« Peresideni Timothy L. Farnes », Liahona, Mē 2025.
Peresideni Timothy L. Farnes
Peresideni rahi nō te Feiā ’Āpī Tamāroa
I te 14ra’a o te matahiti o te peresideni Timothy L. Farnes, ’ua ha’amata te hō’ē hoa nō te tahi atu fa’aro’o i te fa’ati’o i tōna mau ti’aturira’a pae fa’aro’o. Nō te taime mātāmua i roto i tōna orara’a poto, ’ua fa’a’ite pāpū atu Timothy ē e peropheta nā te Atua ’o Iosepha Semita, ’e e ’ēkālesia mau Te ’Ēkālesia a Iesu Mesia i te Feiā Mo’a i te mau Mahana Hope’a nei.
« ’Ua ’ī te piha i te Vārua. E nehenehe roa e fāfā », tāna e ha’amana’o ra. « Mātou pā’āto’a tei putapū i te reira, ’e ’ua taui pauroa mātou. »
’Ua parau te peresideni Farnes ē, tē hina’aro nei ’oia i te feiā ’āpī o te ’Ēkālesia ’ia ’ite ē, nō roto rātou i te ’utuāfare a te Atua.
« E mau tamari’i rātou nā te Atua ’e e mau tamari’i ho’i nō te fafaura’a », ’ua parau ’oia, « ’e e nehenehe rātou e riro mai ’ei pipi nā Iesu Mesia mai te mea e fa’ari’i rātou iāna—e fa’ari’i i te hōro’a nō rātou maoti tāna tāra’ehara. »
’Ua fānauhia Timothy Lowell Farnes i te 29 nō Tiunu 1969, i Baltimore, i Maryland, e Gary William Farnes ’e ’o Mary Ellen Farnes. I tōna tamari’ira’a, ’ua fa’anu’u tōna ’utuāfare i Utah, i reira ’ōna i te pa’arira’a. ’O ’oia te matahiapo o nā tamari’i e hitu.
’Ua tāvini te peresideni Farnes ’ei misiōnare i roto i te misiōni nō Porto Alegre (Peretīria). ’Ua ha’api’i ’oia i te fa’arava’ira’a faufa’a i te fare ha’api’ira’a tuatoru Brigham Young University ’e i muri mai ’ua ha’amata e rave rau taiete, mai nā taiete MedSource Direct, Aspire, ’e te ’āvirira’a ’imi ’ore i te ’āpī ’e te tauturu ’ia maita’i te ta’ata ra World Joy.
’Ua fa’aipoipo ’oia ia Linsey Anne Farnes i te hiero nō Roto Miti (Utah, Marite), i te 27 nō ’Ātete 1992. E pae tamari’i tā rāua ’e e ono mo’otua, ’e tē ora nei rātou i Bountiful, i Utah.
’Ua tāvini te peresideni ’e te tuahine Farnes ’ei feiā fa’atere misiōni i roto i te misiōni nō São Paulo North (Peretīria), mai te matahiti 2014 ē tae atu i te matahiti 2017. I roto i te mau pi’ira’a nā mua a’e a te peresideni Farnes, tē vai ra te Hitu ’Ahuru ārea i Utah, te peresideni titi, te melo ’āpo’ora’a teitei, te ’episekōpo ’e te ’episekōpo nō te feiā ’āpī pa’ari ’ōtahi.