Elder James E. Evanson

’Ua pa’ari Elder James E. Evanson i roto i te hō’ē fare fa’a’apu peti tihota, i te ’oire iti nō Barnwell, i te pae hiti’a o te rā nō Lethbridge, i Alberta, i Tanata.

E hua’ai nō te mau pionie ha’apa’o maita’i, ’ua pa’ari Elder Evanson i roto i te hō’ē ’utuāfare « ’ua ha’api’ihia te ’evanelia ’e ’ua orahia. »

I te 10ra’a o tōna matahiti, ’ua tai’o ’oia i nā buka hōho’a e 16 nō te Buka a Moromona a te ’utuāfare, nā reira ato’a te mau ’ā’amu o te ’Ēkālesia ’e ’ua fa’aoti ’oia e pe’e i te hi’ora’a o Iosepha Semita. Ma te tomo i roto i te hō’ē uru rā’au i te tahi atu pae o te purūmu o tōna fare, ’ua tūturi ’oia ’e ’ua pure ’e ’ua fa’ari’i i te ha’apāpūra’a a te Vārua Maita’i ē ’o Iesu Mesia tōna Fa’aora, e peropheta mau ’o Iosepha Semita ’e e parau mau te Buka a Moromona.

’Ua ’ume teie ti’aturira’a pāpū i te hō’ē orara’a tāvinira’a itoito i roto i te ’Ēkālesia, ’ei Hitu ’Ahuru ārea, ’ei peresideni titi, ’e ’ei peresideni nō te misiōni nō Orem (Utah, Marite). I te taime ’a pi’ihia ai ’oia, tē tāvini ra ’o Elder Evanson ’ei ti’a fa’atere itoito nō te mau ’ātivite i roto i tāna pāroita i Lethbridge.

’Ua fānauhia James Eugene Evanson i Taber, i Alberta, i te 16 nō ’Ātete 1968, ’o ’oia hō’ē o nā tamari’i e va’u a Dale Eugene ’e Phyllis Tanner Evanson.

I muri a’e i te tāvinira’a i te hō’ē misiōni rave tāmau i Tempe, i Arizona, ’ua fa’aipoipo Elder Evanson ia Jody Karil Zobell i te 20 nō Tītema 1989, i te hiero nō Roto Miti. E pae tamari’i tā rāua ’e e 11 mo’otua.

’Ua roa’a ia Elder Evanson te parau ’aravihi tuatoru ’e te hō’ē parau tū’ite taote niho i te fare ha’api’ira’a tuatoru ra University of Alberta ’e ’ua rave i te ’ohipa taote niho nōna iho e 26 matahiti te maoro.