Pagtipon sa Ohio

Sa Ohio, nagadamo nga nagadamo ang nagapamiyembro sa Simbahan. Ginhambalan sang Ginuo si Joseph Smith nga ang mga Santos nga nagaestar sa iban nga mga lugar dapat nga magtipon sa Ohio. Mangin malawig ini nga biyahe. Pero nagpromisa ang Ginuo nga pagkatapos nila nga magtipon, tudloan Niya ang mga Santos sang Iya layi kag bugayan sila sang gahum para himuon ang Iya buluhaton.

Doktrina kag mga Kasugtanan 37; 38:32; Saints, 1:109–110

Ang nanay ni Joseph nga si Lucy, kag ang grupo sang mga 80 ka miyembro sang Simbahan nagbiya sang ila mga balay sa New York kag nagsaylo sa Ohio. Nagsakay sila sa barko nga magadala sa ila sa iban nga lugar. Pagligad sang pila ka adlaw nga biyahe, kinahanglan magdungka ang barko. Indi sila makapadayon tungod sang nagtig-a nga yelo.

Saints, 1:121–22

Kinahanglan sang mga Santos maghulat nga mabuka ang yelo. Kapoy na sila, ginagutom, basa, kag ginatugnawan.

Saints, 1:122

Mabudlay maghulat. Ang iban nga mga Santos nagsugod nga magbinaisay sa isa kag isa.

Saints, 1:122

Waay nanamian si Lucy mamati nga nagabinaisay ang mga Santos. Kahibalo sia nga kinahanglan may ihambal sia. “Diin na ang inyo pagtuo?” pamangkot niya. Ginhambalan ni Lucy ang mga Santos nga kon mangamuyo sila sa Dios, buk-on Niya ang yelo para makapadayon sila sa ila pagbiyahe.

Saints, 1:122–23

Gulpi lang, nakabati sila sang gahod nga daw daguob samtang natunga ang yelo. Nabuka ang yelo, nga igo-igo lang gid agyan sang ila barko.

Saints, 1:123

Nakibot ang mga Santos kag nagpasalamat. Nagtipon sila para mangamuyo kag magpasalamat sa Amay nga Langitnon. Nagbiyahe ang ila barko nga luwas sa katalagman padulong sa Ohio.

Saints, 1:123

Sang mag-abot ang mga Santos sa Ohio, gin-abiabi sila sang mga miyembro sang Simbahan didto kag ginbuligan sila nga magpangita sang mga lugar nga ila estaran. Gintuman sang Ginuo ang Iya promisa nga tudloan sila sang Iya layi kag hatagan sila sang gahum nga himuon ang Iya buluhaton.

Doktrina kag mga Kasugtanan 42; Saints, 1:126