Onyankopɔn Nkɔmhyɛfoɔ

Mmabunu adɔfoɔ, nhyiamu fɛfɛɛfɛ bɛn na yɛreyɛ yi! Yɛadikan atie Yesu Kristo Asomafoɔ ateasefoɔ baasa. Nhyira nwanwasoɔ bɛn nie! Na yɛbɛsan atie baako nso, Titenani Henry B. Eyring. Honhom mu apontoɔ no retoa so!

Berɛ a mekasaaɛ afe a ɛtwaam no, yɛsuaa sɛdeɛ yɛbɛgyina wiase yi ano ɛnam suahunu a Dawid nyaaɛ wɔ Goliat ho no so. Wo kae aboɔ num no? Ɛnnɛ, merekyɛ Apam Dada mu asɛm bi a mekenkanee wɔ wo mfeɛ mu, a ɛmaa mepɛɛ sɛ meyɛ sɛ ne mu ɔkannifoɔ. Twerɛ Kronkron nka ne din nkyerɛ yɛn, ɛnti yɛbɛfrɛ no Sunem baa efiri sɛ yei ne ne kurom din.

Da bi, na nkɔmhyɛni Elisa retwam wɔ Sunem, na yɛkenkan sɛ “ɔbaa kɛseɛ bi wɔ hɔ, na [ɔtoo nsa frɛɛ] no sɛ ɔmmɛ didi Na saa na ɛbaaɛ, sɛ mpɛn dodoɔ a ɔtwaam no, ɔdanee ne ho … kɔdi paanoo.” Mesusu sɛ nkɔmhyɛni Elisa ani gyee sɛ wɔfrɛɛ no sɛ ɔmmɛdidi wɔ ne fie no ho paa! Na wakɔ mpɛn pii dada, na da bi ɔbaa no ka kyerɛɛ ne kunu sɛ, “Afei, mahunu sɛ yei yɛ Onyame nipa kronkroni.”

Ɔbaa no se, “Afei, mahunu.” Ayɛ sɛ ɔtoo nsa frɛɛ Elisa baa ne fie a na onnim sɛ ɔyɛ nkɔmhyɛni no; ɔnam Sunsum Kronkron no so nyaa n’adansedie nam asotie ma deɛ Elisa kaa na ɔkyerɛkyerɛeɛ no yie so. (Kae sɛ, na mfonini biara nni hɔ saa berɛ no! Enti na ɛyɛ den sɛ wobɛhunu nkɔmhyɛni no wɔ n’anim kɛkɛ.)

Nanso abasɛm yi ankɔ awieeɛ wɔ hɔ. Da bi, ɔbaa no ka kyerɛɛ ne kunu sɛ, “Momma yɛnyɛ dan ketewa bi na yɛmfa mpa ne pono, ne nkonwa ne kaneadua nsi hɔ mma no: na sɛ ɔba yɛn nkyɛn a, ɔbɛdane aba.”

Na ɔbaa nokwafoɔ yi wɔ ɔpɛ sɛ obɛsi dan wɔ ne fie sɛdeɛ ɛbɛyɛ a nkɔmhyɛni no, berɛ a ɔretwam wɔ kurow no mu no, anya baabi a ɔbɛtena!

Ɛnnɛ, yɛbɛtumi asua asuadeɛ kɛseɛ afiri suahunu yi mu.

Awurade dii adanseɛ kyerɛɛ Sunemni baa no sɛ Elisha yɛ Onyankopɔn nkɔmhyɛni, na ɔyɛɛ adeɛ ɛnam ne fie a obuee mu gyee no no so.

Yɛn nso yɛbɛtumi anya yɛn ankasa adansedie afa Onyankopɔn nkɔmhyɛni ho nnɛ na yɛabue yɛn akoma ne yɛn adwene—yɛn fie—ama nkrasɛm a yɛn Soro Agya de ama yɛn wɔ saa nna a ɛdi akyire yi mu.

Mmabunu adɔfoɔ, meto nsa frɛ mo sɛ bisa wo ho asɛm yi: So mewɔ Onyankopɔn nkɔmhyɛni teasefoɔ no ho adansedie ankasa?

Yɛnhyɛ aseɛ mfiri mfitiaseɛ.

Deɛn ne nkɔmhyɛni? Nkɔmhyɛni yɛ onipa a wafrɛ no na ɔkasa ma Onyankopɔn. Nkɔmhyɛfoɔ wɔ asase so nnɛ sɛdeɛ na ɛteɛ wɔ tete berɛ mu.

