Te mau tao’a hōro’a rahi nō te tau mure ’ore : Te tāra’ehara, te ti’afa’ahoura’a, te fa’aho’i-fa’ahou-ra’a a Iesu Mesia

Tau matahiti i ma’iri, ’ua tāmau ’ā’au tō mātou piha ha’api’ira’a ’evanelia nō te po’ipo’i i te mau ’īrava nō te Bibilia. ’Ua hi’o iho ā ïa vau i te mau ’īrava poto. Tei roto te Ioane 11:35—te ’īrava pāpa’ira’a mo’a poto roa a’e, e toru ta’o—« ’Oto ihora Iesu. »

Nō’u nei, i teienei, te mea ē ’ua ta’i Iesu ma te ’oto ’e ma te ’oa’oa, e fa’a’itera’a ïa nō te parau pāpū ’e te temeio ē : i tae mai te Tamaiti hanahana a te Atua i roto i te tāhuti tino nei ’e ’ua ’apo i te mau ha’api’ira’a i te tino nei e nāhea i te vai noa i pīha’i iho ia tātou ’e i te ha’amaita’i noa ia tātou.

’Ia tuō tātou i tō tātou māuiui ’aore rā tō tātou ’oa’oa, ’ua māramarama hope roa Iesu Mesia. E ti’a iāna ’ia tae mai ’ia tītau-roa-hia ana’e te mau tao’a hōro’a rahi nō te tau mure ’ore : te tāra’ehara, te ti’afa’ahoura’a ’e te fa’aho’i-fa’ahou-ra’a a Iesu Mesia.

’Ua ta’i Maria ’e ’o Mareta nō tō rāua taea’e ia Lazaro, tei pohe. Nō tōna aumihi, ’ua ’oto Iesu. ’Ua fa’ati’a mai ’oia ia Lazaro.

’Ua hi’o Iesu ia Ierusalema i te pō nā mua noa a’e i te Pāsa a te ’āti Iuda. ’Ua ’oto ’oia, ’aita i noa’a iāna ’ia ha’aputuputu i tōna mau ta’ata mai te moa i tāna mau fanau’a. I teie mahana, e noa’a mai te tīa’ira’a maoti tāna tāra’ehara, i te taime e ’aue tātou nō te ’āhani ē.

’Ua ’oto te Fatu o te ’ō vine i te anira’a i tōna mau tāvini mai ia tātou ato’a paha ïa te mau taea’e ’e te mau tuahine aupuru : « E aha atu ā tei ti’a iā’u ’ia rave nō tā’u ’ō vine ? »

E mana’o mo’emo’e tō Maria i te mēnema. I ui marū ai Iesu : « E aha ’oe i ’oto ai ? » « ’Ia tapae noa mai te ’oto i te ahiahi, e riro rā i te ’oa’oa ’ia po’ipo’i. » E fa’atae mai te ti’afa’ahoura’a i te ’ā’ahiata nō te tā’āto’ara’a.

I te mau fenua nō te Buka a Moromona, i te ti’ara’a mai te naho’a ha’apa’o maita’i i mua iāna ra, ’ua ’ī roa ’oia i te ’oa’oa. ’Ua ’oto ihora.

« ’E ’ua rave atu ra ’oia i tā rātou mau tamari’i ri’i, te tahi i muri iho i te tahi, ’e ’ua ha’amaita’i atu ra ia rātou, ’e ’ua pure atu ra i te Metua nō rātou.

« ’E ’ia oti a’era ’oia i te nā-reira-ra’a, ’ua ’oto fa’ahou ihora ’oia. »

’O teie te Pāsa ia Iesu Mesia ra : E pāhono ’oia i te mau hia’ai o tō tātou ’ā’au ’e i te mau uira’a o tō tātou vairua. E horoi ’ē ’oia i tō tātou roimata, ’eiaha rā te roimata nō te ’oa’oa.

’Ia tahe tō tātou roimata, i te tahi mau taime, e ’ape tātou, e ha’amā. Te ’itera’a rā ē ’ua māramarama Iesu Mesia i te mau māuiui ’e te mau ’oa’oa o te orara’a, e noa’a mai ïa te pūai rahi atu ā i tō tātou iho, i te rāterera’a nā te maramara ’e te monamona.

