’Āpiti mai nō te fa’aineine i te ho’ira’a mai o te Mesia

I roto i « teie tau hanahana », ’a parare ai te bāsileia o te Atua ’e ’a patuhia ai te mau hiero nā te mau fenua ato’a, tē hina’aro-rahi-hia nei te mau vairua mana’o tae ’ia fa’aō mai i roto i te ’ohipa a te Atua. Tē tāvinira’a nounou ’ore ’o te nātura mau ïa o te pipi mai te Mesia te huru. Terā rā, te tāvinira’a e mea varavara ’ei ’ohipa ’ōhie. Nō reira tē fa’ahiahia nei au i te mau pipi ha’apa’o maita’i i te fafaura’a, ’oia ato’a tō tātou mau misiōnare here, ’o tei ha’apae i tō rātou mau hia’ai ’e mau tāmatara’a i te hiti nō te tāvini i te Atua, ma te tāvinira’a i tāna mau tamari’i. « E mea au na [te Atua] ’ia fa’atura [ia ’outou nō te tāvinira’a iāna] ma te parauti’a ». ’Ua parau fafau ’oia, « e rahi roa [tō rātou] utu’a ’e [tō rātou] hanahana e vai ā te reira ē a muri noa atu ». ’Ia parau ana’e tātou ’Ē i te tāvinira’a, tē parau ra ïa tātou ’Ē ia Iesu Mesia. ’E ’ia parau ana’e tātou ’Ē ia Iesu Mesia, tē parau ra ïa tātou ’Ē i te orara’a hau roa i te maita’ira’a.

’Ua ’apo mai au i teie ha’api’ira’a ma te ’ohipara’a ’e te tuatāpapara’a i te pāruru tārā’aura’a [chemical engineering] i te fare ha’api’ira’a tuatoru. ’Ua anihia mai iā’u ’ia riro ’ei ta’ata fa’anaho i te ’ativite nō te hō’ē pāroita melo ’ōtahi. ’Ua riro teie pi’ira’a ’ei rereioa nō’u. Noa atu rā, ’ua fa’ari’i au ’e i te ’ōmuara’a ’ua riro ’ei ’ohipa rahi roa. I muri iho i te hō’ē ’ativite, ’ua fa’ahiahia roa te hō’ē tamāhine nehenehe i tā’u huru ’ōperera’a i te pape to’eto’e. ’Ua ho’i mai ’oia e toru taime, ma te ’imi e haru tō’u ara-maīte-ra’a. ’Ua tupu te here i rotopū ia māua, ’e e piti hepetoma i muri mai, ’ua ani mai ’oia ’ia fa’aipoipo māua. ’Oia ïa, e ’ere paha mai te reira roa te ’oi’oi, ’e nā’u i ani ’ia fa’aipoipo atu iāna, te parau mau rā teie ïa : Tē rūrū nei au i te mana’ora’a ē e’ita vau e fārerei ia Heidi āhani au i pāto’i i taua pi’ira’a ra.

Tē fa’aō nei tātou i roto i te ’ohipa a te Atua ’eiaha nō te mea e hina’aro te Atua ia tātou, nō te mea rā e hina’aro tātou i te Atua ’e tāna mau ha’amaita’ira’a rahi roa. Tē fafau nei ’oia, « nō te mea, inaha, e ha’amaita’i au ia rātou ato’a o te rave i te ’ohipa i roto i tō’u nei ō vine i te hō’ē ha’ama’ita’ira’a rahi roa ». E fa’a’ite atu vau e toru parau tumu ’o tē ha’api’i nei nāhea tō tātou ’āmuira’a i roto i te ’ohipa a te Atua, i te ha’amaita’i ’e i te tauturu ia tātou ’ia fa’aineine nō te fārerei atu i te Fa’aora.

’A tahi, ’a ’āmui ai tātou, e nu’u tāmau tātou i « te ’ōpuara’a nō tō [tātou] hāmanira’ahia ».

Tē ha’api’i mai nei tātou i teie hōho’a i roto i te ’ā’amu nō te poietera’a. I muri a’e i te mahana tāta’itahi, e fā’i te Atua i te nu’ura’a i mua ma te paraura’a « e mea maita’i ïa ». ’Aita ’oia i parau ’ua oti roa te ’ohipa ’aore rā mea maita’i roa. ’Ua parau rā ’oia tē vai ra te mau nu’ura’a i mua, ’e i te hi’ora’a a te Atua, e mea maita’i ïa !

