Elder Eduardo F. Ortega

I te roara’a o tāna mau matahiti tāvinira’a i roto i te ’Ēkālesia, ’ua ’apo mai ’o Elder Eduardo F. Ortega i te hō’ē ha’api’ira’a faufa’a rahi. I roto i te mau huru pi’ira’a ato’a, ’ei ’episekōpo ānei ’aore rā ’ei taea’e aupuru, nā te ’itera’a ē tē ti’a ra ’oe nō te Fatu e fa’a’ōhie a’e i terā pi’ira’a.

« Mai te mea e feruri tātou e nāhea ’oia ’āhani ’o ’oia terā, e mea ’ōhie a’e ïa », tāna i parau ma te fa’ahiti i te Iakoba 5:71–72 i roto i te Buka a Moromona. « ’Ua ’ite au i te Fatu i te tāvinira’a i pīha’i iho iā’u e rave rahi taime i roto i te mau pi’ira’a e rave rahi nō te mea nāna teie ’ō vine, e ’ere nā tātou. »

’Ua fānauhia Eduardo Franciso Ortega i Godoy Cruz, i Mendoza, i Rāparata, i te 10 nō Tiurai 1977, nā Fernando Daniela Ortega ’e Irma Elvira Endstorfer. ’Ua fa’aipoipo ’oia ia Gabriela Alejandra Cappi Franzia i te hiero nō Montevideo (Urutue), i te 13 nō Tetepa 2002. E pae tamari’i tā rāua ’e tē ora ra rātou i Mexico City (Mēhiko) i te taime o tōna pi’ira’a.

’Ua roa’a ia Elder Ortega te parau ’aravihi tuatoru nō te nino’a fare i te fare ha’api’ira’a tuatoru ra John F. Kennedy University, i Rāparata, i te matahiti 2008, ’e te hō’ē parau tū’ite Master i te fare ha’api’ira’a tuatoru ra University of Belgrano i te matahiti 2016. I te matahiti 2017, ’ua fa’ari’i ’oia i te hō’ē parau tū’ite nō te fa’aterera’a i te fare ha’api’ira’a Harvard Business School. ’Ua rave ’oia i te ’ohipa fa’atere ’ohipa patura’a, nō te taiete SBA Company nā mua ’e i muri iho nō te taiete Argentine branch of Village Roadshow Entertainment Group. I riro mai ’oia ’ei upo’o fa’atere i te pae nō te faufa’a mara’a ’ore a te taiete American Express Company i te matahiti 2014, ’ei mero nō te ’āpo’ora’a fa’atere a te Arch Royale Projects Ltd. i te matahiti 2023, ’e ’ei mero nō te ’āpo’ora’a fa’atere a CorNet Global i te matahiti 2024.

I te taime o tōna pi’ira’a, tē tāvini ra ’oia ’ei Hitu ’Ahuru āre’a. ’Ua tāvini ato’a ’oia ’ei tauturu i roto i te peresidenira’a titi, ’ei ’episekōpo, ’ei tauturu i roto i te ’episekōpora’a, ’ei peresideni pupu peresibutero, ’ei ti’a nō te pupu tahu’a rahi ’e ’ei misiōnare rave tāmau i roto i te misiōni nō Cali (Toromepia).