Te fa’atura i te mau mea mo’a

I roto i te buka Exodo, te haere nei tātou ’e ’o Mose nā ni’a i te tua ’āivi o te mou’a nō Horeba a fa’aru’e ai ’oia i tāna mau ha’ape’ape’ara’a i te mau mahana at’o’a—te hō’ē mea e ti’a ia tātou pā’āto’a ’ia hina’aro e rave—nō te hi’o i te pū ’aihere e ’ama ra i te auhi ’aita rā e pau. ’A ha’afātata mai ai ’oia, « ’Ua pi’i maira te Atua iāna mai rotopū mai i te pū ’aihere, nā ’ō mai ra, e Mose, e Mose. ’E ’ua parau atura ’oia, Teie au. E ’ua parau mai ra te Atua […] ’a ’īriti i tō tāma’a i tō ’āvae ihora, e vāhi mo’a ho’i tenā na vāhi tā ’oe e ti’a mai na ». Nā roto i te fa’atura rahi, te ha’eha’a, ’e te maere, ’ua tātara ’o Mose i tōna mau tia’a ’e ’ua fa’aineine nō te fa’aro’o i te parau a te Fatu ’e nō te ’ite i tōna aro mo’a.

Ua riro taua ’itera’a mo’a ra i ni’a i te mou’a, te hō’ē ’ohipa tei ’ī i te fa’atura fa’ahiahia, ’ei tuha’a faufa’a roa nō tōna tauira’a mai te hō’ē tīa’i māmoe ha’eha’a ’ei per²opheta pūai, ’o tei arata’i iāna i ni’a i te hō’ē ’ē’a ’āpī i roto i te orara’a. ’Oia mau, e nehenehe ato’a tātou tāta’itahi e taui i tō tātou ti’ara’a pipi ’ei hōho’a teitei a’e nō te pae vārua nā roto i te fa’arirora’a i te huru maita’i o te fa’atura ’ei tuha’a mo’a o tō tātou huru pae vārua.

E nehenehe te ta’o fa’atura e fa’atū’atihia i te parau latino ra revereri, oia ho’i, « e ti’a i roto i te fa’ahiahia ». I roto i te aura’a o te ’evanelia, te ’ano’i nei teie tātarara’a i te hō’ē mana’o e ’aore rā, te hō’ē huru nō te fa’atura hōhonu, te here, ’e te māuruuru. E fa’atupu teie huru parau nō te mau mea mo’a a te feiā e mafatu tātarahapa tō rātou ’e te horo’ara’a hōhonu i te Atua ’e ia Iesu Mesia i te ’oa’oa rahi a’e i roto i tō rātou vārua.

’Ua riro te fa’atura i te mau mea mo’a ’ei fa’a’itera’a rahi roa a’e o te hō’ē huru pae vārua faufa’a roa ; e fa’ahope’ara’a te reira nō tō tātou tā’aira’a ’e te mo’ara’a ’e tē fa’a’ite nei i tō tātou here ’e tō tātou pirira’a i tō tātou Metua i te Ao ra ’e tō tātou Faaora, ’o Iesu Mesia. ’Ua riro ato’a te reira ’ei hō’ē o te mau ’itera’a teitei roa a’e o te vārua. E arata’i teie huru maita’i i tō tātou mau mana’o, tō tātou mau māfatu, ’e tō tātou orara’a i ni’a i te Atua. Te ti’ara’a mau, e ’ere te fa’atura i te hō’ē noa tuha’a o te pae vārua; O te iho ïa o te reira—te niu i ni’a iho i te reira e patuhia ai te pae vārua, ma te fa’atupu i te hō’ē tā’aira’a ’e te Atua, mai tā tā tātou mau tamari’i i ha’api’i mai ’ia hīmene ana’e rātou ē: « Ia fa’atura ana’e au, ’ua ’ite au i roto i tō’u ’ā’au e mea fātata mai te Metua i te Ao ra ’e ’o Iesu ».

