Ang Pamilya Jackson

Pagkatapos nga naglakat ang una nga grupo sang mga Santos sa Salt Lake Valley, linibo pa gid ka mga Santos ang naglinakat man. Nagbiyahe sila sang malayo, kag ginbuligan sila sang Ginuo. Isa sa pamilya nga nagbiyahe amo ang pamilya Jackson. Ginbayaan nila ang ila balay sa England kag malipayon nga naglakat para magbulig sa mga Santos nga magpatindog sang Sion.

Doktrina kag mga Kasugtanan 136:1–11; Saints, 2:222–23

Nagtabok ang pamilya Jackson sa dagat sakay sa barko. Dayon nagsakay sila sa tren sa isa ka bahin sang pagbiyahe pakadto sa Salt Lake Valley. Kinahanglan lakton na lang nila dayon ang nabilin sa biyahe.

Saints, 2:222–23

Naghimo sila sang gamay nga karo para kargahan sang ila pagkaon, mga bayo, kag iban pa nga gamit nga gusto nila dalhon. Madamo nga Santos ang nakalab-ot nga hilway sa valley sa sini nga pamaagi.

Saints, 2:223–26

Ginguyod ni Elizabeth kag Aaron Jackson ang mabug-at nila nga karo. Naglakat ang ila kabataan nga si Martha, Mary, kag Aaron Jr. Mabudlay ato nga hilimuon. Nagapaabot sila nga makalab-ot sila sa valley antes mag-winter. Pero sang mag-abot ang fall, kalawig pa sang ila lalakton. Nagsugod na nga mangin matugnaw, kag nagakawad-an na sila sang pagkaon.

Saints, 2:223–26, 229, 231–32

Sa Salt Lake City, nabatian ni Brigham Young nga may mga Santos nga nagapakadto sa valley. Nabalaka sia para sa ila. Pagkadason nga adlaw sa simbahan, ginhambalan niya ang tanan nga ining mga Santos ara sa peligro. Ginhambalan niya sila nga kargahan ang mga karosa sang mga butang nga kinahanglanon sang mga Santos. “Lakat kag dalha diri ining mga tawo,” siling niya.

Saints, 2:229–30

Gin-uba sang mga babayi sa miting ang ila madamol nga mga medyas kag ginbutang ini sa mga karosa. Ang iban ginhatag ang ila pagkaon, mga habol, sapatos, kag bayo. Pagligad sang duha ka adlaw, masobra 50 ka lalaki kag 20 ka karosa ang naghalin sa valley para magbulig.

Saints, 2:230

Samtang nagapadayon sa pagpanglakaton ang pamilya Jackson, nagsugod na nga magtupa ang snow. Nagmasakit sing grabe si Aaron. Nabudlayan na sia nga maglakat. Kinahanglan sang mga Santos nga magtabok sa nagayelo nga suba, kag tungod sini mas nagluya pa gid si Aaron. Sina nga gab-i, napatay si Aaron. Ang masubo, kinahanglan sang iya pamilya nga magpadayon nga wala sia.

Saints, 2:232–34

Pagkadason nga aga, mas madamo pa gid ang nagtupa nga snow. Gintulod kag ginguyod sang pamilya Jackson kag sang iban nga mga Santos ang ila mga karo sa snow. Nagpangamuyo sila kada adlaw nga buligan sila sang Dios.

Doktrina kag mga Kasugtanan 136:29; Saints, 2:234–35

Isa ka gab-i, nagakabalaka si Elizabeth sa iya kabataan. Gutom na sila kag ginatugnawan. Makalab-ot ayhan sila sa Salt Lake Valley? Natulogan sia kag nadamguhan niya si Aaron. Siling niya, “Magpakaisog ka, Elizabeth.” Siling niya nga may bulig nga manug-abot.

Saints, 2:235–36

Insakto si Aaron. Wala madugayi, nag-inabot ang mga lalaki halin sa Salt Lake upod ang ila mga karosa. Ginhatagan nila ang mga Santos sang pagkaon kag mga bayo. Naghinugyaw ang mga Santos kag nagkinadlaw kag ginhakos ang mga lalaki. Nagkanta sila sang himno kag ginpasalamatan ang Amay nga Langitnon sa pagsabat sang ila mga pangamuyo.

Doktrina kag mga Kasugtanan 136:28; Saints, 2:236

Sang mag-abot sila sang ulihi sa valley, Domingo na. Ginhambalan ni Brigham Young ang mga miyembro sang Simbahan sa Salt Lake City nga imbes nga magsimba, dapat sila maglakat para amomahon ang mga Santos nga nag-abot. Gintamyaw nila ang ginatugnawan kag kapoy nga mga Santos kag gin-imbitar sila nga mag-estar sa ila mga balay.

Saints, 2:239–40