దేవుడు తన పిల్లలందరిని ప్రేమిస్తున్నారు

మన పరలోక తండ్రి మీ నుండి ఏమి కోరుతున్నారు? మీరు మీ పూర్వమర్త్య జీవితంలో ఉన్నప్పుడు, భూమి మీద మీ జీవితం కోసం పరలోక తండ్రి మిమ్మల్ని సిద్ధపరుస్తున్నారని మీరు గ్రహించారా? యువతతో మాట్లాడుతూ, అధ్యక్షులు రస్సెల్ ఎమ్. నెల్సన్ ఇలా బోధించారు, “మన పరలోక తండ్రి తన మిక్కిలి ఘనమైన ఆత్మలలో అనేకమందిని—బహుశా … ఆయన ఉత్తమమైన జట్టును—ఈ చివరి దశ కొరకు దాచి ఉంచారు.” ఈ కడవరి దినాల కొరకు మనము దాచబడ్డాము కనుక, యేసు క్రీస్తు యొక్క శిష్యులుగా ఉండడాన్ని నేర్చుకోవడం మనకు చాలా ముఖ్యమైనది.

ప్రభువైన యేసు క్రీస్తు గొఱ్ఱెలకు మంచి కాపరి మరియు ఆయన తన మందను ఎరుగును, మరియు ఆ మంద తన కాపరిని ఎరుగును, ఎందుకనగా “ఆయన తన సొంత గొఱ్ఱెలను పేరుపెట్టి పిలుచును.” ఆయన ఎల్లప్పుడు మనల్ని పిలుస్తున్నారు మరియు ఆయన పిల్లలను ఆయన వద్దకు తీసుకొని రావడంలో సహాయపడటానికి, తన సాధారణ సేవకులమైన మనల్ని ఆయన ఉపయోగిస్తారు.

కొంతకాలం క్రితం, ఒక స్టేకు అధ్యక్షుడు, నేను స్థానిక పొరుగు ప్రాంతంలో ఉన్న సంఘ సభ్యులను సందర్శిస్తున్నాము. మేము ప్రణాళిక చేసిన సందర్శనాలను పూర్తి చేసిన తరువాత, మనం మరొక కుటుంబాన్ని చూద్దామా అని స్టేకు అధ్యక్షుడు అడిగాడు. మేము వారితో మాట్లాడాలని అతడు ఆత్మీయంగా ప్రేరేపించబడ్డాడు.

మేము తలుపు తట్టాము మరియు ఒక సహోదరి తలుపు తెరిచింది. ఆమె నావైపు చూసింది, కానీ నేను ఎవరో ఆమెకు తెలియలేదు, కనుక ఆమె ఎక్కువగా వ్యక్తపరచలేదు. నేను నా చేతిని స్టేకు అధ్యక్షుని వైపు చూపించాను, అతడు ఆమెను పేరు పెట్టి పలకరించాడు. అతడిని వినగానే, చూడగానే ఆమె సంతోషించింది. తలుపు వద్ద నిలబడి వారిరువురు హత్తుకొని, కలిసి కన్నీళ్ళు కార్చారు. మిగిలిన సమయమంతా ఇదే వైఖరి కొనసాగింది. ముందు రోజు ఆ సహోదరి కీమోథెరపీ తీసుకుందని మాకు తెలియదు. తన పెద్ద కుమారుడిని చూసుకోలేనంత బలహీనంగా ఆమె భావించింది. అందుచేత, ఆమె కుమారునికి దుస్తులు వేయడంలో స్టేకు అధ్యక్షునికి నేను సహాయపడ్డాను మరియు మేము అతని చక్రాల కుర్చీలో అతడిని కూర్చోబెట్టాము. అంతకు ముందు వార్డు నుండి మరొక ప్రియమైన సహోదరి తెచ్చిన ఆహారాన్ని మేము అతనికి పెట్టి, మిగిలిన పనులలో సహాయపడ్డాము. వారి ఇంటిని విడిచి వెళ్ళకముందు, మేము వారికి యాజకత్వ దీవెన ఇవ్వగలిగాము.

