Nagserbisyo ang mga Apostoles sa Misyon sa Gran Britanya

Sa rebelasyon kay Propetang Joseph Smith, gintawag sang Ginuo ang mga Apostoles sa misyon patabok sa dagat padulong sa Gran Britanya. Bisan nga budlay para kay Joseph nga ato sa malayo ang mga Apostoles, nagsalig sia sa Ginuo. Mabudlay man para sa mga Apostoles nga bayaan ang ila mga pamilya. Pero nagpromisa ang Ginuo nga bugayan sila.

Doktrina kag mga Kasugtanan 118

Si Heber Kimball kag ang iya asawa nga si Vilate, may lamharon pa nga pamilya. May bata sila nga isa pa lang ka bulan. Madamo nga miyembro sang ila pamilya ang nagamasakit sing grabe.

Saints, 1:405

Nagamasakit man si Brigham Young, kag pigado ang iya pamilya. Pero siling sang asawa ni Brigham nga si Mary Ann, “Lakat ka kag tumana ang imo misyon, kag bugayan ka sang Ginuo.”

Saints, 1:404–5

Nagsugod na nga maglakat si Brigham, pero paglab-ot niya sa balay ni Heber, tama na sa iya kaluya nga indi na sia makalakat. Nagtiner sia sa panimalay ni Heber sang pila ka adlaw.

Saints, 1:405

Nag-abot si Mary Ann para atipanon si Brigham hasta nga maayo-ayo na sila gawa ni Heber para maglakat. Pareho sila nga maluya kaayo, pero gusto nila nga iwali ang ebanghelyo.

Saints, 1:405

Nagpaalam si Heber kag Brigham sa ila mga asawa kag nagsakay sa likod sang karosa. Nagalain ang ila buot nga bayaan ang ila mga pamilya nga nagaminasakit kag pigado katama. Samtang nagapalayo ang karosa, siling ni Heber kay Brigham, “Kabudlay man sini man.” Gusto niya nga buligan ang ila pamilya nga magpakabakod. Ginpangabay ni Heber nga magpundo anay ang nagamaneho sang karosa.

Saints, 1:405–6

Sa sulod sang balay, nakabati si Vilate sang gahod. Nagkadto sia sa puwertahan, kon diin nagatindog si Mary Ann. Nakita nila si Heber kag Brigham nga nagatindog sa likod sang karosa, nga nagawagayway sang ila mga kalo kag nagasinggit nga, “Hurrah! Hurrah! Hurrah para sa Israel!” Nagsabat ang mga babayi, “Paalam! Pakamaayuhon kamo sang Dios!”

Saints, 1:406

Pagkatapos sang malawig nga biyahe patabok sa dagat, nag-abot si Heber kag Brigham sa Gran Britanya. Upod sa iban pa nga Apostoles, gintudloan nila ang madamo nga tawo parte kay Jesucristo kag sa Iya ebanghelyo. Linibo ka tawo ang ginbunyagan kag nagpamiyembro sa Simbahan sang Manluluwas.

Saints, 1:408–11

Madamo sa mga tawo nga ginbunyagan sa Gran Britanya ang nagsaylo sa Nauvoo para magbulig sa pagpasad sang siyudad kag sang templo. Gintuman sang Ginuo ang Iya promisa nga atipanon ang mga pamilya ni Heber kag Brigham samtang nagaserbisyo sila sa Iya bilang mga misyonero.

Saints, 1:437–39