’Ua fa’aorahia ’oia i te pae vārua i roto iāna

Hō’ē ’ahuru lepera tei pi’i i te Fa’aora, « ’A aroha mai ia mātou ». ’E ’ua reira Iesu Mesia. ’Ua fa’aue ’oia ia rātou ’ia fa’a’ite ia rātou iho i te tahu’a ’e ’ua tāmāhia ratou i te ma’i ’a haere ai rātou.

’E ’ia hi’o ihora te hō’ē o rātou iāna ’e ’ua ora, ’ua pi’i hua a’era ’oia i te ha’amaita’ira’a i te Atua. ’Ua ho’i ’oia i pīha’i iho i te Fa’aora, ’ua topa i raro i mua i tōna ’āvae ’e ’ua fa’a’ite i tōna māuruuru.

’E ’ua parau te Fa’aora i te ta’ata tei māuruuru, « ’Ua fa’aora tō ’oe fa’aro’o ia ’oe ».

’Ua fa’aora Iesu Mesia hō’ē ’ahuru lepera. Terā rā, ’ua ho’i mai te hō’ē i te Fa’aora ra ’e ’ua fa’ari’i i te tahi atu mea. ’Ua fa’aorahia ’oia.

E iva lepera tei fa’aorahia i te pae tino.

Hō’ē tei fa’aorahia i te pae tino ’e ’ua ora mai i te pae vārua.

’A feruri ai au i teie ’ā’amu, ’ua uiui au ē, e parau mau anei te hurira’a o te reira. Mai te mea e ’ere te fa’aorara’a ’e te ti’amāra’a i te hō’ē ā mea, e nehenehe ānei tāna e fa’aora i te hō’ē ta’ata i te pae vārua, ’aita rā i fa’aorahia i te pae tino ’e i te pae ferurira’a ?

E fa’aora te Fa’aora Rahi i tō tātou mau fifi ato’a, i te pae tino ’e i te pae ferurira’a, i tōna iho taime. E nehenehe ānei rā te hō’ē ta’ata e ora mai i roto i te tīa’ira’a ’ia fa’aorahia ?

E aha te aura’a ’ia fa’aorahia i te pae vārua ?

E fa’aorahia tātou i roto ia Iesu Mesia ’ia fa’a’ohipa ana’e tātou i tō tātou ti’amāra’a ’ia pe’e iāna ma te fa’aro’o, ’ia hōro’a i tō tātou ’ā’au iāna ’ia nehenehe iāna ’ia taui i te reira, ’ia ha’apa’o i tāna mau fa’auera’a, ’e ’ia fa’aō atu i roto i te hō’ē fafaura’a ’e ’ōna, ma te fa’a’oroma’i ma te ha’eha’a ’e ma te ha’api’i mai roto mai i te mau fifi o teie huru orara’a i ni’a i te fenua nei ’e tae roa atu i te taime e ho’i tātou i mua iāna ’e e fa’aorahia nā roto i te mau huru ravera’a ato’a. Mai te mea e mea ha’avare ’ore au i roto i tō’u ’āpitira’a iāna, e nehenehe au e fa’aorahia ’a tīa’i ai au i te fa’aorara’a.

E hōro’a mai te fa’aro’o ia Iesu Mesia i te tīa’ira’a. E ’ite au i te tīa’ira’a nā roto i te tauto’ora’a ’ia vai mā noa—te hō’ē ’īra’a nā roto i te fa’aro’o ia Iesu Mesia. Nā te fa’aro’o iāna e fa’arahi i tō’u tīa’ira’a i te fa’aorara’a, ’e e ha’apūai te reira tīa’ira’a i tō’u fa’aro’o ia Iesu Mesia. E ’ohura’a pūai ta’a’ē te reira.

’Ua parau te Fatu ia Enosa ’ua « ora » ’oia i tōna fa’aro’o. ’Ua tae mai te ’īra’a ’a feruri ai ’o Enosa i te mau parau a tōna metua tāne-peropheta, ’o Iakoba, ’a hina’aro ai ’oia e hāro’aro’a i te rāve’a nō te fa’ari’i i te ora mure ’ore, ’a ti’aoro ai ’oia i mua i te Atua nā roto i te pure ’ū’ana. ’E i roto i taua huru hina’aro ’e te ha’eha’a ra, ’ua tae mai ra te reo o te Fatu iāna, ma te fa’a’ite mai ē, ’ua fa’a’orehia tāna mau hara. ’E ’ua ani atura ’o Enosa i te Fatu, « Nāheahia te reira ? » ’E ’ua pāhono maira te fatu, , « Nō tō fa’aro’o i te Mesia […] ’ua ora ’oe i tō fa’aro’o ».

