Gamo sa Missouri

Pagpadayon nga mabaskog sa pagtuo sa panahon sang peligro

Ang iban nga mga tawo sa Independence nasuya sa nagainabot nga mga Santos.

Madamo nga Santos ang nag-inabot para mag-estar sa Independence, Missouri. Gusto sang Ginuo nga tukuron nila ang Sion didto. Pero ang mga Santos kag ang mga tawo nga nagaestar na ngadaan sa Independence wala nagasantuanay. Nagabinaisay sila sa madamo nga butang. Ang iban nga mga tawo sa banwa nangakig kag gusto nga pahalinon ang mga Santos.

Doktrina kag mga Kasugtanan 57:1–3; Saints, 1:171–74

Mga lider sa Independence nga nagpakigkita kay Edward Partridge.

Si Edward Partridge ang bishop sa Independence. Nagkadto sia sa miting sang mga lider sang banwa. Siling nila nga kinahanglan maghalin ang mga Santos sa Independence. Kahibalo si Bishop Partridge nga gusto sang Dios nga tukuron sang mga Santos ang Sion sa Independence. Siling niya nga indi pwede maghalin ang mga Santos.

Saints, 1:176

Ginapangguba sang akig nga mga tawo ang mga balay kag mga bilding.

Nagsugod sa pagpangguba ang akig nga mga tawo sang mga balay kag mga bilding nga ginpatindog sang mga Santos.

Saints, 1:177–78, 182

Gindakop sang mga tawo si Edward Partridge kag Charles Allen.

Gindakop sang mga tawo si Bishop Partridge kag isa pa ka tawo nga ang ngalan Charles Allen sa ila mga balay. Ginsagnoy nila ang duha sa sentro sang banwa.

Saints, 1:179

Si Edward kag Charles nga bulit sang alkitran kag mga balahibo.

Siling ni Bishop Partridge, “Kon kinahanglan ko nga mag-antos para sa akon relihiyon, pareho lang ini sa gin-agyan sang iban antes sa akon.” Gintiklod sang mga tawo si Bishop Partridge kag si Charles sa duta. Ginbutangan nila sila sang mainit nga alkitran kag mga balahibo sa bilog nila nga lawas.

Saints, 1:179–80

Si William McLellin nga nagapanago sa kakahuyan.

Si William McLellin, nga miyembro sang Simbahan sa Independence, nakabati parte sa ginpanghimo sang akig nga mga tawo. Nahadlok sia kag nagdalagan sa kakahuyan para manago.

Saints, 1:182

Si William nga nagapalibog kon ano ang iya himuon kon madakpan sia.

Nagpalibog si William kon ano ang matabo kon madakpan sia sang akig nga mga tawo. Ihambal bala niya gihapon nga matuod ang Libro ni Mormon, bisan pa nga patyon sia nila tungod sini?

Saints, 1:182–83

Nakita ni Oliver Cowdery kag David Whitmer si William.

Nakit-an sang mga amigo ni William nga si Oliver Cowdery kag David Whitmer nga ara si William sa kakahuyan. Kahibalo si William nga si Oliver kag David nagapati sa Libro ni Mormon. Ginpakita sa ila sang isa ka anghel ang bulawan nga mga lamina. “Ihambal sa akon,” siling ni William sa ila, “matuod gid bala inang Libro ni Mormon?”

Saints, 1:183

Si Oliver kag David nga nagapakigbahin sang ila testimonya kay William.

Ginhambal ni Oliver kag David kay William nga matuod ang Libro ni Mormon. Siling nila nga bisan pa nga patyon sila sang akig nga mga tawo, indi sila mag-untat sa pagpakigbahin sang ila testimonya sa mga tawo. “Nagapati ako sa inyo,” siling ni William.

Doktrina kag mga Kasugtanan 17:3–6; Saints, 1:183