ఈ సందర్శన సమయంలో నా మనసులో ఉన్నదంతా యేసు క్రీస్తు వారిని గాఢంగా ప్రేమిస్తున్నారనే నిర్ధారణ. ఆయన వారిని అర్థం చేసుకుంటారు మరియు వారి ప్రత్యేక పరిస్థితి యొక్క బాధను వ్యక్తిగతంగా ఎరుగుదురు. దాదాపు సందర్శన అంతా నిశ్శబ్దంగానే జరిగింది. ఈ సందర్భంలో మేము పెద్ద ప్రసంగము ఇవ్వలేదు లేదా మా ప్రియమైన లేఖనాన్ని పంచుకోలేదు, కానీ ప్రభువు తన ఆత్మతో మమ్మల్ని సమృద్ధిగా దీవించారు.

ఈ సమయమందు మీ పరలోక తండ్రి మిమ్మల్మి ఇక్కడికి పంపడానికి ఒక గొప్ప కారణం ఏమిటంటే మీరు మీ పూర్తి సామర్థ్యాన్ని గ్రహించగలరు. క్రీస్తు యొక్క శిష్యులుగా, మనము ఒకరినొకరితో పోల్చుకోవడాన్ని మానివేయాలని నా సువార్తను ప్రకటించుడి బోధిస్తుంది. మీ ఆత్మీయ సామర్థ్యాలు ప్రత్యేకమైనవి, వ్యక్తిగతమైనవి, సహజసిద్ధమైనవి మరియు వాటిని అభివృద్ధి చేయడంలో మీ పరలోక తండ్రి మీకు సహాయపడాలనుకుంటున్నారు. మీ పరలోక తండ్రి యొక్క ప్రేమను అనుభూతి చెందడానికి మీరు సహాయపడగలవారు ఎవరో ఒకరు ఎల్లప్పుడూ ఉంటారు. మీ సామర్థ్యము దైవికమైనది. ఈ పోటీ ప్రపంచంలో విజయం సాధించడానికి మిమ్మల్ని మీరు సిద్ధం చేసుకోవడం చాలా ముఖ్యమైనది అయినప్పటికీ, మీ జీవితమంతా ముఖ్యమైన మీ నియమితకార్యాలలో ఒకటి యేసు క్రీస్తు యొక్క శిష్యునిగా మారడం మరియు ఆత్మ యొక్క ప్రేరేపణలను అనుసరించడం. మీరు దీనిని చేసినప్పుడు, దేవుడు మీ జీవితాన్ని దీవిస్తారు, ఆయన మీ ప్రస్తుత లేదా భవిష్యత్ కుటుంబాన్ని దీవిస్తారు మరియు మీకు ఎదురుపడే ఆయన పిల్లల జీవితాలను ఆయన దీవిస్తారు.

గొప్ప అవకాశమున్న కాలములో మనం జీవిస్తున్నాము. మనము అనేక కష్టాలను ఎదుర్కొంటున్నప్పటికీ, అవి కొంతవరకు మన పరలోక తండ్రి ప్రేమను అనుభూతి చెందడానికి ఇతరులకు సహాయం చేసేలా చేయడంలో భాగంగా ఉన్నాయని నాకు తెలుసు. అధ్యక్షులు నెల్సన్ ఇలా బోధించారు, “రాబోయే రోజుల్లో, లోకము ఎన్నడూ చూడని రక్షకుని శక్తి యొక్క గొప్ప ప్రత్యక్షతలను మనం చూస్తాము.” సహకారం, ఆలింగనం, ఓదార్పు భావన లేదా కేవలం మనం వారితోపాటు మౌనంగా ఉండడం అవసరమైన వ్యక్తులను చూసుకునే విశేషాధికారం మనకు గలదు. మనము కేవలం ఒక్క క్షణం కోసం వారి భారాలను తేలిక చేయడానికి సహాయపడగలిగితే, అప్పుడు మనము వారి జీవితాలలో రక్షకుని శక్తి యొక్క గొప్ప ప్రత్యక్షతలను చూడగలుగుతాము.

