Galingan sang Pamilya Hawn

Si Williard Smith 11 ang pangidaron. Nagaestar ang iya pamilya sa Galingan sang Pamilya Hawn, sa Missouri, upod sa iban nga Santos. Gusto nila magtipon upod sa mga Santos sa Far West.

Doktrina kag mga Kasugtanan 115:7–8; Saints, 1:347–48

Isa ka adlaw, upod ni Willard ang iya tatay kag mga utod, si Sardius kag Alma. Gulpi lang, nakabati sila sang linupok kag sininggit. May mga tawo nga nagkadto para atakehon ang mga Santos.

Saints, 1:348–49

Nagdinalagan ang tanan para magpanago. Madamo sang mga lalaki kag kabataan nga nanago sa pandayan sang salsalon. Nagkadto man didto ang tatay ni Willard kag ang iya mga utod, pero naseparar si Willard sa ila. Nanago sia sa likod sang tumpok sang kahoy. Nakabati sia sang linupok sa palibot niya.

Saints, 1:349, 353

Nagsaylo-saylo si Willard para manago. Sang ulihi, nag-untat ang linupok. Naghalin na ang mga nag-atake sang Galingan sang Pamilya Hawn.

Saints, 1:353

Nagkadto si Willard sa pandayan sang salsalon para pangitaon ang iya pamilya. Napatay ang iya tatay kag si Sardius. Pero ang manghod ni Willard nga si Alma buhi pa.

Saints, 1:353

Natiruhan si Alma sa iya balikawang. Grabe ang iya igo. Ginpas-an ni Willard si Alma kag gindala sia sa tolda sang ila pamilya.

Saints, 1:353–54

Ang nanay ni Willard nga si Amanda, indi kabalo kon paano bulngon ang balikawang ni Alma. Pero kabalo sia nga kabalo ang Dios. Nangamuyo sia, kag nakabati sia sang tingug nga nagasugo sa iya kon ano mismo ang iya himuon.

Saints, 1:354

Ginhugasan ni Amanda ang pilas ni Alma sang may abo. Dayon ginpudpod niya ang gamot sang isa ka kahoy kag ginbutang sa iya pilas. Ginputos niya ang iya balikawang sang lapat. “Amo ka lang sina maghigda, kag indi ka maggiho,” siling niya, “kag himuan ka sang Ginuo sang bag-o nga balikawang.”

Saints, 1:354–55

Sang ulihi, siling sang gobernador sang Missouri nga kinahanglan maghalin ang mga Santos sa estado kay kon indi, patyon sila. Pero wala pa mag-ayo ang balikawang ni Alma. Nangamuyo si Amanda kag nangayo sang bulig sa Ginuo. Naghambal ang tingug sa iya nga indi pagbayaan ni Jesus ang iya pamilya. Nabatyagan ni Amanda nga wala sang pwede maghalit sa iya.

Doktrina kag mga Kasugtanan 88:83; Saints, 1:372, 378–79

Wala madugay pagkatapos niya nga magpangamuyo, nabatian ni Amanda nga nagsininggit ang iya kabataan. Nagdalagan sia para pangitaon sila, kag sang makita niya sila, nagadalagan na si Alma. “Nag-ayo na ko, Ma, nag-ayo na ko!” siling niya. Nag-ayo na ang iya balikawang! Isa ini ka milagro halin sa Ginuo. Naghalin si Amanda kag ang iya kabataan sa Missouri para magpangita sang hilway nga lugar upod sa iban nga mga Santos.

Saints, 1:379