I Amerika Apato’a, ’ua autā te hō’ē metua tāne. ’Ua pohe te feti’a ’amo’amo o tōna orara’a, tāna tamāhine ’āpī. « ’Aita e mea e’ita vau e hōro’a nō te ’ite fa’ahou iāna », ’ua ta’i ’oia i roto i tō’u rima. ’Ua ta’i ato’a vau.

I te ha’amo’ara’a o te hiero nō Puebla (Mēhiko), e roimata nō te ’oa’oa i ni’a i te mata o te hō’ē tuahine iti. E ta’ahia i ni’a i tōna mata tōna fa’aro’o ’e te fa’atusiara’a. ’Ua nā ’ō ’oia : « Todos mis hijos están aquí en el templo hoyPauroa tā’u mau tamari’i i roto i te hiero i teie mahana. » Nō te mau u’i ha’aputuputuhia i roto i te fare o te Fatu, e tahe iho ā te roimata nō te ’oa’oa ’e te māuruuru.

I roto i te tama’i tīvira taehae, ’ua rave te fēti’i ’e te ta’ata tupu i te ’ohipa ri’ari’a mau i ni’a i te tahi ’e te tahi. Tē mono-marū-hia ra te maramara i te tīa’ira’a. ’Ua parau te hō’ē vahine i te hō’ē ’oire iti ē, ma te reo rūrū : « E te veutupu ē, hou vau ’a hunahia ai i tō’u mēnema, ’ua hina’aro vau ’ia ’ite ’oe i hea e ’itehia ai ia ’oe tō mau fēti’i i mo’e. »

E vahine mata ’ana’ana ’e tāna tāne nehenehe tei fa’aipoipohia ’e tei tā’atihia i roto i te fare o te Fatu. E 70 matahiti tō rāua tāna tāne. E vahine mōmo’a nehenehe, tei tīa’i noa na i teie mahana, ma te ti’a mā. ’Ua fa’a’ohu ri’i ’oia i tōna ’ahu fa’aipoipora’a i terā pae ’e i terā pae. E roimata nō te ’oa’oa tō mātou. ’Ua fa’atupuhia te mau parau fafau a te Atua. ’Ua fa’atae mai tāna mau fafaura’a i te mau ha’amaita’ira’a.

I te hāhaerera’a te taure’are’a ra Boyd K. Packer i te hō’ē tuahine ’ivi, e ha’api’ira’a iti tāna i ’apo mai. Nō te tahi mana’o tū’ati ’ore ’e tāna tāne fa’aipoipo, ’ua tāora ihora te tuahine i te tahi parau teimaha mau. I terā mahana, e ’ati purōmu mana’o-’ore-hia tei ha’apohe i tāna tāne fa’aipoipo. ’Ua ’autā te vahine ’ivi ē : « E pae ’ahuru matahiti te maoro, ’ua ora na vau i hade, nō te ’itera’a ē te mau parau hope’a tāna i fa’aro’o mai ni’a atu i tō’u ’utu, e parau māinaina ïa ’e te ’ino. »

E tauturu mai te Pāsa ia Iesu Mesia ra i te tātā’i, i te fa’afaite, i te fa’a’āfaro i tō tātou mau tā’amura’a, i nā pae e piti o te pāruru. E ti’a ia Iesu ’ia fa’aora i te māuiui ; e ti’a iāna ’ia ha’amatara i te fa’a’orera’a hapa. E ti’a iāna ’ia fa’ati’amā ia tātou ’e ia vetahi ’ē i te mau mea tā tātou ’aore rā tā rātou i parau ’e i rave, ’ia ’ore ana’e, e ru’uru’u fa’atītī noa te reira ia tātou.

Maoti te Pāsa ia Iesu Mesia ra e putapū ai tātou i te parau fa’ari’i a te Atua. Tē parau nei teie ao ia tātou ē ’ua rahi roa tātou, ’ua poto roa, ’ua ’ā’ano roa, ’ua oaoa roa, ’aita i nava’i tō tātou māramarama, te nehenehe ’e te fāito pae vārua. Nā roto i te tauira’a pae vārua i roto ia Iesu Mesia, e ti’a ia tātou ’ia ora mai i te mana’o ha’aparuru nō te hina’aro ’ore i te hape.

