“නුඹ මට ප්‍රේම කරනවා ද?”

ටයිබීරියස් මුහුදේ දී පේත්‍රැස් සහ මරණයෙන් නැවත නැගිටි ස්වාමින්වහන්සේ අතර සිදු වූ උපදේශාත්මක හුවමාරුවේදී, ස්වාමින්වහන්සේ කෙරෙහි අපගේ ප්‍රේමය පෙන්විය හැකි ක්‍රම පිළිබඳව අපි ඉගෙන ගන්නවා.

“යේසුස්වහන්සේ සීමොන් පේත්‍රැස්ට කථාකොට: යොහන්ගේ පුත්‍රවූ සීමොන්, මොවුන්ට වඩා නුඹ මට ප්‍රේම කරනවාදැයි ඇසූ සේක. ඔහු: එසේය, ස්වාමිනි; මා ඔබට ආදරේ ඇති බව ඔබ දන්නා සේකැයි උන්වහන්සේට කීවේය.”

ස්වාමින්වහන්සේ විසින් මෙම විමසීමේ දී මතු කරන ප්‍රධාන ප්‍රශ්නය තමයි “මොවුන්ට වඩා නුඹ මට ප්‍රේම කරනවා ද?” යන ප්‍රශ්නය. අපි ස්වාමින්වහන්සේව “මොවුන්ට” වඩා ඉහළින් තබන විට අපි උන්වහන්සේට අපගේ ප්‍රේමය පෙන්වනවා ඒවගේම “මොවුන්” කියන්නෙ අපගේ ජීවිතයේ වැදගත්ම බලපෑමෙන් උන්වහන්සේව අස්ථානගත කරන ඕනෑම අයෙකු, ඕනෑම ක්‍රියාකාරකමක් හෝ ඕනෑම දෙයක් වෙන්න පුළුවන්.

අපට අවශ්‍ය හෝ ඉටු කර ගැනීමට අවශ්‍ය සියල්ල කිරීමට දිනක්, සතියක්, මාසයක් හෝ අවුරුද්දක් තුළ ප්‍රමාණවත් කාලයක් කිසිදා ලැබෙන්නේ නෑ. ලෞකිකත්වය පිළිබඳ පරීක්ෂණයේ කොටසක් තමයි අපගේ සදාකාලික යහපත සඳහා වඩාත්ම වැදගත් දේ සඳහා කාලය නැමති වටිනා සම්පත භාවිතා කිරීම සහ අඩු වැදගත්කමක් ඇති දේවල් අත්හැරීම.

සභාපති රසල් එම්. නෙල්සන් මෙසේ පැවසුවා: “අප සෑම කෙනෙකුටම ඇති ප්‍රශ්නය … එක හා සමානයි. … ඔබේ ජීවිතයේ වැදගත්ම බලපෑම දෙවියන්වහන්සේ වීමට සැලැස්වීමට ඔබ කැමති ද? උන්වහන්සේගේ වචන, උන්වහන්සේගේ ආඥා, සහ උන්වහන්සේගේ ගිවිසුම් වලට ඔබ දිනපතා කරන දෙයට බලපෑම් කිරීමට ඔබ ඉඩදෙනවා ද? උන්වහන්සේගේ හඬට වෙනත් ඕනෑම දෙයකට වඩා ප්‍රමුඛතාවය ලබාදීමට ඔබ ඉඩදෙනවා ද? අනෙක් සෑම අභිලාෂයකට වඩා ප්‍රමුඛස්ථානය ගැනීමට උන්වහන්සේට අවශ්‍ය ඕනෑම දෙයකට ඉඩදීමට ඔබ කැමති ද? ඔබගේ කැමැත්ත උන්වහන්සේ තුළ ගිල්වා තැබීමට ඔබ කැමති ද?” අපි දෙවියන්වහන්සේව අපගේ ප්‍රමුඛතාවය කර ගන්නා විට, අපි අපගේ අනුගාමිකත්වය සහ දෙවියන්වහන්සේ කෙරෙහි ඇති ප්‍රේමය පෙන්නුම් කරනවා.

