« Nā muri : Te mau piha ’ohipa nō te ’auvahara’a ’e nō te manihini », Liahona, Mē 2025.
Nā muri : Te mau piha ’ohipa nō te ’auvahara’a ’e nō te manihini
Hō’ē hope’a hepetoma i te ono ’āva’e tāta’itahi, e ’oa’oa tātou i te ’āmuira’a rahi. Nā muri rā, e rave rahi tauatini ta’ata e hōro’a i tō rātou taime, nā reira ato’a te mau rave ’ohipa o te ’Ēkālesia, ’o tē ha’a e rave ’āva’e te maoro ’ia tupu maita’i te reira.
’Ua fa’anaho rātou i te mau mea ato’a nō te ha’apuroro i te mau parau a te mau peropheta i te mau ta’ata e rave rahi mirioni nā te ao ato’a nei. Teie te tahi ri’i noa hi’ora’a nō tei ’ohipa rahi roa ’ino.
Te piha ’ohipa nō te ’auvahara’a
E hānere ’e maha ’ahuru ma toru pupu reo ’ati a’e te ao nei ’o tē ’auvaha ti’aiho i te mau ’aora’a o te ’āmuira’a rahi ’ia ti’a i te mau melo ’ia fa’aro’o i te reira, i reira ra, nā roto i tō rātou reo tumu. E 57 ana’e pupu e ’auvaha nei mai te pū fa’atere a te ’Ēkālesia atu, i Roto Miti.
E mea ta’a ’ē te ’auvahara’a ’e te ’īritira’a, ’oia ho’i te tātarara’a i te mau parau pāpa’i nā roto i te tahi atu reo. Nō te ’auvahara’a, tītau-roa-hia i te mau pupu reo ’ia vai ineine nō te ’auvaha i te mau tauira’a iho ’e te mau parau e fa’ahitihia i te pūpiti. E tauturu te feiā ’auvaha i te mau melo ’ati a’e te ao nei ’ia fa’aro’o i te ’evanelia i roto i tō rātou iho reo tumu (hi’o Te Ha’api’ira’a Tumu ’e te mau Fafaura’a 90:11).
Te piha ’ohipa nō te manihini
Mai te mea ’ua haere ’outou i te ’āmuira’a rahi i Roto Miti, i Marite, ’ua ’ite ’outou i te mau tīa’i e arata’i ia ’outou i tō ’outou pārahira’a. E 400 ti’ahapa misiōnare i Temple Square tei hōro’a i tō rātou taime, e 9 000 ti’ahapa hora, i te roara’a o te ’āmuira’a rahi nō te tauturu i te mau manihini ’ia tomo ’e ’ia haere i rāpae i te pū ’āmuira’a ma te au.
Nā rātou e arata’i e 20 000 rātere nō te tuha’a purera’a tāta’itahi o te ’āmuira’a rahi. ’Ia hope te hō’ē tuha’a purera’a, nā rātou e arata’i i te mau rātere i rāpae, te ’oi’oi e noa’a ia rātou, ’ia ti’a ia rātou ’ia tāmā i te mau vāhi haerera’a nō te tuha’a purera’a nō muri iho.