Taea’e Sean R. Dixon

Nō te mau reo e rave rahi e ’ume’ume nei ’ia tāu’a mai te feiā ’āpī, tē tīa’i nei te taea’e Sean R. Dixon e hi’o te feiā ’āpī i te mau peropheta ’e te mau ’āpōsetolo nō teie ’anotau, ma te ti’aturi atu ’e ma te pe’e i tā rātou arata’ira’a.

« E arata’i rātou i te feiā ’āpī ia Iesu Mesia ra », ’ua parau ’oia. « E ’ere te peropheta [peresideni Russell M. Nelson] te fā hope’a ; ’o te Fa’aora rā. Tē fāriu mau nei rā te peropheta i te Fa’aora, ’e mai te mea e pe’e rātou iāna, e ineine mai rātou nō te mau mea tā rātou e fa’aruru atu i roto i te orara’a. »

’Ua fānauhia Sean Romney Dixon i te 5 nō Mē 1970, i Provo, i Utah, e tamaiti nā Donald Romney Dixon ’e Diane Scott O Dixon. ’Ua tāvini ’oia i te hō’ē misiōni rave tāmau i roto i te misiōni nō Toronto (Tanata). ’Ua fa’aoipoipo ’oia ia M’Shelle Lundquist i te 14 nō Mē 1992, i te hiero nō Roto Miti (Utah, Marite). E metua rāua nō e pae tamari’i.

’Ua fa’ari’i te taea’e Dixon i te parau ’aravihi tuatoru nō te ihi ’utuāfare i te fare ha’api’ira’a tuatoru ra Brigham Young University ’e i te hō’ē parau tū’ite Master nō te ha’api’ira’a i te fare ha’api’ira’a tuatoru ra University of Phoenix. ’Ua rave ’oia i te ’ohipa i roto i te mau fa’auera’a ’ohipa rau nō te Séminaire ’e te Institut e 30 matahiti te maoro, i teienei e upo’o fa’atere nō te Institut nō Utah Apato’a, e ha’apa’o i te institut mai Orem ē tae atu i St. George. Nā mua atu, e ’orometua ha’api’i nō te séminaire ’oia i te mata’eina’a nō Utah ’e ’ei upo’o fa’atere nō te Institut nō Utah Valley.

I te taime ’a pi’ihia ai ’oia, tē tāvini ra te taea’e Dixon ’ei peresideni nō te titi nō Fork Utah East Stake. E peresideni misiōni tahito ’oia nō te misiōni nō Redlands (California), e tauturu i roto i te peresidenira’a titi, e ’episekōpo, e tauturu i roto i te ’episekōpora’a, ’e e peresideni Feiā ’Āpī Tamāroa nō te pāroita.