Elder Ozani Farias

’Ua riro te purera’a nō te mau fa’aotira’a fifi ’ei ’ohipa niu nō Elder Ozani Farias mai tōna ’āpīra’a mai ā. ’Ua pure Elder Farias i muri a’e i tōna fārereira’a i te mau misiōnare i te 15ra’a o tōna matahiti. ’Ua pure ’oia nō te misiōni rave tāmau, te ha’api’ira’a, te fa’aipoipora’a ’e te mau tōro’a ’ohipa.

’E noa atu ’aita te ’ē’a i pāpū maita’i, ’ua ’ite ’oia i te mea tāna e rave.

« ’O te Atua noa i mua », tāna ïa parau. « Tāvini iāna nā mua. ’Ua ’ite mātou i te mau ha’amaita’ira’a rarahi nō te ravera’a i te reira. »

’Aita a’enei te pe’era’a i te mau muhumuhu a te Vārua Maita’i i fa’ahahi ’ē iāna ’e tāna vahine, ’ua nā ’ō ’oia. « ’Ua ha’api’i au i te mana nō te heheura’a ta’ata hō’ē. Tē paraparau nei te Atua i tāna mau tamari’i. ’E e fa’anahora’a tā te Atua nō tātou. »

’Ua fānauhia Ozani Barboza Marques Farias i Recife, i Peretīria, i te 19 nō ’Ātopa 1969, nā Jose Osanã Farias ’e Severina Barbosa Marques. ’Ua tā’atihia ’oia ’e tāna vahine ’o Giovanna de Medeiros Prata Farias, i te hiero nō São Paulo (Peretīria), i te 18 nō Tēnuare 1994. E toru tamari’i tā rāua.

’Ua roa’a ia Elder Farias te parau ’aravihi tuatoru nō te nūmerara’a faufa’a i te fare ha’api’ira’a Catholic University of Pernambuco, te hō’ē parau tū’ite fāito toru nō te pae faufa’a i te fare ha’api’ira’a tuatoru ra University of Pernambuco ’e te hō’ē parau tū’ite Master nō te ’ohipa fa’aterera’a taiete a te Getulio Vargas Foundation. ’Ua rave ’oia i te ’ohipa nō te ’Ēkālesia i ni’a i te mau ti’ara’a ta’a ’ē, mai te ti’a fa’atere nō te pae faufa’a, te ti’a fa’atere nō te fa’aterera’a i te mau rave ’ohipa, ’e te hope’a roa e ti’a fa’atere nō te ’ohipa pae faufa’a o te ārea nō Peretīria.

Tē tāvini nei Elder Farias ’ei peresideni misiōni nō te misiōni nō Atlanta (Georgia, Marite). ’Ua tāvini ato’a ’oia ’ei tauturu i roto i te peresidenira’a titi, ’ei pāpa’i parau titi, ’ei melo ’āpo’ora’a teitei, ’ei ’episekōpo, ’ei tauturu i roto i te ’episekōpora’a ’e ’ei ’orometua Paraimere.