Nā roto i tō tātou fa’aro’o ia Iesu Mesia, e nehenehe tā tātou e ’imi ’ia ora i te pae vārua ’a tīa’i ai ’e ’a ti’aturi ai tātou i te fa’aorara’a i te pae tino ’e i te pae ferurira’a.

Nā roto i tāna tusia tāra’ehara, ’e ’ia tatarahapa mau ana’e tātou, e fa’aora te Fa’aora ia tātou i te hara, mai tāna i nā reira ia Enosa. E tae ato’a tāna Tāra’ehara mure ’ore i ni’a i tō tātou mau ’oto ’e tō tātou mau pe’ape’a.

Terā rā ’e’ita paha ’oia e fa’aora i te ma’i, te māuiui ma’i, te māriri ’ai ta’ata, te ahoaho, te hepohepo, ’e te tahi atu mau mea mai te reira te huru. Nā te Fatu te reira huru fa’aorara’a i tōna iho taime. ’E ’a tīa’i noa ai tātou, e nehenehe tā tātou e mā’iti ’ia fa’aorahia tātou nā roto i te fa’a’ohipara’a i tō tātou fa’aro’o iāna !

Te aura’a no te parau ra ’ia ti’amā, ’oia ho’i, ’ia riro ’ei mea hope ’e te mahora. Mai nā pāretenia pa’ari e pae ’o tei fa’a’ī i tā rātou mau lāmepa i te hinu i te taera’a mai te tāne fa’aipoipo, e nehenehe tātou e fa’aorahia i roto ia Iesu Mesia ’a fa’a’ī ai tātou i tā tātou mau mori i te hinu fa’a’amu o te fa’afāriura’a iāna ra. Nā roto i te reira, ’ua ineine tātou nō te ’amura’a ma’a fa’aipoipora’a taipe, Tōna tae-piti-ra’a mai.

I roto i te parabole, tei te vāhi ti’a mau nā pāretenia hō’ē ’ahuru pā’āto’a i te tīa’ira’a i te tāne fa’aipoipo. ’Ua haere mai rātou tāta’itahi ’e te hō’ē lāmepa.

Terā rā, i tōna taera’a mai i te hora mana’o-’ore-hia i te ’āfara’a o te pō, ’aita i nava’i te hinu a nā pāretenia ma’ama’a e pae nō tā rātou lāmepa. ’Aita rātou i parauhia e feiā ’ino, e feiā ma’ama’a rā. ’Aita te feiā ma’ama’a i ineine maita’i nō te tāpe’a i tā rātou mau lāmepa ’ia ’ama noa i te hinu o te fa’afāriura’a.

’E nō reira, ’ei pāhonora’a i tā rātou anira’a ’ia fāri’ihia rātou ’ia tomo i roto i te ’amura’a mā’a nō te fa’aipoipora’a, ’ua pāhono mai te tāne fa’aipoipo ē, « ’Aore ’outou i ’ite iā’u ».

Nō reira, te aura’a ra, ’ua ’ite nā pāretenia pa’ari e pae iāna. ’Ua fa’aorahia rātou i roto iāna.

’Ua ’ī tā rātou mau lāmepa i te hinu faufa’a roa o te fa’afāriura’a, ’o tei fa’ati’a i te mau pāretenia pa’ari ’ia tomo i roto i te ’ōro’a fa’aipoipora’a i te pae ’atau o te tāne fa’aipoipo.

Mai tā te Fa’aora i parau, « ’Ia mau noa ’ōrua i te itoito, mai te pure noa i te mau taime ato’a, ma te fa’anehenehehia tā ’ōrua nā lāmepa ’e ’ia ama noa ho’i, ’e ’ia ’āfa’i noa ’ōrua i te hinu, ’ia vai ineine noa ’ōrua nō te haerera’a mai ’o te tāne fa’aipoipo ’āpī ra ».12

E pae pāretenia pa’ari, nā Ben Hammond

’Aita i maoro a’enei, ’ua tu’uhia te hō’ē nana’ora’a nehenehe roa nō nā pāretenia pa’ari e pae i Temple Square, i rāpae noa atu i te fare o te Sotaiete Tauturu ’e i roto i te maru o te Hiero nō Roto Miti.

E vāhi tano teie nō te fa’a’ohipa i te parabole. Nō te mea, ’ia rave ana’e tātou ’e ’ia ha’apa’o ana’e tātou i te mau fafaura’a, te mau fafaura’a ihoa rā tā tātou e nehenehe e rave i roto i te fare o te Fatu, e fa’a’ī tātou i tā tātou mau lāmepa i te hinu o te fa’afāriura’a.

