Elder Steven C. Barlow

Hō’ē o te mau ’ohipa pūai roa a’e tā Elder Steven C. Barlow i fa’ari’i nā roto i te Vārua Maita’i, ’o te « mana’o tapitapi ’ore roa ïa nō te ra’i mai ē, tītauhia [iāna] ’ia fa’aipoipo ia Christina Evans. » ’Ua fa’aipoipohia rāua i te hiero nō Roto Miti i te matahiti 1991 ’e e pae tamari’i tā rāua.

’Ua tāvini Elder ’e te tuahine Barlow ’ei feiā fa’atere misiōni i te Fenua Ētuatōria mai te matahiti 2017 ē tae atu i te matahiti 2020, i te ha’amatara’a te pararera’a ma’i pe’e COVID-19. I taua taime ra, e rave rahi misiōnare tei ho’i i te fare, ’e ’ua tauihia te tonora’a a vetahi ’ia haere mai i te misiōni a Barlow mā. ’Ua ’ite Elder ’e te tuahine Barlow i te rima o te Fatu i te fa’aterera’a i teie mau tauto’ora’a misiōnare.

« ’Ua tu’u māua i tō māua ti’aturira’a i ni’a i te Fatu », tē ha’amana’o ra ’oia. « E mau taime ’aita māua i ’ite e aha tē tupu ananahi. ’Ua fa’atano māua ’e ’ua vai ineine noa. ’Ua pure rahi ato’a, ’e ’ua tere noa te mau mea. »

’Ua ha’apāpū teie ’ohipa i te mau ha’api’ira’a tei ha’api’ihia iāna nā mua atu, ’oia ho’i nā te Fatu e fa’atere ’e e nehenehe tātou e ti’aturi iāna i te mau taime ato’a.

’Ua fa’ari’i Elder Barlow i te parau ’aravihi tuatoru nō te ha’api’ira’a ea i te fare ha’api’ira’a tuatoru ra University of Utah i te matahiti 1993. ’Ua ’ohipa ’oia ’ei ta’ata ti’ara’a nō te hi’opo’ara’a putura’a ’ā ’e te ha’amaita’ira’a i te pae nō te ea. I te taime ’a pi’ihia ai ’oia, tē tāvini ra Elder Barlow ’ei Hitu ’Ahuru ārea i roto i te ārea nō Utah.

’Ua fānauhia Steven Chad Barlow i Bountiful, i Utah, i te 1 nō Tēnuare 1969, nā Jon Kay Barlow ’e Becky Christensen Barlow. ’Ua « pa’ari ’oia i pīha’i iho i nā metua fa’ahiahia ’e te paieti ’e te ha’apa’o maita’i », tei ha’api’i iāna i te ’evanelia mai tōna ’āpīra’a mai ā.