Si Mary kag Caroline Rollins

Si Mary Rollins 12 anyos sang primero nga nagbisita ang mga misyonero sa Kirtland, Ohio. Nabatian niya nga nagahambal sila parte sa Libro ni Mormon. Sadto nga panahon, isa pa lang ang kopya sang libro sa Kirtland, kag ara ini sa isa ka lider sang Simbahan nga ginatawag Isaac Morley.

Nagkadto si Mary sa balay ni Brother Morley kag nag-ayo kon pwede niya makita ang libro. Ginpauyatan ini ni Brother Morley sa iya. Namangkot si Mary kon pwede niya ini dalhon sa ila balay.

Indi gusto ni Brother Morley nga ihatag ang iya kopya sang libro kay Mary. Wala pa niya ini mabasa sang maayo. Nagpakitluoy si Mary kay Brother Morley nga hulmon niya ini.

Nagpasugot si Brother Morley. Siling niya nga pwede ni Mary dalhon ang libro pauli basta ibalik niya ini pagkabwas temprano pa sa aga. Ginkabig ini ni Mary nga daw manggad. Ginpulawan niya ini sa pagbasa.

Sang gin-uli ni Mary ang libro, nakibot si Brother Morley sa kadasig niya nga magbasa. “Anak,” siling niya, “dalha ining libro sa inyo kag tapusa ini basa. Makahulat ako.”

Si Mary ang pinakauna nga tawo sa Kirtland nga nakatapos basa sang bilog nga Libro ni Mormon. Wala magdugayi sang natapos niya ini basahon, nakilala niya si Propeta Joseph Smith. Sang nahibal-an niya kon daw ano kadako ang pagpalangga ni Mary sa Libro ni Mormon, siling niya nga iya na lang ang kopya ni Brother Morley. Hatagan niya sang lain nga kopya si Brother Morley.

Sang ulihi sina nga tuig, nagsaylo si Mary kag ang iya pamilya sa Independence, Missouri. Malipayon sia nga nagtan-aw samtang ginsugdan sang mga lider sang Simbahan ang paghimo sang bag-o nga libro nga ginatawag Libro sang mga Kasugoan. Mangin unod sining libro ang madamo sa mga rebelasyon nga ginhatag ni Jesucristo kay Joseph Smith.

Doktrina kag mga Kasugtanan 67; 70:1–4; Saints, 1:178

Pero may mga tawo sa Independence nga waay manamian sang Simbahan. Gusto nila nga maghalin ang mga Santos. Isa ka adlaw, ginsulod sang akig nga mga tawo ang bilding kon diin ginaimprinta ang Libro sang mga Kasugoan. Ginhaboy nila ang imprintahan nga makina sa bintana kag ginpanglapta ang mga pahina sang Libro sang mga Kasugoan.

Saints, 1:177–78

Si Mary kag ang iya utod nga si Caroline, nagatan-aw sa pihak sang kudal. Ginhambalan ni Mary si Caroline nga gusto niya kuhaon ang mga pahina antes ini magkalagisi. Nahadlok si Caroline sa akig nga mga tawo. “Patyon nila kita,” siling niya. Pero kahibalo si Mary kag Caroline nga nasulat sa mga pahina ang pulong sang Dios.

Saints, 1:178

Ginhulat sang mag-utod nga waay nagatulok ang mga tawo. Dayon nagdalagan sila sa dalan kag ginkuha ang kutob masarangan nila kuhaon nga mga pahina. Sang nagadali-dali sila palagyo, nakita sila sang iban nga mga tawo kag ginsinggitan nga magpundo. Ginkup-an ni Mary kag Caroline ang mga pahina kag nagdinalagan kutob sa ila masarangan pakadto sa kamaisan sa unhan.

Saints, 1:178–79

Ginlagas sang duha ka tawo ang mag-utod hasta sa kamaisan. Katag-as sang mais, indi makita ni Mary kag Caroline kon diin sila pakadto. Nagkuob sila sa duta kag ginhap-an ang mga pahina. Mahipos sila nga namati samtang ginapangita sila sang duha ka tawo sa tunga sang kamaisan.

Saints, 1:179

Sang ulihi nag-untat na ang mga lalaki. Nakaluwas si Mary kag Caroline. Nasalbar nila ang mga pahina sang mga rebelasyon sang Ginuo para sa Libro sang mga Kasugoan. Karon ina nga mga rebelasyon amo ang Doktrina kag mga Kasugtanan.

Saints, 1:179