Elder Michael Cziesla

Tē ha’amana’o maita’i nei Elder Michael Cziesla i te mau tāfifira’a nō te matahiti 2017. I te mahana piti i te ’āva’e Tēnuare, ’ua ’ere ’oia i tāna ’ohipa i roto i te hō’ē taiete ture nā te ara, i te topatarira’a te taiete. ’Ia po’ipo’i a’e, ’ua nīnāhia tōna fare i te pararīra’a te hō’ē tuiō rahi nō te pape. ’Ua huehia tōna fare i te toru o te mahana, ’ua tāmata te ta’ata i te ’eiā i tā rātou mau faufa’a. Ma’a mahana noa, ’ua ta’ahuri roa tōna orara’a.

« ’Ua ’ata’ata atu vau i terā sābati ’a pārahi ai i ni’a ’ei peresideni titi », ’ua parau ’oia. « ’Aita hō’ē i ’ite i te ’ohipa e tupu ra. I roto rā iā’u, ’ua ’oto roa ïa. Tei roto vau i te hō’ē vāhi pōiri roa. »

I muri a’e i te purera’a, ’ua ui mai te hō’ē ta’ata marū iāna e aha te fifi. « ’Ua fa’aro’o noa mai ’oia, ’e ’ua tauahi mai iā’u », te parau ïa a Elder Cziesla. « ’Ua putapū vau i te Fatu i te tauahira’a mai iā’u, ’ua ’ite ’oia i tō’u ’ati, ’e e ’āfaro mai te mau mea ato’a. »

’Ua fānauhia ’o Michael Cziesla nā Armin Ludwig ’e Irmtraut Hanna i Neumünster, i Heremani, i te 26 nō Tiurai 1972. ’Ua pa’ari ’oia i Schleswig-Holstein ’e i muri iho ’ua tāvini i te misiōni i te misiōni nō Ogden (Utah, Marite). ’Ua tāvini tāna vahine, ’o Margret Anne Rauh, i roto i te misiōni nō Temple Square. ’Ua fa’aipoipo rāua i te hiero nō Frankfurt (Heremani) i te 4 nō Tetepa 1997. I te taime ’a pi’ihia ai ’oia, tē ora ra rāua ’e tā rāua nā tamari’i e pae i Griesheim, i Heremani, i reira rātou e au roa nei e ori haere nā roto i te uru rā’au ’e e tere i te tau fa’afa’aeara’a i te hō’ē motu i Tanemateta.

’Ua roa’a ia Elder Cziesla te hō’ē parau tū’ite nō te ture i te fare ha’api’ira’a tuatoru ra University of Mainz i te matahiti 2000. ’Ua fa’aoti ’oia i tāna tōro’a ’ohipa nō te ture ’ei mero taiete rahi nō te taiete McDermott Will & Emery.

Hou tōna pi’ira’a ’ei Hitu ’Ahuru huimana fa’atere rahi, ’ua tāvini Elder Cziesla ’ei Hitu Ahuru ārea i te ārea Europa rōpū, ’ei peresideni misiōni mono i roto i te misiōni nō Frankfurt (Heremani), ’ei peresideni titi, ’ei melo ’āpo’ora’a teitei ’e ’ei tauturu i roto i te ’episekōpora’a.