Mau ha’amaita’ira’a mono

Nā roto i tō’u tāvinira’a i roto i te ’Ēpisekōpora’a fa’aterera’a rahi, ’ua fāna’o vau i te fārereira’a i te feiā mo’a nō te mau mahana hope’a nei ’ati a’e te ao nei i roto i te mau vāhi ’e te mau ta’ere rau. ’Ua fa’auru-tāmau-hia vau e tō ’outou fa’aro’o ’aueue ’ore ’e tō ’outou paieti i te Fatu ’o Iesu Mesia. Terā rā, ’ua putapū ato’a vau i te mau huru orara’a huru rau ’e te fifi ’o tā te rahira’a o ’outou e fa’aruru nei—te ma’i, te hepohepo, te ’erera’a i te moni, te ’erera’a i te fa’aipoipora’a ’e ’aore rā te ha’api’ira’a, te hāmani-’ino-ra’a a vetahi ’ē, ’e te tahi atu mau tā’ōti’ara’a ’e ’aore rā mau ha’afifira’a. I te tahi mau taime, mai te huru ra ē, e nehenehe teie mau tāmatara’a e fa’ataime i tō ’outou haerera’a i mua ’e e tāmata i tā ’outou mau tauto’ora’a pāpū nō te ora hope roa i te ’evanelia, ma te ha’afifi i te tāvinira’a, te ha’amorira’a, ’e te ravera’a i te mau hopoi’a mo’a.

E tō’u mau hoa here, mai te mea tē ’ite ra ’outou ē, ’ua tā’ōti’ahia ’outou e ’aore rā ’ua fifihia ’outou nā roto i te mau huru o tō ’outou orara’a, tē hina’aro nei au ’ia ’ite ’outou i teie : Tē here nei te Fatu ia ’outou iho. ’Ua ’ite ’oia i tō ’outou huru, ’e e vai matara noa te ’ūputa o tōna mau ha’amaita’ira’a, noa atu te mau fifi tā ’outou e fa’aruru nei.

’Ua ha’api’i mai au i teie parau mau nā roto i te hō’ē ’ohipa i tupu i ni’a iā’u iho, noa atu ē, e ’ere i te mea rahi roa, ’ua vaiiho mai rā i te hō’ē mana’o pāpū i ni’a iā’u. I te piti-’ahuru-ma-piti-ra’a tō’u matahiti, ’a tāvini ai au i roto i te nu’u manu reva Farāni i Paris, ’ua ’oa’oa roa vau i te ’itera’a ē, e paraparau ’o Neal A. Maxwell, te hō’ē ’āpōsetolo a te Fatu, i roto i te hō’ē ’āmuira’a i ni’a i te mau Champs-Élysées. Teie rā, nā mua noa a’e i te tupura’a te reira, ’ua fa’ari’i au i te hō’ē tītaura’a ’ia fa’ahoro i te hō’ē ti’a fa’atere teitei i te taime mau e tupu te ’āmuira’a.

’Ua ’ino’ino roa vau. Ma te hina’aro pāpū rā ’ia haere i te reira ’āmuira’a, ’ua fa’ahoro vau i te ti’a fa’atere ’e ’ua tere ’oi’oi au i te ’āmuira’a. I muri a’e i tō’u ’itera’a i te hō’ē vāhi tāpe’ara’a pere’o’o, ’ua horo vau nā ni’a i te Champs-Élysées nō te haere atu i te vāhi putuputura’a ’e ’ua tae atu vau ma te rohirohi e pae minuti noa toe e fa’aoti ai te ’āmuira’a. I te taime mau ’a tomo ai au i roto, ’ua fa’aro’o vau ia Elder Maxwell i te paraura’a, « I teienei, e hōro’a atu vau ia ’outou i te hō’ē ha’amaita’ira’a ’āpōsetolo ». I taua taime ra, ’ua fāna’o vau i te hō’ē ’ohipa pae vārua nehenehe ’e tē ’ore e mo’e. ’Ua teimaha roa vau i te Vārua, ’e mai te mea ra ē, ’ua tomo roa te mau parau ha’amaita’ira’a i roto i te mau uaua ato’a ’o tō’u vairua, mai te huru ra ē, ’ua parauhia mai te reira nō’u ana’e.