Noa atu ’aita te mau pāretenia pa’ari e pae e hōro’a nei i te hinu o tō rātou fa’afāriura’a, tē hōro’a nei rā rātou i tō rātou māramarama ’a fa’ateitei ai rātou i tā rātou mau lāmepa tei ’ī i te hinu ’e tē ’ana’ana ra. Tē fa’ahōho’ahia ra rātou tē turu ra te tahi i te tahi, te tapono i ni’a i te tapono, te hō’ē rima i ni’a i te tahi atu, ma te hi’o mata ’e te tītau ia vetahi ’ē ’ia haere mai i te māramarama.

’Oia mau, « [’o tātou] te māramarama o teie nei ao ». ’Ua parau te Fa’aora ē:

« Fa’ariro nei au ia ’outou ’ei māramarama nō teie nei feiā. E ’oire i fa’ati’ahia i ni’a i te mou’a ra, e’ita ïa e mo’e.

« […] Inaha, e tūtu’i ānei te ta’ata nei i te lāmepa a tu’u ai i raro a’e i te fāri’i ? ’Aita, i ni’a rā i te vaira’a, ’ia māramarama tō te fare ato’a ra ;

« ’Oia ato’a tō ’outou māramarama, ’ia ’ana’ana ïa i mua i te ’aro o te ta’ata nei, ’ia hi’o rātou i tā ’outou ’ohipa maita’i, ’e ’ia ha’amaita’i i tō ’outou Metua i te ao ra ».

’Ua fa’auehia tātou ’ia fa’a’ite i tōna maramarama. Nō reira, ’a fa’a’ī noa i tā tātou lāmepa i te hinu no te faafariuraa ia Iesu Mesia ra, e ’ia ineine nō te tāpe’a i te reira ’ia vai noa ’e ’ia ’ama noa. ’E ’ia ’ama noa te reira māramarama. ’Ia ha’aparare ana’e tātou i tō tātou māramarama, e hōro’a tātou i te tāmarūra’a a Iesu Mesia ia vetahi ’ē, e hohonu atu tō tātou fa’afāriura’a iāna ra, ’e e nehenehe tātou e fa’aorahia noa atu ē, tē tīa’i nei tātou i te fa’aorara’a. ’E mai te peu e vaiiho noa tātou i tō tātou māramarama ’ia ’ana’ana, e nehenehe tātou e ’oa’oa noa atu ē, te tīa’i noa ra tātou.

E tauturu te hō’ē hi’ora’a nō roto mai i te mau pāpa’ira’a mo’a nō te ha’apāpū i te parau tumu ē, e nehenehe tātou e fa’aorahia mai te mea ē, e fāriu tātou i ni’a ia Iesu Mesia ’e e fāri’i tātou i te pūai nō ’ō mai iāna ra, noa atu ē, te tīa’i nei tātou i te fa’aorara’a.

’Ua fārerei te aposetolo Paulo i te hō’ē huru fifi, ’o tāna ïa i parau ē, mai te hō’ē « tātaramoa i roto i te tino », tāna i ani e toru taime i te Fatu ’ia tātara. ’E ’ua parau te Fatu ia Paulo, « Tō’u nei maita’i ’ātire ïa tā ʼoe : ʼei te paruparu e taʼa maitaʼi roa ai tō’u pūai ». Pāhono atura ’o Paulo:

« ’E teienei, e mea ’oa’oa ïa iā’u te ’ārue i tō’u nei paruparu ’ia vai māite te pūai ’о te Mesia i ni’a iā’u nei

«‚’E teienei, e mea ti’a iā’u te paruparu […] ’e te ahoaho i te Mesia nei : ’ia paruparu ho’i au га, tē pūai га ïa vau i reira ».

Tē fa’a’ite ra te hi’ora’a ’o Paulo ē, noa atu tō tātou paruparu, e nehenehe tō tātou pūai i roto ia Iesu Mesia e riro ’ei mea ti’a roa, ’oia ho’i, ’ei mea hope roa ’e ’ei mea ti’amā. Te mau ta’ata e aro nei i te mau tāmatara’a i te pae tino ’e e fāriu atu i ni’a i te Atua ma te fa’aro’o, mai ia Paulo, e nehenehe rātou e fāri’i i te mau ha’amaita’ira’a nō roto mai i te ’itera’a i te Atua.