’Ei pipi nā Iesu Mesia, te tītau-manihini-hia nei tātou ’ia fa’atupu i te hōro’a o te fa’atura i roto i tō tātou orara’a nō te fāri’i i te hō’ē tā’aira’a hōhonu a’e ’e te Atua ’e Tāna Tamaiti o Iesu Mesia, ma te ha’apūai ato’a i tō tātou huru pae vārua. Ma te fē’a’a ’ore, ’āhiri ē ’ua rahi a’e teie mau mana’o i roto i tō tātou māfatu, e rahi ato’a atu te ’oa’oa ’e te ’ārearea i roto i tō tātou orara’a, ’e e iti mai te vāhi nō te ’oto ’e te pe’ape’a. E ti’a ia tātou ’ia ha’amana’o ē, te fa’a’itera’a i te fa’atura i te mau mea mo’a, e hōro’a te reira i te aura’a i te rahira’a o te mau mea tā tātou e rave nei i te mau mahana ato’a ’e e ha’apūai i tō tātou mana’o māuruuru—te fa’atupu i te fa’ahiahia, te fa’atura, ’e te here nō te mau mea teitei ’e te mo’a a’e.

Te vahi pe’ape’a rā, te ora nei tātou i roto i te hō’ē ao i reira te fa’atura i te mau mea mo’a e riro noa ai ’ei mea mātau-’ore-hia. Tē fa’ahanahana nei te ao nei i te ’ohipa fa’atura ’ore, mai tē ha’apāpūhia ra i roto i te mau ve’a parauhia « tabloïd », te fa’anahora’a ’āfata teata, ’aore ra te natirara. Te ’erera’a i te fa’atura i te mau mea mo’a, tē fa’atupu nei te reira i te hō’ē huru ferurira’a ’e te ha’apa’o ’ore rahi a’e, o tē nehenehe e arata’i’oi’oi i te hō’ē u’i i roto i te māna’ona’o ’ore ’e a huru atu ai i te u’i i muri iho i roto i te ati.

E nehenehe ato’a te fa’atura ’ore e fa’aātea ’ē ia tātou i te mau tā’aira’a tā te mau fafaura’a ’e te Atua e hōro’a mai ’e e fa’aiti i tō tātou mana’o nō ni’a i te ha’avāra’a i mua i te Atua. Nō reira, e nehenehe tātou e ha’apa’o noa i tō tātou iho tāmāhanahanara’a; te ha’amāha i tō tātou mau hina’aro arai-’ore-hia; ’e i te pae hope’a e tae atu i te vahi mo’a ’ore nō te ha’apa’o ’ore i te mau mea mo’a, e tae noa’tu i te Atua, ’e nā roto reira, tō tātou nātura mo’a ’ei tamari’i nā te Metua i te Ao ra. Te fa’atura ’ore i te mau mea mo’a, e ha’amaita’i te reira i te mau ’opuara’a a te enemi nā roto i te ha’afifira’a i tā tātou mau rāve’a heheura’a, tei riro ’ei mea faufa’a roa nō tō tātou orara’a i te pae vārua i tō tātou nei anotau.

’Ua fa’a’ite-maita’i-hia i roto i te mau papa’ira’a mo’a te aura’a ’e te faufa’a o te fa’atura i te mau mea mo’a. E au ra ē, tē fa’a’ite ra te hō’ē hi’ora’a i roto i Te Ha’api’ira’a Tumu ’e te mau Fafaura’a ē, ’ua riro te fa’atura i tō tātou Metua i te Ao ra ’e Tāna Tamaiti o Iesu Mesia ’ei huru faufa’a roa nō te feiā e tāpae i te bāsileia tiretiera.