’Ua riro te mea tā’u i ’ite i taua mahana ra ’ei fa’a’itera’a na’ina’i, te pūai rā nō te hō’ē tuha’a tāmāhanahanara’a o te ’ōpuara’a a te Atua nō tāna mau tamari’i : ’Ia tāpe’a ana’e te mau huru ’ohipa i rāpae ia tātou ’ia fa’atere ia tātou ’ia fa’atupu i te mau hina’aro parauti’a o tō tātou ’ā’au, e fa’autu’a te Fatu ia tātou nā roto i te mau rāve’a ’o tē fa’ati’a ia tātou ’ia fa’ari’i i tāna mau ha’amaita’ira’a i fafauhia.

’Ua fa’atumuhia teie parau mau tāmāhanahana i ni’a e toru parau tumu rahi i roto i te ’evanelia a Iesu Mesia i fa’aho’i-fa’ahou-hia mai :

1. ’Ua here hope roa te Atua ia tātou tāta’itahi. « ’Ua ani ’oia ia [tātou] ato’a ’ia haere mai iāna ra ’e ’ia fa’ari’i i tōna maita’i’ ». Tē hōro’a nei tāna ’ōpuara’a nō te fa’aorara’a i te mau ta’ata ato’a, ma te ta’a ’ē ’ore, i te rāve’a nō te fa’ari’i i te mau ha’amaita’ira’a o te fa’aorara’a ’e te fa’ateiteira’a, i te hō’ē mahana.

2. Nō te mea ho’i ē, e mea parauti’a ’e e mea aroha te Atua, ’e e mea ti’a roa tāna ’ōpuara’a, e’ita ’oia e fa’autu’a ia tātou nō te mau mea ’o tā tātou e ’ore e nehenehe e arai. ’Ua fa’ata’a ’o Elder Neal A. Maxwell ē, « ’E hi’opo’a te Atua […] ma te aroha ’eiaha i tō tātou noa mau hina’aro ’e tā tātou mau ’ohipa i ravehia, te mau fāito ato’a rā o te fifi tā tō tātou mau huru orara’a e tu’u mai i ni’a ia tātou ».

3. Nā roto ia Iesu Mesia ’e tāna tāra’ehara, e ’itehia ia tātou te pūai nō te fa’a’oroma’i ’e i te pae hope’a nō te upo’oti’a i ni’a i te mau tāmatara’a ato’a o te orara’a. Mai tā Alama i ha’api’i mai, ’ua rave te Fa’aora i ni’a iāna iho ’eiaha te hara noa a tei tātarahapa, ’ua rave ato’a rā ’oia i te « māuiui ’e te mau ma’i o tāna mau ta’ata » ’e « tō rātou paruparu ». Nō reira, ta’a ’ē noa atu i te fa’aorara’a ia tātou i tā tātou mau hape, tē pāturu nei te aroha o te Fatu ia tātou i roto i te mau parauti’a ’ore, te mau hape, ’e te mau ’ōti’a tei fa’atupuhia e tō tātou mau ’ohipa tāhuti nei.

Tē vai ra te tahi mau tītaura’a nō te fa’ari’i i teie mau ha’amaita’ira’a mono. Tē ani mai nei te Fatu ’ia tātou ’ia rave ē « hope noa atu tō tātou itoito ato’a » ’e ’a « pupu mai ai i tō [tātou] ’ā’au ato’a ’ei ō nāna ». E tītau te reira i te hō’ē hina’aro hōhonu, te hō’ē ’ā’au ha’avare ’ore ’e te ha’apa’o maita’i, ’e tō tātou itoito rahi nō te ha’apa’o i tāna mau fa’auera’a ’e nō te fa’aau i tō tātou hina’aro i tōna hina’aro.

’Ia ’ore ana’e tā tātou mau tūtavara’a itoito e fa’atupu i tō tātou mau hina’aro, nō te mau huru ’ohipa e ’ore e ti’a ia tātou ’ia arai, e fa’ari’i te Fatu i te mau hina’aro o tō tātou ’ā’au ’ei ō ti’a. ’Ua ha’api’i mai te peresideni Dallin H. Oaks ē s: « E ha’amaita’ihia tātou nō te mau hina’aro parauti’a o tō tātou ’ā’au, noa atu ē, ’ua tāpe’a te tahi mau ’ohipa nō rāpae ia tātou ’ia fa’atupu i te reira ».

