Si Lucy Morley kag ang Iya Pamilya

Isa ka adlaw, ginabuligan sang 15-anyos nga si Lucy Morley ang iya tupad-balay nga si Abigail Daniels nga maghabi sang tela. Samtang nagatrabaho sila, nakabati sila sang panuktok sa puwertahan. Tatlo gale ka misyonero. Ginpasulod sila ni Abigail. Siling nila nga ginpadala sila ni Jesucristo para maghatag sang isa ka mensahe.

Saints, 1:102–3

Ginhambal sang mga tawo kay Abigail kag Lucy nga gintawag ni Jesus si Joseph Smith para mangin propeta. Ginhambal man nila sa ila ang parte sa Libro ni Mormon.

Saints, 1:103

Sa kakibot ni Lucy, nangakig si Abigail. Gintabog niya ang mga misyonero sa iya balay.

Saints, 1:103

Nabal-an ni Lucy nga ining mga misyonero mga alagad sang Dios. Ginhambalan niya sila nga bisitahan ang iya pamilya nga ara lang sa unhan sang dalan. “Ang akon tatay nagaistar isa ka milya halin diri,” siling niya. “Kadto kamo didto kag pakan-on niya kamo kag atipanon.”

Saints, 1:103–4

Insakto si Lucy. Ginhandaan sang manamit nga pagkaon ang mga misyonero sa uma sang pamilya Morley. Amigo ni Sidney Rigdon ang mga ginikanan ni Lucy. Nagapati sila nga gusto ni Jesus nga ipakigbahin nila sa iban ang tanan nga ara sa ila. Gin-imbitar nila ang mga misyonero nga tudloan sila kag ang ila mga amigo.

Saints, 1:104

Sina nga gab-i, halos tungang-gab-i na, 17 ka tawo ang ginbunyagan. Sang madason nga inadlaw, 50 pa ka tawo ang nagkadto sa uma sang pamilya Morley para mamati sa mga misyonero, kag nangabay sila nga bunyagan. Bisan ang amiga ni Lucy nga si Abigail Daniels nagliwat ang pamensaron parte sa mga misyonero. Nagdesisyon sia kag ang iya bana nga magpamiyembro sa Simbahan.

Saints, 1:105; Doktrina kag mga Kasugtanan 20:25, 37