యేసు క్రీస్తు యొక్క శిష్యులుగా, కడవరి-దిన పరిశుద్ధులు లోకంలో సానుకూల మార్పును తీసుకొనిరాగలరు. మన ముఖంలో ప్రతిబింబించే ఆనందాన్ని—ప్రేమగల మాటలు మరియు దయతో కూడిన క్రియలతో పంచుకునే ఆనందాన్ని మనం అందించగలము. మనం మంచి పొరుగువారిగా, మంచి ఉద్యోగస్తులుగా, మంచి పని వారిగా ఉందాం. అన్ని సమయాలలో మనం మంచి క్రైస్తవులుగా ఉండటానికి ప్రయత్నిద్దాం.

ప్రభువు అవసరమైన విధులతో ఆయన సువార్తను పునఃస్థాపించారు, ఆవిధంగా ఆయనతో మనల్ని బంధించే వాగ్దానాలన్నిటిని పరలోక తండ్రి యొక్క పిల్లలు కలిగియుండగలరు. మన సహోదర సహోదరీలకు వారి అనుదిన కష్టాలలో సహాయపడటం ద్వారా, వారి పరలోక తండ్రితో ఈ పరిశుద్ధ వాగ్దానాలను చేసి పాటించడానికి వారికి సహాయపడాలని కూడా మనం జ్ఞాపకం ఉంచుకుందాం, ఆవిధంగా ఆయన తిరిగి వారికి ఈ జీవితం కొరకు మరియు నిత్యత్వం కొరకు మిక్కిలి గొప్ప దీవెనలు వాగ్దానమివ్వగలరు. యేసు క్రీస్తు యొక్క సువార్త మరియు ఆయన యాజకత్వపు తాళపు చెవులు పునఃస్థాపించబడుట ద్వారా మాత్రమే ఈ వాగ్దానాలు సాధ్యం చేయబడతాయి.

మరొక మాటలో చెప్పాలంటే, నిబంధన బాటపై నిలిచియుండటానికి మనం ఇతరులకు సహాయపడగలము. మనలో కొందరు అప్పుడప్పుడు మార్గము నుండి తొలగిపోతారు, కనుక మన పరలోక తండ్రి కోసం తిరిగి వెళ్ళే సాధ్యతను ఎల్లప్పుడు మనం కలిగియున్నామని తప్పక జ్ఞాపకముంచుకోవాలి. మన గమనము మిక్కిలి పరిపూర్ణమైనది కానప్పటికీ, “మనఃపూర్వకముగా ఎంత తరచుగా [మనం పశ్చాత్తాపపడి] క్షమాపణ [కోరతామో], అంత తరచుగా [మనం] క్షమించబడతాము” అని రక్షకుడు ఎల్లప్పుడు మనకు జ్ఞాపకం చేస్తున్నారు.

ఈ రోజు విరోధి యొక్క కుయుక్తులలో ఒకటి, మనం మారడానికి మార్గం ఏదీ లేదని లేదా మనకు ఇకపై నిరీక్షణ లేదని మనం ఆలోచించేలా మరియు నమ్మేలా చేయడం. ఈ నాశనకరమైన ఆలోచన మనలో అనేకమందిని ప్రయత్నించడం ఆపేలా చేస్తుంది. సరిగ్గా ఈ క్షణంలోనే మన ప్రేమ, మన ప్రోత్సాహపు మాటలు, సహకారం, మన సమయం మరియు మన సహాయం మరొకసారి ప్రయత్నించడానికి తగినంత నిరీక్షణను వేరొకరికి ఇవ్వగలదు.

