Sɛdeɛ Obiara Bɛnya Nkɔsoɔ

Sɛ Yesu Kristo Asɔre a Ɛwɔ hɔ ma Nna a Ɛdi Akyire Ahotefoɔ mma, a wɔde Nyameyɛ no mu baako ahyira yɛn no, yɛbɛtumi anya ɔkyerɛkyerɛfoɔ kɛseɛ no mmoa. Sunsum Kronkron no nim nneɛma nyinaa di nokorɛ ho adanseɛ na “ɔbɛkae [yɛn] nneɛma nyinaa.” Titenani Nelson taa kasa faa hia a ɛhia sɛ yɛtie Awurade nne ho. Ɔkyerɛɛ yɛn sɛdeɛ yɛbɛsrɛ Sunsum Kronkron no akwankyerɛ na ɔsrɛɛ yɛn mpɛn pii sɛ yɛmma yɛn honhom mu ahoɔden nyɛ kɛse na yɛnnya adiyisɛm.

Ɛnnɛ meto nsa frɛ wo sɛ dwene Sunsum Kronkron asɛdeɛ ho, titire deɛ ɛfa asɛmpa no sua ne ne kyerɛ wɔ efie ne asɔre mu. Wɔnam gyedie mpaebɔ ne sɛdeɛ yɛbɔ mmɔden sɛ yɛbɛbɔ bra a ɛfata saa akyɛdeɛ a ɛsom boɔ yi so na ɛde Sunsum Kronkron no ma. Asɔre no nkanyan akwankyerɛ nwoma Teaching in the Savior’s Way kyerɛ nnyinasoɔ ahoroɔ a Awurade ahyehyɛ a ɛboa frɛ Sunsum Kronkro no nkɛntɛnsoɔ.

Saa nnyinasosɛm yi baako ne sɛ yɛfrɛ nsiyɛ adesua. Tete no, ebia yɛfaa adekyerɛ sɛ ɛyɛ akwanya ma ɔwofoɔ anaa ɔkyerɛkyerɛni sɛ yɛfrɛ Honhom no ba yɛn ankasa ahoboa mu na afei yɛne mmɔfra anaa asɔremma kyɛ deɛ yɛasua, a wɔn asɛdeɛ ne sɛ wɔtie. Nanso deɛ ɛyɛ adwuma yie ne berɛ a yɛn, sɛ adesuafoɔ, nso yɛ ahoboa ne berɛ a akyerɛkyerɛfoɔ yɛ adesua suahunu a ɛgyina ankasa adiyisɛm so de kɔ yɛn akoma ne adwene mu tee. Afei, sɛ wɔma yɛn akwanya sɛ yɛnkyɛ deɛ yɛn ankasa resua ne deɛ ɛfiri Sunsum Kronkron no hɔ a, yɛboa yɛn ho yɛn ho ma wɔkyerɛ yɛn na yɛnya nkɔsoɔ. Sɛ yɛde asɛmpa nnyinasosɛm yɛ adwuma a, Honhom no sane di adanseɛ wɔ nokorɛ a wɔyɛ ho.

Sɛdeɛ ɛteɛ wɔ nneɛma nyinaa mu no, Yesu Kristo yɛ nhwɛsoɔ kann. Wafrɛ yɛn mu biara sɛ yɛnyɛ nsiyɛ adesuafoɔ na yɛnni yɛn ankasa adansedie so. Ɔfrɛɛ N’asuafoɔ no sɛ wɔnsiesie wɔn ho nsua adeɛ, na wɔnkyɛ deɛ wɔresua no, na wɔnyɛ no wɔ gyedie mu. Ɔbɔɔ mpaeɛ maa wɔn, hunuu deɛ ɔsoro de adom wɔn, tiee wɔn, na ɔboa maa wɔhunuu sɛ wɔdɔ wɔn hia wɔn.

Sɛ akyerɛkyerɛfoɔ no, yɛbɛtumi de yɛn ani asi osuani no nkɔsoɔ so kɛse, sɛ wɔbɛnya wɔn ahiadeɛ, na yɛaboa wɔn ama wɔanya nkwa nna nyinaa asuafoɔyɛ honhom su. Sɛ adesuafoɔ no, sɛ yɛde yɛn pɛ yɛ adwuma wɔ adesua nhyehyɛeɛ mu a, yɛda no adi kyerɛ Sunsum Kronkron no sɛ yɛwɔ ɔpɛ sɛ Ɔkyerɛkyerɛ yɛn.