’Ei ’Ēkālesia, tē tāmata nei tātou i te tāpe’a i te Metua ’e te Tamaiti i roto i te mo’ara’a ’e te fa’atura rahi roa a’e i roto i te mau tuha’a ato’a, e tae noa atu i te huru nō tō tātou fa’ahoho’ara’a i tō raua mau hōho’a. ’Ua riro te arata’ira’a a te Vārua Mo’a ’ei tuha’a faufa’a roa nō te fa’ata’a e nāhea teie mau hōho’a ’ia fa’a’ite i te nātura mo’a, te huru, ’e te mau huru maitata’i o te Metua ’e te Tamaiti. Te ha’apa’o maita’i nei tātou ’ia ’ape i te fa’a’ite i te mau mea o tē nehenehe e fa’aātea ’ē i tō tātou ara-maīte-ra’a i ni’a i tō tātou Metua i te Ao ra ’e Tāna Tamaiti ’o Iesu Mesia, ’e tā rāua mau ha’api’ira’a, e tae noa’tu i te huru nō tā tatou fa’a’ohipara’a i te mau rāve’a aravihi ’āpī, mai te fa’a’ohipara’a i te māramarama o te ta’ata (AI) nō te hamani i te mau materia ’e te mau hōho’a.

E fa’a’ohipa-ato’a-hia teie parau tumu nō te mau ha’amāramaramara’a ato’a e roa’a mai nā roto i te mau rāve’a ha’apararera’a mana’o a te ’Ēkālesia. ’Ua tuatāpapa-maita’i-hia ’e ’ua fāri’ihia te mau ha’api’ira’a ato’a, te mau buka arata’i, ’e te mau poro’i ato’a i raro a’e i te arata’ira’a a te Vārua nō te ha’apāpū ē, te tāpe’a mau nei tātou i te huru maitai, te faufa’a, ’e te mau tītaura’a o te ’evanelia a Iesu Mesia. I roto i te hō’ē parau poro’i nā te feiā ’āpī pa’ari ’aita i maoro a’e nei, ’ua ha’api’i ’o Elder David A. Bednar ē, « Nō te tere nā ni’a i te purumu fifi o te pae vārua ’e te mau rāve’a ’aravihi ’āpī, e ti’a i te feiā mo’a i te mau mahana hope’a nei, ma te ha’eha’a ’e te pure (1) ’ia ’imi i te mau parau tumu o te ’evanelia ’o tē nehenehe e arata’i i tā rātou fa’a’ohipara’a i te māramarama o te natirara ’e (2) ’ia fa’aitoito pāpū i te tū’ati i te Vārua Maita’i ’e i te hōro’a pae vārua nō te heheura’a ».

E tō’u mau taea’e ’e tuahine here, noa’tu te ta’a’ē rahi o te mau rāve’a ’aravihi o teie tau, ’e’ita tā te reira e nehenehe e fa’ahōho’a i te maere, te mata’u ’e te fa’ahiahia, i ’itehia i roto i te huru fa’atura tei matara mai nā roto mai i te mana ’o te Vārua Maita’i. ’Ei pipi nā Iesu Mesia, e ti’a ia tātou ’ia ha’apa’o maita’i ’eiaha ’ia ha’aparuparu i tō tātou tā’amura’a i te Atua ’e i tāna tamaiti ma te fa’a’ohipa tano ’ore i te mau parau ’e te mau hōho’a e ’itehia i roto i te māramarama o te natirara. E mea ti’a ia tātou ’ia ha’amana’o ē, te ti’aturira’a i ni’a i te hō’ē « rima tino » o te mau rāve’a ’aravihi ’āpī, e monora’a tano ’ore ’e te fa’atura ’ore te reira i te fa’aurura’a, te ha’amaura’a, ’e te ’itera’a pāpū o tē nehenehe e fāri’ihia nā roto ana’e i te mana o te Vārua Maita’i. Mai tā Nephi i parau : « E te Fatu, ’ua ti’aturi au ia ’oe, ’e e ti’aturi au ia ’oe ē a muri noa atu. E ’ore au e ti’aturi i te rima tino nei ».

