Ang Pamilya Martins

Nagadrayb si Helvécio Martins papuli halin sa trabaho sa Rio de Janeiro, Brazil. Grabe kagutok sang dalan amo nga wala gid sa ila sang nagaidog. Ginpamensar ni Helvécio ang iya kabuhi. Maayo ang iya obra. Palangga niya ang iya asawa, si Rudá, kag ang duha niya ka kabataan, si Marcus kag Marisa. Pero pamatyag niya daw may kulang.

Saints, 4:229–30

Naggwa si Helvécio sa salakyan kag nagpangamuyo. “Dios ko,” siling niya, “Kabalo ko nga ara ka lang dira, pero wala ko kabalo kon sa diin.” Ginhambal Niya ang Amay nga Langitnon nga nagapangita ang iya pamilya sang isa ka bagay, kag kinahanglan nila ang Iya bulig. Dayon nagsulod balik si Helvécio sa iya salakyan kag nagdrayb papuli.

Saints, 4:230

Wala madugayi, nagpadala ang Ginuo sang mga misyonero halin sa Estados Unidos. Ginbisitahan nila ang pamilya Martins. Natalupangdan ni Helvécio nga nagadala sila sang matawhay nga pamatyagon sa ila balay. Kabalo sia nga, sang amo to nga panahon, ang mga tawo nga itom panit wala pirme ginatrato sang maayo sa Estados Unidos. Namangkot sia, “Ano ang pagtrato sang inyo relihiyon sa mga Itoman?”

Saints, 4:230–31

Ginpaathag sang mga misyonero nga ang tanan nga anak sang Dios pwede bunyagan. Pero sang amo to nga panahon, ang mga Itoman nga naghalin ang katigulangan sa Aprika indi pwede magkapot sang priesthood ukon magbaton sang kalabanan sang mga bugay sang templo. Madamo pa sang mga pamangkot si Helvécio kag Rudá. Gintinguhaan sang mga misyonero nga sabton ang ila mga pamangkot.

Saints, 4:231

Sa madamo nga tinuig, nagapangamuyo ang mga propeta para mabal-an kon san-o ihatag ang mga bugay sang priesthood kag templo sa tanan nga tawo.

Saints, 4:71

Nagdesisyon si Helvécio kag Rudá nga magtilaw sa pagsimba. Mapinalanggaon kag mabuot kaayo ang mga Santos. Nanamian ang pamilya Martins sa ila natun-an sa simbahan.

Saints, 4:231–32

Isa ka adlaw, samtang nagapapuli halin sa simbahan, ginhambal ni Marcus sa ila pamilya nga natalupangdan niya nga daw mas malipayon sila. “Kabalo ko kon ano ang rason,” siling ni Marcus. “Ang ebanghelyo ni Jesucristo.” Kabalo ang tanan sa pamilya nga husto si Marcus. Nagdesisyon sila nga magpabunyag kag magpakumpirma.

Saints, 4:232

Tinuig ang nagligad, masako ang mga Santos sang Brazil sa pagpatindog sang templo. Nasadyahan ang pamilya Martins, pero ginasuboan man sila. Indi sila makasulod sa templo pagkatapos sini nga madedikar. “Indi ka magkabalaka,” siling ni Helvécio kay Rudá. “Kabalo ang Ginuo sang tanan.”

Saints, 4:293–94

Indi mahapos nga magpabilin nga matinuohon. Ginkadlawan sang mga tawo ang pamilya Martins. Bisan ang ila mga abyan indi makaintiendi kon ngaa nagtiner gihapon sila sa Simbahan. Pero kabalo si Helvécio kag ang iya pamilya nga amo ini ang Simbahan ni Jesucristo.

Saints, 4:251–52

Isa ka adlaw, pag-abot ni Helvécio sa balay halin sa trabaho, siling ni Rudá, “May maayo ako nga balita, kanami-nami gid nga balita!” Pagkatapos sang kadamo nga pagpuasa kag pangamuyo, nakabaton sang rebelasyon ang propeta nga si Pangulong Spencer W. Kimball. Ginhambal sang Dios sa iya nga ang bisan sin-o, bisan ano ang kolor sang ila panit, makabaton sang tanan nga bugay sang priesthood kag templo.

Opisyal nga Deklarasyon 2; Saints, 4:318–19

Madugay ang paghulat sang pamilya Martins kag sang madamo nga iban pa. Karon natapos na gid man ang paghulat! Nabaton ni Helvécio kag Marcus ang priesthood. Si Helvécio, Rudá, kag ang ila kabataan ginselyohan bilang pamilya sa templo. Mabaton na nila karon ang tanan nga bugay sang ebanghelyo.

Saints, 4:319–21