’A ha’ape’ape’a ai te peropheta Iosepha Semita nō tōna taea’e ’o Alvin tei pohe ma te ’ore e fa’ari’i i te mau ’ōro’a faufa’a roa o te ’evanelia, ’ua fa’ari’i ’oia i teie heheura’a tāmāhanahana : « ’O rātou ato’a ’o tē pohe mai teie atu taime ma te ’ite ’ore i te reira, ’o tei ti’a rā ’ia fa’ari’i i te reira ma tō rātou ’ā’au ato’a, e riro ïa rātou ’ei feiā ’āi’a nō [te bāsileia tiretiera o te Atua] ». E ’ua parau fa’ahou te Fatu, « nō te mea nā’u, nā te Fatu, e ha’avā i te mau ta’ata ato’a mai te au i tā rātou ra mau ’ohipa, ’e mai te au ho’i i te hina’aro ’o tō rātou ra mau ’ā’au ».

Te mea faufa’a roa a’e nō te Fatu, e ’ere ïa te ’ite-noa-ra’a ē, e nehenehetā tātou ]e rave], ’o te ’itera’a rā ē, e hina’aro ānei tātou ’ia rave i te mau mea ato’a tā tātou e nehenehe e rave nō te pe’e iāna ’ei Fa’aora nō tātou.

I te hō’ē mahana, ’ua tāmāhanahana te hō’ē hoa i te hō’ē misiōnare ’āpī ’o tē ’oto ra nō tōna matara-’oi’oi-ra’a, nō te tahi mau fifi ïa i te pae nō te ea, noa atu tāna mau pure ’ā’au tae ’e tōna hina’aro rahi e tāvini. ’Ua fa’ahiti teie hoa i te hō’ē ’īrava i reira tō te Fatu paraura’a ē, « haere ana’e tāna mau tamari’i « ma tō rātou pūai ato’a » ’e « ’ia ’ore ho’i ’ia fa’aea i tō rātou itoito » nō te rave i tāna mau fa’auera’a, « e e tāpe’a tō rātou mau ’enemi [’o tē nehenehe e riro te mau mea ’ino i roto i tō tātou orara’a] ia rātou ’ia rave i taua ’ohipa ra, inaha, ’ua ti’a ïa iā’u nei ’ia ’ore ’ia tītau fa’ahou i taua ’ohipa ra i te rima o taua mau ta’ata ra, ’ia fa’ari’i rā ho’i i tō rātou mau ō ».

’Ua fa’a’ite pāpū tō’u hoa i taua taure’are’a ra ē, ’ua ’ite te Atua ē, ’ua rave ’oia ma te maita’i roa nō te pāhono i te pi’ira’a ’ia tāvini. ’Ua ha’apāpū ’oia iāna ē, ’ua fa’ari’i te Fatu i tāna ō ’e e’ita te mau ha’amaita’ira’a i fafauhia i te mau misiōnare ha’apa’o maita’i ato’a e tāpe’ahia.

I roto e rave rahi tupura’a, e noa’a mai te mau ha’amaita’ira’a a te Fatu nā roto mai i te hamani maita’i ’e te tāvinira’a a te mau ta’ata ’o tē tauturu ia tātou ’ia rave i te mea e’ita tā tātou e nehenehe e rave ’o tātou ana’e. Tē ha’amana’o nei au i te hō’ē taime, ’a ora ai māua i te ātea roa i te hō’ē o tā māua mau tamāhine i Farāni, ’ua mana’o māua ē, ’aita tō māua e mana nō te tauturu iāna i muri a’e i te hō’ē fānaura’a fifi. I taua noa hepetoma ato’a ra, ’ua ani tō mātou pāroita i Utaha i te tauturu nō te hō’ē metua vahine ’o tei fānau noa mai ra i te maeha’a. ’Ua fa’a’ite tā’u vahine ’o Valérie i tōna hina’aro ’ia ’āfa’i i te mā’a nāna, ma te pure i roto i tōna ’ā’au nō teie metua vahine ’āpī ’e nō tā māua tamāhine e tītau ato’a ra i te tauturu. I muri noa a’e, ’ua ’ite a’era māua ē, ’ua fa’anaho te mau tuahine i roto i te pāroita a tā māua tamāhine i Farāni nō te hōro’a i te mā’a nō tōna ’utuāfare. ’Ua pāhono mai te Atua i tā māua mau pure, nā roto i te tonora’a mai i tāna mau melahi nō te tamahanahana, i te taime ho’i ’a ’ore ai e ti’a ia māua ’ia rave i te reira.

