikatu hag̃uáicha oñandu Tupã mborayhu.

Ñaipytyvõ hag̃ua ambue tapichakuérape oñandu Tupã mborayhu, tekotevẽ ñamongakuaa ñandejehe umi atributo Cristiano ha’eháicha umilda, karida, poriahuvereko ha paciencia, ha ñaipytyvõ ambuekuérape ojere hag̃ua pe Salvador gotyo jasegívo umi mokõi mandamiento tuichavéva jahayhu hag̃ua Tupãme ha jahayhu hag̃ua ñande rapichakuérape.

Peteĩ ore ra’y oñorairõkuri ija hag̃ua ha oreko hag̃ua autoestima imitãrusúpe. Che rembireko ha che roñembo’e roikuaa hag̃ua mba’éichapa roipytyvõta chupe, ha roime dispuesto rojapo hag̃ua opa mba’e Ñandejára oipotáva rojapo. Peteĩ ára añandu aporanduva’erãha che quórum de elderes presidente-pe oikuaápa peteĩ tapicha oikotevẽva ikatúva rovisita oñondive che ra’y ndive. Opensa sapy’ami rire, ojerure oréve rovisita hag̃ua peteĩ kuña orekóva desafío de salud tuicháva, ha presidente de rama permiso reheve, rogueraha chupe Santa Cena káda semana. Avy’aiterei ha katu ajepy’apy avei mba’éichapa orreaccionáta che ra’y ko compromiso semanal rehe.

Ore visita peteĩháme, ore korasõ hasy ko kuñakarai rohayhuetévare, hasy meme rupi. Ha’e oagradeseterei pe Santa Cena rehe, ha rovy’a rovisita haguére chupe ha iménape. Mbovymi visíta rire, peteĩ domingo aime mombyry ha ndaikatúi amoirũ che raʼýpe ha katu amomanduʼa chupe ore asignasiõre. Ag̃uahẽvo che rógape, ndaikatúi aha’arõ ahendu hag̃ua mba’éichapa ohókuri pe visita. Che ra’y ombohovái noimo’ãiha ikompañerokuéra ikatuha ojapo umi mba’e iporãva péicha. Ha ha’e omombe’uve he’ívo ogueruha iñermánope oipytyvõ hag̃ua, ha pe Santa Cena oho porãha, ha katu ko hermana querida oñembyasýkuri pe semana aja oinvitágui iñamigokuérape hógape ohecha hag̃ua película, ha katu ivideo reproductor ndoikói. Che ra’y he’i oheka hague internet-pe, ojuhu pe problema ha omyatyrõ hague upepete. Oñandu ideprovechoha, ovy’a ha ojerovia ojapo hag̃ua peteĩ mba’e ombohesapéva hi’ára. Ha’e oñandu Tupã mborayhu hese.

Oiméramo jepe peñeha’ãmbaite pe tekove oñemo’ã araíre, peñandúrõ pene ñembo’e noñehenduiha, térã ndaikatúiramo peñandu Tupã mborayhu, peikuaáke opa pene ñeha’ã iñimportanteha ha, umi mbyja ñande áricha, Túva Yvagagua ha Jesucristo pendekuaa, ohendu ha penderayhuha.

Peteĩ jey, Idiscipulokuéra oĩrõ guare peteĩ barco-pe “oñembotyryry [umi] ola rupi”, pe Salvador oguata hendapekuéra y ári ha oasegura chupekuéra, he’ívo: “Peñemokyre’ỹke, che Ha’e, ani pekyhyje”. Pedro oguatase jave pe Salvador rendápe pe y ári, Jesús ojapo chupe séña, he’ívo: “Eju”. Ha Pedro operde jave enfóke ha oñepyrũvo oñapymi, pe Salvador pya’e oipyso ipo ojagarra hag̃ua chupe ha ogueraha chupe tenda seguro-pe he’ívo: “O nde jerovia’ỹva, mba’érepiko reduda?”

Yvytu oĩ jave ñane kóntrape ñande rekovépe, ñaime piko dispuesto javy’a ha ñandepy’aguasu hag̃ua? Mba’éichapa ikatu ñanemandu’a pe Salvador nañanderejaiha ha Ha’e oĩha ñande ypýpe, ikatu umi manera ndajahechakuaáiva gueteri? Ñaimepiko dispuesto jaha hag̃ua Hendápe jerovia reheve, ko’ýte pe tape ñane renondépe ha’etéramo imposible? Ha mba’éichapa Ha’e ñandegueraha peteĩ tenda seguro-pe ñañepysanga jave? Mba’éichapa ikatu ñamaña Ha’e gotyo jeroviarekópe opa temiandúpe, py’amokõi ha kyhyje’ỹre?

Peñanduséramo Tupã mborayhu heta rasa pende rekovépe, poinvita pekonsidera hag̃ua ko’ã mba’e:

• Peteĩha, pepyta jepi penemandu’a hag̃ua peẽ ha’eha Tupã ra’y/rajy ha pepensa umi mba’e pendeaguyjévare.

• Mokõiha, peñembo’e ára ha ára, pejerurévo Túva Yvagaguápe penepytyvõ hag̃ua peikuaa hag̃ua mávapa pende jerére oikotevẽ oñandu Imborayhu.

• Mbohapyha, peporandu pende py’aite guive mba’épa ikatu pejapo peipytyvõ hag̃ua upe tapichápe oñandu hag̃ua Tupã mborayhu.

• Ha irundyha, pemba’e’apo pya’e pe inspirasiõ pehupytyháicha.

Ñañembo’e meme ha jajeruréramo ñande rapichakuérare, Tupã ohechaukáta ñandéve umi tapicha ikatúvape ñaipytyvõ. Ha ñamba’e’apóramo pya’e, ikatu oiko ñandehegui pe tembiporu Ha’e ombohováiva rupi iñembo’ekuéra. Péicha jajapóvo, ára ohasávo, jahupytýta ñembohovái ñane ñembo’épe ha ñañandúta Tupã mborayhu ñande rekovépe voi.

Ojapo mbovy mese roviaha aja Vietnam-pe, che rembireko ha che roime peteĩ vuelo-pe odespegáva peteĩ tormenta tuichaitereíva mbytépe. Tuichaiterei pe turbulencia, ha ore ventána guive ojehechakuaa arai iñypytũva, ama hatã ha aratiri. Peteĩ jejupi puku rire, ipahápe ore aviõ ojupi umi arai tormenta ári ha osẽ ko vista gloriosa-pe. Roñemomandu’a jey ñande Ru Yvagagua ha Jesucristo rehe ha roñandu Imborayhu guasu ñanderehe.

Che angirũnguéra ahayhuetéva, peteĩ oñandúvaicha Tupã mborayhu, vy’ápe atestifika pe Salvador Jesucristo ha’eha Tupã mborayhu. Imborayhu ñanderehe i-perfecto, personal ha ijapyra’ỹva. Jasegívo Chupe jeroviarekópe, tañanerenyhẽ Imborayhúgui ha toiko ñandehegui peteĩ faro ogiáva ambue tapichakuérape Imborayhu gotyo. Jesucristo rérape, amén.