Ang Perlas nga Bilidhon

Isa ka adlaw, isa ka tawo ang nagkadto sa Kirtland nga may mga mummy halin sa Egipto. Upod sa mga mummy ang pila ka linukot, ukon daan na kaayo nga mga rolyo sang papel. Ang mga linukot nasulatan sa Egiptohanon. Ginpakita ini sang tawo kay Propeta Joseph Smith. Interesado kaayo si Joseph sa mga sinulat.

Saints, 1:219–20

Ginbuligan sang pila ka abyan si Joseph nga baklon ang mga mummy kag ang mga linukot. Samtang ginatun-an ni Joseph ang mga sinulat, ginpahayag sang Ginuo sa iya ang sinang-una nga mga sinulatan ni Abraham, isa ka propeta sa Biblia. Sa bulig sang mga amigo pareho kay Oliver Cowdery, ginsulat ni Joseph ang gintudlo sang Ginuo sa iya parte sa mga pinanudlo ni Abraham.

Saints, 1:220

Nakita ni Abraham sa palanan-awon ang aton kabuhi upod sa Amay nga Langitnon antes kita matawo. Nakita niya nga ginpili si Jesus para mangin aton Manluluwas. Natun-an man ni Abraham ang parte sa pagtuga sang kalibutan. Nalipay gid ang mga Santos nga mabaton ini nga mga pinanudlo ni Abraham. Malipayon sila nga gusto sila tudloan sing dugang sang Ginuo.

Abraham 2:6–11; 3–5; Saints, 1:220

Ang mga sinulatan ni Abraham nangin parte sa libro sang balaan nga kasulatan nga ginatawag Perlas nga Bilidhon. Unod man sining libro ang sinulatan ni Moises, isa pa ka propeta sa Biblia. Nagatudlo ini sang mga kamatuoran nga nadula sa Biblia. Gusto sang Ginuo nga mabal-an sang mga tawo ining kamatuoran, gani ginpakigbahin Niya ini kay Joseph Smith.

Moises 1–8; Abraham 1–5

Unod man sang Ang Perlas nga Bilidhon ang testimonya ni Joseph Smith kag ang 13 ka Mga Artikulo sang Pagtuo. Ginsulat ni Joseph Smith ining mga butang para ihambal sa kalibutan kon ano ang mga ginapatihan sang mga Santos sa Ulihing mga Adlaw. Ang Perlas nga Bilidhon gamay nga libro, pareho nga ang perlas gamay, pero tama ini ka malahalon.

Joseph Smith—Kasaysayan; Mga Artikulo sang Pagtuo 1