Pagbiya sang Nauvoo kag Pagbiyahe pa-Weste

Napatay na si Joseph Smith. Karon si Brigham Young kag ang iban pa nga Apostoles ang nagapamuno sang Simbahan. Nabal-an ni Brigham nga ara na sa peligro ang mga Santos sa Nauvoo. Kinahanglan gid nila maghalin. Pero antes sina, gusto sang Ginuo nga tapuson nila ang pagpatindog sang templo. Gusto Niya nga maghimo sila sang mga kasugtanan upod sa Iya kag maselyohan bilang mga pamilya.

Saints, 1:571, 579–80

Pagkatapos sang pila ka bulan, handa na ang templo para maghimo ang mga tawo sang mga kasugtanan didto. Linibo ka Santos ang nagkadto sa templo. Nagtiner si Brigham sa templo sang gab-i na kaayo para buligan sila nga maghimo sang mga kasugtanan upod sa Ginuo. Sang ulihi, ginhambalan ni Brigham ang tanan nga kinahanglan nila maghalin sa Nauvoo.

Saints, 1:582

Pagbugtaw ni Brigham sang aga, madamo pa nga mga Santos ang nagahulat sa templo. Ginhambalan sila ni Brigham nga peligroso na kon magtiner pa sila sa Nauvoo. Kinahanglan na nila magpangita sang bag-o nga maestaran sa Weste. Nagpromisa sia nga pwede sila magpatindog sang bag-o nga templo pag-abot nila didto.

Saints, 1:582–83; 2:13–14

Pero indi maghalin ang mga Santos. Gusto nila nga maghimo sang mga kasugtanan upod sa Ginuo antes sila magsugod sa pagpanglakaton padulong sa bag-o nila nga puluy-an.

Saints, 1:583

Nakita ni Brigham ang ila mga guya kag nagliwat ang iya pensar. Ginhatag niya ang bilog niya nga adlaw kag ang pagkadason nga adlaw sa pagbulig sa mga Santos nga maghimo sang mga kasugtanan sa templo.

Saints, 1:583

Karon nga nakahimo na ang mga Santos sang mga kasugtanan upod sa Ginuo, oras na para maghalin sa Nauvoo. Kabalo si Brigham nga may lugar nga ginpreparar ang Ginuo para sa ila. Nakita niya ini sa palanan-awon. Nagsugod sila sa ila pagbiyahe. Matugnaw ang klima, kag lutakon ang dalan. Nagminasakit ang mga tawo. Nagakaubos na ang ila pagkaon.

Saints, 2:16–18, 20–21

Malawig pa ang lalakton sang mga Santos. Nanghunahuna si Brigham kon paano nila matigayon ang amo sina kalawig kag kabudlay nga biyahe. Nagpangamuyo sia para sa bulig sang Dios.

Saints, 2:46

Ginhatagan sang Ginuo si Brigham sang rebelasyon. Gintudloan Niya si Brigham kon paano pangunahan ang mga Santos. Siling Niya nga dapat magbinuligay sila sa pag-atipan sang mga pigado.

Doktrina kag mga Kasugtanan 136:1–8

Siling sang Ginuo nga dapat dumdumon sang mga Santos ang mga kasugtanan nga ginhimo nila upod sa Iya. Kon himuon nila ini, bugayan Niya sila kag buligan sila sa ila pagpanglakaton.

Doktrina kag mga Kasugtanan 136:4, 11, 42; Saints, 2:47

Mabudlay gihapon kaayo ang biyahe. May mga nagkalamatay. Pero tungod sang ila mga kasugtanan sa templo, kabalo ang mga Santos nga makita nila liwat ang mga miyembro sang ila pamilya.

Pagligad sang pila ka bulan, nag-abot ang una nga mga Santos sa Salt Lake Valley sang 1847. Sang makita ni Brigham Young ang valley, siling niya, “Amo na ini ang husto nga lugar.” Amo gid ini ang lugar nga nakita niya sa iya palanan-awon. Amo ini ang lugar nga mangin hilway ang mga Santos. Diri masimba nila ang Ginuo kag mahimo ang Iya buluhaton nga may kalinong.

Saints, 2:17, 64–67

Sa mga tinuig, padayon nga nagaabot ang mas madamo pa nga mga Santos. Nagpatindog sila sang madamo pa nga templo, kon diin makahimo ang mga tawo sang mga kasugtanan upod sa Ginuo. Nagpadala sila sang mga misyonero sa bilog nga kalibutan para magtudlo sang ebanghelyo ni Jesucristo. Padayon nga nagdako ang Simbahan sang Manluluwas, nga nagabugay sa mga anak sang Amay nga Langitnon sa bisan diin.