Ma te ’oa’oa nō Pāsa, e hīmene tātou : « ’Ua vī rā te pohe [’ua ti’amā te ta’ata]. Tei te Mesia te rē. » E fa’ati’amā te ti’afa’ahoura’a o te Mesia ia tātou i te pohe, i te mau taime paruparu ’e i te mau hapehape pae tino. E fa’aho’i ato’a te tāra’ehara a Iesu Mesia ia tātou i te pae vārua. ’Ua tahe tōna toto nā te mau poa ato’a, mai te huru e roimata toto, ’ia ti’a ia tātou ’ia ora mai i te hara ’e i te fa’ata’a-’ē-ra’a. E fa’atāhō’ē ’oia ia tātou, te tā’āto’a ’e te mo’a, te tahi i te tahi ’e i te Atua ato’a. I roto i te mau mea maitata’i ato’a ra, e fa’aho’i rahi mai ’o Iesu Mesia—e ’ere i te mea noa i vai na, ’o te mea ato’a rā e nehenehe e riro mai.

Tē parau pāpū nei te orara’a ’e te māramarama o Iesu i te here o te Atua nō tāna mau tamari’i ato’a. Nō te here o te Atua tō tātou Metua i tāna mau tamari’i ato’a, nō te mau fāito matahiti ato’a ’e i te mau fenua ato’a, tē ’ite nei tātou i tāna anira’a here ’ia haere mai ’e ’ia ’imi i te hau ’e i te ’oa’oa iāna ra, i roto i te mau peu tumu ’e i te mau ta’ere e rave rahi. Noa atu te vāhi, noa atu te taime, noa atu ’o vai tātou, e hīro’a atua ana’e tō tātou ’ei tamari’i nō te hō’ē ā Hāmani. Nā reira ato’a, hō’ē ā faufa’a pae fa’aro’o tō te feiā ’āpe’e i te fa’aro’o mahometa, ’āti Iuda ’e keresetiano, i roto i te Metua ra Aberahama ’e te tū’atira’a fafaura’a tei ’itehia i roto i te mau ’ohipa i tupu i Aiphiti tahito ra.

I haere mai te Metua Aberahama ra i Aiphiti ’e ’ua ha’amaita’ihia ’oia.

’Ua ’ite Iosepha, tei ho’o-tītī-hia i Aiphiti, i te aura’a o te ta’oto a Pharao, e hitu matahiti ’auhune ’āpe’ehia mai e hitu matahiti o’e. ’Ua fa’aora Iosepha i tōna ’utuāfare ’e i tōna mau ta’ata. I ta’i Iosepha i te ’itera’a ’oia i te fa’anahora’a rahi a’e a te Atua, ’e i reira te mau mea ato’a e ’ohipa nō te maita’i o te feiā e ha’apa’o i tā rātou mau fafaura’a.

’Ua fa’ari’i Mose, tei pa’ari i Aiphiti i roto i te ’utuāfare o Pharao, i te mau tāviri nō te ha’aputuputura’a i te mau tamari’i a te Atua, ’e i muri iho ’ua fa’aho’i mai i te reira.

Nō te fa’atupu i te parau tohu, ’ua ’imi ’o Iosepha, Maria ’e te ’aiū Mesia ra i te ha’apūra’a i Aiphiti. I te ’oire nō Le Caire, ’ua parau te hō’ē mahometa paieti mau ē : « Tē ha’api’i nei te Korana ē, ’ua ’itehia mai ia Iosepha, Maria ’e te ’aiū Iesu te pārurura’a ’e te ha’apūora i tō’u nei fenua. I tō’u nei fenua, ’ua ’amu te pēpe ra Iesu i tā mātou mā’a, ’ua hāhaere nō te taime mātāmua ’e ’ua parau i tāna mau parau mātāmua. I’ō nei i tō’u fenua, tē ti’aturi nei mātou ē, ’ua pi’o roa te mau tumu rā’au nō te hōro’a iāna ’e i tōna ’utuāfare i te mā’a hotu. Nō tōna vaira’a i tō’u nei fenua, i ha’amaita’ihia ai tō’u mau ta’ata ’e tō’u fenua. »