I roto i te tahi atu heheura’a, ’ua ha’api’ihia te peropheta Iosepha Semita ē, e mea ti’a i te mau hiero i patuhia nō te Fatu ia riro ’ei vahi nō te fa’atura Iāna. I te roara’a o tāna tau tāvinira’a, ’ua ha’apāpū pūai tō tātou peropheta here, te peresideni Russell M. Nelson, i tā tātou ha’amorira’a ma te fa’atura i roto i te hiero mo’a. I roto i te fare o te Fatu tē ha’api’ihia ra tātou nō ni’a i te tomora’a i roto i te aro mo’a o te Metua ’e te Tamaiti. ’Ua ’ite noa vau ē, te hō’ē o te mau mea mātāmua tā tātou e rave ’ia tomo ana’e tātou i roto i te hiero ’e ’ia fa’aineine ia tātou iho nō te ’āmui atu i roto i te mau ’ōro’a mo’a i reira, o te tātarara’a ïa i tō tātou mau ti’a ’e te tauira’a i tō tātou ’ahu ’uo’uo. Mai ia Mose, mai te mea ē, ’ua ’opua tātou, e nehenehe tā tātou e ’ite ē, te ’īritira’a i tō tātou mau ti’a nō te ao nei, o te ha’amatara’a ïa nō te ta’ahira’a i ni’a i te repo mo’a ’e te tauira’a i roto i te mau rāve’a teitei ’e te mo’a a’e.

E te mau taea’e e te mau tuahine, ’aita e tītauhia ia tātou ’ia ta’uma i ni’a i te afeafe o te hō’ē mou’a mai ta Mose i nā reira nō te ’ite i te fa’atura i te mau mea mo’a ’e nō te taui i tō tātou ti’ara’a pipi i roto i te hō’ē faito hōhonu a’e o te pae vārua ’e te paieti. ’Ei hi’ora’a, e nehenehe tātou e ’ite i te reira a tūtava ai tātou i te paruru i tō tātou fare i te mau mana o te ao nei. E nehenehe te reira e tupu nā roto i te purera’a ma te ha’avare ’ore ’e te ’aueue ’ore i mua i tō tātou Metua i te Ao ra nā roto i te i’oa o Iesu Mesia, ’e te ’imira’a i te ’ite maita’i a’e i tō tātou Fa’aora nā roto i tā tātou tuatāpapara’a itoito i te parau a te Atua i roto i te mau pāpa’ira’a mo’a ’e te mau ha’api’ira’a a tō tātou mau peropheta. Hau atu ā, e nehenehe teie huru tauira’a i te pae vārua e tupu ’a tāmata ai tātou i te fa’atura i te mau fafaura’a tā tātou i rave ’e te Fatu nā roto i te orara’a ma te ha’apa’o i te mau fa’auera’a. E nehenehe teie mau tūtavara’a e fa’atupu i te hau ’e te vai-maita’i-ra’a i roto i tō tātou māfatu. Ma te pāpū maita’i, e nehenehe te fa’atumura’a i ni’a i teie mau ’ohipa e tauturu i te taui i tō tātou mau fare ’ei vāhi ha’apūra’a fa’atura i te pae vārua—te mau vāhi mo’a nō te fa’aro’o i reira te Vārua e pārahi ai, mai te ’ohipa i tupu i ni’a ia Mose i ni’a i te mou’a.

E nehenehe ato’a tātou e ’ite i teie huru tauira’a i te pae vārua a ’āmui atu ai tātou ma te ha’apa’o maita’i i roto i te ’ohipa ha’amorira’a a te ’Ēkālesia, e tae noa’tu i te fa’a’āfarora’a i tō tātou māfatu i ni’a i te Fatu nā roto i tā tātou hīmenera’a i te mau hīmene mo’a. Nā roto i te fa’aru’era’a—mai ia Mose—i te mau fa’ahuehuera’a o te ao nei, i tā tātou ihoa rā mau niuniu afa’ifa’i ’e ’aore rā, te tahi atu mea o te ’ore e tu’ati i teie taime mo’a, e nehenehe tā tātou e fa’atumu i ni’a i te Fa’aora ’e Tāna tusia tāra’ehara, ’e tae noa’tu i tā tātou iho mau fafaura’a. E fa’atupu teie huru fa’atumura’a i ni’a i te ’ōro’a i te hō’ē taime fa’a’āpīra’a ma te fa’atura o tō tātou tā’aira’a ’e te Fa’aora, ’e e fa’ariro te reira i te Sabati ei mea au roa ’e e taui i to tātou orara’a.

