Natun-an ni Joseph kag Sidney ang parte sa Langit

Isa ka adlaw, si Joseph Smith kag Sidney Rigdon nagabasa sang Biblia. Ginabasa nila kon ano ang matabo sa mga tawo kon mapatay sila. Ginpanumdom ni Joseph kag Sidney ang ila ginbasa, kag gusto pa gid nila makatuon.

Doktrina kag mga Kasugtanan 76:11–18

Ginhatagan sila sang Ginuo sang matahum nga palanan-aawon. Nakita nila ang Amay nga Langitnon kag si Jesucristo nga ginapalibutan sang mga anghel. Nakabati sila sang tingug nga nagasiling nga si Jesus Anak sang Dios. Siling sang tingug nga si Jesus napatay para sa aton kag dayon nabanhaw—nabuhi Sia liwat. Tungod nabuhi Sia, tanan kita mabanhaw man.

Doktrina kag mga Kasugtanan 76:19–24, 39–43

Natun-an ni Joseph kag Sidney nga pagkatapos naton nga mabanhaw, maestar kita sa isa sa tatlo ka lugar sa langit, nga ginatawag mga ginharian. Ang mga tawo nga wala nagabaton sang ebanghelyo ni Jesucristo makadto sa telestiyal nga ginharian. Ginkumparar sang Ginuo ini nga ginharian sa kasanag sang mga bituon.

Doktrina kag mga Kasugtanan 76:81–86

Natun-an man ni Joseph kag Sidney ang parte sa ginharian nga ginatawag terestriyal nga ginharian. Ini nga ginharian para sa mga tawo nga mabuot pero wala nagasunod sang tanan [nga ginatudlo] sang ebanghelyo ni Jesucristo. Indi sila mabakod sa ila pagtuo sa Iya. Ginkumparar sang Ginuo ini nga ginharian sa kasanag sang bulan.

Doktrina kag mga Kasugtanan 76:71–80

Ang pinakataas nga ginharian amo ang selestiyal nga ginharian. Ang mga tawo sa sining ginharian naghimo sang mga kasugtanan, ukon mga promisa, upod sa Dios kag gintuman ang ila mga kasugtanan. Nagahinulsol sila kag nagasunod kay Jesucristo. Magapuyo sila upod sa Amay nga Langitnon kag ni Jesus sa katubtuban kag mangin pareho sa Ila. Ginkumparar sang Ginuo ini nga ginharian sa kasanag sang adlaw.

Doktrina kag mga Kasugtanan 76:50–70

Ginhambalan sang Ginuo si Joseph kag Sidney nga indi pag-iistorya ang tanan nga nakita nila sa ila palanan-awon. Pero gusto Niya nga isulat nila ang iban sini kag ipakigbahin sa iban. Madamo nga miyembro sang Simbahan ang nalipay gid nga iistorya sa iban nga mga tawo ang parte sa palanan-awon.

Doktrina kag mga Kasugtanan 76:113–119; Saints, 1:149–50

May mga tawo nga waay nanamian sa palanan-awon. Lain ini sangsa ila ginapatihan. Pero kalabanan sa mga Santos nagapasalamat nga nakahibalo sila parte sining rebelasyon. Ginapakita sini sa ila nga palangga sang Amay nga Langitnon ang Iya mga anak kag naghatag sang alagyan para makabalik sila sa Iya.

Saints, 1:149–50