Meda ɔkyerɛkyerɛni bi a ɔkaa sɛ menyɛ osuani papa ase. Berɛ a mehyɛɛ kolegyi ase no, meyɛɛ mfomsoɔ dwenee sɛ sukuu yɛ biribi a yɛkɔ mu na ɛma yɛn kwan ma yɛdi agorɔ. Da bi, mekenkanee krataa bi a na matwerɛ wieeɛ no, me kyerɛkyerɛni ka kyerɛɛ me sɛ ɔhunu sɛ meyɛ badwemma a mewɔ akyɛdeɛ. Na mennim deɛ ɛkyerɛ mpo. Ɔkaa sɛ sɛ mesi m’adwene pi a, mɛtumi ayɛ osuani papa. Na saa adwene no mmaa me tiri mu da. Ne dɔ, nkuranhyɛ, ne ne frɛ ahodoɔ sesaa me nwomasua na ɛhyiraa m’abrabɔ kɛse.

Nnyinasosɛm foforɔ a ɛwɔ Sunsum Kronkron no frɛ mu ne sɛ yɛkyerɛkyerɛ nokorɛ nkyerɛkyerɛ. Yei kyerɛ sɛ yɛn asɛmpa sua ne nkyerɛkyerɛ no hyɛ Onyankopɔn asɛm mu na yɛnhaahane yɛn ani anaa yɛmmɔ yɛn tirim nka deɛ Awurade nnaa no adi. Mmom, yɛde yɛn ani si daapem asɛmpa nnyinasosɛm a ɛhia so, deɛ ɛma Honhom no kwan ma ɔdi nokorɛ ho adanseɛ. Bio, yɛdi Agyenkwa no nhwɛsoɔ so. Ɔkaa sɛ, “Me nkyerɛkyerɛ nyɛ me dea, na deɛ ɔsomaa me no dea.”

Nokorɛ nkyerɛkyerɛ wɔ twerɛnsɛm ne ɛnnɛ nkɔmhyɛfoɔ nkyerɛkyerɛ mu. Awurade afotuo sɛ yɛnsua twerɛnsɛm no sɛ ankoroankoro ne mmusua na yɛnkɔ asɔre nnawɔtwe biara nkɔsua N’asɛmpa no ma nhyehyɛeɛ nwanwasoɔ a yɛde sua Ne nkyerɛkyerɛ na yɛte Ne nne. Yɛsua twerɛnsɛm no te abasɛm, nnyinasosɛm a wɔkyerɛkyerɛ, ne sɛdeɛ yɛde saa nokorɛ yi bɛyɛ adwuma wɔ yɛn abrabɔ mu no ase. Ɛyɛ nhyira sɛ yɛbɛnya twerɛnsɛm no wɔ yɛn nsa ano. Fa no sɛ Adam ne Hawa, Abinadi, anaa mpo Ɔkyerɛkyerɛfoɔ Kɛseɛ Yesu Kristo reba yɛn afie anaa adesua adan mu abɛkyerɛkyerɛ yɛn. Wɔbɛtumi berɛ a yɛma Onyankopɔn asɛm mee yɛn. Sɛ yɛtaa bɔ mmɔden a, yɛbɛtumi asua adeɛ ate aseɛ na yɛadɔ twerɛnsɛm no na yɛanya gyedie sɛ wɔwɔ ɔkra no nsɛmmisa mmuaeɛ.

Mmerɛ bi, ansa na yɛreware no na me yere Kristi repre sɛ ɔbɛte Ɔsoro Agya dɔ nka na wate Ne nhyehyɛeɛ a ɔwɔ ma no ase. Berɛ a ɔbɔɔ mpaeɛ pɛɛ akwankyerɛ no, atenka bi baa sɛ ɔnkɔ institute, enti ɔtwerɛɛ ne din wɔ Apam Foforɔ ho adesua bi mu. Sɛdeɛ ne institute kyerɛkyerɛfoɔ kyerɛ firii twerɛnsɛm no mu, mpo sɛdeɛ ɔsɔɔ wɔn mu kyerɛ sɛdeɛ ɔdɔ Onyankopɔn asɛm no fa. Berɛ a ɔkɔeɛ no, Sunsum Kronkron no kasa kyerɛɛ no sɛ biribi wɔ twerɛnsɛm no mu a ɔhia. Ne kyerɛkyerɛfoɔ no dɔ ma twerɛnsɛm no ne Sunsum Kronkron no nkanyan maa no nyaa ɔpɛ sɛ ɔbɛhyɛ aseɛ asua Onyankopɔn asɛm no anibere so—a ɛbɛyɛɛ daa adwensakyera ne atuhoakyɛ akwantuo a ɛmu dɔ.