Maoti te fa’anahora’a a te Atua nō te ti’amāra’a ’ia mā’iti i te pae mōrare ’e i te tāhuti nei e ti’a ai ia tātou ’ia ha’api’i nā roto i te mau mea e tupu i ni’a ia tātou iho. Vetahi o tā tātou mau ha’api’ira’a rahi roa a’e o te orara’a, nō roto mai ïa i te mau mea e’ita roa tātou e mā’iti. Nō tona here, ’ua pou’ Iesu Mesia i raro a’e i te mau mea ato’a ’e ’ua ta’uma i ni’a a’e i te mau mea ato’a. Tē ’oa’oa nei ’oia i tō tātou ’aravihi hanahana nō te mana rohi ’e te fa’a’oa’oa, nō te hāmani maita’i ma te tīa’i ’ore i te fa’aho’ira’a, nō te fa’aro’o i roto i te tātarahapara’a ’e i te fa’aorera’a hapa. ’E tē ta’i nei ’oia ma te ’oto i mua i te rahi roa ’ino o tō tātou mamae ta’ata nei, te taehae, te ’ohipa ti’a ’ore—tei tupu pinepine nō te mā’itira’a ta’ata nei—mai tō te mau ra’i ato’a ’e mai te Atua o te ra’i ’e rātou ra.

Tē parau pāpū nei te pu’e tau fa’atupura’a rā’au tāta’itahi ē i Pāsa ē, e tuha’a te ’āna’ira’a ’e te tū’atira’a pae vārua nō te hōho’a hanahana nō te tāra’ehara, te ti’afa’ahoura’a ’e te fa’aho’i-fa’ahou-ra’a nā roto ia Iesu Mesia. E ’ere teie tū’atira’a mo’a ’e te rahi te tāpa’o i te mea hape noa ’e te mea tano noa. Tē fa’ahanahana nei te Sābati o te ’āma’a tāmara, te Hepetoma mo’a ’e te Pāsa i te tāra’ehara ’e i te ti’afa’ahoura’a o te Mesia. ’E mai teie mahana, i te mau 6 nō ’Ēperēra ato’a, e fa’ahanahana tātou i te ha’amaura’a ’e te fa’anahora’a o Te ’Ēkālesia a Iesu Mesia i te Feiā Mo’a i te mau Mahana Hope’a nei. Teie Fa’aho’i-fa’ahou-ra’a, o te hō’ē ïa tumu tātou e ha’aputuputu ai i te sābati mātāmua tāta’itahi nō ’Ēperēra nō te ’āmuira’a rahi.

’Ua tae ato’a mai te Fa’aho’i-fa’ahou-ra’a i te fa’aho’ira’a mai Iesu Mesia, Mose, Elia ’e Eliaha, tei ti’afa’ahou, i te mau tāviri ’e te ha’amanara’a autahu’ara’a i te hiero nō Kirtland tei ha’amo’a-’āpī-noa-hia i te sābati Pāsa nō te matahiti 1836. I terā vaira’a, i terā mahana, ’ua tae mai i te ’Ēkālesia a Iesu Mesia i fa’aho’ihia mai, te ha’amanara’a a te Atua ’e te ha’amaita’ira’a ’ia ha’aputuputu i tāna mau tamari’i, ’ia fa’aineine i tāna mau tamari’i nō tōna ho’ira’a mai ’e ’ia tāhō’ē i te mau ’utuāfare ē a muri noa atu. ’Ua fa’atupu te Fa’aho’i-fa’ahou-ra’a i terā mahana ra i te tohura’a nō te tupura’a te reira i te mahana Pāsa ’e i te mahana Pāsa ato’a a te ’āti Iuda.