“సరే, కానీ నాకు ఎవరు పరిచర్య చేస్తారు?” అని మీరనుకోవచ్చు. వెళ్ళి మన సహోదర సహోదరీల జీవితాలను దీవించడం ద్వారా, ప్రభువైన యేసు క్రీస్తునందు విశ్వాసముతో మన జీవితాలను నింపే సాక్ష్యాలను మనం సేకరిస్తాము. ఈ సాక్ష్యాలు మనకై మనం మరోసారి ప్రయత్నించేలా నూతన చైతన్యాన్ని ఇస్తాయి. పరిశుద్ధాత్మ మనల్ని మరలా వృద్ధి పొందించి, మన స్వంత కష్టాలు మరియు వ్యక్తిగత శోధనలతో కొనసాగడానికి పునరుద్ధరించబడిన సాక్ష్యాలతో మనకు సహాయపడతారు. ఇతరుల జీవితాలను దీవించడానికి మనము కోరినప్పుడు, ప్రభువు మనపై ఎక్కువ కనికరాన్ని కలిగియుంటారు; ఆయన మనల్ని బలపరుస్తాడు మరియు మన జీవితాల్లో సహాయం చేస్తాడు; ఆయన మనలను బలపరుస్తారు మరియు మన జీవితాలలో మనకు సహాయం చేస్తారు.

ప్రభువైన యేసు క్రీస్తు మీ రక్షకుడని మరియు మిమ్మల్ని వ్యక్తిగతంగా అర్థం చేసుకుంటారని దయచేసి గుర్తుంచుకోండి. ఒక పిలుపును నెరవేర్చుట మరియు దేవుని పిల్లలకు సహాయపడటానికి విషయాలను పక్కన పెట్టుట అనగా అర్థమేమిటో ఆయనకు తెలుసు. మీరు ఆయనను నమ్మి, సందేహించకుండా ఉన్నట్లయితే, ప్రతీదానిలో మిమ్మల్ని దీవించడానికి ఆయన శక్తిని కలిగియున్నారు.

నా ప్రియమైన సహోదర సహోదరీలారా, ఆరోజు ప్రణాళిక చేయకుండా ఒక తల్లిని, కొడుకుని సందర్శించడానికి ఒక యాజకత్వ నాయకుడు ప్రేరేపించబడినప్పుడు, వారికి మన అవసరం ఉందని దేవునికి తెలుసని నేను ప్రకటిస్తున్నాను. చివరిలో, నాకు పరిచర్య చేయబడింది. ఆ రోజు, మన పట్ల రక్షకుని ప్రేమ యొక్క మిక్కిలి గొప్ప పాఠాలలో ఒక దానిని నేను పొందాను.

యేసు క్రీస్తు లోక రక్షకుడని, ఆయన జీవిస్తున్నారని, మీకోసం, నాకోసం ఆయన జీవించారని మరియు చనిపోయారని, మీకోసం, నాకోసం ఆయన పునరుత్థానము చెందారని, తద్వారా మనము ఇదివరకే చనిపోయిన వారితో కలసి ఆనందముతో నిండిన సిలెస్టియల్ పునఃకలయికలను కోరవచ్చని నేను సాక్ష్యమిస్తున్నాను. ఆయన మిమ్మల్ని, నన్ను పరిపూర్ణంగా అర్థం చేసుకుంటారని నాకు తెలుసు. ఆయన మన కష్టమైన క్షణాలలో ప్రతీదానిని గ్రహిస్తారు మరియు మనము ఎక్కువ బలహీనంగా ఉన్న క్షణాలలో మనకు సహాయపడే శక్తిని ఆయన కలిగియున్నారు. ఈ రోజులలో సువార్తను పునఃస్థాపించడానికి ప్రభువైన యేసు క్రీస్తు మరియు మన పరలోక తండ్రి జోసెఫ్ స్మిత్‌కు ప్రత్యక్షమయ్యారని నాకు తెలుసు. మన ప్రియమైన ప్రవక్త, అద్యక్షులు రస్సెల్ ఎమ్. నెల్సన్, ప్రభువు యొక్క ప్రవక్త అని నాకు తెలుసు మరియు ఈ విషయాల గురించి నేను యేసు క్రీస్తు నామములో సాక్ష్యమిస్తున్నాను, ఆమేన్.