Si Susa Young Gates kag Joseph F. Smith

Bata ni Brigham Young si Susa Young Gates. Nabata sia sa Utah kag didto nagdako. Mahiligon sia magsulat, kag nanamian sia magserbisyo sa Simbahan sang Ginuo.

Saints, 3:9–10, 64

Sang dako na si Susa, nagmasakit sia sang malubha. Nagpangayo sia sang bendisyon sang priesthood. Sa bendisyon, ginhambalan sang Ginuo si Susa nga gusto Niya nga maghikot sia sang mga buluhaton sa templo.

Saints, 3:193–94

Pagkatapos sang bendisyon, nag-ayo si Susa. Gingamit niya ang iya oras sa pagtuon parte sa kasaysayan sang iya pamilya. Sang nakita niya ang mga miyembro sang pamilya nga nagkalamatay nga waay mabunyagi, nagkadto sia sa templo para mabunyagan para sa ila. Nanamian sia mag-istorya sa mga tawo parte sa buluhaton sa family history. Ang masubo, madamo nga tawo ang indi interesado.

Saints, 3:194–95, 206

Isa ka adlaw, ginbisitahan ni Susa ang iya abyan nga si Joseph F. Smith, ang Presidente sang Simbahan. Sinemana na nga nagamasakit si Pangulong Smith. Kabalo si Susa nga nasuboan man sia kaayo tungod napatay ang iya bata nga lalaki. Nasuboan man sia sa iban nga mga butang nga nagakatabo sa kalibutan, pareho sang mga giyera kag balatian.

Saints, 3:197–99, 205–6

Pero sang magpungko si Susa upod si Pangulong Smith, malipayon sia nga mag-istorya sa iya. Ginsugiran niya si Susa nga ginhatagan sia sang Dios sang espesyal nga palanan-awon. Parte ini tanan sa kalibutan sang mga espiritu, kon diin nagakadto ang mga tawo pagkatapos nila nga mapatay. Nasulat ang iya palanan-awon sa papel. Ginhatag ini ni Pangulong Smith kay Susa kag ginpangabay sia nga basahon ini.

Saints, 3:206–7

Ginbasa ni Susa ang papel. Ginsiling sini nga ginbisitahan ni Jesucristo ang kalibutan sang mga espiritu. Ginpadala niya si Adan, Eva, kag ang iban nga matinuohon nga mga lalaki kag babayi para tudloan ang mga espiritu nga wala nagbaton sang ebanghelyo sang buhi pa sila. Ginabuligan nila ining mga espiritu nga maghanda agud mabunyagan ang mga tawo para sa ila sa templo.

Doktrina kag mga Kasugtanan 138:11–19, 29–48; Saints, 3:206–7

Nakadayaw si Susa samtang ginabasa niya ang palanan-awon ni Pangulong Smith. Nagyuhum si Pangulong Smith sa iya. “Susa,” siling niya, “halangdon nga buluhaton ang imo ginahimo.” Ginhambalan niya sia nga palangga niya sia tungod sa iya pagtuo sa Ginuo.

Saints, 3:206

Ginsulat ni Susa ang rebelasyon sa iya journal. “Ah, dako nga kasulhayan ato sa akon!” siling niya. Indi na sia kahulat nga sugiran ang iya mga abyan kag ang iban nga mga miyembro sang Simbahan parte sini. Kabalo sia nga makabulig sa mga Santos ang palanan-awon ni Pangulong Smith nga mangin ganado sa paghikot sang buluhaton sa templo para sa mga tawo sa kalibutan sang mga espiritu.

Saints, 3:207