E’ita te mau pi’ira’a e fa’ata’a ’aore rā e ha’apāpū i te faufa’a ’aore rā i te ti’amāra’a o te hō’ē ta’ata. Maori rā, ’a ha’a ai tātou ’e te Atua mai te au i tāna i ani, e tupu rahi tātou mai te au i tō tātou hāmanira’ahia.

E ’oa’oa te Atua i tō tātou nu’ura’a i mua, ’e e ti’a ia tātou ’ia rave hau atu, noa atu tē vai ra te ’ohipa e rave fa’aoti. I te tahi mau taime, ’aita tō tātou e pūai ’aore rā e mau rāve’a nō te tāvini i roto i te hō’ē pi’ira’a. E nehenehe noa tātou e fa’aō i roto i te ’ohipa ’e e pāruru i tō tātou ’itera’a pāpū, nā roto i te mau rāve’a maita’i mai te pure ’e te tai’ora’a i te mau pāpa’ira’a mo’a. E’ita tō tātou Metua i te ao ra e fa’ahapa mai ia tātou ’ia hina’aro ana’e tātou e tāvini, ’aita rā e nehenehe e tāvini.

’A piti, e fa’ateitei te tāvinira’a i tō tātou nohora’a ’e tō tātou mau fare purera’a ’ei mau vāhi mo’a, i reira tātou e nehenehe ai e fa’a’ohipa i te orara’a o te fafaura’a.

’Ei hi’ora’a, tā tātou fafaura’a ’ia ha’amana’o noa i te Mesia nō te ta’ata hō’ē ïa, e orahia rā te reira ’ia tāvini ana’e tātou ia vetahi ’ē. Tē fa’a’ati nei te mau pi’ira’a ia tātou i te mau rāve’a nō te « fa’a’oroma’i […] ato’a te tahi i tā te tahi ra hopoi’a, e nā reira i te fa’ati’a i te ture a te Mesia ra ». ’Ia tāvini ana’e tātou nō te mea ’ua here tātou i te Atua ’e tē hina’aro nei e ora i tā tātou mau fafaura’a, teie tāvinira’a e au ra e mea ’ohipa rahi ’e te rohirohi, e riro mai ’ei mea ’oa’oa ’e te fa’ataui.

E’ita te mau ’ōro’a e fa’aora ia tātou nō te mea tē fa’a’ī nei te reira i te hō’ē tāpura hi’opo’ara’a i te ao ra. Maoti rā, ’ia ora ana’e tātou i te mau fafaura’a e tū’ati i teie mau ’ōro’a, e riro mai tātou mai te huru ta’ata e hina’aro e pārahi i te aro o te Atua. E upo’oti’a teie hāro’aro’ara’a i te mau fea’a nō te tāvini ’aore rā, te hina’aro ’eiaha e tāvini. E fa’a’oi’oi tō tātou fa’aineinera’a ’ia fārerei atu ia Iesu Mesia, ’ia fa’aea ana’e tātou i te uiui e aha tā te Atua e fa’ati’a ’e ’ia ha’amata i te uiui e aha tā te Atua e au a’e.

’A toru, te ’āpitira’a mai i roto i te ’ohipa a te Atua, e tauturu ia tātou ’ia fa’ari’i i te hōro’a o te aroha o te Atua ’e ’ia putapū i tōna here rahi a’e.

E’ita tātou e ’aufauhia nō te tāvinira’a. Maoti rā, tē ha’api’i nei te pāpa’ira’a mo’a ē « ’ia roa’a ia [tātou] te maita’i o te Atua ’ei utu’a nō tā [tātou] ’ohipa, ’ia pūai [tātou] i te Vārua, ma te fa’ari’i i te ’ite nō te Atua, [’e] ’ia ti’a ia [tātou] ’ia ha’api’i ma te mana ’e te ha’amanara’a nō ’ō mai i te Atua ra ». E ’aitauira’a fa’ahiahia roa teie.