’Ia fa’aruru ana’e tātou i te mau tā’oti’ara’a ’e te mau fifi, ’a fa’ari’i na tātou i tō tātou iho mau ha’amaita’ira’a—tā tātou mau ō, mau rāve’a ,’e te taime—’e ’ia fa’a’ohipa i te reira nō te tāvini i te feiā e hina’aro ra i te tauturu. Nā roto i te reira, ’e’ita tātou e tauturu noa i te tahi atu mau ta’ata, e fa’aitoito ato’a rā tātou i te parau nō te fa’aorara’a ’e te monora’a i roto i tō tātou orara’a.

Te hō’ē o te mau rāve’a pūai roa a’e e nehenehe tā tātou e hōro’a i te mau ha’amaita’ira’a a te Atua, ’o te ’ohipa mono ïa tā tātou e rave nō tō tātou mau tupuna i roto i te fare o te Fatu. Nā roto i te ravera’a i te mau ’ōro’a nō rātou, e ’āmui atu tātou ma te itoito i roto i te ’ohipa rahi a te Fatu nō te fa’aorara’a, ma te fa’a’ohipa i tā tātou mau hōro’ara’a ’e tō tātou mau ’aravihi nō te hōro’a i te mau ha’amaita’ira’a i te mau ta’ata ’o tei ’ore i fa’ari’i i te reira i roto i tō rātou orara’a tāhuti.

Te tāvinira’a here tā tātou e hōro’a nei i roto i te mau hiero mo’a, tē fa’aha’amana’o mai nei te reira ia tātou ē, tē tāmau noa ra te aroha o te Fa’aora i muri a’e i teie orara’a. I roto i te orara’a a muri a’e, e nehenehe tā tātou e fa’ari’i i te mau rāve’a ’āpī nō te rave i te mea tā tātou i ’ore i nehenehe e rave i roto i teie orara’a tāhuti. ’Ua parau te peresideni Lorenzo Snow ma te here i te mau tuahine ’o tei ’ore ā i ’itehia te hō’ē hoa mure ’ore ē, « ’Aita hō’ē a’e feiā mo’a i te mau mahana hope’a nei ’o tē pohe i muri a’e i tōna orara’a ha’apa’o maita’i ’o tē ’ere i te hō’ē mea nō te mea ’aita ’oia i rave i te tahi mau mea ’ia ’ore te rāve’a ia hōro’ahia mai […] E fa’ari’i rātou i te mau ha’amaita’ira’a ato’a, te fa’ateiteira’a, ’e te hanahana ato’a tā te mau tāne e ’aore ra, te mau vahine ato’a ’o tei fāna’o i teie rāve’a e nehenehe e fa’ari’i ».

Tē fa’ataehia nei teie poro’i nō te tīa’ira’a ’e te tāmāhanahanara’a ia tātou pā’āto’a, tātou te mau tamari’i a te Atua. E’ita tā te hō’ē o tātou e nehenehe e ’ape i te mau fifi ’e te mau ’ōti’a o te tāhuti nei. E nehenehe e parau ē, ’ua fānauhia tātou pā’āto’a ma te ’ore e nehenehe e fa’aora ia tātou iho. Noa atu rā i te reira, e Fa’aora here tō tātou ’e « ’ua ’ite ho’i tātou ē, nā roto i [tōna] aroha e ora ai tātou, hope noa atu te mau mea ato’a tā tātou e nehenehe e rave ».

Tē fa’a’ite pāpū nei au ē, noa atu e rave rahi mau huru ’ohipa i roto i te orara’a e ’ore e ti’a ia tātou ’ia arai, ’aita hō’ē a’e ’o tātou e ’ore e nehenehe e fa’ari’i i te mau ha’amaita’ira’a mure ’ore a te Fatu. Nā roto i tāna tusia tāra’ehara, e mono te Fa’aora i te mau fifi ’e te parauti’a ’ore ato’a mai te mea e pūpū tātou i tō tātou vairua tā’āto’a iāna. I te i’oa o Iesu Mesia, ’āmene.