’Aita Paulo i fa’aorahia i tōna ma’i, ’ua fa’aorahia rā ’oia i te pae vārua nā roto ia Iesu Mesia. Noa atu te mau fifi, ’ua ’ana’ana te māramarama o tōna fa’afāriura’a i ni’a ia Iesu Mesia ’e te pūai nō roto mai iāna, ’e ’ua ’oa’oa ’oia. I roto i tāna episetole i tō Philipi, ’ua parau oia, « E ’oa’oa i te Fatu, ’eiaha e fa’aea, e parau fa’ahou atu ā vau, e ’oa’oa outou ».

E te mau tuahine ’e te mau taea’e, te pāhonora’a ’oia ho’i e ’ē, e nehenehe tātou e fa’aorahia i te pae vārua noa atu ē, tē tīa’i ra tātou i te fa’aorara’a i te pae tino ’e i te pae ferurira’a. E ’ere noa te fa’aorara’a i te fa’aho’i-fa’ahou-ra’a mai i te pae tino ’e i te pae ferurira’a i roto i teie orara’a. E nōa’a mai te ’īra’a nā roto i te fa’aro’o ’e te fa’afāriura’a i ni’a ia Iesu Mesia, ’e te vaiihora’a i te māramarama o taua fa’afāriura’a ra ’ia ’ana’ana.

« E rave rahi ho’i tei parauhia, e iti rā [’o tē hina’aro ’ia] mā’itihia ».

E fa’aorahia te mau ta’ata ato’a i te pae tino ’e te pae ferurira’a i roto i te Ti’afa’ahoura’a. Terā rā e ma’iti ānei ’outou i teienei ’ia fa’aorahia i roto iāna ?

Tē fa’a’ite nei au, ma te ’oa’oa ē, ’ua fa’afāriuhia vau i te Fatu ’o Iesu Mesia. Tē tūtava nei au ’ia fa’aorahia vau i roto iāna. ’Ua pāpū iā’u ē, e fa’aho’i-fa’ahou-hia mai te mau mea ato’a, ’e e tae mai te fa’aorara’a, i Tōna ra taime, nō te mea te ora nei oia.

’O Maria Magedala te hō’ē vahine tei fa’aorahia e Iesu Mesia. ’E ’ua riro ’oia ’ei vahine fa’aorahia i roto ia Iesu Mesia ’Ei pipi nāna, ’ua pe’e ’oia i te Fa’aora nā roto ’ia Galirea ’e ’ua tāvini iāna.

Tei te ’āvae o te satauro ’oia ’ei ’ite nō tōna pohera’a.

’Ua haere atu ’oia i te mēnema nō te fa’aoti i te mau fa’aineinera’a nō te tanura’a ’e ’u ’ite atura ’oia ē, ’ua ’īritihia te ’ōfa’i tāpo’i, ’e ’ua mo’e te tino o te Fatu. Tei te mēnema ’o Maria, te ta’i noa ra ’oia a ui atu ai te mau melahi ’e te Fa’aora iho iāna, « E terā ra vahine, e aha ’oe i ’oto ai ? ’o vai tā ’oe e ’imi nā ? »

’Ua parau atu ’o Maria, « Nō tā’u Fatu i hōpoi-’ē-hia e rātou nei, ’e ’aore au i ’ite i te vaiihora’ahia e rātou ra ».

’E ’ua pi’i Iesu i tōna i’oa ma te aroha, « Maria ». ’E ’ua ’ite ’oia iāna ’e ’ua pāhono mai ma te fa’atura ē, « Rabbouni […] te Fatu ».

« ’E nāna e ha’amou roa i te pohe ’e a muri noa atu ; e nā te Fatu ra, nā Iehova, e horoi i te roimata i te mau mata ato’a ra ».

’Ua tāmāhia te roimata ’o Maria nā roto i tōna ti’afa’ahoura’a. Pāpū maita’i ē, e tāmā ato’a ’oia i tō ’outou.

’O Maria te ’ite mātāmua nō te Fa’aora tei ti’a fa’ahou mai. ’E ’o ’oia te ta’ata mātāmua i fa’a’ite ia vetahi ’ē i te mea tāna i ’ite.

Ma te ha’eha’a, tē ’apiti nei au i tō’u ’itera’a i tō Maria. ’Ua ti’afa’ahou ’oia. Tē ora nei Iesu Mesia. I te pae hope’a, e fa’aorahia tātou pā’āto’a i te pae tino ’e i te pae ferurira’a i roto iāna. ’E i roto i te tīa’ira’a i taua fa’aorara’a ra, nā te fa’aro’o i te Fatu fa’aora e fa’aora ia tātou i te pae vārua. I te i’oa o Iesu Mesia, ’āmene.