I te pae hope’a, e nehenehe tā tātou e ’ite i teie tauira’a i te pae vārua i roto i tō tātou ti’ara’a pipi a ha’amori tāmau ai tātou i ni’a i te mou’a o te fare o te Fatu—tō tātou mau hiero mo’a—’e ’a tāmata ai tātou i te ora ma te ti’aturi i te fafaura’a, ’ia fa’aruru ihoa rā tātou i te mau tāmatara’a o te orara’a tāhuti nei.

’Ua ’ite maua tā’u vahine i te tahi mau taime mo’a nō te fa’atura i ni’a i te mou’a mo’a ’a tāmata ai māua i te fa’a’ohipa i teie mau parau tumu i roto i tō māua orara’a, o tei fa’atupu i te hō’ē tauira’a faufa’a i roto i tō māua ti’ara’a ’ei pipi. Tē ha’amana’o nei au mai te huru ē, nō ’ananahi noa nei, ’a haere ai au nā roto i te hunara’a ma’i hou ’a tanu ai i te piti o tā māua tamari’i, tei fanau-’oi’oi-hia ’e ’aita i ora mai, i te taime ’a vai noa ai tā’u vahine i te fare ma’i. Tē ha’amana’o nei au i tō’u purera’a ma te ’ū’ana i te Atua nō te ani i te tauturu nō te fa’aruru i taua tāmatara’a fifi ra. I taua ihoa taime ra, ’ua fāri’i au i te hō’ē ha’apāpūra’a pae vārua māramarama ’e te pūai i roto i tō’u ’ā’au : E maita’i te mau mea ato’a i roto i tō māua orara’a mai te mea e fa’a’oroma’i maua tā’u vahine ma te tāpe’a noa i te ’oa’oa e nōa’a mai nā roto i te ha’apa’ora’a i te ’evanelia a Iesu Mesia. E au ra ē, te mea tei riro ’ei fifi rahi ’e te oto i taua taime ra, ’ua riro ïa ’ei ’ohipa mo’a ’e te fa’atura, ’ei ’ōfa’i tumu ’o tei tauturu i te pāturu i tō māua fa’aro’o ’e ’o tei hōro’a ia māua i te ti’aturira’a i roto i te mau fafaura’a tā māua i rave e te Fatu ’e i roto i tāna mau fafaura’a nō’u ’e nō tō’u ’utuāfare.

E to’u mau taea’e ’e tuahine, te fa’atura i te mea mo’a e fa’atupu ïa i te māuruuru mau, e fa’arahi i te ’oa’oa mau, e arata’i i tō tātou mau ferurira’a i te heheura’a, ’e e hōro’a mai i te ’oa’oa rahi a’e i roto i tō tātou orara’a. E tu’u te reira i tō tātou ’āvae i ni’a i te repo mo’a ’e e fa’ateitei i tō tātou ’ā’au i ni’a i te Atua ra.

Tē fa’a’ite pāpū nei au ia ’outou ē, ’a tāmata ai tātou i te fa’aō atu i teie huru maita’i i roto i tō tātou orara’a i te mau mahana ato’a, e nehenehe tā tātou e fa’arahi i tō tātou ha’eha’a, e fa’arahi i tō tātou ite i te hina’aro ’o te Atua nō tātou, ’e e ha’apūai i tō tātou ti’aturi i roto i te mau fafaura’a nō te mau fafaura’a tā tātou i rave e te Fatu. Tē fa’a’ite pāpū nei au ē, ’a fāri’i ai tātou i teie hōro’ara’a nō te fa’atura i te mau mea mo’a, i ni’a ānei i te mou’a o te fare o te Fatu, i roto ānei i te hō’ē fare purera’a, e ’aore rā i roto i tō tātou iho fare, e fa’a’īhia tātou i te maere ’e te fa’ahiahia ’a ’āmui atu ai tātou i te here fāito ’ore o tō tātou Metua i te Ao ra ’e o Iesu Mesia. Tē fa’a’ite nei au i teie mau parau mau ma te tura, i te i’oa mo’a ’o tō tātou Fa’aora, ’o Iesu Mesia, ’āmene.