Elder Ronald M. Barcellos

I te 12ra’a o tōna matahiti, ’ua tai’o Elder Ronald M. Barcellos i te Buka a Moromona nō te taime mātāmua. I te otira’a tāna tai’ora’a, ’ua fārerei atu ’oia i te ’orometua nō te séminaire i roto i tāna pāroita nō te ani atu e nehenehe ānei iāna ’ia ha’amata i te haere i te mau piha séminaire.

« ’Ua haere au i te séminaire mai te 12 matahiti ē tae atu i te 18 matahiti nō tō’u au i te haere atu e fa’aro’o i te mau ’ā’amu nō te Bibilia ’e nō te Buka a Moromona », tāna i parau. « I putapū noa ana vau i teie here nō te ’evanelia, ’e ’ua putapū noa ana vau e parau mau te reira. »

’Ua ha’apa’ari te tāvinira’a misiōni i muri iho i tōna fa’aro’o, ’e ’ua fafau ’oia e tu’u nā mua noa i te ’evanelia i roto i tōna orara’a.

« E fa’aea piri noa i te [Metua i te ao ra], e fa’atura i tā ’oe mau fafaura’a ’e e ’itehia mai te hōho’a o tāna mau fa’anahora’a nō ’oe », ’ua parau ’oia.

’Ua fānauhia Ronald Maldonado Barcellos i São Paulo, i Peretīria, i te 4 nō Novema 1975, nā Sérgio Barcellos Silveira ’e Marcia Maldonado Barcellos Silveira. ’Ua fa’aipoipo ’oia ia Karin Spat Albino Barcellos Silveira i te hiero nō São Paulo (Peretīria), i te 4 nō Tītema 1999. E toru tā rāua tamari’i.

’Ua ha’api’i Elder Barcellos i te fa’aterera’a taiete i te fare ha’api’ira’a tuatoru ra São Marcos University i São Paulo. Nō tāna tōro’a ’ohipa, ’ua rave ’oia nō te mau taiete e rave rahi, i te ’ohipa ho’ora’a ’e te tapiho’ora’a, ’e ’ua ha’amau ato’a i tāna iho taiete. E rave rahi taiete tāna i ha’amau ’e te tahi hoa, mai te taiete GreenMile, LLC, ’o ’oia te upo’o fa’atere e rave rahi matahiti te maoro.

’Aita i maoro a’enei, ’ua fa’aoti Elder Barcellos i tāna tāvinira’a ’ei peresideni misiōni nō te misiōni nō Lisbon (Pōtītī). ’Ua tāvini ato’a ’oia ’ei tauturu i roto i te peresidenira’a titi, ’ei melo ’āpo’ora’a teitei, ’ei peresideni Feiā ’Āpī Tamāroa titi, ’ei ’episekōpo, ’ei tauturu i roto i ’episekōpora’a, ’ei ti’a fa’atere pupu tahu’a rahi, ’ei peresideni pupu peresibutero ’e ’ei ’orometua ha’api’i nō te séminaire.