පේත්‍රැස් සහ ගැලවුම්කරුවාණන් අතර මෙම සාකච්ඡාවේම ඊළඟ පදයෙන්, ස්වාමින්වහන්සේ අපගේ ප්‍රේමයේ ප්‍රකාශන හඳුනා ගන්නා තවත් ආකාරයක් ගැන අපි ඉගෙන ගන්නවා: “[ස්වාමින්වහන්සේ] නැවතත් දෙවෙනි වරක්, යොහන්ගේ පුත්‍ර වූ සීමොන්, නුඹ මට ප්‍රේම කරනවාදැයි ඔහුගෙන් ඇසූ සේක? ඔහු: එසේය, ස්වාමිනි; මා ඔබට ආදරේ ඇති බව ඔබ දන්නා සේකැයි උන්වහන්සේට කීවේය. උන්වහන්සේ ඔහුට කථා කොට, මාගේ බැටළුවන් පෝෂණය කරපන්නැයි කී සේක.”

අපි ස්වර්ගික පියාණන්වහන්සේගේ දරුවන්ට සේවය කරන විට, සවන් දෙන විට, ප්‍රේම කරන විට, ඔවුන්ව ඔසවන විට හෝ දේවසේවය කරන විට අපි උන්වහන්සේ කෙරෙහි අපගේ ප්‍රේමය පෙන්වනවා. එම සේවාව විනිශ්චයකින් තොරව අන් අයව සැබවින්ම දැකීම තරම් සරල වෙන්න පුළුවන්. දහම සහ ගිවිසුම් 76 වන කොටසේ දී, ස්වර්ගීය මහිමයක් උරුම කර ගන්නා අයගේ චරිතය පිළිබඳ කෙටි දර්ශනයක් අපට ලැබෙනවා: “ඔවුන්ව දකින ආකාරයටම ඔවුන් දකින්නෝය, තවද ඔවුන්ව දන්නා ආකාරයටම දැනගන්නෝය.” ඔවුන් අන් අයව දකින්නේ දෙවියන්වහන්සේ ඔවුන්ව දකින ආකාරයටයි, උන්වහන්සේ ඔවුන්ව දකින්නේ ඔවුන්ට හැකි ආකාරයට, මහිමාන්විත දිව්‍ය විභවයකින් යුතුවයි.

මගේ ධර්මදූත සේවය නිම වී මම ආපසු නිවසට පැමිණි පසු, මම සහ මගේ සහෝදරයන් නව යොවුන් වියේදී ආරම්භ කළ තණකොළ කැපීමේ ව්‍යාපාරය මම භාර ගත්තා. මම මගේ විශ්වවිද්‍යාල අධ්‍යාපනයත් එක්කත් කාර්යබහුල වුණා. වසන්ත සමයේ එක් සතියක, තද වැස්ස සහ අවසන් විභාග ළඟ ළඟ එන නිසා මම තැති අරන් සිටියා, ඉතින් වත්තේ වැඩ මට මග හැරුණා.

සතියේ මැද අහස පැහැදිලි වූ අතර, පන්තිවලින් පසු වත්තේ වැඩ කිරීමට මම සැලසුම් කළා. නමුත් මම ගෙදර එන විට මගේ ට්‍රක් රථය සහ උපකරණ තිබුණේ නැහැ. කුතුහලයෙන් යුතුව, මම සැලසුම් කර ඇති වතු නැරඹීමට ගියා; ඒ සෑම එකක්ම දැනටමත් අලංකාර ලෙස කපා තිබුණා. සැලසුම් කර තිබූ අවසාන මිදුලේ දී, මගේ මල්ලි ඒ තණකොළ කපන යන්ත්‍රය පිටුපසින් ඇවිදින ආකාරය මම දැක්කා. ඔහු මාව දැකලා හිනාවෙලා අත වැනුවා. කෘතඥතාවයෙන් පිරී ඉතිරී ගිය මම ඔහුව වැළඳගෙන ස්තූති කළා. ඔහුගේ අර්ථවත් සේවාව ඔහු කෙරෙහි ඇති මගේ ආදරය සහ පක්ෂපාතිත්වය ගැඹුරින් ශක්තිමත් කළා. එකිනෙකාට සේවය කිරීම දෙවියන්වහන්සේට සහ උන්වහන්සේගේ ආදරණීය පුත්‍රයාණන්ට අපගේ ප්‍රේමය පෙන්විය හැකි නොවරදින ක්‍රමයක්.