Mai te hiero nō Kirtland, ’ua tere māta’ita’i a’enei au i te tahi mau vāhi mo’a nō Ohio, i reira te peropheta Iosepha ’e vetahi ato’a i te ’itera’a i roto i te ’ōrama i te Atua tō tātou Metua ’e i tāna Tamaiti ia Iesu Mesia. I ’ite te peropheta Iosepha mai te aha ra te ra’i. I te ra’i ra, nā roto ia Iesu Mesia, e « fa’aora [te Metua i te ao ra] i te mau ’ohipa ato’a a tōna rima » i roto i te hō’ē bāsileia hanahana. Te mau ta’ata noa e’ita, ’o rātou ïa tei ’ōpua iho e « huna i te Tamaiti i muri mai i tō te Metua fa’a’itera’a mai iāna ra. »

I te ha’amatara’a tāna tāvinira’a i te ao tāhuti nei, ’ua fa’a’ite Iesu i tāna misiōni e ha’amaita’i ia tātou tāta’itahi i te mau mea ato’a ’ua ineine tātou ’ia fa’ari’i—i te mau tau ato’a, i te mau fenua ato’a ’e i te mau vaira’a ato’a. I muri mai i te ha’apaera’a i te mā’a e 40 mahana te maoro, ’ua haere Iesu i roto i te sunago ’e ’ua tai’o atu ra : « Tei ni’a iho iā’u te Vārua o te Fatu, ’oia i fa’atāhinu mai iā’u ’ei poro haere i te parau maita’i i te ta’ata ri’i, ’ua tono mai ’oia iā’u ’ei fa’aora i te feiā ’ā’au ’oto, ei poro haere i te ora nō te tītī, ’e ’ia hi’o fa’ahou te matapō, ’e ’ei tu’u ho’i i te feiā i ha’aparuparuhia. »

Te ta’ata ri’i, te feiā ’ā’au ’oto, te tītī, te matapō ’e te feiā i ha’aparuparuhia—’o tātou tāta’itahi ïa.

Tē tāmau ā te buka nō Isaia i te parau fafau a te Mesia nō te tīa’ira’a, te fa’ati’amāra’a ’e te ha’apāpūra’a : « ’Ei hōpoi atu […] i te feiā i ’oto i Ziona ; ’ei hōro’a atu ia rātou i te ’una’una ’ei mono i te rehu auahi ; ’e te mono’i ra i te ’oa’oa ’ei mono i te ’oto ; ’e te ’ahu pū ra i te ha’amaita’i ’ei mono i te ’ā’au taiā. »

’E nō reira e tuō tātou : « E ’oa’oa roa vau ia Iehova, e ’ōu’au’a noa tā’u vārua i te ’oa’oa i tā’u Atua. ’Ua fa’a’ahu mai ’oia iā’u i te ’ahu ra i te ora : ’e ’ua tāpo’i ’oia iā’u i te ’ahu pū ra i te parauti’a. »

I te pu’e tau Pāsa tāta’itahi, e fa’ahanahana tātou, ’ei tāpa’o nō te tā’āto’a, i te mau tao’a hōro’a rahi nō te tau mure ’ore nā roto ia Iesu Mesia ; tāna tāra’ehara ; tōna (’e te parau fafau nō tō tātou) ti’afa’ahoura’a mau ; te Fa’aho’i-fa’ahou-ra’a mai o tāna ’Ēkālesia i te mau mahana hope’a nei ma te mau tāviri ’e te ha’amanara’a autahu’ara’a nō te ha’amaita’i i te mau tamari’i a te Atua. Tē ’oa’oa nei tātou i roto i te ’ahu nō te ora ’e te ’ahu pū ra i te parauti’a. E tuō tātou : « Hosana i te Atua ’e te ’Ārenio ! »

« I aroha mai te Atua i tō te ao, ’e ’ua tae roa i te hōro’a mai i tāna Tamaiti fānau tahi, ’ia ’ore ’ia pohe tē fa’aro’o iāna ra, ’ia roa’a rā te ora mure ’ore »

’Ia ’itehia mai ia tātou tāta’itahi i roto i te tāra’ehara, te ti’afa’ahoura’a ’e te fa’aho’i-fa’ahou-ra’a mai a Iesu Mesia—te hau, te rirora’a mai ’e te tā’amura’a—’o tē vai maoro ’e te pāpū ’e te ’oa’oa rahi, ma te ’oa’oa ē a muri noa atu, ’o tā’u ïa pure i tōna i’oa mo’a ra, ’o Iesu Mesia, ’āmene.