Ne korakora, sɛdeɛ Rekyerɛkyerɛ wɔ Agyenkwa no Kwan so susu no, ɛwɔ sɛ yɛn adekyerɛ ne adesua si Yesu Kristo so. Yɛbɛtumi ataa akasa bebree afa Ne ho wɔ nidie kwan so na yɛahwehwɛ akwanya de akyerɛ adansedie, anisɔ, ne ɔdɔ ama No. Ɛmfa ho ne tebea no, sɛ yɛkae No a, yɛbɛtumi anya “ne Honhom aka [yɛn] ho.”

Ɛkwan baako a yɛbɛfa so ayɛ Yesu Kristo ade titire wɔ yɛn adekyerɛ mu ne sɛ yɛbɛsi Ne nhwɛsoɔ a ɛyɛ pɛ, asɛmpa nyinaa tɔfabɔ no so dua. Mpo sɛ wɔammɔ Ne din pɔtee wɔ twerɛsɛm mu a, yɛbɛtumi aka sɛ Ɔno ne nnyinasosɛm a wɔrekyerɛkyerɛ no nhwɛsoɔ. Yɛbɛtumi abisa tiawa sɛ, “Wobɛtumi akae berɛ bi a Yesu Kristo yɛɛ saa nnyinasosɛm yi nhwɛsoɔ?”

Yɛbɛtumi nso de yɛn ani asi Ne so berɛ a yɛresua N’abodin, dwumadie, ne Ne su ahoroɔ, ahwehwɛ asua ɛnyɛ deɛ Ɔyɛeɛ nko.ara na mmom yɛbɛte deɛ Ɔyɛ ase yie. Nhwɛsoɔ, sɛ yɛresua adwensakyera ho nnyinasosɛm a, ɛho hia sɛ yɛte sɛdeɛ yɛsakyera ase. Ɛho bɛhia nso sɛ yɛkae deɛ Yesu Kristo ayɛ ama adwensakyera aba mu na yɛate deɛ adwensakyera kyerɛkyerɛ fa Ne ho, fa Ne su ne suban ankasa ho ase. Deɛn na yɛn adwensakyera akwanya ka fa Ne dɔ, aboterɛ, ne ahummɔborɔ, Ne gyedie a ɔwɔ wɔ yɛn soro tumi ho, ɔpɛ a Ɔwɔ sɛ ɔbɛpata ama yɛn bɔne, ne anigyeɛ Ɔnya wɔ bɔnefakyɛ mu? Na yɛrete N’abodin ahoroɔ—te sɛ Onyankopɔn Adwammaa, Odimafoɔ, ne Ɔyaresafoɔ—ase boa ma yɛhunu sɛ adwensakyera yɛ Ne frɛ a ɔde te yɛn ho, sesa yɛn, na ɔsa yɛn yareɛ. Yɛde yɛn adwene resi deɛ Ɔyɛ maa yɛn ne deɛ ɛka fa deɛ Ɔyɛ so bɛtumi aboa yɛn ma “yɛanya adwensakyera mu gyedie.”

Ɛtɔ da a, ebia yɛrenhunu Agyenkwa no su a wɔakyerɛkyerɛ wɔ twerɛnsɛm mu no prɛkopɛ. Nhwɛsoɔ, sɛ worekenkan fa Nephi a ɔreyɛ kodoɔ ho a, yɛn adwene bɛtumi akɔ Nephi nko ara so. Nanso sɛ yɛde yɛn adwene si Agyenkwa no so a ɛbɛtumi aboa ama yɛahunu sɛ saa twerɛtohɔ yi wɔankora sɛ ɛbɛkyerɛ yɛn Nephi kɛseyɛ na mmom Onyankopɔn kɛseyɛ—sɛ Ɔma yɛn ahoɔden ma yɛde di Ne mmaransɛm so na ɔgye yɛn firi ahohia mmerɛ mu.