Nkɔmhyɛfoɔ yɛ adehunufoɔ ne adiyifoɔ. Ɛno kyerɛ sɛ wɔbɛtumi ahunu deɛ afoforɔ ntumi nhunu, na wɔbɛtumi ahyɛ daakye nsɛm a ɛbɛsisi ho nkɔm. Wɔbɛtumi nso asiesie yɛn ama amanehunu. Nkɔmhyɛfoɔ nya mmaransɛm ne adiyisɛm firi Awurade hɔ. Ɛyɛ Gyedikasɛm a ɛtɔ so nkron no ka adiyisɛm a ɛkɔ so wɔ nna a ɛtwa toɔ yi ho asɛm. Ɛka sɛ “Yɛgye biribiara a Onyankopɔn ada no adi akyerɛ di, nea ɔda so seesei da no adi kyerɛ nyinaa, na yɛgye di sɛ ɔbɛkɔ so ada nnoɔma akɛseɛ a ɛho hia yie adi a ɛfa Onyankopɔn ahemman no ho.”

Elder Gary E. Stevenson kaa sɛ, “Awurade kɔ so da Ne mmarasɛm ne ne pɛ adi kyerɛ Ne nkɔmhyɛfoɔ nnɛ ɛfiri sɛ Ɔpɛ sɛ ɔdi yɛn anim kɔ anigyeɛ mu wɔ saa abrabɔ yi mu ne ɔsoro animuonyam mu wɔ abrabɔ a ɛdi hɔ no mu.”

Nkɔmhyɛfoɔ nso bɔ asɛmpa no dawuro na wɔyɛ Onyankopɔn akyerɛkyerɛfoɔ ne asomafoɔ ma obiara a ɔwɔ asase so.

Obiara a ɔka Atitenafoɔ a Wɔdi Kan no ne Asomafoɔ Dummienu Kuo no ho yɛ nkɔmhyɛni, anisoadehunufoɔ, ne odiyifoɔ. Wɔsom sɛ agyinatukuo wɔ Awurade akwankyerɛ ase, wɔwɔ tumi sɛ wɔbɛpae mu aka na wɔakyerɛ nkyerɛkyerɛ ase na wɔde nhyehyɛeɛ asi hɔ ama N’Asɔre. Wɔde ahwɛyie bɔ mpaeɛ na wɔsusu ho, ɛfiri sɛ ɛsɛ sɛ saa akuo yi gyinaesie yɛ baako. Wɔ saa kwan yi so, Awurade ma yɛn awerɛhyem sɛ N’apɛdeɛ bɛyɛ hɔ.

Nkɔmhyɛfoɔ di Kristo ho adanseɛ—sɛ Ɔte ase, Ne som adwuma, ne Ne kronkronyɛ.

Yɛnkenkan nkɔmhyɛfoɔ adanseɛ binom mfiri Mormon Nwoma no mu.

Abinadi kaa sɛ:

Abinadi kaa sɛ: “Onyankopɔn no ara bɛsan aba nnipa mma mu, na wadi ama ne nkorɔfoɔ.

Na esiane sɛ ɔte honam mu nti wɔbɛfrɛ no Onyankopɔn Ba.”

Samuel Lamanni no nso dii adanseɛ sɛ Yesu Kristo yɛ “Onyankopɔn Ba, ɔsoro ne asase Agya, adeɛ nyinaa Bɔfoɔ firi mfitiaseɛ.”

Na nkɔmhyɛni Moroni kaa sɛ, “Mahunu Yesu, na ɔne me akasa anim ne anim.”

Berɛ a Kristo kɔsraa Nephifoɔ no, adeɛ baako a ɔdii kan yɛeɛ ne sɛ ɔfrɛɛ Asomafoɔ Dummienu. Na Ɔka kyerɛɛ nkorɔfoɔ no sɛ, “nhyira ne mo sɛ motie dummienu yi a mapaw wɔn no nsɛm.”

Afei, ma menka nsɛm kakra mma awofoɔ anaa abusuafoɔ a wɔretete mma. Awurade ankasa kyerɛkyerɛɛ Adam ne Hawa nkwagyeɛ mu nokorɛ. Na afei Ɔsee wɔn sɛ, “Mede ahyɛdeɛ bi ma mo monkyerɛkyerɛ no kwa nkyerɛ mo mma.”

Monkyerɛkyerɛ no kwa, ɛkyerɛ sɛn? Ɛyɛ asɛmpa no mu nokorɛ ahodoɔ a yɛbɛsua, adi ankasa adanseɛ, na yɛakyɛ saa nimdeɛ no akyerɛ yɛn mma. Ɛbɛboa adekyerɛ akwanya ahodoɔ wɔ fie ne sukuu. Ɛyɛ sɛ yɛde saa nimdeɛ ne adanseɛ no rebɔbra.

