Elder Brian J. Holmes

’Ua parau Elder Brian J. Holmes ē, e ’ite rāua tāna vahine, ’o Maggie, nō te parau fafau a te Fatu i roto i te Te Ha’api’ira’a Tumu ’e te mau Fafaura’a 84:88, ’oia ho’i « e haere [’oia] nā mua i tō ’outou mata. »

« ’O te mea ïa tāna i rave nō mātou i tō mātou orara’a tā’āto’a », ’ua parau Elder Holmes. « ’Ia fāriu ana’e tātou i tō tātou orara’a i ni’a i te Fatu, e nehenehe tāna e e fa’ahotu rahi a’e i te reira, i tā tātou iho e nehenehe. »

I ni’a i tōna ti’ara’a ’āpī ’ei Hitu ’Ahuru huimana fa’atere rahi, tē tīa’i nei Elder Holmes ē, e fāna’o ’oia i te taime nō te parau pāpū atu i te ti’ara’a tumu o Iesu Mesia i roto i te fa’anahora’a a te Metua i te ao ra.

« ’O ’oia te Fa’aora ’e te Tāra’ehara o te mau tamari’i ato’a a tō tātou Metua i te ao ra », ’ua parau ’oia.

’Ua fānauhia Brian J. Holmes i te 5 nō Tītema 1977, i Roto Miti, i Utah, te hō’ē o nā tamari’i e 12, nā Michael H. Holmes ’e Marian R. Holmes. I tōna taure’are’ara’a, ’ua tāvini ’oia i te hō’ē misiōni i Munich, i Heremani. I muri mai ’ua fa’aipoipo ’oia ia Maggie Wilson i te hiero nō Roto Miti (Utah, Marite), i te 29 nō Māti 1999. E ono tamari’i tā Elder ’e te tuahine Holmes ’e tē ora ra i Queen Creek, i Arizona, i te taime ’a pi’ihia ai ’oia.

’Ua roa’a ia Elder Holmes te parau ’aravihi tuatoru nō te ihi poritita ’e te hō’ē parau tū’ite nō te ture, i te fare ha’api’ira’a tuatoru ra Arizona State University. ’Ua ’ohipa ’oia ’ei mono peresideni nō te taiete Holmes Homes i Arizona, ’e ’ua ha’amau i te taiete Holmes Law, PLC, ’e ’aita i maoro a’enei ’ua ’ohipa ’ei a’o nō te taiete Charter One, LLC.

Nā mua atu i tōna pi’ira’a i roto i te Huimana fa’atere rahi, ’ua tāvini Elder Holmes ’ei Hitu ’Ahuru ārea i roto i te ārea nō te pae apato’a tō’o’a o te rā nō Amerika Apato’erau. ’Ua tāvini ato’a ’oia ’ei peresideni titi, ’ei melo ’āpo’ora’a teitei, ’e ’ei ’episekōpo.