Yɛbɛtumi nso de yɛn adwene asi Yesu Kristo dwumadie titire wɔ Ɔsoro Agya anigyeɛ nhyehyɛeɛ a ɛwie pɛyɛ no so. Ɛbɛtumi asesa yɛn abrabɔ ama yɛahunu yɛn tebea ahoroɔ wɔ Onyankopɔn ɛnniawieeɛ nhyehyɛeɛ no mu kyɛn sɛ yɛbɛhunu nhyehyɛeɛ no wɔ yɛn honam fam tebea mu. Asɛmpa no nyɛ ahwehwɛdeɛ ahoroɔ mmoano; ɛyɛ asɛm papa a ɛkyerɛ sɛ Yesu Kristo dii bɔne ne owuo so nkonim Ɛyɛ N’adom nwanwasoɔ a yɛnam yɛne Onyankopɔn apam a yɛdi soɔ no nya so na yɛbɛtumi atena ase anigyeɛ mu seesei na yɛasiesie yɛn ho ama yɛn Agya a ɔwɔ Soro wɔ ɛnniawieeɛ mu. Berɛ a yɛresua sɛ yɛbɛhunu Ɔsoro Agya ne Agyenkwa no wɔ twerɛnsɛm no mu no, yɛbɛba abɛhunu Wɔn yie na yɛbɛtaa ahunu Wɔn dɔ ne nkɛntɛnsoɔ tumi kɛse wɔ yɛn ankasa abrabɔ mu.

Berɛ biara mɛkae Honhom a metee nka sɛ aberanteɛ berɛ a yɛn kyerɛkyerɛfoɔ kyerɛkyerɛɛ Agyenkwa no abrabɔ mu nna a ɛtwa toɔ no. Ɔboaa yɛn ma yɛhunuu nsɛm a ɛsisii wɔ abansoro dan no mu, Getsemane, Golgotha, ne Ɔbodan a hwee nni mu no ho mfasoɔ. Ɔkyɛɛ n’aseda a ɛmu dɔ ma Agyenkwa no ne ɔpɛ mmorosoɔ a ɔwɔ sɛ ɔbɛdi N’akyi. Na ne nkyerɛkyerɛ no yɛ ɔfrɛ sɛ Sunsum Kronkron no bɛdi Yesu Kristo ho adanseɛ. Na honhom a metee wɔ saa adesua dan no mu no maa me gyedie mu dɔeɛ na me dɔ ne m’anisɔ ma Agyenkwa no yɛɛ kɛse. Saa ɔkyerɛkyerɛfoɔ no nkɛntɛnsoɔ aka me ho me nkwa nna nyinaa. Sɛdeɛ ɔkyerɛkyerɛfoɔ foforɔ kaeɛ no, “Yɛbɛtumi de ne gyedie gya no aka yɛn ho hye.

Wɔ yɛn afie ne Asɔre nhyiamu ahoroɔ mu no, sɛ yɛde yɛn adwene si Yesu Kristo so, kyerɛkyerɛ Ne nkyerɛkyerɛ, na yɛde nsiyɛ sua a, yɛfrɛ Sunsum Kronkron no ma ɔhyɛ yɛn gyedie wɔ Yesu Kristo mu den na ɔboa ma yɛbɛyɛ sɛ Ɔno kɛse, a ɛyɛ asɛmpa nkyerɛkyerɛ ne ne sua nyinaa botaeɛ.

Meda akyerɛkyerɛfoɔ a wɔwɔ m’abrabɔ mu, firi awofoɔ pa ne mpɔtam akannifoɔ ne akyerɛkyerɛfoɔ so kɔsi mmarima ne mmaa a wɔafrɛ wɔn sɛ wɔnkyerɛkyerɛ na wɔnni adanseɛ wɔ aponnwa yi so, a wɔboa yɛn ma yɛhunu na yɛdi Yesu Kristo akyi ase. M’ani sɔ Sunsum Kronkron, Ɔkyerɛkyerɛfoɔ papa no. Ɛnam Sunsum Kronkron no so na menim sɛ Ɔsoro Agya dɔ yɛn na ɔwɔ nhyehyɛeɛ a ɛyɛ pɛ ma yɛn; sɛ Yesu ne Kristo, wiase Agyenkwa ne Dimafoɔ no, na wɔasan de N’asɛmpa no ne N’Asɔre aba. Mede anisɔ di saa nneɛma yi ho adanseɛ wɔ Yesu Kristo din mu, amen.