“Nabaton ni Joseph kag Oliver ang mga Yabi sang Priesthood,” Mga Sugilanon sa Doktrina kag mga Kasugtanan (2024)
“Nabaton ni Joseph kag Oliver ang mga Yabi sang Priesthood,” Mga Sugilanon sa Doktrina kag mga Kasugtanan
Abril 1836
Nabaton ni Joseph kag Oliver ang mga Yabi sang Priesthood
Si Jesucristo kag mga anghel nagbisita sa Templo sang Kirtland
Isa ka semana pagkatapos nga gindedikar ang Templo sang Kirtland, isa ka libo ka Santos ang nagtipon sa templo para magsimba sa Manluluwas. Domingo ato sang Pagkabanhaw. Si Joseph Smith, Oliver Cowdery, kag ang Dose ka Apostoles nagpanagtag sang sakramento sa mga Santos.
Doktrina kag mga Kasugtanan 110, tig-ulo sang seksyon; Saints, 1:239
Pagkatapos sang sakramento, nakakita sang malinong nga lugar sa templo si Joseph kag Oliver, sa likod sang kurtina, para magpangamuyo.
Doktrina kag mga Kasugtanan 110, tig-ulo sang seksyon; Saints, 1:239
Pagkatapos nila nga magpangamuyo, nagtangla sila. Nagatindog si Jesucristo sa atubang nila! Nabal-an Niya nga nangabudlay todo ang mga Santos para ipatindog ang templo. “Ginbaton ko ining balay,” siling Niya. Ginhambal ni Jesus kay Joseph kag Oliver nga ang mga bugay sang templo magadala sang dako nga kalipay sa madamo nga tawo.
Doktrina kag mga Kasugtanan 110:1–10
Paghalin ni Jesus, nagpakita kay Joseph kag Oliver ang propeta sa Daan nga Katipan nga si Moises. Ginhatag niya sa ila ang mga yabi sang priesthood sa pagtipon sang Israel. Buot silingon nga pwede na nila pangunahan ang buluhaton sang pagpakigbahin sang ebanghelyo. Pwede na sila magpadala sang mga misyonero sa bilog nga kalibutan para dalhon ang mga tawo sa Simbahan sang Manluluwas.
Doktrina kag mga Kasugtanan 110:11
Dason, nagpakita si propeta Elias. Ginhatag niya kay Joseph kag Oliver ang mga yabi para ipanumbalik ang kasugtanan kay Abraham. Buot silingon sini nga mabaton na sang mga Santos halin sa Ginuo ang pareho nga kasugtanan nga nabaton ni Abraham. Makaangkon na sila sang gahum para dalhon ang ebanghelyo kag ang mga bugay sang Dios sa mga tawo sa bisan diin sa maabot nga madamo nga tinuig.
Doktrina kag mga Kasugtanan 110:12
Sa katapusan, nagpakita si propeta Elijah. Ginhatag niya kay Joseph kag Oliver ang mga yabi sang priesthood para selyohan, ukon bugkuson, ang mga pamilya sa wala katubtuban. Ang buluhaton nga ginahimo sang mga Santos sa templo mabaton na sa langit. Karon ang Simbahan may gahum na sa paghimo sang buluhaton sang Manluluwas kag paghanda para sa Iya pagbalik liwat sa duta.