« Elder B. Corey Cuvelier », Liahona, Mē 2025.
Elder B. Corey Cuvelier
Hitu ’Ahuru huimana fa’atere rahi
I tō Elder B. Corey Cuvelier fa’aarara’a ē, tē fa’aru’e ra ’oia i tāna ’ohipa nō te riro mai ’ei peresideni misiōni nō Te ’Ēkālesia a Iesu Mesia i te Feiā Mo’a i te mau Mahana Hope’a nei, ’ua parau atu tōna mau hoa ’ohipa ē : « ’Ua ma’ama’ahia ’oe ? »
’Ua parau Elder Cuvelier ē, ’ua fifi tōna mau hoa ’ohipa i te māramarama i te tumu ’oia e fa’aātea ’ē ai i tōna tōro’a manuia e toru matahiti te maoro. Terā rā, ’ua riro tā rātou mau uira’a ’ei rāve’a au, ’ua parau ’oia, « nō te fa’a’ite i te tumu tātou e rave ai i te mea tā tātou e rave nei ’e te tumu tātou e ti’aturi ai i te mea tā tātou e ti’aturi nei ’e te ta’ata tā tātou e ti’aturi nei. ’Oia ho’i Iesu Mesia. »
’Ua fānauhia Brian Corey Cuvelier i te 12 nō Tēnuare 1969, i Los Angeles, i California, i reira ’oia i te fa’a’amura’ahia ’e i te pa’arira’a. Tōna metua tāne, ’o Heinz Joachim Cuvelier, e mūto’i ïa. Tōna metua vahine, ’o JoAnn Leslie Jarnecke Cuvelier, e fa’aea ïa ’oia i te fare. ’O ’oia te matahiapo o nā tamari’i e maha.
’Ei misiōnare taure’are’a, ’ua tāvini Elder Cuvelier i roto i te misiōni nō São Paulo Apato’a (Peretīria). ’Ua noa’a tāna parau tū’ite nō Brigham Young university i te matahiti 1994, e parau tū’ite nō te tū’atira’a ’e te mau ta’ata. ’Ua tomo atu ’oia i roto i te taiete Shell Oil Company i te matahiti 1996, ’e ’ua ’ohipa nā muri i te mau taiete e rave rau nō Amerika Apatoʻerau.
’Ua fa’aipoipo Elder Cuvelier ia Wendi Sue Manwaring i te 18 nō Tiurai 1992, i te hiero nō Los Angeles (California, Marite). E maha tamāroa tā rāua. ’Ua tāvini Cuvelier mā ’ei feiā fa’atere misiōni i roto i te misiōni nō Curitiba South (Peretīria), mai te matahiti 2016 ē 2019, ’e tē ora ra rātou i Katy, i Texas, i te taime o tōna pi’ira’a.
Nā mua atu, ’ua tāvini Elder Cuvelier ’ei Hitu ’Ahuru ārea i roto i te ārea nō te pae apato’a tō’o’a o te rā nō Amerika Apato’erau, ’ei peresideni titi, ’ei tauturu i roto i te peresidenira’a titi, ’ei melo ’āpo’ora’a teitei, ’ei ’episekōpo, ’ei tauturu i roto i te ’episekōpora’a, ’e ’ei peresideni Feiā ’Āpī Tamāroa nō te pāroita.