Elder Pedro X. Larreal

Hitu ’Ahuru huimana fa’atere rahi

I te mahara’a o te ’āva’e ’o Elder Pedro X. Larreal e misiōnare rave tāmau, ’ua tere mai te peresideni Gordon B. Hinckley (1910–2008) nā te misiōni nō Caracas (Venetuera).

Tē ha’amana’o ra Elder Larreal : « ’Ua fa’atae mai ’oia i te hō’ē anira’a fa’ahiahia ia mātou nō ni’a i te ha’amo’ara’a : ‘Mai te mea e rōtahi ’outou 100 i ni’a i te hānere, tē parau fafau atu nei au ē e fa’ari’i tō ’outou ’utuāfare nō ananahi i te mau ha’amaita’ira’a.’ »

I muri iho, ’ua pāpa’i Elder Larreal i te hō’ē rata nō te fa’aru’e i tōna hoa tamāhine i tōna fenua. « Tītauhia iā’u ’ia tu’u i te mau mea ato’a i ni’a i te fata nō te mea tītauhia iā’u ’ia rōtahi atu ā. »

’Ia hi’o ’oia i muri, tē ’ite nei ’oia i te mau ha’amaita’ira’a e rave rahi—te ha’api’ira’a maita’i, te tōro’a ’ohipa manuia—nō roto mai ïa i te ti’aturira’a i te reira fafaura’a a te ’āpōsetolo.

« ’Ia pe’e ana’e tātou i te arata’ira’a a te hō’ē peropheta, te hi’o ’e te heheu parau, e fa’ari’i tātou i te mau ha’amaita’ira’a i roto i tō tātou orara’a », ’ua parau ’oia. « Tē parau fafau atu nei au. »

’Ua fānauhia ’o Pedro Xavier Larreal Noguera i te 6 nō Tiuari 1976, i Valencia, i Venetuera, nā Duilio Antonio Larreal Romero ’e Haydee Maria Noguera de Larreal. ’Ua fa’aipoipo ’oia ia Saria Alvarez Campos i te hiero nō Caracas (Venetuera) i te 25 nō ’Ātete 2001. E toru tā rāua tamari’i.

’Ua roa’a ia Elder Larreal te parau ’aravihi tuatoru nō te ’ohipa fa’aterera’a i te fare ha’api’ira’a tuatoru ra Simón Rodríguez University, te hō’ē parau tū’ite Master nō te ihi ha’api’ira’a i te fare ha’api’ira’a tuatoru Santa Maria University, ’e te hō’ē parau tū’ite Master nō te ’ohipa fa’aterera’a taiete i te fare ha’api’ira’a tuatoru ra Brigham Young University. ’Ua rave ’oia i te ’ohipa ’ei ti’a fa’atere nō te séminaire ’e te Institut, ’e ’ua ’ohipa ato’a nō te taiete Nature’s Sunshine Products Inc. ’o ’oia te upo’o fa’atere rahi rētioni nō Mēhiko, Amerika rōpū ’e te Rēpupirita Tominita.

Hou ’a pi’ihia ai ’oia i roto i te Huimana fa’atere rahi, tē tāvini ra Elder Larreal ’ei peresideni nō te misiōni nō McAllen (Texas, Marite). ’Ua tāvini ’oia ’ei Hitu ’Ahuru ārea i roto e piti ārea, ’ei peresideni titi, ’ei tauturu i roto i te peresideni titi, ’ei melo ’āpo’ora’a teitei, ’ei pāpa’i parau fa’atere titi ’e ’ei ’episekōpo.