Mormon Nwoma no kasa fa 2,060 akofoɔ ahoɔdenfoɔ bi ho sɛ “na wɔyɛ mmarima a nokorɛdie ahyɛ wɔn ma na wɔdwoɔ, ɛfiri sɛ wɔakyerɛkyerɛ wɔn sɛ wɔnni Onyankopɔn mmaransɛm so na wɔnante teneneeyɛ mu wɔ n’anim.” Saa mmeranteɛ yi de nokorɛdie tiee Helaman, a saa berɛ no na ɔyɛ wɔn asraafoɔ kannifoɔ ne wɔn nkɔmhyɛni nso, na wɔhunuu sɛ wɔn maamenom de nokorɛ ne gyidie ahyɛ wɔn akoma ma.

Awofoɔ, wɔ wiase a ɛnne bebree na ɛtɔ da bi a esum bebree wɔ mu yi mu no, Onyankopɔn ankasa ahyɛ yɛn sɛ yɛntete yɛn mma wɔ Ɛhan ne nokorɛ mu. Ɔde asɛdeɛ hyɛɛ yɛn nsa sɛ yɛmfa asɛmpa no mu nokorɛ a ɛma nkwagyeɛ nkyerɛkyerɛ yɛn mma. Sɛ yɛantumi anyɛ saa a, wiase no renyɛ da.

Nnamfoɔ nkumaa adɔfoɔ, mewɔ nsatoɔ bi ma mo: Anadwo yi, ansa na mobɛda no, meto nsa frɛ mo sɛ monkoto, mmue mo akoma mu, na momfa gyidie mmɔ mpae nkyerɛ Ɔsoro Agya nsrɛ No sɛ ɔnsi so dua nkyerɛ mo sɛ n’afotufoɔ a wɔwɔ Atitenafoɔ a Wɔdi Kan no mu, ne Asomafoɔ Dummienu Kuo no mufoɔ yɛ Yesu Kristo nne wɔ asase so nnɛ.

Shunem baa no kyerɛkyerɛɛ yɛn sɛ yɛbɛtumi anya saa adanseɛ no nam Sunsum Kronkron no so. Mehyɛ wo bɔ sɛ sɛ yɛ hunu sɛ wɔyɛ wɔn a Onyankopɔn asra wɔn a, yɛn asetena bɛyɛ mmerɛ ɛmfa ho ne akwansideɛ a ɛrekɔ so no sɛdeɛ yɛde ahotɔsoɔ, gyidie ne anidasoɔ bɛtie wɔn nne no. Sɛ yɛbɛtie na yɛadi so nkɔmhyɛni no nne yɛ ahiadeɛ ma adepa nyinaa kɔsi yɛn Agyenkwa no Mmaeɛ a Ɛtɔso Mmienu.

Wiase amumuyɛ renya nkɔanim, nanso Yesu Kristo Asɔre ne N’ahennie no mu wɔ ahoɔden sene berɛ biara. Sion rehyɛ ne ntadeɛ fɛfɛ, na Kristo ahennie rennhwease da. Awurade hwɛ kwan sɛ yɛbɛyɛ den wɔ yɛn adansedie mu, yɛahyɛ gyidie ma, na yɛasakyera dabiara. Yɛn Agyenkwa Yesu Kristo de ne ho to yɛn mu biara so sɛ ɔbɛtoa N’adwuma so.

Nkɔmhyɛni Joseph Smith kaa sɛ, “Anuanom, yɛrenkɔ so wɔ asɛm kɛseɛ a ɛte saa mu?” Nanso, esiane sɛ saa nkrasɛm yi fa mo, mmabunu titire ho nti, mɛpɛ sɛ mede asɛmfua mmabunu di dwuma sene sɛ mede anuanombedi dwuma. Wayɛ krado?

“[Mmabunu], yɛre nkɔ so wɔ asɛm kɛseɛ a ɛte saa mu? Monkɔ mo anim na ɛnnyɛ mo akyi. Monnya akokoɔduro, [mmabunu]; na monkɔso, nkɔdi nkunim! Momma mo akoma nni ahurisie, na ɛnnya anigye pii.”

M’ani sɔ woakwankyerɛ ne wo mmɔdemmɔ a wɔahyira so. Medi m’adanseɛ a ɛmu yɛ den sɛ Onyankopɔn afrɛɛ wɔn sɛ wɔmfa N’ahennie nkɔ anim, nsi hɔ, na wɔnni anim wɔ asase so nnɛ. Na ɛbɛyɛ saa daa. Awurade bɛkɔ so apaw Ne nkoa daa. Wɔ Yesu Kristo din mu, amen.