Mga Saksi Nakakita sang mga Lamina sang Libro ni Mormon

Padayon nga gin-translate ni Joseph, Emma, kag Oliver ang bulawan nga mga lamina sa balay sang mga Smith sa Pennsylvania. Pero gusto sila pauntaton sang ila mga kasimanwa. May amigo si Oliver nga si David Whitmer nga nagaistar sa New York. Ginpamangkot ni Oliver si David kon pwede sila magsaylo sa balay sang pamilya Whitmer para matapos ang pag-translate.

Saints, 1:68

Nagpasugot si David kag ang iya pamilya. Ginbaton nila si Joseph, Emma, kag Oliver sa ila balay. Pwede na nila karon mapadayon ang pag-translate sing malinong. Madamo nga tawo ang nagaistar sa balay sang mga Whitmer. Buot silingon, madamo man sang ulobrahon, labi na ang nanay ni David nga si Mary.

Saints, 1:68–70

Isa ka adlaw, samtang nagaobra si Mary, ginbisitahan sia ni anghel Moroni. Siling niya nga kabalo sia nga ginakapoy sia tungod sa dugang nga ulobrahon. Gusto niya nga pabakuron ang iya pagtuo. Ginbuksan niya ang isa ka bag kag ginpagwa ang bulawan nga mga lamina. Ginbuksan niya ang mga pahina kag ginpakita kay Mary ang mga sinulatan. Ginpromisa niya kay Mary nga pagabugayan sia.

Saints, 1:70–71

May mga tawo nga wala nagapati nga matuod ang mga lamina. Gintuman ni Joseph ang sugo sang Ginuo nga indi pag-ipakita sa iban ang mga lamina. Siling sang Ginuo nga pasugtan Niya nga may tatlo pa nga makasaksi sang mga lamina. Namangkot si David Whitmer, Martin Harris, kag Oliver Cowdery kon pwede sila mangin saksi. Siling sang Ginuo nga pwede.

Doktrina kag mga Kasugtanan 5:11–12; 17; Saints, 1:73

Nagkadto sa kakahuyan si Joseph, Martin, Oliver, kag David. Nagluhod sila kag nagbulos-bulos sa pagpangabay sa Dios kon pwede nila makita ang mga lamina, pero waay sang may natabo.

Saints, 1:73

Nabatyagan ni Martin Harris nga sia ang rason nga wala ginasabat ang ila pangamuyo. Naghalin si Martin, kag padayon nga nagpangamuyo ang iban.

Saints, 1:73

Dayon may nagpakita nga anghel sa dako nga kasanag. Ginpakita niya kay Oliver kag David ang bulawan nga mga lamina kag ang mga nasulat diri. Nabatian nila ang tingug sang Dios nga nagasiling nga gin-translate ni Joseph ang mga lamina paagi sa gahum sang Dios kag husto ang pagka-translate sini. Ginhambal man sang Dios nga dapat nila ihambal sa tanan ang ila nakita kag nabatian.

“Ang Testimonya sang Tatlo ka Saksi”; Saints, 1:73–74

Ginpangita ni Joseph si Martin. Nagapangamuyo sia gihapon. Nangamuyo si Joseph upod sa iya. Dayon nagpakita ang anghel kag ginpakita ang mga lamina kay Martin, pareho sang iya ginhimo sa ila ni Oliver kag David.

Saints, 1:74

Dayon, ginpangita ni Joseph ang iya mga ginikanan, nga nagbisita kay Mary Whitmer. Ginhambalan niya sila nga malipayon gid sia katama nga may iban na nga nakakita sang mga lamina. Karon mahambalan na sang mga saksi ang mga tawo nga nagasugid sang matuod si Joseph. Ginsugid ni Martin sa tanan nga malipayon gid sia nga gintugtan sia sang Dios nga mangin isa sa mga saksi.

Saints, 1:74–75

Pagligad sang pila pa ka adlaw, ginsugo sang Ginuo si Joseph nga ipakita ang bulawan nga mga lamina sa walo pa ka tawo—sa iya tatay, duha niya ka utod nga lalaki, apat ka utod nga lalaki ni David, kag sa bayaw ni David. Ginpakaptan sa ila ang mga lamina kag ginpabukad ang mga pahina. Kabalo sila nga matuod ang mga lamina.

“Ang Testimonya sang Walo ka Saksi”; Saints, 1:75

Natapos na gid man ang pag-translate sang Libro ni Mormon. Ginbalik ni Joseph ang bulawan nga mga lamina kay anghel Moroni. Oras na para mag-imprinta sang mga kopya sang libro para mabasa ini sang tanan kag magtuon pa gid parte kay Jesucristo.

Saints, 1:75–76

Kinahanglan sang dako nga kantidad para maimprinta ang Libro ni Mormon. Ginbaligya ni Martin Harris ang iya parte sa ila uma para ibayad sa pagpaimprinta. Ginhimo niya ini kay kabalo sia nga matuod ang Libro ni Mormon. Ang tagsa ka kopya sang libro may testimonya ni Martin kag sang iban pa nga saksi para mabasa sang tanan. Wala gid ginhimutig sang mga saksi ang ila testimonya.

Doktrina kag mga Kasugtanan 19:26–27, 34–35; Saints, 1:76–78