Mga Sugilanon sa Balaan nga mga Kasulatan

Ginhatag ni Joseph kag Hyrum ang Ila Kabuhi para sa Ebanghelyo

“Ginhatag ni Joseph kag Hyrum ang Ila Kabuhi para sa Ebanghelyo,” Mga Sugilanon sa Doktrina kag mga Kasugtanan (2024)

“Ginhatag ni Joseph kag Hyrum ang Ila Kabuhi para sa Ebanghelyo,” Mga Sugilanon sa Doktrina kag mga Kasugtanan

Marso–Hunyo 1844

Ginhatag ni Joseph kag Hyrum ang Ila Kabuhi para sa Ebanghelyo

Napatay ang Propeta, pero nagapadayon ang buluhaton sang Ginuo

Ginpasa ni Joseph Smith ang mga yabi sang priesthood sa mga Apostoles sang Simbahan.

Nabalaka si Joseph Smith. Ano ang matabo sa Simbahan kon mapatay sia? Gusto niya masiguro nga ang buluhaton sang Ginuo magapadayon. Gani gintipon niya ang mga Apostoles kag ginhatag sa ila ang mga yabi sang priesthood nga ginhatag sa iya ni Jesucristo. Buot silingon sini nga ang mga Apostoles mahimo nga magpamuno sang Simbahan sang Ginuo kag himuon ang Iya buluhaton. Nakabulig ini nga mapahamtang ang balatyagon ni Joseph.

Saints, 1:519–20

Eksena sa Nauvoo nga nagapakita sang mga tawo nga akig kay Joseph.

Pero kadamo sang mga tawo nga akig kay Joseph. Ang iban gusto pa gani sia nga patyon. Wala sila nanamian sang iya ginatudlo. Nagsulat sila parte sa iya sa peryodiko para mas mangakig ang mga tawo kay Joseph kag sa Simbahan. Ang iban sa ila gusto nga sulongon ang Nauvoo.

Saints, 1:526–28, 530–32, 533–34

Ginpaguba ni Joseph kag sang iban nga mga lider sa Nauvoo ang imprintahan para mauntat ang paglapta sang dumot. Mas ginkaakig ini sang mga tawo. Ginhambalan sang gobernador si Joseph nga magkadto sa siyudad sang Carthage para madesisyunan sang husgado kon naglapas sia sang layi. Nahibal-an ni Joseph nga kon magkadto sia sa Carthage, patyon sia sang mga tawo.

Doktrina kag mga Kasugtanan 135:4; Saints, 1:533–37, 539–41

Si Joseph nga nagapaalam sa iya pamilya kag manugkadto sa Carthage.

Pero gusto man ni Joseph nga mapalayo sa peligro ang mga Santos. Kon magkadto sia sa Carthage, basi kon indi na paghilabtan sang mga tawo ang mga Santos sa Nauvoo. Nagdesisyon si Joseph nga maglakat. Ginbendisyonan niya si Emma kag ang iya kabataan, ginhalukan sila bilang pamaalam, kag naglakat pa-Carthage.

Saints, 1:542–44

Si Joseph kag Hyrum nga nagahalin sa Nauvoo.

Nag-upod ang utod ni Joseph nga si Hyrum sa iya. Amo man si John Taylor, Willard Richards, kag iban pa nga abyan. Sang nagapalayo na sila, ginpapundo ni Joseph ang iya kabayo kag nagbalikid sa Nauvoo. “Amo ini ang pinakamatahum nga lugar kag pinakamaayo nga mga tawo sa idalom sang langit,” siling niya.

Saints, 1:543–45

Eksena halin sa Bilanggoan sang Carthage: si Hyrum nga nagabasa sang Libro ni Mormon kag si Joseph nga nagawali sa mga guwardiya.

Sang mag-abot sila sa Carthage, ginpriso sila. Sang ara sila sa prisuhan, ginbasahan sila ni Hyrum sang Libro ni Mormon. Ginhambalan ni Joseph ang mga guwardiya nga ang Libro ni Mormon matuod.

Saints, 1:546

Para paumpawan ang iya mga amigo, nagkanta si John Taylor sang himno parte kay Jesus. Katahum sang kanta, kag ginpakanta ini liwat sa iya ni Hyrum.

Saints, 1:549

Mga akig nga mga tawo nga nagsulong sa prisuhan.

Sang ulihi sina nga adlaw, nagsulong ang akig nga mga lalaki nga may mga armas sa prisuhan. Ginwasak nila ang puwertahan kag gintiro ang kuwarto kon diin ara si Joseph kag ang iya mga abyan. Malubha nga napilasan si John Taylor. Napatay si Hyrum kag Joseph.

Doktrina kag mga Kasugtanan 135:1–2; Saints, 1:550–52

Gintangisan sang mga Santos ang kamatayon ni Joseph kag Hyrum.

Nasubuan gid ang mga Santos sang nabal-an nila nga napatay si Joseph kag Hyrum. Pero kabalo sila nga ang pagpatay sa Propeta indi makapugong sa Simbahan. Simbahan ini sang Manluluwas, kag padayon Niya ini nga pangunahan. Padayon nga nagdako ang Simbahan kag nagabugay sa mga anak sang Dios sa bilog nga kalibutan.

Saints, 1:553–59