කෘතවේදී හදවතක් තිබීමෙන් ද අපි දෙවියන්වහන්සේ කෙරෙහි අපගේ ප්‍රේමය ප්‍රකාශ කරනවා. ස්වාමින්වහන්සේ මෙසේ පැවසුවා, “තවද සියලු දේවලදී උන්වහන්සේගේ හස්තය ඇති බව පිළිනොගන්නන් හැර, … කිසිවකින් මනුෂ්‍යයා දෙවියන්වහන්සේව අමනාප කරන්නේ නැත.” අපගේ ජීවිතයේ සෑම යහපත් දෙයකම උල්පත උන්වහන්සේ බව පිළිගැනීමෙන් අපි දෙවියන්වහන්සේ කෙරෙහි අපගේ ප්‍රේමය පෙන්වනවා.

මම සමාගමක් ආරම්භ කළ මුල් දිනවල, මගේ ව්‍යාපාරික සහකරු සහ මම වැදගත් රැස්වීම්වලට පෙර ස්වර්ගික පියාණන්ගේ උපකාරය ඉල්ලා ඉතා ඕනෑකමින් යාච්ඤා කළා. නැවත නැවතත්, දෙවියන්වහන්සේ අපගේ යාච්ඤාවලට පිළිතුරු දුන් අතර, අපගේ රැස්වීම් හොඳින් සිදු වුණා. අපි උදව් ඉල්ලීමට ඉක්මන් වූ නමුත් ස්තූති කිරීමට ප්‍රමාද වූ බව එක් රැස්වීමකින් පසු, මගේ ව්‍යාපාරික සහකරු පෙන්වා දුන්නා. එතැන් සිට, අපගේ සාර්ථකත්වයන් සඳහා ස්වාමින්වහන්සේගේ හස්තය හඳුනා ගනිමින්, කෘතඥතාවයේ අවංක යාච්ඤා ඉදිරිපත් කිරීම අපි පුරුද්දක් කර ගත්තා. අපි දෙවියන්වහන්සේ කෙරෙහි ඇති අපගේ ප්‍රේමය “කෘතඥතාවේ ආකල්පයකින්” පෙන්වනවා.

ස්වර්ගික පියාණන්වහන්සේට සහ උන්වහන්සේගේ ආදරණීය පුත්‍රයාණන්ට අපගේ ප්‍රේමය පෙන්විය හැකි තවත් ක්‍රමයක් තමයි, උන්වහන්සේලාට කීකරු වීමට තෝරා ගැනීම. ස්වාමින්වහන්සේ මෙසේ ප්‍රකාශ කර තිබෙනවා: “නුඹලා මට ප්‍රේම කරනවා නම් මාගේ ආඥා රක්ෂා කරන්නහුය.” මේ ආකාරයේ කීකරුකම අන්ධ හෝ අනිවාර්ය දෙයක් නොවේ, නමුත් එය ප්‍රේමයේ අවංක සහ කැමැත්තෙන් ප්‍රකාශ කිරීමක්. ස්වර්ගයේ සිටින පියාණන්වහන්සේට උවමනා වන්නේ අප කීකරු වීම උවමනා කිරීමයි. තමාරා ඩබ්. රූනියා සහෝදරිය එය “ප්‍රේමණීය කීකරුකමක්” ලෙස හැඳින්නුවා. ඇය මෙසේ පැවසුවා “අපට තවමත් පරිපූර්ණ කීකරුකමක් නොමැති වුනත්, අපි උන්වහන්සේට ප්‍රේම කරන නිසා, නැවත නැවතත් උන්වහන්සේ තුළ රැඳී සිටීමට තෝරා ගනිමින්, ප්‍රේමණීය කීකරුකමක් ඇති කර ගැනීමට අපි දැන් උත්සාහ කරනවා.