Nō te aroha o te Atua, e ’ere tō tātou mau ’aravihi ’e mau ’aravihi ’ore i te tumu mātāmua nō te fa’ataera’a ’aore rā nō te fa’ari’ira’a i te hō’ē pi’ira’a. ’Aita te Atua e tīa’i nei i te ’ohipa maita’i roa ’aore rā i te tārēni fa’ahiahia roa nō te ’āmui mai i roto i tāna ’ohipa. ’Ahiri ’o te reira, e’ita e ti’a i te ari’i vahine Esetera e fa’aora i tōna nuna’a, e’ita Petero e arata’i i te ’Ēkālesia mātāmua, ’e e’ita Iosepha Semita e riro ’ei peropheta nō te fa’aho’i-fa’ahou-ra’a mai.

’A rave ai tātou ma te fa’aro’o nō te rave i te hō’ē ’ohipa e nā ni’a a’e i tō tātou mau aravihi, e fa’a’itehia mai tō tātou paruparu. E ’ere roa atu i te mea au roa, terā rā e mea tītauhia ’ia « ’ite [tātou] ē, nā roto i tō [te Atua] ra maita’i… i ti’a ai ia [tātou] ’ia rave i taua mau mea nei ».

E topa pinepine tātou ’a ’āmui ai tātou i roto i te ’ohipa a te Atua. I roto rā i tā tātou tauto’ora’a, e haru mai Iesu Mesia ia tātou. E fa’ateitei tāmau ’oia ia tātou ’ia fa’aorahia tātou i te paura’a ’e te mata’u, ’e nā roto mai i te nīno’a mana’o e’ita roa e tae i terā fāito. ’Ia ha’amo’a ana’e tātou i tā tātou tauto’ora’a, terā i te mea ha’iha’i roa, e fa’ahanahana te Atua i te reira. ’Ia fa’atusia ana’e tātou nō te Mesia, e ha’amo’a ’oia ia tātou. ’O teie te mana fa’ataui o te aroha o te Atua. ’A tāvini ai tātou, e tupu tātou i roto i te aroha e tae roa ’ua ineine tātou ’ia « fa’ateiteihia i ni’a e te Metua, ’ia ti’a mai i mua ia [Iesu Mesia] ».

’Aita vau i ’ite i te mau uira’a ato’a tā te Fa’aora e ui mai iā’u ’ia ti’a atu ana’e au i mua iāna, teie rā paha te hō’ē uira’a, « ’o vai tā ’oe i ’āfa’i mai nā muri ia ’oe ? » Te mau pi’ira’a ’o te mau hōro’a mo’a ïa a te hō’ē Metua here i te ao ra, nō te tauturu ia tātou ’ia ’āfa’i ia vetahi ’ē ia Iesu Mesia ra. Nō reira, tē ani manihini nei au i te feiā fa’atere ’e ia tātou tāta’itahi, ’ia ’imi ma te ’ā’au tae rahi a’e i te feiā ’aita e pi’ira’a. ’A fa’aitoito ia rātou ’e ’a tauturu ia rātou ’ia ’āmui mai i roto i te ’ohipa a te Atua, nō te tauturu ia rātou ’ia fa’aineine nō te ho’ira’a mai o te Mesia.

E ’ere Ioane i te mea itoito i roto i te ’Ēkālesia ’a fārerei atu ai tōna ’episekōpo iāna, ’e ’ua parau atu iāna ē, e ’ohipa tā te Fatu nāna ’ia rave. ’Ua ani atu te ’episekōpo ia Ioane ’ia fa’aea i te puhipuhi i te ’ava’ava. Noa atu ē ’ua tāmata Ioane e rave rahi taime ’ia fa’aea, i teie rā taime ’ua putapū ’oia i te hō’ē pūai ’ite-’ore-hia i te tauturura’a iāna.

E toru noa hepetoma i muri iho, ’ua fārerei atu te peresideni titi ia Ioane. ’Ua pi’i ’oia ia Ioane ’ia tāvini i roto i te ’episekōpora’a. ’Ua hitimahuta roa Ioane. ’Ua parau atu ’oia i te peresideni titi nō fa’aea noa iho nei ’oia i te puhipuhi i te ’ava’ava. Mai te peu te aura’a e tītauhia iāna e ha’apae i tāna peu ’ia haere i te mau ha’utira’a tu’e pōpō i te sābati, e anira’a rahi roa ïa te reira. E mea ’ōhie roa te pāhonora’a fa’auruhia a te peresideni titi : « E Ioane, e ’ere nā’u te anira’a ia ’oe, nā te Fatu rā ».

I te reira ’ua pāhono mai Ioane, « mai te peu ’o te reira ihoā, e tāvini ïa vau ».

’Ua parau mai Ioane iā’u ē, ’ua riro teie mau tusiara’a nō te tāvini ’ei nu’ura’a pae vārua nōna ’e nō tōna ’utuāfare.

Tē ui maere nei au ’aita ānei tātou e hi’o hape ra, e ma’iri nei i te fa’atae i te mau pi’ira’a i te feiā, i tā tātou hi’ora’a tāhuti nei, e mea pāpū ’ore ’aore rā e mea ti’amā ’ore. ’Aore rā, e mea ha’ape’ape’a a’e nā tātou te ’aravihira’a ’eiaha rā te parau tumu nō te nu’ura’a i mua, ma te ’aramōina ’ia hi’o e mea nāhea te Fa’aora ’ia fa’arahi i te ’aravihi mana’o-’ore-hia ’e te ta’a ’ore, ma te hōro’a ia rātou i te mau rāve’a nō te tāvini.

Tē ha’api’i nei Elder David A. Bednar i te faufa’a rahi o te fa’auera’a pāpa’ira’a mo’a ’ia « ha’api’i te mau ta’ata tāta’itahi [te vahine ’e te tāne] i tāna iho ’ohipa ’e ’ia rave i [tā rātou] ’ohipa ». Tē nā reira ra ānei tātou ? ’Ia vaiiho ana’e te feiā fa’atere ’e te mau metua ia vetahi ’ē ’ia ha’api’i mai ’e ’ia ’ohipa rātou iho, e pua mai ’e e ruperupe mai rātou. Mai te mea e mea ’ōhie a’e ’ia hōro’a i te mau melo ha’apa’o maita’i i te tahi fa’ahou pi’ira’a, te rāve’a maitai a’e ’o te ani-manihini-ra’a ïa i te feiā e ’ere i te mea ha’apa’o ’ia tāvini ’e ’ia vaiiho ia rātou ’ia ha’api’i mai ’e ’ia tupu i te rahi.

’Ahiri te Mesia i ti’a tino mai i’ō nei, e haere ’oia e fārerei i te feiā ma’i, e ha’api’i i te piha Ha’api’ira’a Sābati, e pārahi i pīha’i iho i te tamāhine e ’oto ra ’e e ha’amaita’i i te mau tamari’i. E nehenehe ’oia e rave i tāna iho ’ohipa. Tē ora nei rā ’oia i teie parau tumu ’ia vaiiho ia tātou ’ia rave ’e ’ia ha’api’i mai, nō reira ’oia i tono mai ai ia tātou i tōna pārahira’a.

Ma te ’āpitira’a mai i roto i te ’ohipa a te Atua e nā muri mai « te ti’ara’a, te tura ’e te hōpoi’a nō te ti’a atu nō te Fatu [Iesu Mesia] ». ’Ia tāvini ana’e tātou nō te fa’arahi i te Mesia ’e ’eiaha ia tātou iho, e riro tā tātou tāvinira’a e mea ’oa’oa. ’Ia fa’aru’e ana’e mai vetahi ’ē i tā tātou piha ha’api’ira’a, te rurura’a, te tāvini aupurura’a, ’aore rā te ’ativite, ma te ha’amana’o hau atu i te Mesia ia tātou nei, e mea pūai ïa te ’ohipa.

I roto i te ’imira’a ma te ’ā’au tae i te ti’a atu nō te Fa’aora, e riro rahi mai tātou mai iāna te huru. Teie te fa’aineinera’a maita’i a’e nō te taime mo’a i reira tātou tāta’itahi e tūturi ai ’e e fā’i ai o Iesu te Mesia, ’o tā’u e fa’a’ite pāpū nei, ’e ’o te peresideni Russell M. Nelson tōna « reo […] i te mau hope’a o te ao nei » nō te tauturu ia tātou « ’ia fa’aineine ia tātou […] nō te mea e tae mai ». Nā roto i te i’oa mo’a ’o Iesu Mesia, ’āmene.