ස්වර්ගික පියාණන්වහන්සේ අපට උන්වහන්සේව තෝරා ගැනීමට උවමනා ලෙස තෝරාගැනීමේ නිදහස ලබා දුන්නා. උන්වහන්සේගේ කාර්යය සහ මහිමය අපගේ සදාකාල ජීවනය ගෙන ඒම පමණක් නොවේ නමුත් අපගේ ලොකුම ආශාව වන උන්වහන්සේ වෙත නැවත යාමේ බලාපොරොත්තුව ද එයට ඇතුළත් වෙනවා. කෙසේ වෙතත්, උන්වහන්සේ කිසි විටෙකත් අපට කීකරු වීමට බල කරන්නේ නෑ. “Know This, That Every Soul Is Free” යන ගීතිකාවේ අපි මෙසේ ගායනා කරනවා:

ධර්මදූත ප්‍රමිතියක් නිසා පමණක් නොවේ, නමුත් නිහතමානීව උන්වහන්සේව නියෝජනය කිරීමට තෝරා ගැනීමෙන් ස්වාමින්වහන්සේ කෙරෙහි ඔවුන්ගේ ප්‍රේමය පෙන්වීමට ඔවුන්ට අවශ්‍ය වූ නිසා, කීකරු වීමට තෝරාගත් බොහෝ ධර්මදූතයින්ගෙන් ධර්මදූත නායකයන් ලෙස, මගේ බිරිඳ ක්‍රිස්ටිනා සහ මම ආභාෂය ලැබුවා.

වැඩිහිටි ඩේල් ජී. රෙන්ලන්ඩ් මෙසේ පැවසුවා: “දෙවියන්වහන්සේ දෙමාපියෙක් හැටියට ඉලක්කය වන්නේ උන්වහන්සේගේ දරුවන් හරි දේ කිරීම නොවේ; ඒ උන්වහන්සේගේ දරුවන් හරි දේ කිරීමට තෝරාගෙන අවසානයේ උන්වහන්සේගේ හා සමාන වීමටයි.” උන්වහන්සේට අවශ්‍ය වූයේ අප කීකරු වීම පමණක් නම්, උන්වහන්සේ අපගේ හැසිරීම් වලට බලපෑම් කිරීම සඳහා ක්ෂණික විපාක සහ දඬුවම් භාවිතා කරන්නට තිබුණා.” අපි දෙවියන්වහන්සේට කීකරු වී උන්වහන්සේව අනුගමනය කිරීමට තෝරා ගන්නා විට අපි උන්වහන්සේට ඇති අපගේ ප්‍රේමය පෙන්වනවා.

අපි උන්වහන්සේලාව අපගේ ජීවිතවල මුල් තැනට තබන විට, එකිනෙකාට සේවය කරන විට, උන්වහන්සේලාගෙන් ලැබෙන සෑම ආශිර්වාදයක්ම කෘතඥපූර්වකව පිළිගන්නා විට, උන්වහන්සේලාට කීකරු වී අනුගමනය කිරීමට තෝරා ගන්නා විට, අපගේ ස්වර්ගික පියාණන්වහන්සේ සහ අපගේ ගැලවුම්කරුවාණන් විසින් උන්වහන්සේලා කෙරෙහි අපගේ ප්‍රේමයේ ප්‍රකාශන හඳුනා ගන්නවා.

අපි සෑම කෙනෙකුම සැබවින්ම දෙවියන්වහන්සේගේ දරුවෙකු බවත්, උන්වහන්සේ අපට පරිපූර්ණ ලෙස ප්‍රේම කරන බවත් මම සාක්ෂි දරනවා. අපි හඳුනා ගන්නා සහ තේරුම් ගන්නා ආකාරයෙන් උන්වහන්සේගේ ප්‍රේමය අපි අත්විඳිනවාට උන්වහන්සේ ආශා කරන බවට මම සාක්ෂි දරනවා. තේරුම් ගැනීමට අසීරු සුන්දර දේ තමයි, අපි උන්වහන්සේ කෙරෙහි අපගේ ප්‍රේමය පෙන්වන විට, උන්වහන්සේ අප කෙරෙහි දක්වන ප්‍රේමය අපි තවත් ගැඹුරින් අත්විඳියි. යේසුස් ක්‍රිස්තුස්වහන්සේගේ නාමයෙන්, ආමෙන්.